Acts 22
22
1“Aukaina ma aukamana. Halono mai. Anau ekuu imua okou nohakonu hea okou ehai mai anau.”
2Keualoko keonohenua la elono pela Paul ekakala aꞌe lakou i nakakala na{Jiu} la, kena nakama la unoho semuu hakoa. Ia kena Paul eme aꞌe,
3“Anau hekama ha{Jiu} ehanau mai iloko kemakaꞌina Tarsus iloko Cilicia. Ia anau emakua mai iloko Jerusalem. Kama hamakua Gamaliel eaoaꞌo mai anau imakino laoi nakuaa nakipuna kakou imua la. Kena anau ehai namahi anau la ikaukali nakipukipu Keakua la, ehau poi okou keaho nei na. 4Anau ehai haeꞌo kia nakama kela ekaukali nakipukipu Kealiꞌi la, nokaia nakama la nomake. Anau ehapiꞌi nakanaka ma nahine lakou la nopono iloko kelokapu. 5Pohoulu hamakua namaakua ia ma nakama hananiu na{Jiu} la elavaa keme aku pela nakakala anau nei ehamaoni. Nakama hamakua la eau mai kelauniu iꞌave na{Jiu} kela enoho i Damascus. Kena anau ehaele i kemakaꞌina la, ihapiꞌi nahakina ana la, ihakaꞌi lakou i Jerusalem, ma ikaa lakou hoi.
6“Keualoko kelaa lakea, anau usasaika aꞌe Damascus. Vahola oia, keahi kevaelani emasina haimahi iluna anau. 7Kena anau usina nomoe ilalo nolono keleo evasili mai penei, ‘Saul. Saul. Okea aꞌoe ehai haeꞌo kia anau?’
8“Kena anau ume aꞌe, ‘Oai aꞌoe Kealiꞌi?’
“Kama la eme mai ma, ‘Anau o Jesus kela i Nazareth, kekama aꞌoe ehai haeꞌo kia la.’ 9Nakama ekaꞌa manau la eꞌike keahi la, ia selono keleo kela ekakala mai anau la.
10“Ia kena anau ume aꞌe, ‘Kealiꞌi. Hea aꞌoe hihai anau ipena?’
“Kena Kealiꞌi ume mai, ‘Masiꞌe iluna. Aꞌoe uhaele i Damascus. Kulana aꞌoe meikae ilaa, hekama meikakala aku hea Keakua ehakaꞌoko pela aꞌoe ipena.’ 11Naꞌalemaka anau eseni kemasina haimahi keahi la. Ia kena nakanaka kela ekaꞌa manau la ekaohi nalima anau nohakaꞌi i Damascus.
12“Kela hekama enoho i kemakaꞌina la, kanamale Ananias. Kama la ehakina Keakua, kena ihalono nakuaa Moses. Ia kena na{Jiu} iloko Damascus hakoa ehihai kama la. 13Ananias uhamai nokuu kevahi anau, kena ime mai, ‘Kaukaina Saul. Ila mai.’ Saika la oia, anau uꞌike kama la. 14Kena Ananias ume mai hoi, ‘Keakua nakipuna kakou imua la ehilihili aꞌoe iailoa hea aia hihai aꞌoe ipena, kena iꞌike kekama ekonu la, ia ilono nakakala aia. 15Aꞌoe meikakala aꞌe naonohenua hakoa pela aꞌoe eꞌike kama la, kena elono nakakala aia la hoi. 16Hea aꞌoe ehakali na? Masiꞌe iluna. Loku aꞌe Kealiꞌi ikonaꞌi aꞌoe, kena anau meihaauꞌau kapu aꞌoe, isolo nahaisala aꞌoe la ikaha.’
17“Kena anau uvaꞌai muli i Jerusalem noloku iloko hale kapu. Keualoko la, anau eisi keꞌike hakaꞌoko anau. 18Anau eꞌike pela Kealiꞌi ehakuu maka mai anau, kena ikakala mai penei, ‘Haele vave ikaha ma Jerusalem, maikinimea keonohenua la mesehihai aꞌoe ikakala aꞌe lakou nakipukipu anau.’ 19Kena anau ume aꞌe, ‘Kealiꞌi, nakama la ailoa pela anau uhaele hakiꞌe nahale loku lakou la, nolili kia nakama kela ehakina i aꞌoe, kena ipono nakama la iloko kelokapu. 20Keonohenua la nikaia Stephen nomake, maikinimea kama la ehaꞌali aꞌe nakipukipu aꞌoe. Ia keualoko la, anau ehihia hea nakama la epena la, kena ikuu ilaa nololosi naauꞌahu nakama kela ekaa kama la nomake.’ 21Ia Kealiꞌi eme mai anau, ‘Haele aku. Anau meihaunalia aꞌoe i nakama enoho pouli emao la.’ ”
22Keonohenua la ehalono hakaualeꞌa. Ia saika Paul ekakala pela, nakama la eanaa hamaloa pela, “Kaa kama na imake. Kama na sekau i keola.”*f14*
23Ia nakama la ekauhano i keananaa hamaloa, ia isasae napamalo lakou la, kena ilaku laku nakaꞌele iluna. 24Kena kama hananiu napulepule la ume aꞌe napulepule aia la ihakaꞌi Paul iloko kehale lakou la. Kena ilili kia kama la, ma ilave lakou kesala aia la. Kama hananiu la ehihai imakino hea keonohenua la ehakaukau lakou ma Paul la. 25Napulepule la usaisai nalima Paul nomakau ma ilili kia kama la. Ia Paul ume aꞌe kama hamakua napulepule la, “Ame ekonu pela okou elili kia kekama haRome, amea okou sehakonu kama la imakino okou kesala kama la?”
26Napulepule la elono nakakala Paul, kena io nome aꞌe kama hananiu lakou la, “Aꞌoe makino hea aꞌoe ehai? Kanaka nei hekama haRome.”
27Kena kama hananiu la uhaele aꞌe ia Paul, kena ime aꞌe, “Ehamaoni pela aꞌoe hekama haRome?” Kena Paul ume aꞌe, “Ei.”
28Kena kama hananiu la ume aꞌe Paul, “Anau esui namoni komaꞌi imea mo kama haRome.” Ia Paul eme aꞌe kama la, “Anau ehanau mai pela hekama haRome hamaoni.”
29Kena nakanaka kela ekanakana ilili kia Paul eoho nosolo muli. Ia kama hananiu la umakaꞌu soia hoi, maikinimea kama la uailoa pela Paul ehanau mai hekama haRome hamaoni. Ia niaina ma Paul hekama haRome, kama la ehapiꞌi Paul i na{seni} la.
Paul ekuu imua nakama hamakua {kaumani}
30Kena kela aho, kama hananiu la uvekeveke na{seni} Paul la. Kama la ehihai imakino hea na{Jiu} la ehakaukau lakou ma Paul la. Ia kena kama la eme aꞌe namaakua hamakua ma nakama hamakua na{Jiu} la iꞌuku hakoa, kena ihakuu Paul imua nakama la.
Выбрано:
Acts 22: ojv
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 1999, Wycliffe Bible Translators, Inc. All rights reserved.
