SAN MATEO 12

Chojni que vacao Jesús conc̈hinji na trigo ngain nchanho que nchejogaha ni

(Mr. 2.23‑28; Lc. 6.1‑5)

1Ngain tiempo mé ngain ná nchanho que nchejogaha ni, Jesús conixin tti chojni que vacao vatto na ngain canxion jngui que dinga trigo. Co chojni mé venhe na jintta, mexinxin coexinhi na conc̈hinji na canxion ninchjenhe trigo para joine na. 2Co canxion xifariseo vintteguicon xa mé, co vinttendac̈ho xa ngain Jesús:

―Tsjenxin, chojni que c̈hjiho tenchehe na ẍa co jiquininxinha sinchehe ni ẍa ngain tti nchanho que nchejogaha ni.

3Pero Jesús ndac̈ho ngain xa:

―¿Aẍa tsjeha ra tti jitaxin ngain Palabré Dios ixin quehe joinchehe David conixin cain xicompañeroe ná nchanho are vintteguenhe na jintta? 4David conixin cain xicompañeroe mé joixinhi na tti nihngo icha importante co joine na tti niottja que jiquininxinha para rrojine na jehe na, sino que jeho xidána vequininxin vane xa niottja mé. 5¿O ani ẍa tsjeha ra tti jitaxin ley que vayé Moisés que ixin cain xidána de ngain nihngo icha importante ẍonhi tiempo nchejogaha xa ngain tti nchanho que nchejogaha ni, co mé jeha ná cosa jianha para ixin jehe xa? 6Co janha rrindattjo ra que jí nganji ra jaxon ná tti icha importante que nihngo mé. 7Jaha ra ẍa coinxinha ra tti ndac̈ho Dios ngain tti jitaxin Palabré que ndac̈ho: “Janha rinaho que jaha ra tsiaconoehe ra chojni, co nahi ixin sonhe ra coxigo para tsín ra para ixin janha.” Si jaha ra orroquinxin ra mé irronichjaha ra jianha de ixin chojni que ncheha ni ná cosa jianha. 8Janha, tti Xí que joixin de ngajni, cai chonda joachaxin para tti nchanho que nchejogaha ni.

Ná xí que ndadixemadoho ná rá

(Mr. 3.1‑6; Lc. 6.6‑11)

9Cottimeja Jesús sacjoixin de nttiha, co sajoixinhi iná nihngo. 10Co ngaxinhi nttiha tají ná xí que ndadixemadoho ná ra, co xifariseo techonhe xa quehe cosa nchaoha rrojinchehe Jesús para rrocjanguihi xa. Mexinxin joanchiangui xa ngain co ndac̈ho xa:

―¿Ají joachaxin para que sinchexingamehe ni chojni nihi mero ngain tti nchanho que nchejogaha ni?

11Jesús ndac̈ho:

―Si ná de jaha ra chonda ra ná coleco, co si setsingá va ná pozo ngain tti nchanho que nchejogaha ni, ¿atsjiha ra para sigantsjea ra va? ¡Seguro que ján! 12Nchao, janché ndachjenji ni ra, ¿ajeha anto icha rentte ná chojni que ná coleco? Mexinxin jeha jianha para que jehe ni sinchehe ni ná cosa jian ngain tti nchanho que nchejogaha ni.

13Cottimeja ndac̈ho Jesús ngain tti xí que dixemadoho rá:

―Ttinxe rá.

Co are jehe coinxe rá, ojian vittohe ra inchin ra jngo. 14Cottimeja xifariseo mé vinttegac̈hjexin xa de nttiha co coexinhi xa cjoao chó xa ixin queẍén sinchehe xa para nasoenxon xa Jesús.

Tti dindac̈ho profeta Isaías de ixin Jesús

15Are Jesús conohe cain mé, jehe sacjoixin de nttiha co anto tsje chojni rroé na Jesús. Co jehe joinchexingamehe cainxin chojni nihi que vetan. 16Co jehe vaquetonhe na que rrondacheha na icha chojni ixin quensen jehe. 17Jamé, para que joiconhe tti dicjin profeta Isaías que ndac̈ho:

18Yá chonda ra tti nchehe ẍana, tti janha coinchiá,

tti janha anto rinaho, co de ixin jehe, janha anto chahna.

Co sanjo Espíritu Santo ngain jehe,

co jehe tti rrondache cain chojni de cainxin nación quehe jiquininxin sinchehe na.

19Jehe ẍonhi chojni tsetocaho, ni tsoyaotteha chojni,

ni jehe rronichjaha soji ngain chojni ngá nttiha.

20Jehe sincheanimá tti chojni que anto tangui tonhe na

co jion sinchecoenhe chojni que ditticaon nchion,

hasta que cainxin chojni sinchehe na jian inchin jehe tsetonha.

21Co cainxin nación satsoan que ixin jehe tti ttjenguijna chojni.

Are ndac̈ho chojni ixin Jesús chonda joachaxín Satanás

(Mr. 3.19‑30; Lc. 11.14‑23; 12.10)

22Cottimeja joicaohe na Jesús ná xí que c̈hoha vaguicon ni vanichja ixin vechonda xa ná espíritu jianha. Co Jesús joinchexingamehe xí mé para que jehe xa onchao vicon xa co onchao nichja xa. 23Cainxin chojni goan na admirado ngain rato mé, co vinttendac̈ho na:

―Puede jihi tti razé David que rrochonda ẍajeho joachaxin que vechonda rey David.

24Pero are xifariseo vinttequinhi xa jihi, vinttendac̈ho xa:

―Xí jihi dengui xa espíritu jianha pero de ixin joachaxín Satanás, tti rey de cain espíritu mé co tti dinhi Beelzebú cai.

25Jesús oconohe quehe tendac̈ho xifariseo mé, mexinxin jehe ndac̈ho ngain xa:

―Si chojni ngain ná nación chjea na para ttetocaho chó na, nación mé tsonc̈hjenha sé, co si ná rajna o ná nindoha anto tteto na, cai tsonc̈hjenha chojni mé sé. 26Jamé cai si Satanás dengui chó jeho, rroc̈ho que jeho ttetocaho chó co joachaxín tsonc̈hjenha sé, toin ndatsjexin. 27Mexinxin, si inchin ndac̈ho ra jaha ra que janha dehngui espíritu jianha de ixin joachaxín Satanás, si jamé ¿quensen danjo joachaxin ngain chojnia ra para que jehe na dengui na espíritu jianha? Mexinxin jeho chojnia ra tjago que jaha ra jeha ndoa tti jaha ra ẍaxaon ra. 28Pero janha dehngui espíritu jianha de ixin joachaxín Espíritu Santo de Dios, co mé rroc̈ho que tti ttetonha Dios ojí nganji ra.

29’Ixin si ná chojni rinao santsjehe cosé iná xí tsanga de ngaxinhi nchiandoha xa, saho chonda que tsia xa.

30’Tti chojni que ncheẍoxinha tti janha rrinttaha, chojni mé ningaconna janha, co tti c̈hjiha nganji na janha para ttjejo na chojni, mé icha tonchjequé na.

31’Mexinxin janha rrindattjo ra que cain chojni nchao sitjañehe na cain tti jianha que nchehe na co cain tti jianha que nichja na, pero si rronichja na jianha de ixin Espíritu Santo, Dios sinchetjañeha na palabra mé. 32Co quexeho tti rronichja palabra jianha de ixin janha, tti Xí que joixin de ngajni, nchao sitjañehe chojni mé, pero tti chojni que rronichja palabra jianha de ixin Espíritu Santo, Dios ẍonhi tiempo sinchetjañehe chojni mé, ni jaxon ni después que jehe ndasenhe.

Nttattochjoin datsoan ni ntta de ixin ttochjoín ntta

(Lc. 6.43‑45)

33’Si nttattochjoin jian ntta, cai ttochjoin que nchechjian ntta jian tto; co tti nttá ẍonhi ẍé, cai ttochjoin que nchechjian ntta ẍonhi ẍé tto. Mexinxin cada nttattochjoin datsoan ni ntta de ixin ttochjoín ntta. 34¡Jaha ra inchin xenhe conché! ¿Queẍén nchao rronichja ra cosa jian si jaha ra jianha ra? Rroha ni nichja cain tti jí ngain ansén ni. 35Ná chojni jian jehe nichja cosa jian ixin tti jian jí ngain ansén; co ná chojni jianha jehe nichja cosa jianha ixin tti jianha mé jí ngain ansén. 36Co janha rrindattjo ra que are ngain tti nchanho que Dios sinchejuzguehe cainxin chojni, are mé cainxin na chonda que tsjenga na hna de ixin cain palabra que ẍonhi ẍé ndac̈ho na. 37Ixin inchin rronichja jaha, jamé Dios sinchejuzgá nganji. Co are mé tsonoha si ján rrica o ni ẍonhi rrica.

Are chojni jianha joanchia na ná milagro

(Mr. 8.12; Lc. 11.29‑32)

38Cottimeja canxion xifariseo co canxion ximaestroe ley Israel vinttendac̈ho xa ngain Jesús:

―Maestro, janha na rinaho na sicon na que jaha sinchehe ná milagro.

39Jesús ndac̈ho ngain xa:

―Chojni jianha que ditticaonha na Dios rinao na sicon na ná milagro, pero chojni mé Dios tsjagoeha na icha milagro que jeho inchin tti conhe profeta Jonás. 40Ixin jamé inchin Jonás vehe ní nchanho co ní ttie ngaxinhi tsehe copescado jie, jamé janha cai, tti Xí que joixin de ngajni, sarihi ngadoho nontte ní nchanho co ní ttie. 41Cain chojni que vintte ngain ciudad de Nínive, jehe na singattjen na ngain tti nchanho are Dios sinchejuzguehe cainxin chojni para rroc̈ho na jie para ixin cain chojni de ngain tiempo jihi, ixin jehe na coentoxinhi na vidé na are Jonás joindache na joajné Dios. Co nttihi nganji ra jaxon jí ná tti icha importante que Jonás, pero jaha ra c̈hoha ra ditticaon ra. 42Cai tti reina que joixin de ngain nontte Sabá icha sur, singattjen ngain tti nchanho are Dios sinchejuzguehe cainxin chojni de ngain tiempo jihi para que reina mé rroc̈ho jie para ixin jehe na ixin jehe reina mé joixin anto cjin para joiquinhi tti venohe Salomón, co nttihi nganji ra jaxon jí ná tti icha importante que Salomón.

Tti espíritu jianha que cjan

(Lc. 11.24‑26)

43Co Jesús ndac̈ho cai:

―Are ná espíritu jianha dac̈hjexin de ngain cuerpoe ná chojni, espíritu mé sattji ngain tsje lugar xema para dicjé ttinó sinchejogaha, co are jehe idittjaha lugar mé, jehe ẍaxaon: 44“Janha rrocjan na ngain nchiania tti vac̈hjexin.” Co are jehe espíritu jianha mé cjan, dittja ngain cuerpoe chojni mé inchin ná nchia que ẍonhi chojni te, tti diganjo na jian, co cain roa ngaxinhi nchia mé. 45Cottimeja jehe espíritu jianha mé dirroé iyáto espíritu icha jianha que jehe para que dintte cain espíritu mé ngaxinhi cuerpoe chojni mé, co chojni mé cjan icha tangui tonhe que are saho. Co jamé tsonhe ngain chojni jianha tehe cai.

Janné Jesús co xanchó

(Mr. 3.31‑35; Lc. 8.19‑21)

46Jesús ẍa jinichja cain yá ngain chojni are joí janné conixin xanchó Jesús ixin joinao na rronichjé na Jesús, pero ndoja tavintte na ixin tsje chojni sinxinhi nchia tti jí Jesús. 47Ná chojni ndac̈ho ngain Jesús:

―Janná co xanchó ndoja nttihi te na co rinao na rronichja na nganji.

48Pero Jesús ndac̈ho ngain chojni mé:

―¿Quensen jannana, co quecá xanchian?

49Cottimeja jehe cjoago ngain chojni que vacao co ndac̈ho:

―Chojni tehe tti inchin jannana co jehe na tti inchin xanchian, 50ixin quexeho chojni que nchehe inchin rinao Ndodana que ttjen ngajni, chojni mé tti xanchian co chojni mé tti jannana.

Выбрано:

SAN MATEO 12: plsNT

Выделить

Копировать