Yoˇhaˬ 8
8
Aˬ cawˬ nehˬ-ehˇ bahˬ-euˬ zaˬ miˬ zaˬ-ahˇ nyehꞈ-euˬ
1Yeˬsuˇ-aˬ, Saˬloˬ gawˬ jawˬ-ahˇ le-euˬ meh. 2Yawˬ nah yawˬ uˬ shawˬ yaw naꞈ-ehˇ Uˬ duˬ tahˬ nymˇ nymˇ ma-ahˇ aˬ yawꞈ le-euˬ meh. Tsawˇ haˬ dawˬ tawˆ luꞈ aˬ yawꞈ jawˇ gaˇ uiˬ laˇ-awˇ, aˬ yawꞈ nuiˇ-awˇ aˬ yawꞈ maꞈ-ahˇ mehˬ nehˬ tsoˆ nehˬ-euˬ meh. 3Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ, aˬ cawˬ nehˬ-ehˇ bahˬ-euˬ zaˬ miˬ zaˬ tiˬ gʼaˬ sheuˬ ahˇ laꞈ-awˇ, dawˬ tawˆ luꞈ mehˬ shi bi yawꞈ-euˬ meh. 4Aˬ yawꞈ maˬ Yeˬsuˇ-ahˇ ehˇ-eu, “Saˬ laˬ-oˇ, zaˬ miˬ zaˬ heu gʼaˬ aˬ cawˬ nehˬ-ehˇ bahˬ luꞈ gaˇ nyehꞈ-euˬ ma. 5Heu loꞈ-ehˇ gʼeh-eu zaˬ miˬ zaˬ-ahˇ kʼaˬ lo neh ya biˬ sehꞈ meh lehˇ, aˬ duiˬ-euˬ Zahˇ dawˬ kʼoꞈ dawˬ laꞈ kʼoeˇ Moˇseˬ neh ehˇ taˬ-euˬ jaˆ-eu meh. Nawˇ aˬ joˆ-ehˇ ehˇ nmˇ.” 6Aˬ yawꞈ maꞈ Yeˬsuˇ-ahˇ lahˇ ju kʼmˇ paꞈ-awˇ, yaˇ kʼaˬ ja mawꞈ-eu miˇ neh, kʼoeˇ loꞈ-ehˇ ehˇ-eu meh. Ehˇ kʼawꞈ, Yeˬsuˇ awˆ kʼoꞈ taˬ-awˇ, laꞈ noeˇ neh miˇ tsaˬ-ahˇ kawˆ boꞈ kawˆ boꞈ-ehˇ jawˇ-eu meh.
7Aˬ yawꞈ maꞈ kʼoeˇ gaˇ yawꞈ-awˇ aˬ yawꞈ-ahˇ maˬ naˬ leˇ ni naˇ haˬ-eu miˇ neh, aˬ yawꞈ tuˇ laˇ-awˇ, “Naw maꞈ laꞈ kʼoeˇ iˬ baˇ maˬ mˇ haw-euˬ gʼaˬ aˬ yawꞈ-ahˇ kʼaˬ lo biˬ dawꞈ dawꞈ-awˬ” lehˇ ehˇ nehˬ-euˬ meh. 8Kʼoeˇ loꞈ-ehˇ ehˇ gʼaˬ ngeh, aˬ yawꞈ paˇ awˆ kʼoꞈ-awˇ, miˇ tsaˬ-ahˇ kawˆ boꞈ kawˆ boꞈ-ehˇ paˇ jawˇ-euˬ meh. 9Dawˬ kʼoeˇ dawˬ-ahˇ aˬ yawꞈ maꞈ ya gaˬ ngeh, aˇ kʼoꞈ kʼawˆ dzehˬ-eu deuˬ jeˬ huˬ huˬ-awˇ, tiˬ gʼaˬ saˇ-iˬ tiˬ gʼaˬ gʼoꞈ doˆ-iˇ jiˇ-euˬ meh. Yeˬsuˇ tiˬ gʼaˬ tehꞈ-ehˇ kʼoeˇ gaˇ jawˇ yaꞈ-awˇ, zaˬ miˬ zaˬ kʼoeˇ gʼaˬ kʼoeˇ gaˇ yawꞈ luꞈ-eu meh. 10Yeˬsuˇ awˆ tuˇ laˇ-awˇ zaˬ miˬ zaˬ kʼoeˇ gʼaˬ-ahˇ ehˇ-eu, “Aˬ yawꞈ maꞈ aˬ gaˇ iˇ jiˇ taˬ. Nawˬ-ahˇ iˬ baˇ poˆ-eu tsawˇ haˬ kʼoeˇ deuˬ tiˬ gʼaˬ-iˬ maˬ paˇ jawˇ meh loˇ.”
11Aˬ yawꞈ ehˇ-eu, “Sahˬpaˬ-oˇ, tiˬ gʼaˬ-iˬ maˬ paˇ jawˇ meh.”
Yeˬsuˇ ehˇ-eu, “Ngaˇ jiˇ nawˬ-ahˇ iˬ baˇ maˬ poˆ. Gʼoꞈ-iˇ-awˬ. Ehˇ kʼawꞈ, iˬ baˇ taˬ paˇ mˇ de.”
Yeˬsuˇ-aˬ miˇ tsaˬ-euˬ yaw shehꞈ meh.
12Kʼoeˇ naˇ, Paˬliˬsehˇ deuˬ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Ngaˇ-aˬ, miˇ tsaˬ-euˬ yaw shehꞈ ma. Ngaˬ-euˬ mehˬ nah kʼaˇ caw teh-eu tsawˇ haˬ-aˬ, dehꞈ-eu saꞈ laˇ yaw shehꞈ za-awˇ, yaw zahˇ laꞈ kʼoeˇ maˬ paˇ cah-aˇ.”
13Paˬliˬsehˇ deuˬ aˬ yawꞈ-ahˇ ehˇ-eu, “Nymˬ-mˇ poˆ jawˇ-aˬ, nawˇ yawˬ ha gaˇ kawˆ yawˬ ha saˇ kiˇ kamˬ-eu tehꞈ ngaˇ. Nawˬ neh kʼaˇ ehˇ-euˬ jeˬ yaw duˬ yaw ciˇ maˬ baw nga.”
14Yeˬsuˇ ehˇ-eu, “Ngaˇ ngaˬ-euˬ gaˇ kawˆ saˇ kiˇ kamˬ-eu nga lehˇ ehˇ kʼawꞈ, ngaˬ neh kʼaˇ ehˇ-euˬ jeˬ tsaˬ ma dawˇ ma. Ngaˇ aˬ gaˇ neh oe-awˇ aˬ gaˇ iˇ luꞈ-eu ngaˇ siˬ nya ma. Naw maꞈ-aˬ, ngaˇ aˬ gaˇ neh oe-awˇ aˬ gaˇ iˇ luꞈ-eu maˬ siˬ nya-a. 15Naw maꞈ shiˬ shaˬ jiˇ nui noeˬ-ahˇ gʼoe-awˇ aˬ cawˬ-ahˇ yaw lehˬ poˆ-eu meh. Ngaˇ-aˬ, aˬ cawˬ-ahˇ yaw lehˬ maˬ poˆ. 16Ehˇ law hawˇ kʼawꞈ, ngaˇ aˬ cawˬ-ahˇ yaw lehˬ nga lehˇ daˇ naˇ, ngaˬ neh daˇ-euˬ kʼoeˇ tsaˬ ma. Aˬ jeˬ miˇ neh ehˇ naˇ, ngaˇ tiˬ gʼaˬ tehꞈ-ehˇ kʼoeˇ loꞈ-ehˇ daˇ-eu maˬ ngeuˇ. Ngaˬ-ahˇ kʼehˇ gʼeh leꞈ-euˬ Aˬda ngaˬ nehˬ-ehˇ jawˇ ma. 17Tsawˇ haˬ nyiˬ gʼaˬ tiˬ jeˬ tehꞈ-ehˇ saˇ kiˇ kamˬ naˇ, saˇ kiˇ kamˬ-euˬ kʼoeˇ tsaˬ meh lehˇ, naw maꞈ-euˬ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ meh. 18Ngaˬ-euˬ gaˇ kawˆ ngaˇ saˇ kiˇ kamˬ-eu ma. Ngaˬ-ahˇ kʼehˇ gʼeh leꞈ-euˬ gʼaˬ pyeuꞈ-eu Aˬda kʼawꞈ, ngaˬ-euˬ gʼaˇ duˬ saˇ kiˇ kamˬ-eu meh.”
19Aˬ yawꞈ maꞈ ehˇ-eu, “Nawˬ da aˬ gaˇ jawˇ ta.”
Yeˬsuˇ ehˇ-eu, “Ngaˬ-ahˇ maˬ ehˇ, ngaˬ Da-ahˇ maˬ ehˇ, naw maꞈ maˬ siˬ nya-a. Naw maꞈ ngaˬ-ahˇ siˬ nya law nmˇ-aˬ, ngaˬ Da-ahˇ kʼawꞈ siˬ nya tehꞈ-a.”
20Yeˬsuˇ-aˬ, Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ daˬ bahˬ keuˆ deuˬ baꞈ taˬ-euˬ lawˆ-ahˇ jawˇ-awˇ, gaˇ kawˆ kʼoeˇ deuˬ mehˬ nehˬ tsoˆ nehˬ-euˬ meh. Ehˇ kʼawꞈ, tsawˇ haˬ tiˬ gʼaˬ-iˬ aˬ yawꞈ-ahˇ maˬ nyehꞈ-a. Aˬ jeˬ miˇ neh ehˇ naˇ, aˬ yawꞈ-euˬ aˇ yamˬ maˬ keuˆ laˇ-euˬ miˇ neh meh.
Ngaˇ le gaˇ naw maꞈ maˬ le nya-a
21Yeˬsuˇ aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Ngaˇ le ma. Naw maꞈ ngaˬ-ahˇ poˆ tehꞈ-a. Ehˇ kʼawꞈ, naw maꞈ-euˬ iˬ baˇ laꞈ kʼoeˇ naw maꞈ ya shiˇ tehꞈ-a. ngaˇ le-eu jawˇ duˬ-ahˇ naw maꞈ maˬ le nya-a.”
22Kʼoeˇ ngeh, Yuˇdaˆ tsawˇ haˬ aˬ yuiꞈ aˬ tsu deuˬ ehˇ-eu, “Aˬ yawꞈ le-eu jawˇ duˬ-ahˇ aˬ dui maˬ le nya-aˇ lehˇ ehˇ-eu teu, aˬ yawꞈ yawˬ haˇ yawˬ ha sehꞈ ma lehˇ ehˇ mawꞈ law hawˇ maˬ siˬ.”
23Yeˬsuˇ ehˇ-eu, “Naw maꞈ-aˬ, laꞈ oˆ miˇ tsaˬ zaˬ meh. Ngaˇ-aˬ, mˬ taˆ-euˬ tsawˇ haˬ ma. Naw maꞈ-aˬ miˇ tsaˬ heu-ahˇ taꞈ-eu tsawˇ haˬ meh. Ngaˇ-aˬ, miˇ tsaˬ heu-ahˇ maˬ taꞈ. 24Kʼoeˇ miˇ neh, naw maꞈ-euˬ iˬ baˇ laꞈ kʼoeˇ naw maꞈ ya shiˇ meh lehˇ ngaˇ ehˇ-eu ma. ‘Ngaˇ ehˇ luꞈ-eu kʼoeˇ gʼaˬ ngaˇ meh’ lehˇ naw maꞈ maˬ jah naˇ, naw maꞈ yawˬ ha-euˬ iˬ baˇ laꞈ kʼoeˇ ya shiˇ tehꞈ-a.”
25Aˬ yawꞈ maꞈ ehˇ-eu, “Nawˇ aˬ suˇ gʼaˬ te.”
Yeˬsuˇ ehˇ-eu, “Aˇ dahˬ beh ngeh neh naw maꞈ-ahˇ ngaˇ ehˇ nehˬ gʼaˬ-euˬ ma. 26Ngaˇ naw maꞈ gaˇ kawˆ ehˇ paˬ-ehˇ gʼawˬ mya ni jaˆ ma. Naw maꞈ-ahˇ dehˬ paˬ-ehˇ gʼawˬ mya ni jaˆ ma. Ngaˬ-ahˇ kʼehˇ gʼeh leꞈ-euˬ gʼaˬ-aˬ, yaw tsaˬ yaw dawˇ meh. Aˬ yawꞈ neh kʼaˇ ehˇ nehˬ laꞈ-euˬ jeˬ tehꞈ-ehˇ miˇ tsaˬ zaˬ deuˬ-ahˇ ngaˇ ehˇ nehˬ-eu ma.”
27Yeˬsuˇ aˬ yawꞈ maꞈ-ahˇ Aˬda gaˇ kawˆ ja mehˬ luꞈ-eu meh lehˇ aˬ yawꞈ maꞈ maˬ gʼoˆ siˬ nya-a. 28Kʼoeˇ miˇ neh, aˬ yawꞈ maꞈahˇ aˬ yawꞈ ehˇ nehˬ-eu, “Tsawˇ haˬ-euˬ Zaˬmaˇ-ahˇ laꞈ yaꞈ kʼoeˇ taˆ taꞈ tehꞈ-awˇ ka tuˇ ngeh nah, “Ngaˇ ehˇ luꞈ-eu kʼoeˇ gʼaˬ ngaˇ law hawˇ ngaˇ leh naw maꞈ siˬ nya laˇ tehꞈ-a. Kʼoeˇ ngeh jawˇ, ngaˇ ngaˬ-euˬ nui noeˬ tiˬ jeˬ-iˬ maˬ mˇ ni, Aˬda neh kʼaˇ bi ngehˬ kʼaˇ bi tmˇ-euˬ jeˬ tehꞈ-ehˇ ngaˇ ngehˬ-eu tmˇ-eu ngaˇ lehˇ, naw maꞈ ya siˬ duˬ tehꞈ-a. 29Ngaˬ-ahˇ kʼehˇ gʼeh leꞈ-euˬ gʼaˬ ngaˬ nehˬ-ehˇ jawˇ ma. Aˬ yawꞈ ngaˬ-ahˇ maˬ byehˇ dzeh nehˬ laꞈ-a. A jeˬ miˇ neh ehˇ naˇ, aˬ myah luꞈ aˬ yawꞈ nui ma tsaˬ-eu jeˬ tehꞈ-ehˇ ngaˇ mˇ-eu ma.”
30Yeˬsuˇ kʼoeˇ loꞈ-ehˇ ehˇ gaˇ ya gaˬ-euˬ tsawˇ haˬ gʼawˬ mya ni aˬ yawꞈ-ahˇ jah laˇ-euˬ meh.
Yaw tsaˬ yaw dawˇ jeˬ naw maꞈ-ahˇ bi buˬ-iˇ tehꞈ-a
31Kʼoeˇ naˇ, Yeˬsuˇ-ahˇ jah-eu tsawˇ haˬ deuˬ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Naw maꞈ ngaˬ neh mehˬ nehˬ tsoˆ nehˬ-euˬ dawˬ deuˬ-ahˇ naˇ haˬ geuꞈ naˇ, maˇ maˇ ni ngaˬ-euˬ zaˬ lahˇ ma. 32Yaw tsaˬ yaw dawˇ jeˬ-ahˇ naw maꞈ siˬ nya laˇ-awˇ, yaw tsaˬ yaw dawˇ jeˬ naw maꞈ-ahˇ bi buˬ-iˇ tehꞈ-a.”
33Aˬ yawꞈ maꞈ ehˇ-eu, “Nga maꞈ Aˬbyaˬhaˬ-euˬ zaˬ deuˬ uˆ deuˬ ma. Aˬ cawˬ-euˬ zaˬ kʼaˆ kʼawꞈ tiˬ jawˇ-iˬ maˬ geuꞈ haw-aˬ. ‘Naw maꞈ ya buˬ-iˇ tehꞈ-a’ lehˇ nawˇ ehˇ-eu teu, aˬ jeˬ ehˇ mawꞈ te.”
34Yeˬsuˇ ehˇ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Iˬ baˇ kʼaˇ mˇ-eu tsawˇ haˬ-aˬ, iˬ baˇ-euˬ zaˬ kʼaˆ meh. 35Zaˬ kʼaˆ-aˬ, nymˇ sahˇ deuˬ nehˬ-ehˇ aˬ myah luꞈ jawˇ-eu maˬ ngeuˇ-a. Ehˇ kʼawꞈ, aˬ li-aˬ, nymˇ sahˇ deuˬ nehˬ-ehˇ aˬ myah luꞈ jawˇ-eu meh. 36Zaˬ maˇ neh naw maꞈ-ahˇ bi buˬ-iˇ laꞈ naˇ, naw maꞈ aˬ diˇ buˬ-iˇ-euˬ tehꞈ-a. 37Naw maꞈ-aˬ, Aˬbyaˬhaˬ-euˬ zaˬ deuˬ uˆ deuˬ meh lehˇ ngaˇ siˬ nya ma. Ehˇ kʼawꞈ, naw maꞈ ngaˬ-ahˇ sehꞈ-eu lehˇ leh jeh-eu meh. Aˬ jeˬ miˇ neh ehˇ naˇ, ngaˬ neh mehˬ nehˬ tsoˆ nehˬ-euˬ jeˬ-ahˇ naw maꞈ maˬ ha geuꞈ-a. 38Ngaˬ Da neh bi mawˇ laꞈ-euˬ jeˬ-ahˇ ngaˇ ja-eu ma. Ehˇ kʼawꞈ, naw maꞈ-aˬ, naw maꞈ-euˬ aˬ da deuˬ neh ehˇ mehˬ nehˬ-euˬ jeˬ mˇ-eu meh.”
39Aˬ yawꞈ maꞈ Yeˬsuˇ-ahˇ ehˇ-eu, “Nga maꞈ-euˬ aˬ da-aˬ, Aˬbyaˬhaˬ ma.”
Yeˬsuˇ ehˇ-eu, “Naw maꞈ maˇ maˇ ni Aˬbyaˬhaˬ-euˬ zaˬ ma lehˇ ngeuˇ naˇ, aˬ yawꞈ neh mˇ-euˬ jeˬ naw maꞈ mˇ tehꞈ-a. 40Ngaˬ neh kʼaˇ mˇ-euˬ-aˬ, Miˬyehˇ neh bi ehˇ-euˬ yaw tsaˬ yaw dawˇ jeˬ naw maꞈ-ahˇ ehˇ nehˬ-euˬ tehꞈ ma. Ehˇ kʼawꞈ, naw maꞈ ngaˬ-ahˇ sehꞈ-eu lehˇ leh jeh-eu meh. Aˬbyaˬhaˬ-aˬ, teu loꞈ-ehˇ gʼeh-eu jeˬ maˬ mˇ-aˬ. 41Naw maꞈ-aˬ, naw maꞈ-euˬ aˬ da mˇ-euˬ loꞈ-ehˇ mˇ-eu meh.
Aˬ yawꞈ maꞈ ehˇ-eu, “Nga maꞈ-euˬ aˬ da-aˬ, Miˬyehˇ tiˬ gʼaˬ tehꞈ ma. Nga maꞈ maˇ maˇ ni aˬ yawꞈ-euˬ zaˬ ma. Jawˇ zaˇ shaˬ leˇ-awˇ dehꞈ le-euˬ zaˬ deuˬ maˬ ngeuˇ.”
42Yeˬsuˇ ehˇ-eu, “Miˬyehˇ-aˬ, maˇ maˇ ni naw maꞈ-euˬ Aˬ da ma lehˇ ngeuˇ naˇ, naw maꞈ ngaˬ-ahˇ gaˬ tehꞈ-a. Miˬyehˇ jawˇ gaˇ neh ngaˇ oe taˬ-euˬ ma. Ngaˬ-euˬ nui noeˬ oe-euˬ maˬ ngeuˇ. Aˬ yawꞈ neh kʼehˇ gʼeh leꞈ-euˬ meh. 43Ngaˇ ehˇ gaˇ aˬ jeˬ miˇ neh naw maꞈ maˬ gʼoˆ shaw nya ta lehˇ naw maꞈ siˬ nya ma loˇ. Ngaˬ-euˬ dawˬ-ahˇ naw maꞈ maˬ naˇ haˬ nahˇ-eu miˇ neh meh. 44Naw maꞈ-aˬ, naw maꞈ-euˬ aˬ da nehˬ sahˬ paˬ-euˬ zaˬ deuˬ pyeuꞈ-awˇ, naw maꞈ-euˬ aˬ da-euˬ nui kʼahˇ mehˬ nah caw teh mawꞈ-eu meh. Aˬ yawꞈ-aˬ, aˇ dahˬ beh ngeh neh aˬ cawˬ-ahˇ sehꞈ-euˬ gʼaˬ pyeuꞈ-awˇ, yaw tsaˬ yaw dawˇ paw tiˬ pawꞈ-iˬ maˬ pyawˬ-a. Aˬ jeˬ miˇ neh ehˇnaˇ, aˬ yawꞈ laꞈ kʼoeˇ yaw tsawˬ yaw dawˇ jeˬ maˬ ahˇ-a. Aˬ yawꞈ jaˬ myawꞈ myawꞈ-eu kʼoeˇ-aˬ, kʼoeˇ loꞈ-ehˇ mˇ-eu lehˇ seu le-euˬ miˇ neh meh. Aˬ jeˬ miˇ neh ehˇ naˇ, aˬ yawꞈ-aˬ, jaˬ myawꞈ myawꞈ-eu deuˬ dawˬ tawˆ luꞈ-euˬ aˬ da yaw dzahˇ gʼaˬ meh. 45Ehˇ kʼawꞈ, ngaˇ-aˬ, yaw tsaˬ yaw dawˇ jeˬ ngehˬ-eu ma. Kʼoeˇ miˇ neh, naw maꞈ ngaˬ-ahˇ maˬ jah-eu meh. 46Naw maꞈ ngaˬ-euˬ iˬ baˇ toeˬ ceh nya-eu aˬ suˇ gʼaˬ jawˇ te. Ngaˇ yaw tsaˬ yaw dawˇ jeˬ ngehˬ-eu ngeuˇ naˇ kʼawꞈ, aˬ jeˬ miˇ neh naw maꞈ ngaˬ-ahˇ maˬ jah te. 47Miˬyehˇ jawˇ gaˇ neh oe-euˬ tsawˇ haˬ-aˬ, Miˬyehˇ-euˬ ehˇ dawˬ naˇ haˬ tehꞈ-a. Ehˇ kʼawꞈ, naw maꞈ-aˬ, Miˬyehˇ jawˇ gaˇ neh oe-euˬ maˬ ngeuˇ-a. Kʼoeˇ miˇ neh, Miˬyehˇ-euˬ ehˇ dawˬ naw maꞈ maˬ naˇ haˬ mawꞈ-a.”
Yeˬsuˇ hawˇ-eu Aˬbyaˬhaˬ
48Aˬ yawꞈ maꞈ Yeˬsuˇ-ahˇ ehˇ-eu, “Nawˇ-aˬ, Saˬmaˬliˆ tsawˇ haˬ pyeuꞈ-awˇ, nawˬ-euˬ laꞈ kʼoeˇ nehꞈ uˇ ngaˇ lehˇ nga maꞈ ehˇ-eu maˬ tsaˬ nya loˇ.”
49Yeˬsuˇ ehˇ-eu, “Ngaˇ nehꞈ maˬ uˇ. Ngaˇ ngaˬ Da-ahˇ taˬ huiˬ luꞈ ma. Ehˇ kʼawꞈ, naw maꞈ ngaˬ-ahˇ maˬ taˬ huiˬ-a. 50Ngaˇ-aˬ, aˬ cawˬ neh bi taˬ huiˬ bi taˬ mahˇ-eu jeˬ-ahˇ poˆ luꞈ-eu maˬ ngeuˇ. Ehˇ kʼawꞈ, ngaˬ-ahˇ aˬ cawˬ bi taˬ huiˬ-eu jeˬ-ahˇ poˆ-awˇ, ngaˇ jawˇ paw pyawˬ-awˇ daˇ tsehˆ-eu tiˬ gʼaˬ jawˇ meh. 51Ngaˇ naw maꞈ-ahˇ maˇ jawˆ ni ehˇ nehˬ nyaˇ. Ngaˬ neh mehˬ nehˬ tsoˆ nehˬ-euˬ gaˇ kʼaˇ naˇ haˬ-eu tsawˇ haˬ-aˬ, tiˬ jawˇ-iˬ maˬ shiˇ-aˇ.”
52Aˬ yawꞈ maꞈ aˬ yawꞈ-ahˇ ehˇ-eu, “Nymˬ-mˇ poˆ jawˇ-aˬ, nawˇ nehꞈ uˇ-eu nga maꞈ-ahˇ siˬ duˬ laˇ ngaˇ. Aˬbyaˬhaˬ gʼeh shiˇ-euˬ meh. Miˬyehˇ gʼaˇ duˬ ngehˬ dah-eu deuˬ gʼeh shiˇ jiˇ-euˬ meh. Ehˇ kʼawꞈ, nawˬ neh mehˬ nehˬ tsoˆ nehˬ-euˬ gaˇ kʼaˇ naˇ haˬ geuꞈ-eu tsawˇ haˬ maˬ shiˇ-aˇ lehˇ nawˇ ehˇ-eu nga laˬ. 53Aˬ dui-euˬ aˬ da Aˬbyaˬhaˬ shiˇ-euˬ meh. Nawˇ Aˬbyaˬhaˬ naˆ maˬ tseˇ huiˬ dzehˬ ma lehˇ ehˇ mawꞈ te loˇ. Miˬyehˇ gʼaˇ duˬ ngehˬ dah-eu deuˬ gʼeh shiˇ-euˬ meh. Nawˇ aˬ suˇ gʼaˬ te lehˇ ehˇ-eu gʼeh te.”
54Yeˬsuˇ ehˇ-eu, “Ngaˇ yawˬ haˇ yawˬ ha taˬ huiˬ naˇ, ngaˬ neh taˬ huiˬ-euˬ kʼoeˇ maˬ poeˬ maˬ lawˬ-aˇ. Ngaˬ-ahˇ taˬ huiˬ-eu gʼaˬ-aˬ, ngaˬ Da meh. Naw maꞈ-euˬ Miˬyehˇ ma lehˇ naw maꞈ ehˇ-eu kʼoeˇ gʼaˬ meh. 55Naw maꞈ aˬ yawꞈ-ahˇ maˬ siˬ nya-a. Ehˇ kʼawꞈ, ngaˇ aˬ yawꞈ-ahˇ siˬ nya ma. Aˬ yawꞈ-ahˇ maˬ siˬ nya nya lehˇ ngaˇ ehˇ naˇ, ngaˇ kʼawꞈ naw maꞈ loꞈ-ehˇ jaˬ myawꞈ myawꞈ-eu tsawˇ haˬ-ahˇ duˇ tehꞈ-a. Ngaˇ aˬ yawꞈ-ahˇ a diˇ siˬ nya-awˇ, aˬ yawꞈ-euˬ dawˬ-ahˇ naˇ haˬ geuꞈ luꞈ-eu ma. 56Ngaˇ oe-eu aˇ nah-ahˇ ya mawˇ tehꞈ-a lehˇ noeˬ-awˇ, naw maꞈ-euˬ aˬ da Aˬbyaˬhaˬ laˬ kʼaˬ cehˇ-euˬ meh. Aˬ yawꞈ aˬ diˇ ya mawˇ-awˇ laˬ kʼaˬ ya cehˇ-euˬ meh.”
57Aˬ yawꞈ maꞈ aˬ yawꞈ-ahˇ ehˇ-eu, “Nawˇ ngaˬ tseˇ kʼoꞈ kʼawꞈ maˬ byah laˇ-euˬ gaˇ, aˬ joˆ-ehˇ jahˇ-awˇ Aˬbyaˬhaˬ-ahˇ mawˇ haw teˬ.”
58Yeˬsuˇ ehˇ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Aˬbyaˬhaˬ maˬ dehꞈ le mi naˆ-ehˇ ngaˇ jawˇ-euˬ ma.”
59Kʼoeˇ ngeh, aˬ yawꞈ maꞈ kʼaˬ lo gʼoˆ-awˇ Yeˬsuˇ-ahˇ biˬ-eu lehˇ gʼeh-eu meh. Ehˇ kʼawꞈ, Yeˬsuˇ-aˬ, aˬ yawꞈ-euˬ gʼawˇ mawˇ maˬ bi mawˇ ni Uˬ duˬ tahˬ nymˇ nymˇ ma laꞈ kʼoeˇ neh iˇ doˆ-euˬ meh.
දැනට තෝරාගෙන ඇත:
Yoˇhaˬ 8: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.