Marko 3

Yesu wachizga munthu wajanja lakuphapha

(Mateyu 12.9-14; Luka 6.6-11)

1Ndipo wangusere mu sinagoge lo, ndipo mwenimuwa mwenga munthu wa janja lakuphapa. 2Ndipo ŵamukhazganga, vinu wamuchizgenge pa Sabata, alinga kuti wamusaniye kafukwa. 3Ndipo watiti ku munthu wakuŵa ndi janja lakuphapa yo, “Yiza kuno.” 4Ndipo wanguŵafumba, “Kumbi kuyamu pa Sabata kuchita umampha, pamwenga kuchita uheni? Kutaska uzima, pamwenga kubaya?” Kweni iwo ŵanguja chete. 5Ndipo wakuŵalereska kwakuzunguliya ndi chikwiya, wangukwininika pa unononu wa mitima yawo, ndipo watiti ku munthu yo, “Tambasuwa janja lako lo.” Ndipo wachatambasuwa, janja lake linguweremo. 6Ndipo wachituwamo ŵaFarisi, sosonukweni pamoza ndi ŵaHerode ŵachitanga upu paku iyo, mo ŵangamunangiya.

Mzinda pa likumba la nyanja

7Yesu pamoza ndi ŵasambizi ŵake ŵanguwere ku nyanja; ndipo ungumrondo urapasi ukuru wa ŵanthu kutuwa ku Galile: ku Yuda, 8ku Yerusalemu, ku Idumeya, ndi kusirgha ku Yordane, mpaka ku Turo ndi Sidoni, urapasi ukuru, pakuvwa vyo vyose wachitanga, ŵanguza kwaku iyo. 9Ndipo wanguŵanene ŵasambizi ŵake kuti kangaraŵa kamulinde, pa chifwa cha mzinda wo, kuti vinu ŵangamufinyikizga. 10Chifukwa wanguŵachizga ŵanandi, viyo kuti ŵangumumotoke wose ŵakuŵa ndi zinthenda mwakuti ŵamukwaske. 11Ndipo wose ŵakuŵa ndi mizimu yawiyu, ŵachimuwona, ŵaŵanga paurongo pake, ndipo ŵabongonga kuti, “Iwe ndiwe Mwana waku Chiuta.” 12Ndipo wangwalanguliya ukongwa kuti ŵangamuwandiskanga cha.

Yesu wasankha ŵasambizi chumi ndi ŵaŵi (12)

(Mateyu 10.1-4; Luka 6.12-16)

13Ndipo ŵangukwera mu phiri lo, ndipo wangudana ŵeniwo wakhumbanga iyo: ndipo ŵanguza kwaku iyo. 14Ndipo wangumika chumi ndi ŵaŵi, alinga kuti ŵaŵenge pamoza nayo, ndi kuti waŵatumenge kwachitaula, 15ndi kuŵa ndi mtufu kwachituzga ŵademone. 16Simoni yo wangudana Petro; 17Yakobe mwana waku Zebediya, ndi Yohane mhurwa waku Yakobe; ndipo wanguŵapaska zina Boanergesi, ndiku kuti, ŵana ŵa chidiririzi, 18Andreya, ndi Filipu, Bartolomeyu, ndi Mateyu, Tomase, ndi Yakobe, mwana waku Alifeyu, ndi Simoni mKanane, 19ndi Yuda mkeriote, mweniyo nayo wangumpachiya.

Yesu ndi Belzebule

(Mateyu 12.22-32; Luka 11.14-23; 12.10)

20Ndipo wangusere mu nyumba. Ndipo mzinda wo unguwungirana pamoza so, viyo kuti wanguziŵa chingana nkhurgha cha. 21Ndipo ŵachivwa ŵabali ŵake ŵanguruta kwachimuko; chifukwa ŵatinge, “Wahereuka.” 22Ndipo ŵalembi wo ŵangusika ku Yerusalemu ŵatinge, “We ndi Belzebule; ndikuti, ndi fumu yo ŵademone waŵatuzga ŵademone.” 23Ndipo pakuŵandana wawaneniyanga mu zintharika, “Ngwanthazi uli Satana kumtuzga Satana? 24Asani ufumu ungagaukana mwaku wija, kuti ngwanthazi ku ufumu wo cha. 25Asani nyumba yingagaukana paku yija, kuti yiŵenge yanthazi kuma cha nyumba yeniyo. 26Ndipo asani Satana wayukiya paku yija, ndi wagaukana, kuti waziŵa kuma cha, kweni wendi umari. 27Palive yumoza wangaŵa wanthazi kusere mu nyumba ya chilimbi, kwachiskoŵa viyaŵi vyake, kwambura kuti wadanga wamanga chilimbi yo; sono ndipo waskoŵenge nyumba yake.

28“Nadidi ndikuneniyani, vilakwa vyose virekekiyenge pa ŵana ŵa ŵanthu, ndi matuka ghenigho ŵangatuka? 29Kweni yose yo wangatuka Mzimu Wakupaturika, walive chireke muyaya, kweni wendi kalema ka chilakwa chamuyaya:” 30pakuti ŵanenanga, “We nawo mzimu wawiyu.”

Anyina ndi ŵabali ŵaku Yesu

(Mateyu 12.46-50; Luka 8.19-21)

31Ndipo ŵanguza anyina ndi ŵahurwa ŵake; Ndipo, pakuma kubwaro ŵangutuma kwaku iyo, kumudana. 32Ndipo watekangapo mzinda wo kwakumukwetere; ndipo watiti kwaku iyo, “Awona, anyoko ndi ŵahurwa ŵako kubwaro ŵatulembe.” 33Ndipo wakuwamuka watiti, “Mbayani ama ndi ŵahurwa ŵangu?” 34Pakulereska kwakuzunguliya paku ŵeniwo ŵatekanga kwakumukwetere, watiti, “Awoni, ama ndi ŵahurwa ŵangu! 35Chifukwa yose yo wachitenge khumbu laku Chiuta, mweniyo ndi muhurwa wangu, ndi mzichi, ndi ama.”

Выбрано:

Marko 3: TongaMw

Выделить

Копировать