19
طلاق دے بارے یِسُوع دی تعلِیم
1تے جد یِسُوع ایہہ گلّاں مُکائِیاں تے اینج ہویا پئی اوہ گلِیلوں ٹُرپیا۔ تے یَردن دے پار یہُودیہ دِیاں حداں وِچ آیا۔ 2تے بتھیرے لوک اوہدے مگر ٹُر پئے۔ تے اوس اوہناں نُوں اوتھے ای چَنگا کِیتا۔
3تے فریسی اوہدے ازمان لئی اوہدے کول آئے۔ تے اوہنوں آکھیا ایہہ روا اے پئی بندہ کِسے وی گلّوں اپنی بیوی نُوں چھڈ دیوے؟ 4اوس اوہناں نُوں جواب دِتّا۔ تُساں نئیں پڑھیا پئی جِس اوہناں نُوں بنایا اوس اوہناں نُوں مُڈھوں نَر تے ناری پَیدا کِیتا۔ 5تے آکھیا ”ایس لئی بندہ اپنے ماں پئیو نُوں چھڈ دے گا تے اپنی بیوی نال مِلیا رہے گا۔ تے اوہ دوویں اِک بدن ہو جان گے۔“ 6ایس کر کے اوہ دو نا رہے پر اِک ای بدن نیں سو جِہنُوں خُدا نے جوڑیا اے اوہنوں بندہ وَکھ نا کرے۔ 7اوہ اوہنوں آکھن لگّے فیر مُوسیٰ نے کیوں حُکم دِتّا پئی طلاق نامہ دے کے اوہنوں چھڈ دے؟ 8اوہ اوہناں نُوں آکھن لگّا مُوسیٰ تے تُہاڈی سخت دِلی دے سبّب تُہانوں اپنیاں وَوہٹِیاں نُوں چھڈ دین دی اجازت دِتّی پر مُڈھوں ایس طرح نئیں سی ہویا۔ 9تے مَیں تُہانوں آکھنا آں پئی جیہڑا کوئی اپنی بیوی نُوں زناکاری دے سِوا ہور کِسے گلّ بدلے چھڈ دیوے تے دُوجی نال ویاہ کرے اوہ زنا کر دا اے تے جیہڑا اوس چھڈی ہوئی نُوں ویاہے اوہ زنا کر دا اے۔
10شاگِرد اوہنوں آکھن لگّے۔ جے بیوی نال بندے دا ایہہ حال اے تے ویاہ کرنا ای چَنگا نئیں۔ 11پر اوس اوہناں نُوں آکھیا سبھے ایس گلّ نُوں قبول نئیں کر سکدے۔ پر جِنہاں نُوں دِتّا گیا اے۔ 12کیوں جو بعض کُھسرے اجیہے نیں جیہڑے ماں دے گربھوں اجیہے جمّے نیں۔ تے اجیہے کُھسرے نیں جِنہاں نُوں بندیاں کھُسریاں کر دِتّا۔ تے اجیہے کُھسرے وی نیں جِنہاں اسمان دی بادشاہی دی خاطر اپنے آپ نُوں کھُسریاں کر لیا اے۔ جیہڑا قبول کر سکدا اے اوہ ای قبولے۔
یِسُوع چھوٹے بچّیاں نُوں برکت دیندا اے
13اوس ویلے اوہدے کول بال لیاندے گئے پئی اوہ اوہناں اُتّے ہتّھ رکھّے تے دُعا کرے۔ شاگِرداں اوہناں نُوں جِھڑکیا۔ 14پر یِسُوع آکھیا بچّیاں نُوں کُجھ نا آکھو تے نا اوہناں نُوں میرے کول آؤن توں روکو کیوں جو اسمان دی بادشاہی ایہو جِہیاں دی اے۔ 15تے اوہ اوہناں اُتّے ہتّھ رکھ کے اوتھوں ٹُرگیا۔
اِک دَولتمند جَنا
16تے ویکھو اِک بندے نے اوہدے کول آن کے آکھیا اَے اُستاد مَیں کیہڑا بھلا کمّ کراں پئی ہمیشہ دی زِندگی مَینُوں مِلے؟ 17اوس اوہنوں آکھیا بھلیائی دی بابت مَیتھوں کیوں پُچھنا ایں؟ بھلا تے اِک ای اے۔ پر جے تُوں زِندگی وِچ داخل ہونا چاہنا ایں۔ تے حُکماں نُوں مَن۔ 18اوس اوہنوں آکھیا کیہڑیاں نُوں؟ یِسُوع آکھیا ایہہ پئی تُوں خُون نا کر۔ زنا نا کر۔ چوری نا کر۔ جُھوٹھی گواہی نا دے۔ 19اپنے ماں باپ دی عِزّت کر۔ تے اپنے گوانڈھی نُوں اپنے جِہیا پیار کر۔ 20اوہ جوان اوہنوں آکھن لگّا مَیں ایہناں سارِیاں گلّاں نُوں مَندا آیا آں۔ اجے ہور کاہدے وِچ مَیں گھٹ آں۔ 21یِسُوع نے اوہنوں آکھیا جے تُوں کامِل ہونا چاہنا ایں تے جا کے اپنا سبھ کُجھ ویچ تے غرِیباں نُوں دے تے تینُوں اسمان اُتّے خزانہ مِلے گا۔ تَد آ کے میرے مگر ٹُر پَو۔ 22جد اوس جوان ایہہ گلّ سُنی تَد اُداس ہو کے ٹُر گیا۔ کیوں جو اوہ بڑا مالدار سی۔
23تَد یِسُوع اپنے شاگِرداں نُوں آکھیا مَیں تُہانوں سَچ آکھنا آں پئی دَولتمند بندہ اسمان دی بادشاہی وِچ مُشکل نال داخل ہوئے گا۔ 24تے فیر مَیں تُہانوں آکھنا آں پئی سُوئی دے نکّے وِچوں اُوٹھ دا لنگھناں ایس نالوں سوکھالا اے پئی دَولتمند بندہ خُدا دی بادشاہی وِچ داخل ہوئے۔ 25ایہہ سُن کے شاگِرد بڑے حَیران ہوئے تے آکھن لگّے فیر کون نجات پا سکدا اے؟ 26یِسُوع اوہناں چَنگا ویکھ کے آکھیا بندیاں توں ایہہ گلّ اَنہونی اے۔ پر خُدا توں سبھ کُجھ ہوسکدا اے۔ 27تَد پطرس نے جواب دِتّا۔ ویکھ اساں سبھ کُجھ چھڈیا تے تیرے مگر ٹُر پئے آں فیر سانُوں کِیہ مِلے گا؟ 28یِسُوع اوہناں نُوں آکھیا مَیں تُہانوں سَچ آکھنا آں پئی جد اِبنِ آدم نَوِیں پَیدایش وِچ اپنے جلال دے تخت اُتّے بَہے گا تُسی وی جیہڑے میرے مگر ٹُر پئے ہو باراں تختاں اُتّے بَہو گے تے اِسرائیل دے باراں گھرانیاں دی عدالت کرو گے۔ 29تے جِنہاں گھراں یا بھراواں یا بھیناں یا ماپیاں یا بال بچّیاں یا زمین نُوں میرے ناں دی خاطر چھڈ دِتّا اے اوہنوں سَو حِصّے وَدّھ مِلے گا۔ تے اوہ ہمیشہ دی زِندگی دا وارث ہوئے گا۔ 30پر بتھیرے جیہڑے پِچّھلے نیں پہلے ہون گے۔ تے پہلے پِچّھلے ہون گے۔
