Luka 8

Ayiing Kaa Bii Yesu

1Ta dǝbarin nbana, Yesu ɗǝ angaa byaa mee ware nyar mɓaa a bii andar nyeshii ɗaa ndar maksar ng ɓanaa asum nung zar shii tǝruun Vitora. 2Ayii dǝshai kǝ kapsan yen ɗaa vishii maa yiɓi ɗǝ ayiing kǝ bar ɗǝ yen a bii yen ket. Gaat ta kǝshii maa yii kyaa mee ni Maryamu mang kǝ war Magadala, mang kǝ Yesu kapsan ma ɗaa vishii maa ayiɓi tarɓa. 3Ayii dǝshai yeni Yowana yiin Kuza, mu ɓasa lokng Hirudus ɗǝ Suzana ɗaa dǝs maa yii kyai. Ayii kyaa a ɗǝ ɓwakghaa yen ɗǝ awuu sokghaa yen.

Agarang Mu Ɗǝn Kǝng Sama Ɓǝrkǝt

(Mat 13.1-9; Mar 4.1-9)

4Kǝ asum wari ndara ndara a taa tokshii ta Yeswaa, shee Yesu ɓan yen agara mari, pang shee ka: 5“Mu ɗǝn yen nak sama ɓǝrkǝt mee. Mee kǝng ta sama kyaa a dǝs maa ɓǝrkǝt ki pir gwarshaa. Asum tapshii yen, amuyen taa tangshii yen nzup. 6A dǝs kyaa piri ara maa tǝtara, a warshii pang a por kuushii tung ka araa ki min sham ma rak. 7A dǝs kyaa piri kǝshii maa ryakghaa, a warshii pang a ryak ɗak yen maksaraki. 8A dǝs kyaa piri kǝshiin ndar zaraa, kǝ a warshii a maksar, a pon shii maksar-maksar ɗaa zhang kǝ gangaa nggagham gaat.”

Kǝ Yesu kǝd agara ki. Shee ka, “Nzup mung kǝng ɗǝ kutun yira, kǝ yiri.”

Dakng Agarang Mu Samang Ɓǝrkǝt ki

(Mat 13.10-17; Mar 4.10-12)

9Shee angaa byaa mee yiɓǝn ma ka yeni dak maa agara mari ki paa? 10Pang palta ka, “Yini a nayin gwarshii yokghan awung kǝng ɓuɓaa shiin tǝruun Vitoraa. Taa dǝs kyaa ng ɓana yen kǝshii maa agara, tung ka,

“ ‘Nzup ɗǝ yis kaa ɗǝ mee,

a ɓyaaki rak, nzup ɗǝ kutun kaa ɗǝ mee a ɗǝ yokgha dak ki rak.’

11“Dakng agara ki meni ka, Ɓǝrkǝt ki meni nung Vitor. 12Aɓǝrkǝt kaa piri nung gwarshaa, a yeni asum mang kǝ a yir nung Vitor, pang Shetan taa mok nung Vitor ki ta karkǝɗoo yena, tung ka kaa yiri, kaa sok bar ta rak. 13Aɓǝrkǝt mang kaa piri shiin maa pǝpara, a kan kee asum mang kaa sok yir nung Vitor pang a yal ma ɗǝ katla maa ɗoo. A ɗǝ shadna rak, a ɗǝ gǝtlǝng rak, a yal ˈyii taa ɗoo yena mang yisa njot, awung kwanan karkǝɗoo ni sok yen shee kaa por piri nyee. 14Aɓǝrkǝt mang kaa piri kǝshii maa ryakghaa, a kan kee asum mang kaa yir nung Vitor, pang tung yara maa awuu maa par, ɗǝ ruɗan wusungaa, ryak kǝ dugur yen ki yal rak. 15Aɓǝrkǝt mang kaa piri shiin ndar zaraa, a kan kee asum mang kaa yir nung Vitor, pang a yal wuri ɗǝ karkǝɗoo gaat, ɗǝ shadna maa ɗoo pang a maksar a shii dugur kun kun.

Agara Shin Rwaa ya

(Mar 4.21-25)

16“Mu ɗakghai ɗǝ kǝ ˈyobɓa rwaa dugusa pang kǝ puk maa ɗǝ kusuk rak, koo kaa ˈyii nggǝs jii ɗǝng rak, ˈyaa maa shiin rabtangaa ni, tung kǝ mwok araa ta, ng asum ni lǝri kaa ɓee yis ta. 17Tung kaɓan nzup maa wung kǝng ɓukghaa a ɓoosa ma, nzup maa wung kǝng pukghaa, a pǝla ma kǝ nak apara. 18Nɗǝran ɗǝ shiin yiran nung Vitor, nzup mung kǝng ɗǝ awen. Mee ni pang a naa ma tǝkwak, mung kǝ ɗa awen nak, awung kǝng ɓyaaki ka ng ɗǝ mee, a yala ta myaa.”

Atǝɗong Yesu Mang Kǝduk Dukghaa

(Mat 12.46-50; Mar 3.31-35)

19Kaa ta tang, shee nakng Yesu ɗaa zaa mee a nakghai tung kaa sok ɓyaa ma, a sok gang ta arang kǝng ta rak, tung ɓum maa sum. 20Shee muɗakghai foo ma nung ka, “Ɓee, nak mu ɗaa zaa mu a ta shambala kyaa kaaryaa, a ruɗaki kaa sok ɓyaa ku.”

21Shee Yesu ɓan asum kaa ta tang ka, “Nak min ɗaa zaa min a yeni Angaan kaa yal nung Vitor, pang a byaaki.”

Yesu Mok Wuu Nung

(Mat 8.23-27; Mar 4.35-41)

22Vii yen, Yesu ɓan angaa byaa mee ka, “Wo nyaran ta kar kuɓor nbana.” A lǝr ta kǝshii kusuk kaa sǝraki shiin mina ɗǝ mee, shee a cir shii niyang. 23Kaa ta naa kyaa shee mor cir Yesu, pan banji wuu yen nanzu shiin kuɓor kyaa, kǝ ryak min naa swaa shiin kusuk ki, shee wop kap angaa byaa mee ki.

24Pang angaa byaa mee ki nak ta mee ya, pang a naa nanzu ma moraa, a ɓan ma ka, “Viikuta! Viikuta! Mawar masala ɓari!”

Shee nanzu mok nung wuu ki, pang wuu ki shambal, shee min ki tapshii shii. 25Pang ɓan yen ka, “Naan maa aɗoo yin pee?”

Shee wop kap yen ndus yen shiishii pang a yiɓǝn aɗakghai yen ka, “Na ni mari paa? Kǝ mok nung wuu ɗǝ min pang a yir ma paa?”

Yesu Pun Ayiɓi Shin Sum yena

(Mat 8.28-34; Mar 4.35-41)

26Yeni kaa nyari kuɓor Galili ɗǝ kusuk sǝra shiin min ki, a taa gang ta ndarng maa Garasinaa. 27Kǝ Yesu wari kǝshii kusuk kyaa, shee sum yen mu ndar ki, kǝ ayiɓi soo shii mee yaa, sham ɗǝ Yesu. Sum ki fednaa kǝng ɗaaki ndus kori kǝng yisa ki lokghaa rak, ng yisaki araa kuna ni. 28Mee kǝ ɓee Yesu, pang foo wuri, ɗǝ nyan ndus, naa piri nggen Yeswaa. Ng foosa wuri ka, “Yesu fan Vitor mang kǝng gakghaa yang, yeni pang a ruɗaki ta makghaa paa? Ng kwarsa ku kaa ryak mi kǝshiin bungaa rak.” 29Shee kaɓan tung ka, Yesu ɓwak ɓan ayiɓi ki yaa ka, kǝ war kala sum ki, ayiɓi kyaa fednaa kaa vǝvǝra ma, angaa kaa ˈyaa yis mee a ɗǝ shiira maa kwak ɗǝ kuɓol ɗǝ varng sheemi a gwomji ma ɗǝ gwanji, nzup ɗǝ kaɓan ng ɓora varki. Ayiɓi kyaa a ɗǝ wuranaa ma kǝshii maa pokghaa.

30Pang Yesu yiɓǝn ma ka, “Tǝsak mu ka nani paa?”

Shee palta ka, “Damai.” Shee mari tung ka ayiɓing kaa lǝr ma a damai ni. 31A shii ta kwarsa ma ka, “Kaa wunak war taa Adisa#8.31 Adis: Arang kǝ angaa kuusa shakghaa viin toorng Vitor ta. rak.”

32Akangshiin lok a ta ryaa awura ryaa shiin duuduu yena ta tang. Ayiɓi ki kwarshii Yesu ka, kǝ kala yen ka ta lǝr shii ta akangshiin lok kyaa, shee kala yen ka shii kaɓan. 33Pang ayiɓi kyaa war kala sum ki, pang a naa ta lǝrshii ta akangshii kyaa. Nzup maa akangshii ki somshii jiri naa lǝr kǝshii kuɓoraa, shee min soo shii yen.

34Awan dool maa kangshiin lok ki, kaa ɓee kaɓan, pang a somshii lǝr kǝshii ndar kyaa ɗaa nyeeshii maa ndar mang kaa nggǝr kyaa, pang a ɓanaa asum awung kǝ a ɓee. 35Shee asum kyaa wari nak ta araan kǝ Yesu ta, pang a ɓee sum ki kǝ ayiɓi kyai war kala ma yaa kǝng ɗaaki ɗǝ kǝrɓǝt ta ndusa kǝshii maa ɗoo myaa nggen Yeswaa, shee wop kap yen. 36Angaan kaa ɓee awung kǝ Yesu shii, akori ɓan asum, awung kǝ Yesu shii sum mu maa yiɓi ki maa kǝ bar ta. 37Shee asum kyaa kaa war Garasaa, tung ka wop kap yen, pang a kwarshii Yesu ka kǝ war kala yen maa ndar yen, pang Yesu lǝr kǝshiin kusuk kyaa pang por niyang.

38Kǝ Yesu na kaɓa shii, shee sum ki kǝ ayiɓi kyai war kala ma, kwarshii Yesu ka mee byaa ma, nzup ɗǝ kaɓan Yesu pun ma, shee ka, 39“Por lokghaa ka naa kori ɓan angaa lok awung kǝ Vitor shii ku maa.” Pang niyang, naa rii nggena ɗǝ sheera maa wung kǝ Yesu shiin maa ta nzup maa ndar kyaa.

Yesu Bar Ɗǝ Yii Yen Mu Furan Nggii ɗǝ Faing Dariyus

(Mat 9.18-26; Mar 5.21-43)

40Kǝ Yesu por Galiliyaa, ɓum maa sum kaa ta shakghaa maa, shee a yal ma. 41Sum yen kaa tokghaa ma ka Yayirus mushorin arang Shamang shii maa angaa Yahudu, taa karang nggen Yeswaa kwarshii ma ka kǝ taa lok mee yaa, 42tung ka fai mee gaat kǝng ɗǝ yee ware nyar mɓaa ng nung kwaa ya. Kǝ Yesu cir shii naa yang, aɓum maa sum ta kur ma. 43Ta kǝshii maa sum kyaa yii yen ta kǝ fedna ɗǝ womnakng fura nggii mang yee ware nyar mɓaa, wun nzup awung kǝng ɗǝ mee shiin byaa maa angaa nggalaa, nzup ɗǝ kaɓan sok bara rak. 44Shee nakghai dibarin Yeswaa, pang naa gunji kǝrɓǝt mee, shee furayang nggii ki ɗoo shambal nyee.

45Shee Yesu shiiɓǝl yiɓǝn asumyai ka, “Nani gunjin mi paa?” Kǝ nzup maa sumyai shee ka, “A gunji ku yaa rak.” Biturus shee ka, “Viikuta, asum kom ku yaa kaa tona ku.”

46Pang Yesu shee ka, “Muɗakghai gunjin mi, ng yokghai shadna wari yaa ta ndus mina!”

47Yii ki kǝ yokghai ka shama ɓuɓa shii mee rak, taa ta Yeswaa ɗǝ nyan ndus, karang nggen Yeswaa, kǝshii maa sum ma, shee ɓan asum dakng kǝ gunji ma ta, kǝ gunji Yesu pang ɗoo bar nyee. 48Shee ɓan ma ka, “Fai min, naan karkǝɗoo mu ta makghai ya mee ni naku bara. Nakghai ɗǝ shiisa maa aɗoo.”

49Kǝ Yesu ta shee nungaa ɗǝ yii ki, muɗakghai kǝ war lokng Yayirus, mushorin araa shamang shii maa Yahudu kyaa tari pang shee ka, “Fai mu ki ɓwak kuu yaa! Kaa nak ɓana Viikuta rak.”

50Kǝ Yesu yir kaɓan, shee ɓan Yayirus ka, “Kaa shii wop rak, na aɗoo mu ta makghai yaa, fai mu ki barak.”

51Kǝ a Yesu taa gang ta lok Yayirusa, kala kaa sum bii yen kǝshii kyaa rak, angaan kaa lǝri ɗǝ mee a yeni: Biturus, Yohana, Yakub, dǝn fai ki ɗǝ nak mee en. 52Nzup maa sum kaa ta tǝkwaa, a ta shiidna kyaa pang Yesu shee ka, “Kǝ yin shiidn nak, kuu yaa rak, ng naa mor ni.”

53Kaa yir kaɓan, pang a jir yang ɗǝ shiishala ma, tung ka a ɓwak yokghai fai ki kuu yaa. 54Shee Yesu nak ta nggǝr fai kyaa, pang kap kwak mee, shee tok ma ka, fai min, nanzu! 55Pang awurki mee, por taa ta mee ya, shee nanzu nyee. Yesu ɓan yen ka naan ma awura ryaa kǝ ri. 56Awung kǝ Yesu shii na nakng fai ki, ɗǝ dǝ mee awuu shiisan ndus, pang Yesu nap yen maa kutu ka, “Kǝ yin ɓan muɗakghai rak.”

Выбрано:

Luka 8: (Boi) Tiyaa

Выделить

Копировать