Hwègbèèlì 2
2
Hwèjèelì hwe Èlìŋgɛ̀ yà Wòtani
1Nà òma e ndèma ema e hwɛ̀lɛ̀hwɛ̀ Pɛ̀ntìkɔ̀rzì e ma uke, hwalòkelì hwa ama Rzàŋgò hwà mà arzàŋgànɛ ò èki yɔ̀kɔ. 2O lìwòkimɛnɛ mɔ̀tɔ̀wù mò ma uwɛ̀lɛ̀lɛ̀yi ò ŋmanyu ya lohwà. È ma hwɛ ndi nàa mbɛ̀hvɛ̀nì ndɛnɛ ema e ma hwɛ lì aka. Rzìi mò ònda e ndawò ya arzɛ ema hwà mà hwɛ. 3Aŋga ndi wɔ̀ hwà mà ɛnɛ hwema nàa mùnya ema mò ma ayèkɛnɛ̀ mekakò me tɛmi ò mèyòhvò me tɔ̀ ima mòtò. 4Wɔ̀ hwa arzɛ hwà mà ònda na Èlìŋgɛ̀ yà Wòtani, rzìi hwa wòteya lì òhwa imbɔrzi ja hwahvɛhvɛ hwatò ema hwa rza òkòwɛ. Èlìŋgɛ̀ yɔ ndi e ma hwa lìyɛlɛ ò lì òhwa mamɛ ema hwà mà hwɛ lì òhwa.
5O eŋge hvònda, wònyà Yudà ema hwà mà hwɛ lì kanɛ̀ Lohwɛ̀ hwà mà hwɛ ò Jèrurzalɛ̀mù. Hwanu hwatò hwà mà uwɛ̀lɛ̀lɛ̀yi hwehvɛhvɛ hweki ò e rze yà mɔ̀nyɛ̀. 6Nà òma wɔ̀ hwà mà hweye mònò mɔtɔwu, ŋgindi ndɛnɛ ya hwatò e ma arzaŋganɛ ò eŋge èki ema hwalòkelì hwà mà hwɛ. Tɔ̀ ima mɔ̀ wa awu à mà jeja èhwanja na òma hwàlòkèlì hwà mà hwɛ lì òhwa, wɔ̀ hwa arzɛ hwà mà emba imbɔrzi ja awu ja mbòwa. 7O hwetamirzelì rzìi hwa ijòwa nanù ema, “Rzeke hwanù hwatò hwa arzɛ ema hwa òhwa nanù, hwa hwèlì ndi hwatò hwa erzòòkà ya Gàlìlì e? 8Nɛ rzɔ irzɔ i hwa hweyàna na òma wɔ̀ hwa òhwa ò imbɔrzi ja awu ja mbòwa e? 9O ìtììtènì ja arzu, lòŋgò la hwatò hwa mà uwɛ̀lɛ̀lɛ̀yi ndi ò èkòmè ya Pàtìyà, Mediya na Èlàmi; ò èkòmè ya Mèrzòpòtemìyà, Jùdeyà, Kapadorzìyà; O hwèkòmè hwe Pòntìyùrzì, na Èrzìyà, 10ò hwèkòmè hwe Hvrìgìyà na Pàmhvilìya, ò èkòmè ya Ìjiptò na lòŋgò la hwèhvàrzù ò èkòmè ya Lìbiya, ò tòŋgòŋgò ya Rzirènè, lòŋgò la hwa irzɔ jò uwɛ̀lɛ̀lɛ̀yi ndi ò mbòwa ya Ròmànì. 11O ìtììtènì ja hwanu hwatò hwa arzɛ, lòŋgò hwa uwɛ̀lɛ̀lɛ̀yi ndi ò mòtende mò wònyà Yudà hwanɛyi hvɛ hwa hwèlì ndi hwatò ema hwa rza enje wònyà Yudà, ndi hwa òŋgami lìlòkɛ̀ là wònyà Yudà. Lòŋgò la arzu jò uwɛ̀lɛ̀lɛ̀yi ndi ò èkòmè ya Krɛ̀tɛ na ò èkòmè ya Arèbìyà, ndi tɔ̀ nanù, tɔ̀ ima mɔ̀ wa arzu a hwèya na òma hwa òhwa ò imbɔrzi ja arzu hweyà hwe ndɛnɛ ema Lohwɛ̀ à mà gbeyɛ.” 12O lì jeja la awu na hwètàmirzelì rzìi hwa a ijòwanɛ mɔ̀kɔ na ɔ̀nɛyi nanù ema, “Mamɛ e hwèlì jànda ja enè eyà e?” 13Ndi tɔ̀ nanù, lòŋgò hwà mà hwɛ lì kikòwa hwàlòkèlì rzìi hwa a òhwa nanù ema, hwa kulɛ ndi lì nyɔ mimba.
Ŋmɛ̀ndì mò ama Pètrò
14Pètrò rzìi a tɛ̀mɛ̀nɛ ò ŋmanyu ò ìtììtènì ja lìnɛyi lìyòmɛ̀ la àpɔ̀rzìtòlò na mɔ̀kɔ, à mà karzɛ lìlò la eni ò ŋmanyu, rzìi a òhweyà e ŋgìndì nanù ema, “Ìi wònyamòwè hwa wònyà Yudà, na inyɔ hwa arzɛ ema e lìya ò mbòwa ya Jèrurzalɛ̀mù, e kòŋgɛ matò, inyɛ na e telɛlɛ mamɛ e hwèlì jànda ja ene eyà. 15Hwanu hwatò hwa rza nyɔlì ndi mìimbà na òma inyɔ e ɔ̀ŋgɛ̀lɛ̀. È hvònda e hwèlì ndi luuwa la ŋgɛ̀ŋgì mɛnɛ la elele. 16Jàyɛ̀, ene eyà e gbèyɛ̀nɛ ndi ò lì òndìrzɛ̀ jòòhwì ja ama e mòòhwèlì wà èlìŋgɛ̀ Jòhwɛlì à mà òhwe nanù ema,
17Lohwɛ̀ à mà òhwa nanù ema,
‘O mèenyà me lìrzukù,
imba na òma Èlìŋgɛ̀ ya ami ya Wòtani ndèŋgànɛ̀lɛ̀ e jèeya tɔ̀ ima mòtò.
Hwaana hwa anyu hwa wunyanà na e wɔ̀ hwa hwalana, hwa ò òhwa hweyà ema hwe ò gbèyɛ̀nɛ ò e hvònda ema e ò jɛ̀ɛ̀.
Imberza ja anyu jò ò ɛnɛ jɛ̀nɛ̀nì ema jò uwɛ̀lɛ̀lɛ̀yi ò mba ami,
hwàmbaki hwa anyu hvɛ hwa ò ɔ̀tɔ̀ indɔ̀tɔ̀.
18Nànù mɛnɛ ndi imba na gbèyà.
O mèŋge mèenyà mɛnɛ, na òma èlìŋgɛ̀ ya ami ya Wòtani e ò rzihweyà hwàgbèèlì hwa ami, hwa wunyanà na hwalana,
ndèŋgàna wɔ̀ hwa ò òhwa hweyà ema hwe uwɛ̀lɛ̀lɛ̀yi ò mba ami ndèŋgànà hwa ò òhwa hvɛ hweyà ema hwe ò gbeeyɛnɛ ò e hvònda ema e ò jɛ̀ɛ̀ ò wòrzò.
19Imba na ò uŋmɛ̀lɛ̀ hweyà hwe mànyakà ò ŋmanyu yà lohwà,
ndèŋgànɛ̀lɛ̀ na uŋmɛ̀lɛ̀ hwembànèlì ò rze ya mɔ̀nyɛ̀.
Màyìjà mò ò rzòweya, mùnya mò òŋwa na yutùtù hvɛ e wurza.
20Igbèyi jò ò timba jìtìtì,
ŋmɛ̀ɛlì hvɛ mò ayeŋgòwɛ̀ teeyi nàa màyija.
Hwene hweyà hwe arzɛ hwe ò gbèyɛ̀nɛ ndèŋgànà hwejèelì hwe Wùnyà wò ndɛnɛ na èluhwe ya ama Rzàŋgò hwe ò jɛ̀ɛ̀.
21O eŋge hvònda tɔ̀ njɛ̀nɛ̀ ema a hwɛlɛyi Rzàŋgò nanù ema a mò òŋgòwane, a ò rzùŋgàhwa.’”
22Petrò rzìi a ɛ̀ndɛ̀nɛ̀ e mbɔrzi ò wòrzò rzìi a òhwa nanù ema, “Hwàtò hwa Irzàyɛ̀lì, e òkànèyà kɔ̀yi-kɔ̀yi ò hweyà ema na arza lì òhwa. Lohwɛ̀ à mà gbeyà Yerzù mòtò wa e mbòwa ya Nàrzàrɛ̀tì ò lì gbeyà hweyà hwe ndɛnɛ hwe mànyakà na hwembànèlì ò lì e uŋmɛ̀lɛ̀ nanù ema mɔ̀ ŋmitɛ-ŋmitɛ ndi à mò òmi. Inyɔ hwiti e hwi nanù èhwanja eŋge eyà e ma gbèyɛ̀nɛ ndi ò ìtììtènì ja anyu. 23Lohwɛ̀ à mà lòma lì hwiya nanù ndèŋgànɛ̀lɛ̀ mɔ̀ à mà tɛ̀yirzɛ nanù ema, e hwɛni lì òŋwa Yerzù ò lì mò akɛlɛ ò màà mà hwàkɔ̀yèlì ema hwa mò wòmeyà ò mbarza. 24Ndi tɔ̀ nanù Lohwɛ̀ à mà mò hvùmùlɛ̀ ò kpelì, a mò rzòlohwà hvɛ ò mòrziyò mò kpelì èhwanja e ma ambana e kpelì ò lì mò lɛmbɛ nàa mòtò wa hwèwòwà. 25Kìŋgɛ̀ Dàhwitì à mà òhwa ò lì mò hvòmɛ̀nɛ̀ nanù ema,
‘Nà mà hwɛ lì ɛnɛ Rzàŋgò ò wòrzò wa ami i hvònda jà àrzɛ̀.
Nà rza unda ŋgèŋgè èhwanja à hwèlì ò lìiya la ami la mòme.
26O eŋgànɛlɛ rzɔ ŋmèma mò ami mò òndi na mɔ̀nyɛ̀ŋgì,
ndèŋgànɛlɛ hvɛ imba na òhwa ŋmɛ̀ndì na mɔ̀nyɛ̀ŋgì.
È nyò ya ami yɔ hvɛ e ò hwɛnɛ lìhvìtà na òma na hwèlì lòŋgɛ.
27Nà àrzìyòlɛ̀ ò lìhvìta èhwanja à rza ò kìnyɛ̀lɛ̀ èlìŋgɛ̀ yà ami ò èkòmè ya kpelì,
ndèŋgànɛ̀lɛ̀ ò rza ò emeyà nanù ema èèmbè yà ama è mògbèèlì wà aŋgɔ̀ ema à ò gbèeyà nà ŋmèma mɔ̀kɔ ò lì rzɔ̀mbeyà ò tenì ya rzɔ̀ŋgɔ̀.
28O ma nò uŋmɛ̀lɛ̀ injiya ema i jànà lòŋgɛ̀, ndèŋgànɛlɛ na òma o ò hwɛ ò tòŋgòŋgò ya ami na ò lìŋga.’”
29Petrò rzìi a òhwa hvɛ nanù ema, “Ìi wònyamòwè kòkò, na e òhweyà kɔ̀yi-kɔ̀yi nanù ema, e mbamba ya arzu Kiŋgɛ̀ Dàhwitì e ma ŋwa. A ma imayɛhwɛlɛ ndèŋgàna mòlìma mò eni mò hwèlì anu na irzɔ natɛ̀ɛ na e wò yawònò. 30Dàhwitì à mà hwɛ ndi mòòhwèlì wà èlìŋgɛ̀ ndèŋgànà mɔ̀ à mà hwiya yòòma ema Lohwɛ̀ à mà òhwe nanù ema a mò ŋgba. Lohwɛ̀ à mà aàtɛ yòmbò nanù ema, a ò wòwa ŋmanà ò mòtende mò ama Dàhwitì a ò mò lìirzɛ kiŋgɛ nyayi hvɔ̀kɔ na òma Dàhwitì hvɛ à mà hwɛ kiŋgɛ. 31Dàhwitì à mà ɛnɛ̀ hvòò mamɛ Lohwɛ̀ à mà hwɛ̀nɛ̀ lì gbeyà ò wòrzò rzìi à òhwa hweyà lì hvòmɛ̀nɛ̀ hwèhvùmùwèlì hwe ama è Mɔ̀ ema à Ɔ̀kirzɛ̀hwɛ̀yi. A mà òhwa nanù ema,
‘Lohwɛ̀ a rzi emeyà nanù ema mɔ̀ à ò kìnyɛ̀lɛ̀ ò èkòmè ya kpelì,
ndèŋgànɛ̀lɛ̀ èèmbè ya eni e rzi rzɔ̀mbeyà ò tenì ya rzɔ̀ŋgɔ̀.’
32Lohwɛ̀ a mà hvùmùlɛ̀ òŋgò Yerzù ò kpelì ndèŋgàna irzɔ hwa arzɛ i hwèlì mbòŋgi nanù ema à mà hvùmuwa. 33Lohwɛ̀ à mà mò ŋgba kònda yà èluhwe ò lìya là eni là mòmɛ̀. Ndeŋgànɛ̀lɛ̀ à mà mò ŋgba Èlìŋgɛ̀ yà Wòtani ema à mà òhwe nanù ema à ò mò ŋgba. Yerzù mɔ̀ hvɛ à mà jò ŋgba eŋge èlìŋgɛ̀ ndèŋgànɛ̀lɛ̀ yɔ̀ ndi è gbèyi ema inyɔ è ɛnɛ̀ nà lì hweyà tɔ̀ mamɛ ema è gbèyɛ̀nɛ̀ yàwònò. 34Irzɔ i hwi nanù ema, Dàhwitì mɔ̀ ŋmìti a rzi agbe ò ŋmanyu yà lohwà ndi tɔ̀ nanù, mɔ̀ à mà òhwa nanù ema,
‘Rzàŋgò Lohwɛ̀ à mà òhweyà e Rzàŋgò ya ami nanù ema,
Lììyà ò lìya la ami la mòmɛ̀,
35natɛ̀ɛ nà lìrzakò ema nà ò gbeyà ema ò làalè hwàkɔ̀yèlì hwa aŋgɔ̀ nà màtàŋgà ma aŋgɔ̀.’”
36Petrò rzìi a hwatɛ hvɛ ò lì òhwa nanù ema, “O eŋgànɛlɛ rzɔ inyɔ hwa arzɛ hwatò hwa Irzàyɛ̀lì e hwɛni lì hwiye na e jɔ̀kɛ̀ nanù ema, ò nò Yerzù ema inyɔ e ma wòmeyà ò mbarza mɔ̀ ndi à hwèlì e mɔ̀ ema Lohwɛ̀ à mà gbeyɛ, e Rzàŋgò ndèŋgànɛ̀lɛ̀ mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi.”
37Nà òma hwatò hwà mà hweye mamɛ ema Pètrò à mà òhwe, mèèmà me awu me ma kerzeya. Rzìi hwa ijòwa Pètrò nà inɛyi àpɔ̀rzìtòlò nanù ema, “Ìi wònyàmòwe mamɛ ja àŋgàmɛ̀nɛyi lì gbeyà e?”
38Pètrò rzìi a hwa alàhwɛ̀ nanù ema, “Tɔ̀ ima mɔ̀ wa anyu a tikòwe ò hwɛ̀ɛ̀mɛ̀ hwe wòhwe a timbeya Lohwɛ̀ rzìi a lùhwìrzɛ̀hwɛ̀ ò lìna la ama Yerzù Krirztò, aŋga nanù Lohwɛ̀ a e làkirzɛ ò wòhwe wò anyu. Ndeŋgana Lohwɛ̀ a e ŋgba jàhwèyà ja eni ja Èlìŋgɛ̀ yà Wòtani. 39Lini lì kàkɛ̀nɛ̀ lì hwèlì ndi è la anyu na hwàànà hwa anyu na hwaŋga hwatò ema hwa rzɔlɛnɛyi ema hwa rza enje wònyà Yudà. È hwèlì ndi nàa tɔ̀ ima mòtò ema Rzàŋgò ya arzu Lohwɛ̀ à mà hwɛlɛ ò lì hwɛ na mɔ̀.”
40Pètrò à mà hwa kòkòwɛ̀lɛ̀ na lì hwa òhweyà ihvɛhvɛ nyayi na nyayi ja hweyà. A ma hwa atɛkɛ nanù ema, “Tɔ̀ ima mòtò arzùŋgɛ̀ lòŋgɛ la eni. È rza enje tɛ nanù Lohwɛ̀ a e kɔ̀kìrzɛ̀ ŋgàna hvɔ̀kɔ na òma a ò kɔ̀kìrzɛ̀ ene nyɔ̀ŋgɔ̀nì ya wòhwe.” 41Rzayi-rzayi ja hwàtò ema hwà mà lòkɛ̀ eyà ema Petrò à mà òhwe hwà mà lùhwìrzɛ̀hwɛ̀. O wòŋgò wùnyà mɛnɛ, eyà ya hwekòlì hweyàwò hwe hwatò hwe mà ahwatɛ ò Mɔ̀rzɔ̀ŋgi mò hwàlòkèlì hwa ama Krirztò. 42Hwàlòkèlì hwà mà ika mèèmà me awu ò lì òkòwa hweyà ema i àpɔ̀rzìtòlò i ma hwɛ lì hwa òkòlɛ, ndèŋgànɛ̀lɛ̀ hwà mà hwɛ mòndeŋgè na hwatò ema hwa lòkɛ̀ Krirztò. Mɔ̀ na wɔ̀ hwà mà hwɛ lì kànɛ, na lì lalɛnɛ̀ èki yɔ̀kɔ.
Lì arzaŋganɛ la hwatò ema hwa lòkɛ̀
43Tɔ̀ ima mòtò à mà jeja, ò nyòla rzayi-rzayi ja hweyà hwe mànyakà na hwembànèlì ema i àpɔ̀rzìtòlò i ma gbeye. 44Hwàlòkèlì hwa arzɛ hwà mà hwɛ lì arzàŋganɛ ekì yɔ̀kɔ na ò lì akahwanɛ tɔ̀ mamɛ ema hwà mà òhve. 45Hwa mà àhwirzɛ̀ hwerzàŋgò hwe awu, rzìi hwa kahwa lì hvòmɛ̀nɛ̀ hweyàrzèlì hwe tɔ̀ ima mòtò. 46Wùnyà tɛ wɔ̀ hwa mà hwɛ lì tàneyà ò Ndawò yà Lohwà ò lì kanɛ̀. Wɔ̀ hwa mà làlɛnɛ̀ ò màndawò mà awu nà mɔ̀nyɛ̀ŋgì mò arzɛ nà ŋmèma mɔ̀kɔ. 47Hwa mà hwɛ lì eka Lohwɛ̀ nà ò lì òka là mɔ̀nyɛ̀ŋgì mò hwèhwɛ̀ɛlì hwe gbamù hwe hwatò hwa arzɛ. Ndèŋgana wùnyà tɛ Rzàŋgò à mà hwatɛ ò mòndèŋge mò awu hwaŋga ema hwa mà hwɛ lì rzùŋgàhwà.
Выбрано:
Hwègbèèlì 2: bri
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2022, CABTAL
