Yoˇhaˬ 9
9
Dehꞈ le ngeh neh myaˆ behꞈ behꞈ-eu tsawˇ haˬ tiˬ gʼaˬ-ahˇ myaˆ nuiˆ bi mawˇ laˇ-euˬ
1Yeˬsuˇ iˇ luꞈ ngeh, dehꞈ le ngeh neh myaˆ behꞈ behꞈ-eu tsawˇ haˬ tiˬ gʼaˬ-ahˇ ya mawˇ-euˬ meh. 2Aˬ yawꞈ-euˬ zaˬ lahˇ deuˬ aˬ yawꞈ-ahˇ ehˇ-eu, “Saˬ laˬ-oˇ, aˬ yawꞈ dehꞈ le ngeh neh myaˆ behꞈ behꞈ-eu teu aˬ suˇ gʼaˬ-euˬ iˬ baˇ baˬ da neh gʼeh ta. Aˬ yawꞈ-euˬ iˬ baˇ baˬ da neh nga loˇ. Aˬ da aˬ ma-euˬ iˬ baˇ baˬ da neh nga loˇ.”
3Yeˬ suˇ ehˇ-eu, “Aˬ yawꞈ myaˆ behꞈ behꞈ-eu kʼoeˇ-aˬ, aˬ yawꞈ-euˬ iˬ baˇ baˬ da neh maˬ ngeuˇ-a. Aˬ da aˬ ma euˬ iˬ baˇ baˬ da neh kʼawꞈ maˬ ngeuˇ-a. Miˬyehˇ tehꞈ-ehˇ mˇ nya-eu zahˬ leˇ paˬ-ehˇ gʼeh-eu jeˬ-ahˇ aˬ cawˬ ya mawˇ ni aˬ yawꞈ myaˆ behꞈ behꞈ-eu jeˬ pyeuꞈ-eu meh. 4Uˬ ciꞈ maˬ ciꞈ le kʼoeˇ keuˆ ni, ngaˬ-ahˇ kʼehˇ gʼeh leꞈ-euˬ gʼaˬ-euˬ gaˇ-ahˇ aˬ dui ya mˇ meh. Tsawˇ haˬ tiˬ gʼaˬ-iˬ gaˇ maˬ mˇ nya-eu uˬ ciꞈ aˇ yamˬ keuˆ le luꞈ meh. 5Ngaˇ miˇ tsaˬ kʼoeˇ taˆ kʼaˇ jawˇ kʼoeˇ keuˆ ni, miˇ tsaˬ-euˬ yaw shehꞈ pyeuꞈ-eu ma.”
6Yeˬsuˇ kʼoeˇ loꞈ-ehˇ ehˇ gʼaˬ-awˇ, miˇ tsaˬ-ahˇ duˬ kʼaˬ kʼa shehˬ-awˇ shaˬ jehˆ laˆ pyeuꞈ-euˬ meh. Kʼoeˇ naˇ, tsawˇ haˬ kʼoeˇ gʼaˬ-euˬ myaˆ nuiˆ-ahˇ lehꞈ nehˬ-awˇ, 7“Siˇlamˬ lah-ahˇ myaˆ duꞈ puꞈ shawˇ-iˇ-awˬ” lehˇ ehˇ nehˬ-euˬ meh. (Siˇlamˬ lehˇ ehˇ-eu dawˬ tsuiꞈ-aˬ, ‘Kʼehˇ gʼeh-euˬ’ lehˇ ehˇ mawꞈ-eu meh.) Kʼoeˇ ngeh, tsawˇ haˬ kʼoeˇ gʼaˬ myaˆ duꞈ puꞈ shawˇ-iˇ-awˇ, myaˆ nuiˆ mawˇ laˇ-awˇ gʼoꞈ laˇ-euˬ meh.
8Aˬ yawꞈ-ahˇ nymˇ kaˬ taꞈ-eu deuˬ hawˇ-eu, yaw beh aˬ yawꞈ hawˬ shaˇ shaˇ dzaˬ ngeh mawˇ-euˬ tsawˇ haˬ deuˬ, “Tsawˇ haˬ heu gʼaˬ nuiˇ nuiˇ-ehˇ hawˬ shaˇ shaˇ dzaˬ-euˬ kʼoeˇ gʼaˬ maˬ ngeuˇ nga loˇ” lehˇ ehˇ-eu meh.
9Tiˬ paˆ na deuˬ-aˬ, “Ngeuˇ ngaˇ” lehˇ ehˇ-eu meh. Ehˇ kʼawꞈ, tiˬ paˆ na deuˬ-aˬ, “Maˬ ngeuˇ nga. Aˬ yawꞈ-ahˇ duˇ leˇ-eu yawˬ gʼaˬ yawˬ nga” lehˇ ehˇ-eu meh. Kʼoeˇ ngeh, tsawˇ haˬ kʼoeˇ gʼaˬ aˬ yawꞈ maꞈ-ahˇ, “Hawˬ shaˇ shaˇ dzaˬ-euˬ kʼoeˇ gʼaˬ ngaˇ ma” lehˇ ehˇ duˬ nehˬ-euˬ meh.
10Aˬ yawꞈ maꞈ aˬ yawꞈ-ahˇ ehˇ-eu, “Nawˇ aˬ joˆ-ehˇ jahˇ-awˇ myaˆ nuiˆ paˇ mawˇ laˇ teˬ.”
11Aˬ yawꞈ ehˇ-eu, “Yeˬsuˇ lehˇ myahˇ-euˬ gʼaˬ neh shaˬ jehˆ ui cuiˆ jahˇ-awˇ, ngaˬ-euˬ myaˆ nuiˆ-ahˇ lehꞈ nehˬ laꞈ-awˇ, ‘Siˇlamˬ lah-ahˇ myaˆ duꞈ puꞈ shawˇ-iˇ-awˬ’ lehˇ ehˇ nehˬ laꞈ-euˬ meh. Ngaˇ iˇ-awˇ myaˆ duꞈ puꞈ-euˬ nehˬ-ehˇ, tiˬ poˆ tehꞈ-ehˇ myaˆ nuiˆ mawˇ laˇ-euˬ miˇ-a.”
12Aˬ yawꞈ maꞈ aˬ yawꞈ-ahˇ “Aˬ yawꞈ aˬ gaˇ jawˇ ta” lehˇ naˇ haˬ ngeh, “Ngaˇ maˬ siˬ” lehˇ aˬ yawꞈ ehˇ kʼoꞈ nehˬ-euˬ meh.
Myaˆ nuiˆ mawˇ laˇ-euˬ tsawˇ haˬ kʼoeˇ gʼaˬ-ahˇ Paˬliˬsehˇ deuˬ pyehˆ tseˇ naˇ haˬ-euˬ
13Kʼoeˇ naˇ, yaw beh myaˆ behꞈ behꞈ-euˬ tsawˇ haˬ kʼoeˇ gʼaˬ-ahˇ, Paˬliˬsehˇ deuˬ jawˇ gaˇ aˬ yawꞈ maꞈ sheuˬ gʼeh-euˬ meh. 14Yeˬsuˇ neh shaˬ jehˆ jahˇ-awˇ aˬ yawꞈ-euˬ myaˆ nuiˆ mawˇ laˇ nya ni laˆ taˬ nehˬ-euˬ aˇ nah kʼoeˇ nah-aˬ, Jawˇ nah pyeuꞈ-eu meh. 15Aˬ joˆ-ehˇ jahˇ-awˇ myaˆ nuiˆ mawˇ laˇ-euˬ gaˇ kawˆ, tsawˇ haˬ kʼoeˇ gʼaˬ-ahˇ Paˬliˬsehˇ deuˬ paˇ naˇ haˬ-euˬ meh. Aˬ yawꞈ ehˇ-eu, “Aˬ yawꞈ ngaˬ-euˬ myaˆ nuiˆ-ahˇ shaˬ jehˆ lehꞈ nehˬ laꞈ-awˇ, ngaˇ myaˆ duꞈ puꞈ shawˇ-iˇ ngeh, myaˆ nuiˆ mawˇ laˇ-euˬ ma.”
16Paˬliˬsehˇ tsawˇ haˬ tiˬ paˆ na deuˬ ehˇ-eu, “Myaˆ nuiˆ mawˇ laˇ ni jahˇ nehˬ-euˬ kʼoeˇ gʼaˬ Miˬyehˇ jawˇ gaˇ neh oe-euˬ tsawˇ haˬ maˬ ngeuˇ luꞈ-a. Aˬ jeˬ miˇ neh ehˇ naˇ, Jawˇ nah-ahˇ ya lah ya daw-eu zahˇ sahˇ kʼoꞈ-ahˇ maˬ caw teh ni, maˬ mˇ kʼmˬ-eu jeˬ aˬ yawꞈ mˇ-euˬ nga.”
Ehˇ kʼawꞈ, tiˬ paˆ na deuˬ ehˇ-eu, “Iˬ baˇ zaˬ tiˬ gʼaˬ heu naˆ naˆ-ehˇ zahˬ lehˇ paˬ-ehˇ gʼeh-eu jeˬ aˬ joˆ-ehˇ mˇ nya ta.” Aˬ yawꞈ maꞈ kʼoeˇ loꞈ-ehˇ tiˬ gʼaˬ tiˬ jeˬ noeˬ-eu meh.
17Kʼoeˇ naˇ, Paˬliˬsehˇ kʼoeˇ deuˬ tsawˇ haˬ kʼoeˇ gʼaˬ-ahˇ heu loꞈ-ehˇ paˇ naˇ haˬ-euˬ meh. “Nawˬ-euˬ myaˆ nuiˆ mawˇ laˇ ni aˬ yawꞈ neh jahˇ nehˬ laꞈ-euˬ meh lehˇ nawˇ ehˇ-eu-aˬ, aˬ yawꞈ-ahˇ nawˇ aˬ joˆ-ehˇ noeˬ-eu nya.”
Tsawˇ haˬ kʼoeˇ gʼaˬ ehˇ-eu, “Aˬ yawꞈ-aˬ, Miˬyehˇ gʼaˇ duˬ ngehˬ dah-eu tsawˇ haˬ meh.”
18Yuˇdaˆ tsawˇ haˬ aˬ yuiꞈ aˬ tsu deuˬ-aˬ, tsawˇhaˬ kʼoeˇ gʼaˬ-euˬ aˬ da aˬ ma-ahˇ kuˇ-awˇ maˬ naˇ haˬ duˬ kʼoeˇ keuˆ ni, yaw beh aˬ yawꞈ myaˆ behꞈ behꞈ-awˇ nymˬ-mˇ mawˇ laˇ-euˬ meh lehˇ ehˇ gaˇ maˬ jah-a. 19Aˬ yawꞈ maꞈ aˬ yawꞈ nyaꞈ-ahˇ naˇ haˬ-eu, “Aˬ yawꞈ naw nyaꞈ-euˬ zaˬ ngeuˇ ma loˇ. Aˬ yawꞈ dehꞈ le ngeh neh myaˆ behꞈ behꞈ-eu meh lehˇ naw nyaꞈ ehˇ-eu meh. Toˆ-ehˇ ngeuˇ naˇ, nymˬ-mˇ aˬ yawꞈ aˬ joˆ-ehˇ myaˆ nuiˆ paˇ mawˇ laˇ nya taˬ.” 20Aˬ yawꞈ-euˬ aˬ da aˬ ma ehˇ-eu, “Nga nyaꞈ-euˬ zaˬ ma. Dehꞈ le ngeh neh myaˆ behꞈ meh lehˇ nga nyaꞈ siˬ duˬ-eu ma. 21Ehˇ kʼawꞈ, nymˬ-mˇ aˬ yawꞈ aˬ joˆ-ehˇ jahˇ-awˇ myaˆ nuiˆ paˇ mawˇ laˇ-euˬ gaˇ kawˆ hawˇ-eu, aˬ suˇ gʼaˬ neh myaˆ nuiˆ laˆ dahˇ nehˬ-euˬ gaˇ kawˆ nga nyaꞈ maˬ siˬ nya nya. Aˬ yawꞈ-ahˇ naˇ haˬ-awˬ. Aˬ yawꞈ huiˬ laˇ-euˬ meh. Aˬ yawˇ yawꞈ ja mehˬ nehˬ laꞈ nya tehꞈ-a.” 22Aˬ da aˬ ma kʼoeˇ nyiˬ gʼaˬ Yuˇdaˆ tsawˇ haˬ aˬ yuiꞈ aˬ tsu deuˬ-ahˇ guˆ-eu miˇ neh kʼoeˇ loꞈ-ehˇ ehˇ-eu meh. Aˬ jeˬ miˇ neh ehˇ naˇ, Yeˬsuˇ-ahˇ Meˬsiˇya meh lehˇ kʼaˇ jah-eu tsawˇ haˬ deuˬ-ahˇ, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ maˬ bi taꞈ ni teh dzeh-eu gʼaˇ duˬ, Yuˇdaˆ tsawˇ haˬ aˬ yuiꞈ aˬ tsu deuˬ neh bawˬ tsehˆ taˬ-euˬ meh. 23Kʼoeˇ miˇ neh, “Aˬ yawꞈ huiˬ laˇ-euˬ meh. Aˬ yawꞈ-ahˇ naˇ haˬ-awˬ” lehˇ, aˬ yawꞈ nyaꞈ ehˇ-eu meh.
24Dehꞈ le ngeh neh myaˆ behꞈ behꞈ-euˬ tsawˇ haˬ kʼoeˇ gʼaˬ-ahˇ aˬ yawꞈ maꞈ tiˬ poˆ paˇ kuˇ-awˇ ehˇ nehˬ-eu, “Nawˇ dawˇ coe ni ehˇ ma lehˇ Miˬyehˇ mehˬ shi kamˬ-awˬ. Nawˬ-ahˇ myaˆ nuiˆ mawˇ laˇ ni jahˇ nehˬ-euˬ kʼoeˇ gʼaˬ iˬ baˇ zaˬ meh lehˇ nga maꞈ siˬ nya ma.”
25Tsawˇ haˬ kʼoeˇ gʼaˬ ehˇ-eu, “Aˬ yawꞈ iˬ baˇ zaˬ ngeuˇ-eu maˬ ngeuˇ-eu kʼoeˇ law nmˇ-aˬ ngaˇ maˬ siˬ. Ngaˇ siˬ nya-eu-aˬ, yaw beh ngaˇ myaˆ behꞈ behꞈ-euˬ kʼawꞈ, nymˬ-mˇ myaˆ nuiˆ mawˇ laˇ-euˬ heu tiˬ hmˬ tehꞈ ma.”
26Aˬ yawꞈ maꞈ ehˇ-eu, “Aˬ yawꞈ nawˬ-ahˇ aˬ jeˬ jahˇ nehˬ laꞈ taˬ. Nawˇ myaˆ behꞈ behꞈ-eu mawˇ nya laˇ ni aˬ joˆ-ehˇ laˆ taˬ nehˬ laꞈ taˬ.”
27Tsawˇ haˬ kʼoeˇ gʼaˬ ehˇ-eu, “Ngaˇ naw maꞈ-ahˇ ehˇ nehˬ gʼa-euˬ ma tawˇ. Aˬ jeˬ miˇ neh paˇ gaˬ poˆ mawꞈ-eu nya. Naw maꞈ jiˇ aˬ yawꞈ-euˬ zaˬ lahˇ geuꞈ mawꞈ-eu nya loˇ.”
28Kʼoeˇ ngeh, aˬ yawꞈ maꞈ aˬ yawꞈ-ahˇ yaˬ kʼehˇ yaˬ-awˇ ehˇ-eu, “Nawˇ-aˬ, tsawˇ haˬ kʼoeˇ gʼaˬ-euˬ zaˬ lahˇ ngaˇ. Nga maꞈ-aˬ, Moˇseˬ-euˬ zaˬ lahˇ ma. 29Moˇseˬ-ahˇ Miˬyehˇ dawˬ ngehˬ cawˬ-euˬ nga maꞈ siˬ nya ma. Ehˇ kʼawꞈ, tsawˇ haˬ kʼoeˇ gʼaˬ aˬ gaˇ neh doˆ le-euˬ jiˇ nga maꞈ maˬ siˬ.”
30Myaˆ nuiˆ mawˇ laˇ-euˬ tsawˇ haˬ kʼoeˇ gʼaˬ ehˇ-eu, “Naw maꞈ ngehˬ-eu dawˬ teu dawˬ-ahˇ ngaˇ zahˬ dui dui leˇ nya. Aˬ yawꞈ ngaˬ-ahˇ myaˆ nuiˆ bi mawˇ laˇ ngeh keuˆ ni, aˬ yawꞈ aˬ gaˇ neh oe-euˬ naw maꞈ maˬ siˬ nya nya lehˇ la. 31Iˬ baˇ zaˬ-euˬ shaˇ dawˬ-ahˇ Miˬyehˇ maˬ naˇ haˬ-a lehˇ aˬ dui siˬ nya ma. Ehˇ kʼawꞈ, aˬ yawꞈ-ahˇ yaw zeu baw-awˇ, aˬ yawꞈ-euˬ nui kʼahˇ mˇ-eu deuˬ-euˬ shaˇ dawˬ-ahˇ naˇ haˬ nehˬ meh. 32Mˬ beh miˇ beh ngeh neh iˬ nah keuˆ ni, myaˆ behꞈ behꞈ-eu tsawˇ haˬ-ahˇ myaˆ nuiˆ mawˇ laˇ ni jahˇ nehˬ nya-eu tsawˇ haˬ tiˬ gʼaˬ-iˬ maˬ gaˬ haw-aˬ siˬ. 33Tsawˇ haˬ kʼoeˇ gʼaˬ Miˬyehˇ jawˇ gaˇ neh oe-euˬ maˬ ngeuˇ law nmˇ-aˬ, tiˬ jeˬ-iˬ maˬ jahˇ nya-aˇ.”
34Aˬ yawꞈ maꞈ aˬ yawꞈ-ahˇ ehˇ-eu, “Nawˇ loꞈ-ehˇ gʼeh-eu iˬ baˇ laꞈ kʼoeˇ dehꞈ le-awˇ huiˬ laˇ-euˬ tsawˇ haˬ tiˬ gʼaˬ nga maꞈ-ahˇ paˇ mehˬ paˇ tsoˆ-eu gʼeh te loˇ.” Kʼoeˇ naˇ, aˬ yawꞈ-ahˇ Yuˇdaˆ tsawˇ haˬ-euˬ uˬ duˬ tahˬ nymˇ-ahˇ maˬ bi taꞈ ni teh dzeh nehˬ-euˬ meh.
Saꞈ laˇ paw myaˆ behꞈ behꞈ-eu
35Tsawˇ haˬ kʼoeˇ gʼaˬ-ahˇ teh dzeh nehˬ-euˬ gaˇ kawˆ Yeˬsuˇ ya gaˬ ngeh, aˬ yawꞈ-ahˇ poˆ mawˇ-awˇ, “Tsawˇ haˬ-euˬ Zaˬmaˇ-ahˇ nawˇ jah ma loˇ” lehˇ naˇ haˬ-euˬ meh.
36Tsawˇ haˬ kʼoeˇ gʼaˬ ehˇ-eu, “Saˬ laˬ-oˇ, aˬ yawꞈ-ahˇ ngaˇ jah nya ni aˬ yawꞈ aˬ suˇ gʼaˬ-a lehˇ tiˬ poˆ ehˇ nehˬ laꞈ-awˬ.”
37Yeˬsuˇ aˬ yawꞈ-ahˇ ehˇ nehˬ-eu, “Nawˇ aˬ yawꞈ-ahˇ tahˬ puˬ gʼaˬ-euˬ meh. Nymˬ-mˇ nawˬ-ahˇ ngehˬ cawˬ luꞈ-eu gʼaˬ aˬ yawꞈ meh.”
38Kʼoeˇ ngeh jawˇ, tsawˇ haˬ kʼoeˇ gʼaˬ “Sahˬ paˬ-oˇ, ngaˇ jah ma” lehˇ ehˇ-awˇ, Yeˬsuˇ-euˬ mehˬ shi pawˬ tsuiꞈ pawˬ dmˬ dmˬ-euˬ meh.
39Yeˬsuˇ ehˇ-eu, “Myaˆ behꞈ deuˬ-ahˇ myaˆ nuiˆ bi mawˇ laˇ-awˇ, myaˆ nuiˆ mawˇ luꞈ-eu deuˬ myaˆ behꞈ bi behꞈ-iˇ ni yaˇ kʼaˬ daˇ-eu gʼaˇ duˬ, miˇ tsaˬ heu kʼoeˇ taˆ ngaˇ oe-euˬ ma.”
40Kʼoeˇ gaˇ jawˇ-eu Paˬliˬsehˇ tiˬ paˆ na deuˬ aˬ yawꞈ kʼoeˇ loꞈ-ehˇ ehˇ gaˇ ya gaˬ ngeh, “Nga maꞈ-ahˇ myaˆ behꞈ nga lehˇ nawˇ ehˇ mawꞈ-eu maˬ ngeuˇ-eu paˬ” lehˇ ehˇ-eu meh.
41Yeˬsuˇ ehˇ-eu, “Naw maꞈ myaˆ behꞈ law nmˇ-aˬ, iˬ baˇ maˬ ahˇ-aˇ. Ehˇ kʼawꞈ, naw maꞈ myaˆ nuiˇ mawˇ nya ma lehˇ yawˬ haˇ yawˬ ha ehˇ-eu miˇ neh, iˬ baˇ ahˇ-eu meh.”
දැනට තෝරාගෙන ඇත:
Yoˇhaˬ 9: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.