لُوقا 22

یِسُوع دے خلاف سازش

1تے فطِیری روٹی دی عید جِہنُوں فسح آکھدے نیں نیڑے آئی۔ 2تے سردار کاہِن تے فقِیہ داء لبّھدے سن۔ پئی اوہنوں کِس طرح مار سُٹّن۔ کیوں جو اوہ لوکاں توں ڈر دے سن۔

یہُوداہ یِسُوع نُوں دھوکھے نال پھڑوان تے راضی ہوندا اے

3تَد یہُوداہ وِچ جیہڑا اِسکریُوتی اکھواؤندا تے جیہڑا باراں دی گنتری وِچ سی شیطان سمایا۔ 4تے اوس جا کے سردار کاہِناں تے صُوبیداراں نال صلاح کِیتی پئی اوہنوں کِیویں اوہناں دے حوالے کرے۔ 5تے اوہ خُوش ہوئے تے اوہدے نال رُپئے دین دا اِقرار کِیتا۔ 6تے اوس مَن لیا تے موقع لَبّھدا سی پئی جد بِھیڑ نا ہوئے اودُوں اوہنوں اوہناں دے حوالے کر دے۔

یِسُوع فسح دے کھانا کھان دی تیاری کر دا اے

7تَد فطِیری روٹِیاں دا دِن آیا۔ جِہدے وِچ فسح حلال کرنا سی۔ 8تے اوس پطرس تے یُوحنّا نُوں ایہہ آکھ کے گھلّیا۔ پئی جا کے ساڈے لئی فسح تیار کرو۔ پئی اسی کھائیے۔ 9اوہناں اوہنوں آکھیا۔ تُوں کِتّھے چاہنا ایں پئی اسی تیار کریئے؟ 10اوس اوہناں نُوں آکھیا۔ جد شہر وِچ تُسی وڑو گے ویکھو اِک بندہ پانی دا گھڑا چُکیا ہویا تُہانوں ٹکّرے گا۔ اوہ جِس گھر وِچ جائے اوہدے مگر جاؤ۔ 11تے گھر دے مالک نُوں آکھو اُستاد تینُوں آکھدا اے۔ پئی پَروہنیاں دی تھاں کِتّھے اے جِتّھے مَیں اپنے شاگِرداں نال فسح کھاواں؟ 12تے اوہ آپ اِک وَڈا چوبارا تیار ہویا تُہانوں وکھالے گا۔ اوتھے تیار کرو۔ 13اوہناں جا کے جِہیا اوس اوہناں نُوں دسیا سی ویکھیا۔ تے فسح تیار کِیتی نیں۔

عشائے ربّانی

14تے جد ویلا آگیا اوہ بَہہ گیا تے رسُول اوہدے نال۔ 15تے اوہناں نُوں آکھیا۔ مَینُوں بڑی چاہ سی پئی دُکھ سہن توں پہلاں ایہہ فسح تُہاڈے نال کھانواں۔ 16کیوں جو مَیں تُہانوں آکھنا آں۔ پئی مَیں ایہہ کدی نا کھانواں گا جد تِیکر خُدا دی بادشاہی وِچ اوہ پُورا نا ہوئے۔ 17تے پیالہ لے کے شُکر کِیتا تے آکھیا ایہہ نُوں پھڑو تے آپو وِچ ونڈ لو۔ 18کیوں جو مَیں تُہانوں آکھنا آں پئی ایدوں اگّے مَیں انگور دی رَس کدی نا پِیاں گا جد تِیکر خُدا دی بادشاہی نا آوے۔ 19تے روٹی لئی تے شُکر کر کے توڑی تے ایہہ آکھ کے اوہناں نُوں دِتّی پئی ایہہ میرا بدن اے۔ جیہڑا تُہاڈے واسطے دِتّا جاندا اے۔ ایہہ میری یادگیری لئی کریا کرو۔ 20تے ایسے طرح کھان دے مگروں اوس پیالے نُوں ایہہ آکھ کے دِتّا۔ پئی ایہہ پیالہ میرے لہو وِچ جیہڑا تُہاڈے لئی وگایا جاندا اے نواں عہد اے۔ 21پر ویکھو میرے پھڑان والے دا ہتّھ میرے نال میز اُتّے اے۔ 22کیوں جو اِبنِ آدم جاندا اے جیویں اوہدے لئی ٹھیرایا گیا اے۔ پر افسوس اوس بندے اُتّے جِہدی راہِیں اوہ پھڑوایا جاندا اے۔ 23تے اوہ آپو وِچ پچُھّن لگّے پئی ساڈے وِچوں اوہ کیہڑا اے جیہڑا ایہہ کمّ کرے گا؟

وَڈا ہون اُتّے بحث

24تے اوہناں وِچ جھگڑا وی پیا پئی ساڈے وِچوں کیہڑا وَڈا مَنّیا جاندا اے؟ 25اوس اوہناں نُوں آکھیا پئی غیر قوماں دے بادشاہ اوہناں اُتّے حکُومت چلاؤندے نیں۔ تے جیہڑے لوک اوہناں اُتّے اختیار رکھدے نیں سو غرِیب پرور اکھواؤندے نیں۔ 26پر تُہاڈا اوہ حال نئیں۔ سگوں تُہاڈے وِچ جیہڑا وَڈا اے اوہ نِکّے وانگر تے جیہڑا سردار اے اوہ ٹہلئے وانگر اے۔ 27کیوں جو وَڈا کیہڑا اے۔ اوہ جیہڑا کھان بَیٹھا۔ یا اوہ جیہڑا سیوا کر دا اے؟ اوہ نئیں جیہڑا کھان بَیٹھا اے؟ پر مَیں تُہاڈے وِچ ٹہلئے وانگر آں۔

28تُسی اوہو ای اوہ جیہڑے میرِیاں ازمایشاں وِچ برابر میرے نال رہے اوہ۔ 29تے جیویں میرے باپ میرے لئی اِک بادشاہی ٹھیرائی مَیں تُہاڈے لئی ٹھہرانا آں۔ 30تاں جو میری بادشاہی وِچ میرے میز اُتّے کھاؤ پِیو۔ تے تُسی تختاں اُتّے بَہہ کے اِسرائیل دے باراں قبیلیاں دا نیاں کرو گے۔

یِسُوع دی پیشین گوئی پئی اوہ میرا اِنکار کرے گا

31اَے شمعُون اَے شمعُون ویکھ شیطان نے تُساں لوکاں نُوں منگیا۔ پئی کنک وانگُوں تُہانوں چھٹّے۔ 32پر مَیں تیرے لئی دُعا کِیتی۔ پئی تیرا اِیمان جاندا نا رہے۔ تے جد تُوں مُڑ پئیں تے اپنے بھراواں نُوں تگڑیاں کریں۔ 33اوس اوہنوں آکھیا اَے خُداوند تیرے نال مَیں تیار آں بھانویں قید نُوں تے مَوت نُوں جانا پَوے۔ 34اوس آکھیا پطرس مَیں تینُوں آکھنا آں پئی کُکّڑ دے بانگ دین توں پہلاں تُوں تَرے واری میرا اِنکار کریں گا پئی مَیں اینوں نئیں جان دا۔

بٹوا، جھولی تے تلوار

35تے اوس اوہناں نُوں آکھیا جِس ویلے مَیں تُہانوں بٹوے تے جھولی تے جُتِّیاں بِناں گھل دِتّا تَد تُہانوں کِسے شے دی تھوڑ تے نئیں سی؟ اوہ آکھن لگّے کِسے دی نئیں۔ 36تَد اوس اوہناں نُوں آکھیا پر ہُن جِہدے کول بٹوا ہوئے سو لے لَئے تے ایسے طرح جھولی وی۔ تے جِہدے کول نا ہوئے اوہ اپنا کپڑا ویچ کے تلوار مُل لَوے۔ 37کیوں جو مَیں تُہانوں آکھنا آں۔ پئی ایہہ جو لِکھیا ہویا اے پئی اوہ بُریاں وِچ گِنیا گیا۔ میرے حق اندر پُورا ہونا ضرُور اے۔ کیوں جو کُجھ میرے نال تعلق رکھدا اے سو پُورا ہونا اے۔ 38اوہناں آکھیا اَے خُداوند ویکھ ایتھے دو تلواراں تے ہے نیں۔ اوس اوہناں نُوں آکھیا۔ ایہہ بتھیریاں نیں۔

یِسُوع زَیتُون دے پہاڑ تے دُعا منگدا اے

39تے اوہ باہر نِکل کے اپنے دستُور دے سببّوں زَیتُون دے پہاڑ نُوں گیا۔ تے شاگِرد وی اوہدے مگر ٹُرپَئے۔ 40تے اوس تھاں اَپڑ کے اوس اوہناں نُوں آکھیا۔ دُعا کرو پئی ازمایش وِچ نا پَوو۔ 41تے آپی اوہناں توں کوئی ڈھیم دی مار دی وِتھ جِنّاں وکھرا ہوگیا تے گوڈے نواکے دُعا منگی۔ 42پئی اَے باپ جے تُوں چاہیں تے ایس پیالے نُوں میرے کولوں ہٹا دے۔ فیر وی میری مرضی نئیں پر تیری مرضی ہوئے۔ 43تے اسمانوں اِک فرِشتے اوہنوں وکھالی دِتّی۔ اوہ اوہنوں طاقت دیندا سی۔ 44فیر اوہ بُہت پریشان ہو کے بڑی تانگھ نال دُعا منگن لگّا تے اوہدا مُڑھکا لہو دے تُبکیاں وانگُوں زمین اُتّے ڈِگّدا سی۔ 45تے دُعا توں اُٹھ کے اوہ شاگِرداں دے کول آیا تے اوہناں نُوں غم دیاں مارِیاں سُتّیاں ہویاں ویکھیا۔ 46تے اوہناں نُوں آکھیا تُسی کاہِنُوں سَوندے اوہ؟ اُٹھ کے دُعا منگو۔ پئی ازمایش وِچ نا پَوو۔

یِسُوع دی گِرفتاری

47اوہ اجے بولدا ای سی پئی ویکھو اِک بِھیڑ آئی تے باراں وِچوں اِک جیہڑا یہُوداہ اکھواؤندا سی اوہناں دے اگّے اگّے آؤندا سی۔ تے اوہ یِسُوع دے کول آیا پئی اوہنوں چُمّے۔ 48پر یِسُوع اوہنوں آکھیا یہُوداہ تُوں چُمّ کے اِبنِ آدم نُوں پھڑانا ایں؟ 49جد اوہدے آلے دوالے والیاں ویکھیا پئی کِیہ ہون لگّا تے آکھیا اَے خُداوند اسی تلوار چلائیے۔ 50تے اوہناں وِچوں اِک نے سردار کاہِن دے غلام اُتّے چلا کے اوہدا سَجّا کنّ اُڈا دِتّا۔ 51یِسُوع جواب دِتّا۔ ہُن صبر کرو۔ تے اوہدا کنّ چُھو کے اوہنوں چَنگا کِیتا۔ 52تَد یِسُوع سردار کاہِناں تے ہیکل دے صُوبیداراں تے بزُرگاں نُوں جیہڑے اوہدے اُتّے چڑھ آئے سن آکھیا۔ تُسی مَینُوں چور سمجھ کے تلواراں تے ڈانگاں لے کے نِکلے ہوئے ہو؟ 53جد مَیں روز ہیکل وِچ تُہاڈے نال ساں تُساں میرے اُتّے ہتّھ نا پائے پر ایہہ تُہاڈی گھڑی تے ہنیرے دا اختیار اے۔

پطرس یِسُوع دا اِنکار کر دا اے

54تَد اوہ اوہنوں پھڑ کے لے آئے۔ تے سردار کاہِن دے گھر وِچ لے گئے۔ تے پطرس ڈردا ڈردا مگر ٹُریا جاندا سی۔ 55تے جد اوہ ویہڑے دے اندر اَگ بال کے اکٹّھے بَیٹھے ہوئے سن تَد پطرس اوہناں وِچ بَہہ گیا۔ 56تے اِک ٹہلن اوہنوں لو وِچ بَیٹھیا ویکھیا۔ تے اوہدے ولّ چنگی طرح دھیان کر کے آکھیا۔ ایہہ وی اوہدے نال سی۔ 57پر اوہ مُکّر گیا تے آکھیا اَے بی بی مَیں اوہنوں نئیں جان دا۔ 58تھوڑے چِر مگروں ہور کِسے اوہنوں ویکھ کے آکھیا۔ تُوں وی اوہناں وِچوں ایں۔ پطرس آکھیا اوہ پائی مَیں اوہناں وِچوں نئیں آں۔ 59تے گھڑی کُو مگروں ہور کِسے نے پَکّی کر کے آکھیا پئی بے شک ایہہ وی اوہدے نال سی۔ کیوں جو اوہ گلِیلی بندہ اے۔ 60پطرس آکھیا اوہ پائی مَیں نئیں سمجھدا پئی تُوں کِیہ آکھنا ایں۔ تے اوہ اجے بولدا ای پیا سی پئی جھٹ کُکّڑ نے بانگ دِتّی۔ 61تَد خُداوند مُڑ کے پطرس ولّ ویکھیا۔ تے پطرس نُوں خُداوند دی اوہ گلّ یاد آئی۔ جیہڑی اوس اوہنوں آکھی سی پئی اَج کُکّڑ دے بانگ دین توں پہلاں تُوں میرا تَرے واری اِنکار کریں گا۔ 62اوہ باہر ٹُر گیا تے بڑا رویا۔

سپاہی یِسُوع نُوں مارے دے تے مخَول کر دے نیں

63تے اوہ بندے جِنہاں یِسُوع نُوں پھڑیا ہویا سی۔ اوہنوں مخَول کر دے تے مار دے سن۔ 64تے اوہ اوہدیاں اَکھّیاں بَنّھ کے اوہنوں ایہہ پُچھ دے سن پئی نبُوّت کر کے دس تینُوں کِس ماریا؟ 65تے طعنہ مار کے ہور کئی سارِیاں گلّاں اوہ دے برخلاف آکھیاں۔

یِسُوع دی پنچایت دے سامھنے پیشی

66تے جد دِن چڑھیا تے قوم دے بزُرگاں دی جماعت اکٹّھی ہوئی۔ سردار کاہِن وی تے فقِیہ وی۔ تے اوہنوں اپنی وڈّی پنچایت وِچ لیا کے آکھیا۔ 67جے تُوں مسِیح ایں۔ تے سانُوں دس۔ اوس اوہناں نُوں آکھیا جے مَیں تُہانوں دساں تُسی کدی نا مَنّو گے۔ 68تے جے پُچھاں کدی جواب نا دیو گے۔ 69ہُن توں اگّے اِبنِ آدم خُدا دی قُدرت دے سَجّے ہتّھ بَیٹھا رہے گا۔ 70تَد ساریاں آکھیا تُوں خُدا دا پُتر ایں؟ اوس اوہناں نُوں آکھیا۔ تُسی آکھدے ہو کیوں جو مَیں ہاں۔ 71تَد اوہناں آکھیا سانُوں ہور گواہی دی ہُن کِیہ لوڑ؟ اساں آپ جو اوہدے مُنھوں سُنیا۔

Выбрано:

لُوقا 22: pan2020

Выделить

Копировать

Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь

Punjabi New Testament, Revised 2020

Revised Edition

Computer Typeset Edition.

Revised Edition of Punjabi New Testament 1952

The Punjabi New Testament text may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the title of the copyright page of the work as follows:

Scripture taken from the Punjabi New Testament, Revised 2020,

Used by Permission of The Pakistan Bible Society

For the use of text more than 25% of the work in which intended to quote, Please take prior permission.

Cover design, Composed and typeset by the CAP Department of the Pakistan Bible Society

PAKISTAN BIBLE SOCIETY

LAHORE, PAKISTAN

Узнать больше о پنجابی نواں عہد نامہ نظرثانی شدہ چھپائی