Mateo 2
2
Wami bara‑ka mai kake
1Bere Yodeya‑kaya Yeso wade‑ya wami bara‑ka mai wi‑wina mai kake, Yerosare‑ya mai kobonameteni. Bere‑kaya Yeso wade‑ya Yodeo ai‑ka hidi webote i‑di Erodi tohematane.
2Yerosare‑ya mai kobona,
“Yodeo dai‑ka hidi webote wademona oda awabone, mahi ka‑kaki‑kaya hika amowa oda awe, oda kakeni, Deoso‑ka Ka‑kadika oda awabonehe.” Mai ati nameteni.
3Hidi webote‑mona tamine‑ya i‑di Erodi mite, atibodi yama‑ya kadike, Yerosare‑ya mai wi‑wina mai nafi mai atibodi yama‑ya kadikahari nameteni.
4Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha na, i‑di Erodi ati ene mai yorotokana, mai‑ya hiyare,
“Deoso‑ka Ka‑kadika wadebona, yama hani ati na, ebeni‑kaya wadabonati?” I‑di Erodi ati ne,
5“Bere Yodeya‑kaya Kirisito wadebona, Deoso ati‑ya mi‑mita ati nematamonane.
6‘Bere Yodeya‑ka tabora bide towe tohi awirini. Bere amosateni, fara‑ya ai‑ka hidi wadebonane.’ Deoso‑ka yama hani ati teni.” Mai ati nameteni.
7Mai nafi tokoma, mai nowati‑ya wami bara‑ka mai hinama mai‑ya i‑di Erodi haane, mai kamake, mai‑ya hiyare,
“Eme abariko ne‑ya amowa dai awimeteti?” I‑di Erodi ati nematane.
8Mai ati‑ya i‑di Erodi mite, mai‑ya yose,
“Bere‑ya dai tokahi, ewe dai sibaniya, dai wasiya, owa‑kaya dai kamahi. Dai ati omitiya, makobote okomiya, okahiyarebonane.” I‑di Erodi ati nematane, keyehe‑ya hirineri.
9I‑di Erodi ati‑ya mai mita, mai toka, hibati‑ya amowa mai hiawe‑ya mai awamatasameteni. Amowa yakane, mai hiwakatome, ewe sawi‑ke yobe neme‑ya amowa maatowitimatane.
10Amowa‑ya mai awa, mai ya‑yaina, mai ya‑yaini nafemeteni.
11Yobe‑ya mai tokiyoma, Yeso madi‑ya fame‑ya mai awa, Yeso‑ya mai kahiyara, Yeso‑ka yama‑bone‑ya mai daanameteni. Oro‑ya mai daa, yama mahi amosa‑ya mai daa, mira‑ya mai daa, mai nameteni.
12Deoso‑ka yo‑yose ati wadarine‑ya mai awa,
“I‑di Erodi‑ya dai tokomariyahi.” Deoso‑ka yo‑yose ati wadarine ati nematane.
Wada ihi hawi one‑kaya mai tokoma, hini mai tabori‑kaya mai tokoma, i‑di Erodi‑ya mai hiyari awirameteni.
Eyito‑ya mai toka
13Mai tokoma mai nowati‑ya Deoso‑ka yo‑yose i‑di Yose‑ya wadarine hiyare,
“Yose didafihi. Yeso madi‑ya fame tiwakahi. Eyito‑ya dai tokiya, Eyito‑ya dai nahoyahi. Tiwa haa·onamatasaboneni. Yeso‑ya i‑di Erodi sibanebonane, Yeso‑ya nanahabebonaha.” Deoso‑ka yo‑yose ati wadarine ati nematane.
14I‑di Yose dodafi, fadi bidi‑ya fama‑ya towakebona, yama soki‑ya mai yanana, Eyito‑ya mai towakameteni.
15I‑di Erodi abi awisareya, Eyito‑ya mai winameteni. Makobote i‑di Erodi abawahematane.
“Oka Dao Eyito‑ya wineya, haa·onaboneni.” Deoso ati nematamonane.
Hibati‑ya Deoso ati‑ya mi‑mita ati‑nima yama nawahameteni.
16Wami bara‑ka mai tokoma, mai tamine‑ya i‑di Erodi mite, yawe,
“Owa‑ya mai hiyaramabone ona, owa‑ya mai hiyarami awireni.” I‑di Erodi atibodi ati ne,
yawi kite, sodado mai‑ya yose,
“Bere‑ya dai tokahi. Madehe makidi 2 ano toha dai nanahaba, madehe bi‑bidi na toha na, mai nafi dai nanahabahi. Bere‑ka madehe dai nanahaba, Bere yakari‑ya mai wi‑wina mai‑ka madehe dai nanahaba, dai nahi.” I‑di Erodi ati nematane.
“Ano one‑ya amowa‑ya mai awa, fara hidi‑mona‑ka ano fami yanatona awineni.” I‑di Erodi atibodi ati nematane.
17Yeremiya Deoso ati‑ya mi‑mita‑mata ati‑mata‑nima yama nawahameteni.
18“Rama‑ka mai ohinaboneni. I‑di Hakeo‑ka nodi mai‑ka madehe tabiyo mai ohinaboneni.” I‑di Yeremiya‑ka yama hani ati neni.
Nasare‑kaya mai toka
19Eyito‑ya i‑di Yose wine‑ya i‑di Erodi abe, Deoso‑ka yo‑yose i‑di Yose‑ya wadarine hiyare,
20“Isara·eo‑kaya dai tokomahi. Yeso‑ya ati nanahabemari, abawahane.” Deoso‑ka yo‑yose ati wadarine ati nematane.
21Ati ene Yeso madi‑ya fame‑ya i‑di Yose towakamematane, Isara·eo‑kaya.
22I‑di Erodi bidi oni i‑di Akerao tohe, Yodeya‑ya mai wi‑wina mai‑ka hidi tohawahe, tamine‑ya i‑di Yose mite, habo siitonematane. Yama soki‑ya i‑di Yose wada‑ya awamatase,
“Yodeya‑ya tikariyahi.” Ati wadarine ati nematane.
Wada ihi Karireya‑kaya mai tokabisameteni.
23Karireya‑kaya mai toka, Nasare‑kaya mai winawahameteni.
“Deoso Bidi Nasare‑ke amane, mai ati naboneni.” Deoso ati‑ya mai mi‑mita mai ati nametemoneni.
Fare Yeso Nasare‑ke amane.
Выбрано:
Mateo 2: jaaNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
