Hwègbèèlì 15
15
Wòlìya wò lì kulɛ e mbɔrzi ya ŋmèmba ò Jèrurzalɛ̀mù
1Lòŋgò la hwatò hwà mà uwɛ̀lɛ̀lɛ̀yi ò erzòòkà ya Jùdeyà rzìi hwa jà lì uka ò mbòwa ndɛnɛ ya Antìyɔ̀kì. Hwa wòteya lì òkòlɛ̀ hwàlòkèlì nanù ema, “Mòtò a rza endàhwi tɛ na òma e mbenda ya ama Mòrzè ya arza, a rza tanɛ a rzùŋgàhwà.” 2Ène eyà e ma jàneyà Pàwolò na Bànàbàrzì hvenda ndɛnɛ natɛ̀ɛ wɔ hwà mà imanɛlɛ nanù ema Pàwolò, Bànàbàrzì na hwahvɛhvɛ hwatò hwa ɛndɛ ò Jèrurzalɛ̀mù, ò lì ɛndɛ lì ɛnɛ i àpɔ̀rzìtòlò na hwàtimbèlì hwa ŋmèmba lì hvòmɛ̀nɛ̀ ene eyà. 3Hwàtò hwa ŋmèmba hwà mà ɛndɛ lì hwa lìyɛlɛ ò njiya. Nà òma wɔ̀ hwà mà akeyà ò hwèrzòòkà hwe Hvɔ̀nìrzìyà na Rzàmarìyà hwà mà nɔ̀ŋgeyà hwatò nɛ hwaŋga hwatò ema hwa rza enje wònyà Yudà hwà mà tikòwahwɛ ò lì timbeya Lohwɛ̀. Mònò ŋmɛ̀ndì mò ma lìŋgirzɛ hwàlòkèlì hwa arzɛ. 4Nà òma Bànàbàrzì na Pàwolò hwà mà ùke ò Jèrurzalɛ̀mù, ŋmèmba ema mò ma hwɛ aŋga, i àpɔ̀rzìtòlò, na hwàtimbèlì hwa ŋmèmba hwà mà hwa arzàŋgànɛ̀lɛ̀. Pàwolò na Bànàbàrzì hwà mà hwa òhweyà hweyà hwe arzɛ ema Lohwɛ̀ à mà gbèyɛ ò lì akeyà na wɔ. 5Ndi tɔ̀ nanù, lòŋgò la hwàlòkèlì ema hwà mà hwɛ ò ehvehva ya Hvàlìrzàyì hwà mà tɛ̀mɛ̀ ò ŋmanyu rzìi hwa òhwa nanù ema, “Hwàŋga hwatò ema hwa rza enje wònyà Yudà ema hwa lòkɛ̀ Yerzù, hwa àŋgàmɛ̀nɛyi lì endàhwa, na lì òhwahwɛlɛ ò lì ika imbenda ja ama Mòrzè.”
6Ène eyà e ma gbeyà ema I àpɔ̀rzìtòlò na hwàtimbèlì hwa ŋmèmba hwà mà taneya ò lì chakumɛlɛ ene mbɔrzi. 7O mburzà lì chakumɛlɛ ema lì ma wawa, Pètrò rzìi a tɛ̀mɛ̀ ò ŋmanyu rzìi a hwa òhweyà nanù ema, “Ìi wònyànyàŋgò ami kòkò, e hwi nanù ema Lohwɛ̀ à mà nò hvɔ̀rzɔ̀ ò ìtììtènì ja anyu, ò lì òhweyà hwatò ema hwa rza enje wònyà Yudà Ŋmɛ̀ndì mò Gbamù aŋga nanù wɔ̀ hwa mò hweyà rzìi hwa mò lòkɛ̀. 8Lohwɛ̀ ema a hwi mèèmà me hwatò, à mà uŋmɛ̀lɛ̀ nanù ema à mà ŋgba hwaŋga hwatò ema hwa rza enje wònyà Yudà è wònjà ò lì lòkɛ̀, na òma à mà hwa ŋgbe Èlìŋgɛ̀ yà Wòtani, ŋgàna hvɔ̀kɔ mɛnɛ na òma à mà jò ŋgbe irzɔ hvɛ e yɔ. 9Lohwɛ̀ a rzi gbèye tɔ̀ ndandò ò wɔ̀ tɔ̀ irzɔ, èhwanja mɔ̀ à mà hwa làkirzɛ wòhwe wò awu lì akeyà na lìlòkɛ̀ la awu. 10Nàŋgɛ̀ rzɔ mamɛ ndèŋgàtɛ inyɔ e keka ò lì kèkirzɛ Lohwɛ̀ e? O lì gbeyà nanù ema hwatò ema hwa lòkɛ̀ Yerzù hwa hwànɛ miyuna ema imbamba ja arzu tɔ̀ irzɔ i rza tanɛ lì hwanɛ̀ e? 11Jàyɛ̀! Irzɔ i lòkɛ̀ ndèŋgànɛ̀lɛ̀ i rzùŋgàhwi lì akeyà na e ndèli ya ama e Rzàŋgò ya arzu Yerzù nyayi hvɔ̀kɔ na òma wɔ̀ hvɛ hwa rzùŋgàhwi.”
12Èŋge ŋgindi ya arzɛ e ma hwɛ ndi lì òkànèyà ŋmɛ̀ɛ, na òma Bànàbàrzì na Pàwolò hwà mà hwɛ lì hwa òhweyà hwèèmbanelì na mànyàka ema Lohwɛ̀ à mà gbeye lì akeyà na wɔ ò ìtììtènì ja hwaŋga hwatò ema hwa rzi hwɛ wònyà Yudà. 13Lirzakò ema hwà mà kulɛ lì òhwa, Jèmìrzì rzìi a òhwa nanù ema, “Wònyànyàŋgò hwa ami e nò òkànèyà tɛ! 14Rzimɔ̀ni mɔ̀ à mà jò uŋmɛ̀lɛ̀ naŋgɛ nɛ Lohwɛ̀ à mà wòteyà lì uŋmɛ̀lɛ̀ hwatò ema hwa rza enje wònyà Yudà, ŋmèma mò eni mò gbamù. È mòhvɔ̀rzèlì wà hwatò ò ìtììtènì ja awu ò lì hwɛ hwatò hwa eni. 15Ène eyà e gbeyi hwèyòhwèlì hwe hwà-òhwèlì hwa hwèlìŋgɛ̀ hwe òndìrzɛ̀hwɛ. È tìlahwì nanù ema,
16‘Imba Rzàŋgò na òhwa nanù ema, ene eyà e akayi tɛ, na tìmba lì jà hvɛ,
Nà òŋga e ndawò ya ama Dàhwitì hvɛ ema e ma wùùlɛ̀hwɛ̀.
Nà ò òŋga hwèèmà hwe arzɛ ema hwe ma wùùlɛ̀hwɛ̀ ndèŋgànɛ̀lɛ̀ na ò hwe timbirzɛ na òma hwe ma lòme lì hwɛ.
17Aŋga nanù hwanɛyi hwatò hwa e rze ya arzɛ hwa ò nò jèeya,
nà mà hvɔ̀rzɔ̀ hwatò ema hwa rza enje wònyà Yudà ò lì hwɛ hwatò hwa ami. Imba e Rzàŋgò ndi òhwi nanù.
18Imba ndi nà mà gbeyà hwenè hweyà hwe arzɛ hwe ma hwiyahwe natɛ̀ɛ na e hvònda ya kòhwa.’”
19Jèmìrzì à mà ɛndɛ ò wòrzò hvɛ ò lì òhwa nanù ema, “È mbakò ya ami e hwèlì ndi ema irzɔ i rza tàkirzɛ hwanù hwatò ema hwa rza enje wònyà Yudà ema hwà mà àyìŋgòwɛ̀lɛ̀lɛ̀ Lohwɛ̀. 20Eyà ema irzɔ i hwɛni ò lì gbeyà e hwèlì ndi ò lì hwa tìleyà kààtì nanù ema, hwa rzi làa tɔ̀ mòlèlì ema mò ŋgbààhwà nàa màhwèyà ò hwèrzùmbù èhwanja mòŋgò mòlèlì mò rza rzàŋgi, hwa kiye mòrzònje, hwa kìye ò lì làa hwèembè ema hwe ŋwelì mòtìmà, ndèŋgànɛ̀lɛ̀ hwa rzi laa hvɛ màyija. 21Irzɔ i hwi nanù ema natɛ̀ɛ na e hvònda kòhwa imbenda ja ama Mòrzè i ma làŋgàhwa ò ndawò ya màkanɛ̀ ya wònyà Yudà ò tɔ̀ ima Wùnyà wò lì Arzìyòlɛ̀. Ndeŋgana eŋge mbɔrzi e ma òhwahwa ò tenì ya mambòwà mà ndɛnɛ ma arzɛ.”
Itita ja hwàlòkèlì ema hwa rza enje wònyà Yudà
22O èŋgànɛ̀lɛ̀ I àpɔ̀rzìtòlò na hwàtimbèlì hwa ŋmèmba na ŋmèmba mò arzɛ hwà mà kulɛ nanù ema, hwa hvɔ̀rzɔ̀ e hwa awu hwatò rzìi hwà hwa òma ò Antìyɔ̀kì mòndèŋge na Pàwolò na Bànàbàrzì. Wɔ̀ hwà mà hvɔ̀rzɔ̀ Jùdàrzì ema à mà hwɛ̀lɛ̀hwɛ̀ Bàrzabàrzì na Rzàyilàrzì, wunyanà ema hwà mà hwɛ hwàtimbèlì ò tenì ya hwàlòkèlì. 23È kààtì ema hwà mà hwa òmane ò Antìyɔ̀kì e ma òhwa nanù ema, “Irzɔ I àpɔ̀rzìtòlò, na hwàtimbèlì hwa ŋmèmba, ema i hwèlì wònyànyàŋgò hwa anyu jò e òmelì inyɔ wònyànyàŋgò hwa arzu hwa arzɛ ema e rza enje wònyà Yudà iikɔ̀mi. Inyɔ ema e lìya ò mbòwà ndɛnɛ ya Antìyɔ̀kì ò erzòòkà ya Rzìrìyà na Rzìlirzìyà. 24Irzɔ i ma hweyà nanù ema lòŋgò la hwatò ema hwa uwɛ̀lɛ̀lɛ̀yi ò mba arzu lì e jèeya, wɔ hwa e emirzɛyi na hweyà ema hwa òhwa. Ndi inyɔ e hwɛni lì hwiya nanù ema i rzi hwa ŋgbelì tɔ wònjà ò lì gbeyà nanù. 25Irzɔ i ma lìya ò lì chakumɛlɛ hwenè hweyà, ò èŋgànɛ̀lɛ̀ irzɔ i ma kaka nanù ema, irzɔ je e hvɔ̀rzèyà ŋgurzu ja hwatò ema je e òmeya. Wɔ hwa ɛndɛ na Pàwolò na Bànàbàrzì ema irzɔ i lìŋgàni rzayi-rzayi. 26Wɔ̀ ema hwà mà lòme lì ika mòŋgɛ ma awu ò mbenakò ò lì gbèeyà e Rzàŋgò ya arzu Yerzù Krirztò. 27O èŋgànɛ̀lɛ̀ irzɔ je e òmeya Jùdàrzì na Rzàyìlàrzì wɔ hwa e òhweyà eŋge eyà mɛnɛ ema irzɔ i ma e tìleya. 28Èlìŋgɛ̀ yà Wòtani e ma jò lìyɛlɛ nanù ema i rza e tàkirzɛ na hwehvɛhvɛ hweyà lì aka tɛ hwene hweyà ema hwe hwèlì wòlìtò. 29È rzi keka lì làa tɔ̀ mòlelì ema mò ma ŋgbààhwɛ̀ hwèrzùmbù. È rzi keka lì laa màyija, e kìye ò lì làa hwèembè ema hwe ŋwelì mòtìmà. È rzi gbeyà mòrzònje. È ò hwɛ gbamù e rza gbèyi tɛ hwene hweyà. Je ahvìtɛ̀ hwèlìyelì hwe gbamù.”
30Nà òma hwà mà kulɛ lì tìla eŋge kààtì, hwà mà ɛndɛ lì lìyɛlɛ hwaŋga hwatò ò njiya ò yɔ̀ndɔ̀ ya awu ò Antìyɔ̀kì. Nà òma hwà mà uke aŋga, hwà mà rzaŋga hwàlòkèlì hwa arzɛ rzìi hwa hwà ŋgba eŋge kààtì. 31Nà òma hwaŋga hwatò hwà mà laŋge eŋge kààtì, wɔ hwà mà lìŋga ehwànja ò ma hwɛ ŋmɛ̀ndì ema mò ma lìŋgirzɛ mèèmà me awu. 32Jùdàrzì na Rzàyìlàrzì, ema wɔ̀ hwiti hwà mà hwɛ ndi hwà-òhwèlì hwa hwèlìŋgɛ̀, hwà mà òhwa rzayi-rzayi ò lì kɔ̀mɛ̀lɛ̀ na lì embɛ hwàlòkèlì. 33Nà òma hwà mà lìya aŋga ò ŋmanà hvòka hvònda hwàlòkèlì hwà mà ɛndɛ lì hwà lìyɛlɛ na ɛ̀yɔ̀lɛ̀ rzìi hwa timbeya hwatò ema hwà mà hwa òma.#15.33 Lòŋgò la ikààtì ja wòrzò i lati ŋmɛ̀ŋgɛ mò ùkirzɛ̀ 34: “Ndi Rzàyìlàrzì à mà kulɛ nanù ema mɔ̀ à lìya aŋga.” 35Pàwolò na Bàlabàrzi hwà mà lìya ò Antìyɔ̀kì ò ŋmanà hvòka hvònda. Wɔ̀ na rzayì-rzayì ja hwahvɛhvɛ hwatò, hwà mà òkòlɛ̀ na lì òhwa eyà ya ama Rzàŋgò.
Pàwolò na Bànabàrzi hwa akakòwɛ
36O mburza hvònda, Pàwolò rzìi a òhweyà Bànàbàrzì nanù ema, “Inyɛ̀ i timbe, ò tenì ya maŋga mambòwà ma ndɛnɛ ma arzɛ ema i ma lòmè lì òhwa eyà ya ama Rzàŋgò, ò lì hvɛ̀hvɛ hwàlòkèlì na ò lì ɛnɛ nɛ hwa hwèlì.” 37Bànàbàrzì à mà arza lì wòwa Yòwanìrzɛ̀ Màkòrzì na wɔ̀, 38Ndi Pàwolò à mà rzɔ̀rzɔ̀ na ŋginyà èhwanja Yòwanìrzɛ̀ Màkòrzì à mà lòma lì hwa kìnyɛ̀lɛ̀ ò mbòwa ndɛnɛ ya Pàmhvilìya ndèŋgànà hwa e kulɛ èwòlò. 39Ène ŋgàna e ma hwa jàneyà mbùnakɛ̀ ya ŋginyà ema e ma hwa kakòhwà. Bànàbàrzì rzi a wòwa Yòwanìrzɛ̀ Màkòrzì na mɔ̀, rzìi hwa ɛ̀ndɛ yɔ̀ndɔ̀ ya malìhwa ò lì aka yùulu rzìi hwa uka ò èkòmè ya Rzàyiprɔ̀rzì. 40Pàwolò mɔ̀ à mà hvɔ̀rzɔ̀ Rzàyìlàrzì rzi a ɛ̀ndɛ. Hwàlòkèlì hwà mà hwa kànɛlɛlɛ nanù ema e ndèli ya ama Rzàŋgò a hwa timbe. 41Pàwolò à mà akànèyà Rzàyilarzì ò erzòòkà ya Rzìrìyà na Rzìlirzìyà, hwà mà hwɛ lì ɛndɛ na lì ètìrzɛ̀ ŋmèmba.
Выбрано:
Hwègbèèlì 15: bri
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2022, CABTAL
