MATEO 3

Wzëët Xwa ne rtxobnis xdiiz Dëdyuzh

(Mr. 1:1-8; Lc. 3:1-9, 15‑17; Jn. 1:19-28)

1Tyemp ke guin wa Xwa ne rtxobnis wzëët Xwa xdiiz Dëdyuzh denbidx ne nak lo lyu ne la Judea, 2re Xwa:

―Gusaan xgyelmal de, porke che wyob gak ne rkyeen Dëdyuzh.

3Laa xkwent Xwaree nga wkaa profet-Isaías chene re men:

Te rëz rlen denbidx, re we:

“Gulaxnëz xnëz Men ne rnebééy,

guxal te nëz ne tebli.”

4Kon xgyits kamey nzhexkwaa xab Xwa, le sinturon ne ruu txu Xwa nak gyed, le ne ru Xwa nak miich no le dxin ne nuu den. 5Lex rruu men-Jerusalén no le yra mén ne nuu ydendxee lo lyu ne la Judea no le yra men nuu kbii rugyow-Jordán, ra men ron men ne rzëët Xwa. 6Lex rxobdol men, rluzh nga rtxobnis Xwa men rugyow-Jordán.

7Per chene wyenen Xwa ne ndal men ne nak farisew no le men ne nak sadusew ra lo Xwa chen yrobnis men, nan Xwa lo men:

―¡Xerras mëël! ¿Txu na lo de ne yláá de lo gyelentozroo ne zëdyob? 8Xnëz gugak chen gaknyoo ne nli che wsaan de xgyelmal de, 9no ydxindet de ne gue de lo xkompanyer de: “Xnëz Abraham zëëd be”; porke yna noo lo de yra de ne axtegue gyeree zun Dëdyuzh gan ylaa Dëdyuzho men ne zëëd xnëz Abraham. 10Che list zu gyibyag ne txuug axtegue ydeblu yag; yrandxee yag ne rkaadet nexwen lo, txuugo, tsa we lo gyi. 11Noo noze kon nis rtxobnis noo de yra de chen gaknyoo ne che wsaan de xgyelmal de; per le men ne gyed zëëd, kon Espíritu Sant ytxobnis men de no le kon gyi. Axtegue ni xgyël men rzëëldet noo tsano noo lo men porke mazre rapdee men poder ke lo noo. 12No nzen men ne ylanya men zhobxtil, koo men zhobxtil lad xgyizho, lex gutsoow meno; le xgyizho tsa lo gyi ne nunk gyuudet.

Wrobnis Jesus

(Mr. 1:9-11; Lc. 3:21-22)

13Cheguin ke wruu Jesus lo lyu ne la Galilea wa Ne rugyow-Jordán ledne ka Xwa, chen ytxobnis Xwa Ne, 14per nadet Xwa, re Xwa lo Ne:

―Laa de ryal ytxobnis noo, lel laa de zëëd lo noo ne ytxobnis noo de.

15Wke Jesus, re Ne:

―Gutxobnis noo, porke rap be degne gun be kumplir yrandxee ne rkyeen Dëdyuzh.

Orguin wna Xwa wtxobnis Xwa Ne. 16Wluzh wrobnis Ne, wruugue Ne lo nis, tebegue wyal gyeybaa, wii Ne zëdtseeb Espíritu Sant zegnak te mëër, wyab Espíritu Sant led Ne, 17no wlen te rëz gyeybaa, re we:

―Laa XPee noo nee ne ryaan noo no ne kesentyent rnesak lextoo noo.

Выбрано:

MATEO 3: zpi

Выделить

Копировать