Mateo 16

Re fariseo nu re xaa saduceo naab nseyn lo Jesús

(Mr. 8:11-13; Lc. 12:54-56)

1Re xaa fariseo nu re xaa saduceo ngwa lo Jesús nu ngunaab xaa tub nseyn yiba lo Jesús, zee luu lee xaa nak xaa mxaal Dios. 2Per lee Jesús mkeb nzhé:

—Leezha naxne na xkaw yiba nzhal mzhel yizhyo mbezh gu: “Nalat yey”. 3Leezha naxne na xkaw yiba nzhal garziil, zee mbezh gu: “Nalzhe roo mbi nu la yey”. Gu nlabeyy re nseyn naz yiba, ¿xomod nanlabeyyt gu re nseyn re mbizh ne? 4¡Ay, nakap doo nak re gu xaa nzho re mbizh nal, xaa nanalit nzhak lextoo gu! Naab gu nseyn gro doo lo na, per nyent nseyn kwaan wii re gu lo, nebse nseyn cheen Jonás, xaa mzaa kwent kwaan nzhé Dios lo lee xaa yilo.

Nzhé xaa kwaan baa nu mroo xaa lo re xaa.

Kwaan nlu fariseo nak kwenta lebadur

(Mr. 8:14-21)

5Jesús kwaan re nu, xaa mseed lo xaa, nzhaded stub ta roo nistoo nu myenlazh re nu nge nu pan. 6Zee né Jesús lo re nu:

—Lijer gok gu lo lebadur cheen re fariseo nu re xaa saduceo.

7Zee lee re nu nzhé lo wechxinn nu:

—Nanzenot be pan, zee sbaa né xaa lo be.

8Jesús mzeen kwaane zee né xaa lo re nu:

—¿Chozhiin mbezh gu lee gu nanzenot pan? Gu nak xaa chepse ngwii lo Dios. 9¿Che seesa nanlata yek gu? ¿Che nanselazht gu cheen gaay pan kwaan mza na ndaw tub gaay mil xaabyi, nu lak chekwid kwaan byog mtop gu? 10Nu, ¿che nixa nanselazht gu cheen gazh pan kwaan mza na ndaw tub tap mil xaabyi, nu lak chekwid kwaan byog mtop gu? 11¿Chozhiin nanet gu lee na nakaniit cheen lebadur cheen pan? Per lee kwaan ngunii na lo gu nak: Kanap gu gu lo lebadur cheen re fariseo nu re xaa saduceo.

12Zeera mlaya yek re nu, lee Jesús nakaniit gak lijer re nu lo lebadur cheen pan, sinka lijer gak nu lo re kwaan nlu re fariseo nu re xaa saduceo.

Pér nzhé lee Jesús nak Crist, Xaa Mxaal Dios Nabeyy

(Mr. 8:27-30; Lc. 9:18-21)

13Gorna lee Jesús mzhin yizhyo cheen Cesarea-Filipo, mnabdizh xaa lo re nu, xaa mseed lo xaa, nu né xaa lo nu:

—¿Cho né re myet nak na, Xaa Mzhin Ngok Myet?

14Lee nu nzhé:

—Tub naz xaa mbezh lee lu nak Juan xaa mchubnis, stub naz xaa mbezh lee lu nak Li, nu stub naz xaa mbezh lee lu nak Jeremías, nu stub naz xaa mbezh lee lu nak stub re xaa mzaa kwent kwaan nzhé Dios lo lee xaa yilo, mrobanla nal.

15Zee mnabdizh Jesús lo re nu:

—Lee re gu, ¿cho nak na nle re gu xgab?

16Simón Pér mkeb nzhé:

—Lu nak Xaa Mxaal Dios Nabeyy, nak lu Xgann Dios xaa tira mban.

17Zee lee Jesús nzhé lo Pér:

—Byakla lu Simón Pér, xgann Jonás. Nel nik tub myet namlut kwaane lo lu, sinka Xuz na, xaa nzob naz yiba, mluya lo lu. 18Nu nii na lo lu Pér, lee le lu nii “Ke”, nu tich ke ne za na yidoo cheen na, kwaan nak re xaa ngwii lo na. Nu lee re xaa ngwii lo na le gan lo xaa nabeyy lo re xaa ngut. 19Nu lo lu za na leyaw cheen pa nabeyy Dios. Rese kwaan kado lu lo yizhyo ne, nkadoola naz yiba; nu rese kwaan sela lu lo yizhyo ne, mlala naz yiba.

20Zee lee Jesús mnabeyy re nu, zee nik tub lo nayét nu lee Jesús nak Crist, Xaa Mxaal Dios Nabeyy.

Jesús mzaa kwent xomod yet xaa

(Mr. 8:31-9:1; Lc. 9:22-27)

21Jesús mzelo mseed re nu, xaa mseed lo xaa, nkin ded doo xaa bid, nu nakayaat re xaa gol xaa, nixa re ngwleyy xaa non, nixa re maestr xaa nlu xtizh Dios. Nu gut re xaa xaa, per lee mbizh yon lee xaa roban. 22Zee mbe Pér xaa tub lad nu mgalno Pér xaa, nu nzhé Pér lo xaa:

—Xaa Nabeyy, Dios nanzheklat yet lu, nyent mod ded lu kwaan ba.

23Per lee Jesús mzere yenn nu nzhé xaa lo Pér:

—¡Bachii lo na Maxuu! Lu nanlet xgab kwaan nle Dios xgab; lu nle xgab kwenta re myet.

24Zee lee Jesús né lo re nu, xaa mseed lo xaa:

—Chelee tub gu nzhekla reke tich na, laa gu rese kwaan nzhap gu, nu rese kwaan nzho yek gu le gu, nu gak gu kwenta tub xaa mbit xaa lo krus, nu breke gu tich na. 25Chelee tub xaa yet nel nreke xaa tich na, nu nel ngula xaa re wdizh wen cheen Dios xaa nzho naz leen yiba, le xaa gan yalnaban cheen xaa kwaan tira. Per lee xaa nzheb yet kwaan na, nalet xaa gan yalnaban naz leen yiba. 26¿Cho gan le re myet le xaa gan rese kwaan nzho yizhyo nu yet xaa? ¿Che nzho mod zii xaa yalnaban kwaan ndii tira? 27Nel lee na nak Xaa Mzhin Ngok Myet, nu yal na kwaan xni cheen Xuz na nu kwaan re mandad cheen xaa. Nu lo kad tub xaa za na kwaan mle xaa gan lo yizhyo ne. 28Wli na nii na lo gu, nzho lak gu nzo nee nal, nayeta axta lee na, Xaa Mzhin Ngok Myet, yaad kwaan yalngezh cheen pa nabeyy Dios.

Выбрано:

Mateo 16: zpo

Выделить

Копировать