От Матфея 9

Иисусым На̄лъҳускаңа Унӣқақ

1Та̄хкын Иисус аңьямун ӯхлъюни иңлюңанун на̄йвам аӷвиқақ. Ынка̄м Капернаумымун агляқақ ныминун. 2Иляңита югыт лъңанун тагитка̄т унӣқақ ю̄к алъиӷа̄кун. Иисусым лӣгиклъюки ухпықилъыҳтулңит, пика̄ унӣқақ: «Иӷнымни, қуя! Сыӷлыҳқылъыҳтын сыӷывутут».

3Та̄хкын иляңи апыҳтуӷикаюгыт Лӣлиҳтӯсяның сюмыҳтаӷақат: «Уна ю̄к сыӷлыҳқыҳлъяхтуқ. Кияӷныӷуюхтуқ сыӷывутилъыӷмикун сыӷлыҳқылъыӷның!»

4Иисусым лӣсимаклъюки сюмыҳтаӷалъҳит, пикӣ: «Сяңан сыӷлыӷмың сюмыҳтаӷаӷыстык? 5Налиқ акузилъық пияқнӣта: “Сыӷлыҳқылъыҳтын сыӷывутут” налиӷмың: “Макылъютын пиюги”? 6Лӣгикыснақамси Иӷныӷа Югым сыӷывутилъыҳқалгутаңа сыӷлыҳқылъыӷмың нунами хўани». Ынка̄м унӣқақ ю̄к пика̄: «Макылъютын, алъиӷан тугулюку, агля̄!»

7Ю̄к макылъюни агляқақ. 8Юлӷутыт ысҳапаглюку талъюӷьюкат, усюқыхка̄т Кияӷнық таўатылңуӷмың аҳтуӷьяҳқа̄нӷилъылискаңи югыт.

Иисусым Туқлъюқаңа Матфей

9Та̄м киңуңаның Иисусым иглыӷуткылъюку ысҳақа̄ налогмың қырңуҳтистыңа, ақумлюни қыпҳаӷвигмини; Матфейеңуфтуқ. Пика̄: «Малихтиңа».

Ынка̄м Матфейем ныкывлюни малихтыка̄.

10Мулюхпынатың Иисусылъю малихся̄ҳтыкулъҳӣт ныӷьяҳтуқат Матфейенкунун. Ныӷӯсималюки налогмың қырңуҳтистылӷутытлъю, сыӷлыҳқыстылӷутытлъю ақумлютың Иисусылъю ныӷылгусиқӣт. 11Иляңита Фарисеит ысҳаӷлюку ныӷылгусӣӷилӷӣ, малихся̄ҳтыңи а̄птыкӣт: «Сяңан апыҳтуӷистывси ныӷылгусиҳтаки налогмың қырңуҳтистытлъю, сыӷлыҳқыстытлъю?»

12Иисусым нагалъюки кӣмсиқӣ: «Югунқыхтат аӷалъыхтаҳсюӷнӣтут, тама̄куңина̄т қинуюлӷӣт. 13Лӣсяҳтуҳтыху сямың писӣтаңа уна Акузитнилңуқ Игақыхкақ хўатын пилӷӣ: “Пиюкынӷитанка аҳқутыси, итупилъ наңлъыхтаҳтысюгамси”. Тагиңунӷитуңа тахсиӷналюки ылъқуӷутңалӷӣт, иўырңа тагиңӯңа тахсиӷналюки сыӷлыҳқыстыт».

А̄пқуӷа̄лъық Посталъыӷмың

14Та̄хкын Иоанным Крестителым малихся̄ҳтыңита такулюку Иисус а̄птыка̄т: «Сяңан хўаңкуталъю Фарисеитлъю аўын постақыста, нақам малихся̄ҳтытын постахпынатың?»

15Иисусым кӣмсиқӣ: «Нулиҳтуӷьяҳқам тахсиқлъиқӣ қивӷуңаяҳқа̄ўа̄т таўанлъюку нулиҳтуӷнақылӷӣ? Йыӷлыгилъю! Иўырңа пилъыҳқақ ка̄сяҳқа̄гуқ нулиҳтуӷнақылӷӣ лъңитның иқитыстыкумыхтыху, ынңа̄талъ тама̄ни аӷныӷни посталъықут».

Иисусым Апыҳтӯсӣ Илясяҳқа̄нӷитут Иудеит Апыҳтӯсӣтнун

16Та̄хкын Иисусым пикӣ: «Китум алңунак иля̄ӷна̄нӷита̄к а̄ткалюгык нутаӷамың лӣқныӷмың. Иля̄лъық қылъюҳтыкуми пӣгулъықуқ, ынка̄м пӣлъық сюлъывылъықуқ. 17Талўа китум алңунак виноӷраӷаӷмың имиӷна̄нӷита̄ аўатаҳпалюк қаюҳлъяк аўатаҳпалъюк имиқуми а̄фкаӷлюни имӣӷулъықуқ. Ынка̄м аўатаҳпалъюк атӯяҳқа̄наниҳлъықуқ. Иўырңа аўатаҳпаграӷақ имиқуми виноӷраӷаӷмың қырңа̄гмык на̄вна̄нӷитук».

Иисусым На̄лъҳутилъҳалъю, Уңуваҳтилъҳалъю

18Паниның Иисус акузималюку Иудеит иглыӷутистыңат итыӷлюни сыгысқуҳлъюни мануңакун пика̄: «Паника хўа̄ туқунҳа̄гуқ, иўырңа такулюку ся̄фтыкувгу уңуваҳлъықуқ».

19Ынка̄м Иисусым ныкывлюни малихтыка̄, малихся̄ҳтыңилъю малигуткат.

20-21Агля̄малюки, қинуюлӷӣм аӷнам такука̄ Иисус тунутаңаның. Қуля ма̄лӷук сӣпнықлъюку аюмиқулъық кӣтылъқуңигалңуқ. Хўатын сюмыҳтаӷақақ: «Ся̄фтықыҳсяқумкун а̄тка̄кун, на̄лъҳунъаяҳтуңа». Ынка̄м ся̄фтыка̄ аткуя̄ӷан кынӣкун.

22Иисусым қӣвуткылъюку ысҳаӷлюку аӷнақ пика̄: «Панимни алиңыхпынаң! Ухпықилъыҳпыгун на̄лъҳутутын». Ага аӷнақ на̄лъҳуткақ.

23Та̄хкын Иисусым ка̄лъюни иглыӷутистынкунун, ысҳақӣ туқӣлӷӣни қалӷиҳтаҳтытлъю, юлӷутытлъю қия̄ӷӯатыҳлъялӷӣт. 24Таўавык пикӣ: «А̄нлыӷа̄тык! Аӷнаӷаҳақ туқулъҳитуқ қава̄гуқ!»

Иўырңа ныңляқыхка̄т. 25А̄нлыӷа̄тысята, итыӷлюни Иисусым тугука̄ ӣхакун, ынка̄м аӷнаӷаҳақ уңувақақ. 26Ынка̄м та̄на алъя̄ҳлъюхўаҳтилъық уңипақыхка̄т тамаңани.

Иисусым На̄лъҳускык Ая̄как Югык

27Та̄хкын Иисус аӷуляқыхкақ нымың. Ая̄как югык малихся̄қа̄к, акилӷӯма̄гмык хўатын: «Иӷныӷани Давидым, наңлъыгьягутикуң!»

28Ага мыңтыӷамун итыӷьян малихтыка̄к, ынка̄м Иисусым а̄птыкӣ: «Ухпықыстынъа̄ на̄лъҳутилъыҳқақа?»

Кӣмсиқа̄к: «А̄а Атанық!»

29Та̄хкын Иисусым ийңитхун ся̄флъюкык пикақ: «Ухпықилъыҳпытыгытун апыӷӣӷли». 30Ынка̄м ысҳаӷьягуткак. Иисусым иныҳтыңъўа̄ӷак: «Уңипаҳпынаси китумун алңунак».

31Иўырңа навык пиныӷмыгни а̄пҳақыхкаңӣт Иисусым апыӷӣқа̄ лъмыгнун.

Иисусым На̄лъҳускаңа Акузиңигалңуқ Ю̄к

32Та̄кук югык аӷуляқумалюкык, Иисусымун тагитка̄т ю̄к акузиңигалңуқ қаюҳлъяк илюмикун туӷныӷалык. 33Лыган Иисусым туӷныӷақ а̄ныста̄, ю̄к ага акузикақ. Ынка̄м юлӷутыт сяӷӣӷаюгулъютың хўатын пикат: «Хўатылңуӷмың алъя̄ҳлъюўаҳтилъыӷмың ысҳа̄сигатукут Израилыми!»

34Иўырңа Фарисеит пикат: «Умӣлгита туӷныӷа̄т аҳтуӷьяҳқа̄нӷилъылисима̄т а̄нысқӣсқылъюку туӷныӷаӷның».

Иисусым Наңлъыгьягускаңи Югыт

35Та̄хкын Иисус иглыҳтыкақ тамаҳа̄ни Галилеями, апыҳтуӷимаӷми синагогаңитни, уңипақимаӷмилъю Пинилӷӣның Уңипа̄мың Атаныҳпагулъҳым. На̄лъҳуқуқӣ қамахлъюки ақниӷнылгытлъю, қинуюлӷӣтлъю. 36Ысҳаӷлюки юлӷутыҳлъягыт наңлъыгьягуткӣ, қаюҳлъяк сыӷлылӣӷңаҳлъягыт, каютңунатың; пынъӣӷыстун пынъӣӷниҳтыңилңуӷыстун. 37Та̄хкын малихся̄ҳтыни пикӣ: «Углялӷӣм югым ухпықсюгақӣт Пинилӷӣт Уңипат. Тама̄куңӯт успутңалӷӣт нунивахсыӷанун унатаӷьяқлъыхӣна̄ҳтыкат. Та̄ўаңинақ паляпигӯт қыпҳаҳтыт. 38Ынка̄ңам юӷаҳтык Атанӷанун унатаӷьяҳқат, каяхтисқылъюку қыпҳаҳтыкаҳқамың унатаӷьяҳқа̄нун».

Выбрано:

От Матфея 9: ess2

Выделить

Копировать