Acts 24
24
Na{Jiu} emau kakala ia Paul
1Imuli kaulima naaho, pohoulu hamakua namaakua la ekaꞌa lakou ma nakama hamakua na{Jiu} la nokae Caesarea. Kama la emale ma Ananias. Ia nakama la eko kekama kela ailoa laoi kekakala, kanamale Tertullus. Nakama la uo nokuu imua {kaumani} la nohai aꞌe nahakaꞌoko lakou ma Paul esala. 2{Kaumani} la uanaa aꞌe Paul ihaele aꞌe i hale, kena Tertullus uꞌamaka nokakala aꞌe {kaumani} la.
“Aꞌoe emakonu haeꞌo kelolosi keonohenua makou nei, kena aꞌoe ehakonu komaꞌi namesala henua nei, pela makou enoho laoi saika loloa lo. 3Namenei makou eꞌike ekaualeꞌa lo. Kena makou hakoa ehamaha aku i aꞌoe, {kaumani} hamakua Felix. 4Ia ekaualeꞌa pela anau eainoa aku i aꞌoe ihalono mai nakakala makou nei, ia nakakala anau mepopoko oia, aoki nakino aꞌoe mekahi.
5“Makou eꞌila pela kama nei ekahao sala kahi, kena ihakaukau ma na{Jiu} kemaalama nei hakoa. Kama nei ehamakua i keukulana nakama ekaukali kekama i Nazareth. 6Kama nei ehaꞌike imea hale kapu makou la nosaꞌino. Kena makou ukaohi kama nei, ihakonu kama nei ikaukali nakuaa makou. 7Ia Lysias kama hananiu napulepule la ehai namahi aia nohaunalia mai kama nei ikaha ma makou, 8kena ime mai makou io mai nokuu imua aꞌoe. Amea aꞌoe soꞌoe elaulahu kama na, aꞌoe meilave hea makou ehakauoki ma kama na.”
9Na{Jiu} la enuu hakoa pela nakakala Tertullus la ehamaoni.
Paul ukakala aꞌe ia Felix
10{Kaumani} Felix uhaiauna aꞌe ia Paul ikakala. Kena Paul esui aꞌe nakakala na{Jiu} la.
“Anau makino pela aꞌoe ehakonukonu nasala keonohenua nei komaꞌi nahekau. Ia anau ehihia kekuu imua aꞌoe ihakonu lia hea nakama nei ehai mai anau la. 11Vahonei ulaꞌa sanahulu ma lua naaho imuli anau ehaele nokae i Jerusalem, nohamalumalu Keakua. Aꞌoe meilave soꞌoe pela kakala nei ehamaoni. 12Nakama nei eꞌike pela anau sehakaukau ma hekama iloko hale kapu. Ia anau sehaꞌukuꞌuku naonohenua iloko nahale loku ia ma kemakaꞌina la. 13Nakama na selavaa kehuli aku kehamaoni nia lakou ekakala hakaukau manau la. 14Ia anau eme aku aꞌoe. Anau ekaukali nakipukipu Kealiꞌi ihamalumalu Keakua kela nakipuna makou imua la. Nakama na emea ma keukulana makou la esehamaoni. Ia anau ehakina nakipukipu nakuaa Moses, ia ma nalauniu nakama hakae nakakala Keakua. 15Anau ehakina pela Keakua meikonaꞌi anau, ehau poi hea nakama hamakua nei ehakina hoi. Makou ehakina pela nakama ekonu ma nakama saꞌino la meimasiꞌe muli ikaha ma kemake. 16Kela hea anau ehai namahi anau imakino laoi pela anau ekonu kahi imua namaisu Keakua ia ma keonohenua.
17“Anau enoho i naꞌina emao la komaꞌi nahekau. Ia kena anau uvaꞌai mai i Jerusalem ihoꞌi aꞌe namoni ikonaꞌi nakama makou ehaaloha la, ia ihamalumalu Keakua. 18Kena ipena nakipukipu imea anau ikonu i kevahi nakuaa. Keualoko la, nakama hamakua na{Jiu} nei elave anau iloko hale kapu. Ia saika la, sehikama ehaꞌuku novaa, ia anau sehakauoki ma alakama. 19Ia na{Jiu} kela eo mai Asia la ehakaukau manau. Ia apoi nakama la ehakaꞌoko ma anau epena namesala, kena nakama la ekau keo mai nokuu imua aꞌoe. 20Poi na{Jiu} nei elave namea esala keualoko anau nikuu imua nakama hamakua lakou la iloko Jerusalem, kena nakama la ekau keme aku hoi. 21Ia keualoko anau nikuu imua nakama la, anau eme aꞌe kemenei oia, ‘Keaho nei, okou ehakonu konu anau, maikinimea anau ehakina pela nakama emake la meimasiꞌe muli ikaha ma kemake.’ ”
22Felix namakino avale kipukipu Kealiꞌi. Kena kama la uhaoki kehakonu la, kena ime aꞌe, “Keualoko Lysias kama hananiu napulepule la meihamai, kena anau meihakonu kesala okou na.” 23Felix eme aꞌe pulepule hamakua la ilolosi Paul, ia isepui nasoa Paul la keau aꞌe hea kama la hihai la.
Paul ekakala aꞌe ia Felix ma keꞌavana aia la
24Kela heaho, Felix laua ma keꞌavana aia la Drusilla ukae aꞌe i kehale hakonukonu la. Kehine la he{Jiu}. Felix eanaa aꞌe Paul ihaele aꞌe nokakala aꞌe nakipukipu kehakina Jesus Christ ihalono laua. 25Kena Paul ekakala aꞌe koꞌolua la nakipukipu keola ekonu, ia ma nakipukipu kekuꞌu konu naola laua. Pela Keakua meihakonu konu nakama hakoa. Ia kena Felix umakaꞌu, kena ime aꞌe, “Ukau. Anau ame ana aku aꞌoe imuli. Haele aku.” 26Alaualoko Felix eanaa aꞌe Paul ihaele aꞌe nokakala laua, maikinimea Felix hakaꞌokoꞌoko pela Paul meau aꞌe nimoni maia.
27Imuli sahekau ulaꞌa, Porcius Festus usui kesao Felix mo {kaumani} hamakua. Ia Felix ehihai na{Jiu} la ihihia i aia, kena ikiaꞌi Paul nopono i kelokapu.
Выбрано:
Acts 24: ojv
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 1999, Wycliffe Bible Translators, Inc. All rights reserved.
