Matius 7

Ada Pasala do Vokon

(Mar. 4:24; Luk. 6:37-38, 41-42)

1Om kadi Yisus kavagu, “Ada kouno monginsala do tulun vokon supaya i Kinoringan nga aui pakasala dikovu. 2Onuu nopo pinonginsala muju do vokon, irino ponginsala do Kinoringan dikovu, do potingkuro nopo pongoturan muju si do vokon, nga irino pongoturan do Kinoringan si dikovu.

3Nokuroi do aantangannu i sala di songkoruangannu irad do livata topoyok om auno opurimanan i salanu irad do vatang ginajo sino matonu kondiri? 4Nokuro do opusuko mitangar di songkoruangannu do, ‘Ongoi pogi siti. Iduoku ino livatanu,’ kanu, do ino vatang nokolivata di matonu kondiri nga aupo noidu? 5Oi dika tulun do puupura! Iduopo ino vatang i nokolivata dino matonu kondiri, om ampa nogi do anavau ino pongongontongnu do mongidu dino livata di songkoruangannu,” kadi Yisus.

6Om ponudukno kavagu i Yisus diolo diri duvo poiradanJo do i tongotulun di au mongkinongou do tinangaran di Kinoringan komoion, do kaDisido, “Nunuu nopo porompon muju olidang om ada pataako do tasu do monsuli iri pokoruol dikovu. Om muntiara#7:6 muntiara: guliga ko bulawan, irino barang diri vaalon do kalung di oorogo marong muju nogi nga ada podumpauo do vogok supaya auno opipasak-pasakan diri vogok,” kadi Yisus.

Mokianu, Mogium om Mongotuk

(Luk. 11:9-13)

7Om kadi Yisus kavagu, “Pokianu kouno di Kinoringan om onuan kovi. Om pogium kouno om kaayang kovi do tulungon kovi di Kinoringan. Pongotuk kouno di pintu om oukaban kovi di Kinoringan. 8Do pointikid-tikid do tulun do mokianu di Kinoringan nga kaanui. Om pointikid-tikid do tulun di mogium nga kaayangi. Om pointikid-tikid do tulun di mongotuk do pintu nga oukabani isido.

9Oi kokusajan kou, aupo kama nokoinam kou do mokianu nogi i tanak muju do takanon, onuan muju do vatu, 10om mokianu do sada nga onuan muju nogi do vulanut di ovijau. 11Insan songkuropo karaato muju, nga koilo kovi manaak di aandai do pokionuon di tangaanak muju. Makinpo dii i Tama tokou soi suruga do irad dino koilo manaak do aandai si di tulun i mokianu Disido!

12Kaandai kouno si di tulun vokon, irad di kouvangan muju do aandai i tulun vokon si dikovu. Nong irad dino kaandaio di gaagaya muju ampa osuut muju i komoion diri Undang-undang Ugama pointulis saralom buuk di Musa om buuk di nabi vokon, i popolombus di tinangaran do Kinoringan pogulu,” ka.

Pintu Tokikip

(Luk. 13:23-24)

13Om minaganu i Yisus do iso poiradon do ka, “Asuno siri pintu diri okikip do irino tolibon mongoi silo suruga. Do kivaro daa pintu do abava tolibon om asanang maja siri, nga irino mongoi siri kapatajon, om oguu i tulun do maja siri. 14Nga iri nopo pintu do okikip om vajaan do aradaai nga mongoi siri kovijaan do auso koovion, om okuyak i tulun do nakaayang diri,” ka.

Mongintutunan di Ginavo mantad di Gaagaya

(Mat. 12:33; Luk. 6:43-44)

15Om kadi Yisus kavagu, “Ondodomo mujuno i tulun do mitangar do isidono nabi, i popolombus di tinangaran do Kinoringan, do momumudut isido. Do gaagaya nopo disido dino nga miinong gaagaya di kaakaa korongit, nga sumangalu isido irad diri gaagaya do kambing biri-biri do otuud, do mangakal#7:15 mangakal: monimbuu dikovu supaya kavaja kou diri ponudukan disido. 16Nga otutunan mujui do momudut isido do aantangan muju iri gaagaya disido. Irad diri kaju, do irino tuvajo pongintutunan muju do aandai ko araat. Ausoi tulun mongupu do tuva di anggur mantad siri korugijan, ko tuva do nunuk mantad siri bintorung.#7:16 bintorung: kaju kirugi 17Iri nopo puun do aandai mimangno monguva do aandai, okoniko araat. Nong puun araat, monguva do araat, okoniko aandai. 18Do puun nopo do aandai nga au kadapat monguva do araat, om puun nopo do araat nga au kadapat monguva do aandai. 19Nga tikid-tikid do puun do kaju diri au monguva do aandai nga tagadon om sorobon nogi dino. 20Nga mongintutun kou nopo do puun do kaju om irino tuvajo. Irad nogi dino i tulun do mitangar do isidono nabi nga momumudut isido, do irino gaagaya disido pongintutunan muju do araat,” kadi Yisus.

Ponudukan do Maja di Kouvangan do Kinoringan

(Luk. 13:25-27)

21Om kadi Yisus kavagu, “Okoniko kasangkat i tulun mangarait do ngaranKu do mokiTuhan-Tuhan noo do kaasu siri Kopomorintaan di Kinoringan, nga irino tulun maja do kouvangan di TamaKu silo suruga. 22Om ontok diri Tadau Kopongukuman, oguu tulun do mitangar Dogo do, ‘Tuhan, Tuhan,’ ka, ‘mantad di ngaranNu nokoongoi ikoi do popolombus diri nituduk do Kinoringan laaid dagai si di tongotulun. Om mantad do ngaranNu nogi ponunsubja di rogon. Om mantad do ngaranNu kavaal ikoi do kosunduvan,’ ka. 23Nga mitangar Oku diolo do, ‘Pogidu kouno! Do au Okui kotutun dikovu do ongoraraat marong ino gaagaya muju,’ kangKu nono diolo,” kadi Yisus.

Duvo Tulun Mamaal do Valai

(Luk. 6:47-49)

24Om kadi Yisus kavagu, “Pointikid-tikid do tulun di mongkinongou di tangaronKu om maja marong nga irad di tulun diri opintar do mamaal do valai siri pantok do kivatu do agajo. 25Om insan odorunanpo iri, om olonian do vaig om ologod i sarup, nga aui maba i valai sabap nokougor#7:25 nokougor: nokoponsok i torigijo si vatu.

26Nga iri nopo tulun di nokorongou di tinangarKu nga au maja, om isidono irad di tulun do obudu do au koilo mamaal do valai, do siri noopo pantai pinamaalanjo. 27Om nong odorunan, om olonian do vaig om ologod i sarup, nga naaba dii i valai, gosob do nouyas dii marong,” kadi Yisus.

28Om ontok diri noopod i Yisus monuduk diolo, oguu iri tongotulun osumboijan marong do nokorongou di ponudukanJo, 29do Isido nopo monuduk nga inong do kikuasa Isido. Okonko irad di tulun monunuduk do Undang-undang Ugama do Joudi.

Выбрано:

Matius 7: LabukPKV

Выделить

Копировать