Jon 3

Yecu gin ki Nikodemo

1Ceŋ tye dano mo i kin Luparicayo ma nyiŋe Nikodemo, ma en ŋat acel i kin jo madito me Judaya. 2En obino bot Yecu dyewor, owacce ni, “Lapwony, waŋeyo ni in lapwony ma ia ki bot Lubaŋa; pien pe tye ŋatti mo ma twero tiyo lanyut meno ma in itiyo, ka Lubaŋa pe tye kwede.” 3Yecu odokke iye ni, “Adada awacci ni, dano ka pe ginywale tyen me aryo* pe twero neno ker pa Lubaŋa.” 4Nikodemo openye ni, “Dano gitwero nywale niŋniŋ ka doŋ oti? Twero donyo doki i ot nyodo pa minne tyen me aryo, ci ginywale?” 5Yecu odok iye ni, “Adada awacci ni, dano ka pe ginywale ki pii ki Cwiny, pe twero donyo i ker pa Lubaŋa. 6Ma ginywale ki kom en kom, ma ginywale ki Cwiny en cwiny. 7Pe iŋur pien awacci ni, ‘Myero ginywalwu tyen me aryo.’#3.3, 7 tyen me aryo nyo ki malo 8Yamo kodo dok ka ma en mito; iwinyo dwane, ento pe iŋeyo ka ma oa iye, nyo ka ma dok iye; dano ducu ma ginywale ki Cwiny tye kameno.”

9Nikodemo openye ni, “Man twero timme niŋniŋ?” 10Yecu odokke iye ni, “In lapwony pa Icrael, pe iŋeyo lok man? 11Adada awacci ni, wan waloko i kom gin ma waŋeyo, wabedo caden i kom gin ma waneno, ento wun pe wuye lok ma watito botwu. 12Ka attitiwu lok me lobo, wun pe wuye, wubiye niŋniŋ ka atittiwu lok me polo? 13Pe tye ŋat mo ma yam oito i wi polo, kono en ma ceŋ olor piny nia ki i polo, en aye Wod pa dano, ma bedo i polo. 14#Wel 21.9 Kit macalo Moses yam otiŋo twol malo i tim-mi, Wod pa dano bene myero gitiŋe malo kumeno, 15wek dano ducu ma ye en olim kwo ma pe tum.”

16Pien Lubaŋa con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum. 17Lubaŋa pe ooro Wode i lobo ni oŋol kop i kom lobo, ento wek lobo olarre pi en. 18Ŋat ma ye en pe doŋ giŋolo kop i kome, ento ŋat ma pe ye en, doŋ giŋolo kop oloye con; pien pe oye nyiŋ Wod acel keken pa Lubaŋa. 19Ŋolo kop tye kit man, ceŋ con obino i lobo, ento dano gumaro piny macol makato ceŋ, pien timgi rac. 20Pien dano ducu ma timo gin marac dag ceŋ, pe bino i ceŋ, wek timme pe onen ka maleŋ. 21Ento ŋat ma timo gin me ada bino i ceŋ, wek ticce onen ka maleŋ, ni en tiyo i Lubaŋa.

En myero omedde, an myero adok piny

22Ka man otum, Yecu ocito i lobo Judaya kacel ki lupwonnyene; obedo kwedgi kunnu kun batija dano. 23Jon bene onoŋo tye ka batija dano i Ainon, cok ki Calim; pien pii onoŋo dwoŋ kunnu, dano gubino, en obatijagi. 24#Mat 14.3; Mar 6.17; Luka 3.19, 20 Onoŋo peya gitweyo Jon i mabuc.. 25Pyem ocakke i kin lupwonnye mogo pa Jon ki Lajudaya mo i kom lok me lonnye. 26Gubino bot Jon, guwacce ni, “Lapwony, ŋat ma ceŋ itye kwede loka Jordan, ma ceŋ ibolo lok me caden i kome-ni, nen, en tye ka batija dano, jo ducu gibino bote.” 27Jon odok iye ni, “Dano pe twero noŋo gin mo pire kene, ka pe gimiye nia ki i polo. 28#Jon 1.20 Wun kikomwu onoŋo wubedo cadenna ni yam atito ni, ‘An pe a Kricito ma Lubaŋa oyero ento giora akwoŋo nyime’. 29Ŋat ma cuŋ i ŋet nyako aye lanyom; larem lanyom ma cuŋ i ŋete kun winye, cwinye bedo yom twatwal pi winyo dwan lanyom; pi meno an bene cwinya yom kakare. 30En myero omedde, ento an myero adok piny.”

Ŋat ma oa i polo

31Ŋat ma oa ki malo loyo ducu; ŋat ma oa i lobo en dano me lobo, loko lok me lobo; ŋat ma oa i polo loyo ducu. 32En bedo caden i kom gin ma oneno ki i kom gin ma owinyo, ento pe tye ŋat mo ma ye lok ma en otito. 33Ŋat ma ye lokke, nyuto tamme ni, Lubaŋa en me ada. 34Ŋat ma Lubaŋa ooro loko lok pa Lubaŋa, pien Lubaŋa pe miyo Cwiny kun pimo apima. 35#Mat 11.27; Luka 10.22 Won omaro Wod, ci omiyo jami ducu i ciŋe. 36Dano ma ye Wod tye ki kwo ma pe tum; ŋat ma pe winyo dog Wod, pe bineno kwo, ento kiniga pa Lubaŋa bedo i kome.

Выбрано:

Jon 3: Aco85

Выделить

Копировать