Matta 12
12
Nze da Ɓwaara nə həmɨ fərə piyatə
(Markus 2.23-28; Luka 6.1-5)
1A itɨngɨn fərə piyati da Yawude, Yesu a woyo ka lagbe dan a koɗə dɨ vor i gaashi. Myatə gə lagbe dan, təna tiya sər gyelkətɨ zumwe a posə ta tuuli. 2Imi dɨ vor Farise a naarən, təna ɗiyə Yesu atɨ, “Niyi! Lagbe dəw nee dɨ ɗa sa ɓashita Musa a kərdən a fərə piyatə.”
3Yesu a luwa a sarən, “Hwunaa bəl sa Dawuda a ɗa ma, a ite ndi ka myee nda dɨ woyo kaarən, myatə a gərən? 4Nda dɨ pɨrə vor hwoda Həmɨnpwa a nggur buroditɨ ɗəmɗəmte mya ɗa gə le da kɨsehəmyee dɨ lyenə vor hwoɗingɨn ɓəmbə, nda zɨmə ɓwaa ka myee nda woyo kaarən. 5Naasə mgban hwunaa bələ a vor malɨmtɨ ɓashita Musa atɨ, kɨsehəmye da Həmɨnpwa 'ye dɨ lyenə Shafe a duwa ɓiya ɓashitə a fərə piyatɨ da Yawude, kat ka angɨn tənaa ɗwangashe? 6Hɨnə dɨ boyownə atɨ ama a pɨrgə Shafe ka fukatə nə ganə. 7Na hwun nda lee naarə ləməginə atɨ, ‘Puruti na dɨ mwo, aa hamati,’#12.7 Naasə: Hosaya 6.6. hwunaa dɨ nda pa ɓwaare a ɓəltɨrən ɓaa ka ləməgye a myee aa ɗwangashe. 8Hɨn Nze da Ɓwaara hɨnə həmɨ fərə piyatə.”
Yesu a gwadə ma tɨfəngɨn a mbɨrə
(Markus 3.1-6; Luka 6.6-11)
9Də Yesu a ɗaka hangɨn, nda wudə a pɨrə vor vɨnə kəndəshe darən. 10Ama nee də a hangɨn tɨfəngɨn a lɨɓɨkə. Farise nee də mgban a hangɨn dɨ ɨli gə təna ɗɨmgə Yesu le, təna ɗiyən atɨ, “Ɓashitə vədə humwatə atɨ mya gwadə ma a dɨmən də ootə a fərə piyatə ma?”
11Yesu a ɗiyərən atɨ, “Wonə a vorsəwnə a ma ka mbagatə kan, ngga fukəgən a gwe a fərə piyatə, ndaa dɨ kɨsatɨrə a nggɨradə gə gwe? 12Ɓə ɓwaara aa pɨrgə mbagatə ka fukatə ma? Gə ləngɨn ɓashitə mwa mya ɗa səfeme a fərə piyatə.”
13Nda sa mangɨn atɨ, “Tɨddə tɨfanga.” Mangɨn a tɨddə tɨfəngɨn, tɨfəngɨn a mɨna pepe ɓətɨ arə hiɗə. 14Shezə Farise a dɨmə a shalasə le gəkɨlə təna kɨt Yesu a ɓɨltən.
Kɨsaa Həmɨnpwa a nggɨlə
15Ite Yesu a niyəshe, nda dɨmə a ɗaka hangɨn. Ɓwaare hananang a koɗən, nda gwadə myee ka sɨtɨ ootə kat a dɨmərən də ootɨngɨn gə sɨsərən. 16Nda fyel-kwakingrən atɨ, ɓe tənaa boyə ɓwaare atɨ sɨnə wonə. 17Gə-angɨn a naadə la mya boyo dɨ kwaamɨ kpale Ishaya atɨ,
18“Kɨsaa de nə, a na nggɨlə,
sɨnə ma na mwo,
a haa dɨ nɨnyi kan.
Hɨn ɓa ɗɨkən
Pitɨ Ɗəmɗəmtɨ de,
ndi ɓa hiwa vɨratə kat a nə ɓashitɨ diyale.
19Ndaa dɨ nggələsə le
ka ɓwaare,
ndaa dɨ ɗaw-kwaame ɓaraw,
myaa dɨ kɨla kormɨngɨn a wake hwoɗye.
20Nagi nda reka
hyalak-hyalak nə,
ndaa dɨ ɓiyan,
tikɨla dɨ ləwi mbɨrɨp-mbɨrɨp,
ndaa dɨ kpawan a mbɨran.
Sə ndi ɓa ɗa ɓashitɨ dan
ka diyale baa a zə kpawtə.
21A vor kwakɨngɨn,
bətɨ mi vɨratə kat
ɓa nza ka bəə myentə.”#12.21 Naasə: Ishaya 42.1-4.
Yesu ka Belzabub
(Markus 3.20-27; Luka 11.14-23)
22Də təna shi ka Yesu ka ama ka nzə-dwatə a sɨsən, mangɨn welə, ndaawa byelə. Yesu a gwadən a nggurəngə ootɨngɨn, nda tiya byele ka naa haa. 23Ɓwaare kat a ɗa ndəle, tən ta ɗiyəsə atɨ, “Hwuna saa nze da Dawuda nə a na?”
24Ite Farise a kɨl lə sa Yesu a ɗa, təna sa atɨ, “Ka gəta Belzabub həme da pɨle ji-dwatə ma kəwnə a dɨ dɨmdə pɨle ji-dwatə gə sɨtɨ ɓwaare.”
25Yesu ɓə lee la a hubosərən, nda sarən atɨ, “Kat həmna ndɨlkasə təki kpe, həmnəngɨn aa dɨ nza. Sə mgban vɨrate, naasə hwoɗyee kat ndɨlkasə təki kpe, tənaa dɨ kangə. 26Anda Shetan ndɨlka Shetan, angɨn ɓa shi ka təktə, ya həmne dan ɓa nza? 27Anda ka gəta Belzabub na dɨ dɨmdə pɨle ji-dwatə dɨ sɨtɨ ɓwaare, ɓə myee dəwnə mgban? Ka gəta wonə təna dɨ dɨmdə pɨle ji-dwatə dɨ sɨtɨ ɓwaare? Gə-angɨn, myee dəwnə 'ye dɨ dɨmdə pɨle ji-dwatə mgban ɓa ɓashiyəwnə a nə ləməgyee hwuna dɨ boyo. 28Anda ka gəta Pita Həmɨnpwa na dɨ dɨmdə pɨle ji-dwatə gə sɨtɨ ɓwaare, leyəm atɨ həmne da Həmɨnpwa shi hakəwnə.
29“Ɓə ya ɓwaara ɓa pɨrə vor hwoda gbinda, a ɓə porgən gɨnətɨ dan, a ndaa ɓwe həmɨ-hwoɗingɨn a mbəə? Də nda ɓə shea porgən gɨnətɨ dan.
30“Di ma kat tam ɓwaa ke nzə-kwo na nə, ma mgban aawa gwadi pedə shee a haa hiɗə, vyata mangɨn a dɨ vyatarən. 31Səngɨn nə ɗa na dɨ boyownə atɨ, nagi ndo səhasə sharha kat a ɓwaara a ɗarən mye ɓa nggurəngə angɨn, shezə kɨɗa kwakɨ Pitɨ Ɗəmɗəmtə ka sharha myaa dɨ nggurəngə səhasəngɨn. 32Ma kat bwelə hase a na hɨn Nze da Ɓwaara, mya nggurəngə səhasəngɨn, ma bwelə hase a nə Pitɨ Ɗəmɗəmtə myaa dɨ nggurən gən nagi a nzatɨnə ka ite ɓaga shi.
Kada ka mbosən
(Luka 6.43-45)
33“Ɗamdə kada, ndi ɓa vədə mbwotɨ pepetə, kadaa myaa ɗadən mgban, mbwosən aa dɨ wula. Mye ɓa lee kada dɨ mbwosən. 34Hwun rokonyi hashe, a je da səfwakshike, a hwun liya mi hashi, hwun ɓa nda ɗa ya hwuna ɓə bwelə feme? Di la a vor hubo ma nə nda dɨ dɨmaadən dɨ kwaamɨngɨn. 35Ɓwaara feme kat, nda dɨ dɨmaadə ləmə fema nda kəpdən dɨ səɗə-yedi pepeye. Ma hase mgban nda dɨ dɨmaadə ləmə hasa mgban nda kəpdən dɨ səɗə-yedi hashe dan. 36Diyalə na dɨ boyownə atɨ, a fərə ɓashitə, ɓwaare ɓa bwegə ləməgi ɓaye kat təna dɨ boyo. 37Gə dɨ ləməgyee dɨma dɨ kwaamɨnga hye ɓa zɨm ɓashitə, sə mgban dɨ ləməgyee dɨ dɨma dɨ kwaamɨnga mye ɓa ɓashiyu a lɨbada.”
Wule sɨgbəshe da Yunana
(Markus 8.12; Luka 11.24-26,29-32)
38Imi dɨ vor Farise ka ji-lee kəndə ɓashita Musa a sa Yesu atɨ, “Nzə-kəndəshe, hine dɨ mwi atɨ hye bɨlenə a sɨgbəshi hina nan.”
39Nda luwa a sarən atɨ, “Mi wanetɨnə mi hashi, ji-sharawnə, tənə dɨ ɨli gəkɨlə mya bɨlərən sɨgbəshe! Myaa dɨ bɨlərən asə som pɨrgə hɨnggə kpale Yunana. 40Ɓətɨya Yunana a bə fəre mwaakɨn, tukotə mwaakɨn a vor yedi vaaktɨ gbaktə, sə mgban hɨn Nze da Ɓwaara hɨn ɓa ɗa bətə mwaakɨn a taane. 41Sə mgban a fərə ɓashitə, mi Nineva kana kangə kəwnə a humwa Həmɨnpwa, tən ɓa mbəwnə ka ɓashitə, gəkɨlə təna kɨl kormi Yunana a por-njiya ka səhase darən. Ɓəgəng ma pɨrgə Yunana ka fukatə nə kangə wakasəwnə. 42A fərə ɓashitə, hwun mi wanetɨnə, hwun kana kangə humwa Həmɨnpwa ka həmte shi dɨ basa ɓayang, nggi ɓa mbəwnə ka ɓashitə gəkɨlə ngga nggura tɨfe ɓong-ɓong gələ ngga sɨ kɨl kormi lele da həmɨn Solomon. Supo ma pɨrgə həmɨn Solomon nə kangə wakasəwnə.
43“Pɨla nzə-dwatə kana dɨmgə sɨtɨ ɓwaara, nda dɨ pərəsə a vor ɓaawe ta ɨl haa ndi ɓa nza a piyadə, ndi kana ɨlə ndaa ɗɨmə. 44Nda sa nənəngɨn atɨ, ‘Ndɨka na mɨnə hwoɗyee a sɨtɨ ma na dɨmagən.’ Ndi kana mɨna asɨ pa hwoɗingɨn mye fegərən ɗadərən pepe taa asə a vorsərən, 45pɨla nzə-dwatɨngɨn ɓa mɨnə a dɨ pwara i pɨle ji-dwati tukolukpe 'ye hashi pɨrgən, təna pɨrə kat a nza sɨtɨ mangɨn. Kpawtɨ nzata mangɨn ɓa hasə a pɨrgə i kwamətə. Sə mgban ɓa gə kəwnə a hwun mi hashi vɨraa wanetɨnə.”
Nuwogə Yesu ka mwaafengɨn
(Markus 3.31-35; Luka 8.19-21)
46Ite Yesu nee a vor byele ka ɓwaare, nuwogən kat ka mwafengɨn a kangə haa bwange a dɨ mwo byele kan. 47Ama a san atɨ, “Nuwogu ka mwafenga nee kangə haa bwange dɨ mwo byele kəw.”
48Nda luwa a san, “Wonə nuwogi, yə wonə mwafe mgban?” 49Nda ɗifə lagbe dan a sa, “Minə, tənə yə nuwogi ka yə mwafe. 50Gəkɨlə nagi ndo ma a dɨ koddə sa Baagi arə a vor pwa a dɨ mwo, sɨnə mufa, ka mwafɨri, ka nuwogi.”
Выбрано:
Matta 12: bcy
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
