Luk 24
24
Oḅetenu esi aḍuugh phọ
(Matiu 28.1-10; Mạk 16.1-8; Jọn 20.1-10)
1Esoph ạḍiroor ạSondi phọ, ạnmariir phọ ụphamagh ni oomo arolo eeḅi eḍu phọ bịdi ookolobian bọ ọghimom sịphe oḍi phọ. 2Bịdi ụmiin ni mọ mookilemi ḍighiigh phọ opukiom bọ oḍi phọ ọkiom ḍiniin ạḍighaagh. 3Kụ bịdi oḍigh ologhi oḍi phọ kụ ụ́miin ḍizu phọ ạJizos Ọmoogh-we phọ. 4Bịdi ọmeera ni rookia ghan ịpe emite bọ, kụ ekperenom bịn ịyal awe dị oonmenan ịnmananmana ịphalaḅaal iinmenan ọmeera sịphe ịigaany ạbidi. 5Rꞌakuboom aruugu kụ ạnmariir phọ ozumeri yogh ghisigh ạbidi ude, kụ awe phọ opuru bịdi mọ, “Uḍighi ika kụ nyina etu rẹwa ghan oye dị odi, ogbo ạbudi momuughu? 6#Mat 16.21; 17.22, 23; 20.18, 19; Mạk 8.31; 9.31; 10.33, 34; Luk 9.22; 18.31-33Ọdi ólho sịen, maḅetenu. Ịitughian ịpe ọdi ịḅeni bọ inyina mem mọ dị ạrol bọ ẹpe Galili mọ, 7‘Kọḅogh ni Mọony phọ Oye ọngo buḍighinom ịkaraph, ọkan loor oreeny okiigh kụ ạḅile aḅetenu ḍughul otu dị emuneniom ịraar.’”
8Kụ ạnmariir phọ ogbi ọotughian ikpo ọnhu phọ ọdi, 9kụ ọḍua ẹpe oḍi phọ oḅula kụ ọghaaph oomo phọ ịphen phọ ọḅeni ḍioph rꞌoniin ạbumatuan phọ rꞌạbueri phọ awe phọ. 10Nmạriir phọ uughologh mọ aMeri ọpo ạMagdala phọ rꞌaJoana, rꞌaMeri onhiin phọ aJems. Bịdi rꞌạbueri phọ ạnmariir phọ ọrol aani bọ ụghaaph ni ịphen phọ ọḅeni butelhedom mọ. 11Kụ abutelhedom mọ úmeeraam, ịdi eḍighi bọ bịdi ugbi mọ ạnmariir phọ upu ni oopho ọghaaph bịn ọghaaph aani. 12Kụ aPita aḅetenu aghiil ạghi asi sịphe oḍi phọ, kụ aḅiriman aḅiila kụ ạmiin ịphalaḅaal iidugha phọ bịn kụ aakia ni ịpe emite bọ asiom ologhi otu.
Otelhe rọki Ẹmaos
(Mạk 16.12-13)
13Egina phọ aḍio phọ ạḍiphe phọ, ịyal ạbuno oten rọki ọony ẹmha dị oghol mọ Ẹmaos, dị ẹghiom ni ḍioph rꞌoniin itobi ọḍua aJeruselem ọghi. 14Bịdi ụghaaphan ghan ịlo oomo phọ ịpe emite bọ. 15Bịdi rọkaaph ni koopuruan, kụ ạJizos rꞌaloor ọdi aḍuraan ạteeny bịdi kụ orelhian. 16Bịdi ọmiin bọ nyọdi ụ́kar ụlogh elegh. 17Kụ ạJizos apuru bịdi mọ, “Nyina rẹkaaph ghan eeghe ọghaaph kụ retelhiom bọ?”
Kụ bịdi ọmeera zin okiriri yogh. 18Oniin ọnyo ạbidi dị oghol mọ aKliopas, apuru ni nyọdi mọ, “Nạ ạkar ri aḍighi ooruen dị odi sịphe Jeruselem dị úlegheri aani ịphen emite bọ ịyal-ikpo aḍughul-otu phọ ịphen eten bọ?”
19Kụ ọdi mọ, “Eeghe ạraraar?”
Kụ bịdi mọ, “Ạraraar phọ ịpe emiteghunaan bọ Jịzos ọnyo ạNazeret phọ. Oye phọ ọphon aḍighi ni oyil dị Ẹnaan rꞌoomo awe olegheri ni mọ ogbogh ni sịphe ọghaaph phọ rꞌeḍighinom ạraraar phọ ọdi. 20Ạbuo ạrumhu ariil ạrikia rꞌạbudaam mọ ayoor ụḅogh ni nyọdi ọngo mọ oghiigh kụ bịdi ọkan nyọdi loor oreeny. 21Kụ ọbo yoor uḍuom ni ologhi mọ ọdi kụ kaḍighi bọ nyọpo kạtagharan bọ weye Ịzirel. Ịphen phọ emite bọ rꞌarodon sịen ịraar aḍughul-otu. 22Buniin ạnmariir sịphe aḍita phọ ayoor ụngo ni iyoor iikia. Bịdi ụghi ni ẹpe oḍi phọ mem dị mẹkpoghoronu, 23kụ ụ́miin ḍizu phọ ọdi. Bịdi uḅula ghụn ni kụ ọḅem mọ bụno mọmiin rụukpaany Ẹnaan uḍien dị ọḅeni bụno mọ ọdi odi ni rapooghu. 24Buniin awe phọ rꞌayoor ọrolan ghan bọ ụghi kẹn ni ẹpe oḍi phọ kụ ọmiin ịdipho ạnmariir phọ ọḅem bọ, bịn nyọdi phọ ụ́miin.”
25Kụ ạJizos ạḅeni bịdi mọ, “Uḍighi ika kụ nyina ẹmoogh bọ elologhi ẹḅile bọ reebinya ghan omeeraam oomo phọ ịpe ariil phọ Ẹnaan ọghaaph bọ? 26Ị́kpe dị aMesaya phọ kạmiinom oomo phọ ịphen kụ ạtuan aḍighom eghuan phọ ọdi ḍụghum?” 27Kụ ạJizos ạgba ẹmhu oomo ịpe ọghaaph bọ ịlo ọdi sịphe Ạḍinya Iigbia phọ emiigh kꞌịpe aMozis ẹteeny oomo phọ ịpe ariil phọ Ẹnaan ọge bọ.
28Kụ bịdi ọtol ropogh ọony ẹmha phọ bịdi rọki bọ, kụ ạJizos apu aḍighi mụdi rạwa ni oten ịsiphe. 29Kụ bịdi ọmagh nyọdi ọmeremi kụ ọḅeni mọ, “Tue ọrol sịen. Adulhe retu, ḅịle kẹn, aḍio phọ mẹghi ni iboom.” Kụ ọdi aḍigh ọrolan ạbidi. 30Ọdi rꞌạbidi ọtol rolian eḍien kụ ạsighe ạbred phọ kụ rọngo ḍịseph Ẹnaan kụ ạparion ạngo bịdi. 31Kụ ariḍien ạbidi ekpoghoronu kụ ogbi ọlogh ọdi elegh, kụ ọdi aphe sịphe ariḍien phọ ạbidi. 32Kụ oniin apuru ghan nyoniin mọ, “Aloor ayira ígbirighaan ẹpe eten phọ, mem mọ dị ạghaaph ghan bọ ạḅile ạgba ẹmhu ịpe ọge bọ pạ Ạḍinya Iigbia phọ ụḅeni iyira?”
33Kụ bịdi oḅerenu egina amem oḅula ẹpe Jeruselem kụ ọmiin ḍioph rꞌoniin ạbumatuan phọ dị odianaan rꞌạbunon awe 34kụ rọḅem ghan mọ, “Ọkar igey ni. Ọmoogh-we phọ aḅetenu ni sịphe aḍuugh phọ. ASaimon mạmiin ni nyọdi.”
35Kụ ịyal phọ awe phọ ọghaaph ọḅeni bụeri phọ ịpe emite bọ ẹpe eten phọ, rꞌịpe bịdi ọlogh bọ elegh Ọmoogh-we phọ mem mọ ọpo ọdi mạparion bọ ạbred phọ.
ẠJizos amite egaan aḍeenaan loor bụmatuan phọ ọdi
(Matiu 28.16-20; Mạk 16.14-18; Jọn 20.19-23; Iiḍighi 1.6-8)
36Bịdi odi rọkaaph ghan ịphen phọ kụ Ọmoogh-we phọ aru ạmeera pạ ogbo phọ ạbidi ekperenom, kụ ạḅeni bịdi mọ, “Ẹepho ịrolonaan inyina!”
37Esi eegu rꞌeepuph bịdi ugbi mọ bụno rọmiin ghan ọlo úlho. 38Kụ ọdi mọ, “Eeghe kụ rẹeḅaghami iloghi anyina? Iḍighi ika nụun kụ iikia phọ ịphen edianaan bọ iloghi phọ anyina? 39Ipogh rạghaagh phọ ạmi rꞌaruwol phọ ạmi, bịn ẹmiin mọ ọkar ạmi phọ ni! Ịḅogh ịmi nyina kẹmiin ni! Ọlo úlho rạ́moogh ghan iphulupul rꞌịḅarara ịduon ạmi.”
40Mạḅem ịduon phọ kụ aḍeenaan bịdi rạghaagh rꞌaruwol phọ ọdi. 41Kụ úmeeraam úmeeraam ni. Ọḅaal ologhi rꞌiikia kụ ịrolonaan iloghi phọ ạbidi. Kụ ọdi apuru bịdi mọ, “Nyina ẹmoogh ni ịyaar olhe sịen ḍụghum?” 42Kụ bịdi ọngo nyọdi ḍịkpol ẹsaaneen ena, 43kụ ọdi ạsighe ạany ghisigh ạbidi.
44Kụ ọdi mọ, “Ịphen kụ ikpo ọnhu phọ ạmi mị ịḅeni bọ inyina, mem mọ mị ạrolan bọ rꞌanyina: oomo phọ ịpe ọge bọ ịlo ạmi sịphe iilogh phọ aMozis, rꞌịgeeghi ariil phọ Ẹnaan, rꞌạḍinya Ạsuor phọ kẹ́bile dị kémite emunughan.”
45Ọdi aghunyon ni iloghi phọ ạbidi mọ bịdi olegheri ẹmhu Ạḍinya Iigbia phọ, 46kụ ọdi ạḅeni bịdi mọ, “Phọn kụ ịdi ọge bọ mọ aKraist phọ kạmiinom ni kụ aḅetenu esi aḍuugh phọ ḍughul otu dị emuneniom ịraar, 47kụ okol ghan ḍien phọ ọdi kụ ọkaaph dom okiton esi ịkaraph rꞌọsar ịkaraph ọwilenaan phọ oleenye oomo areelhe phọ emiigh kꞌẹpe Jeruselem. 48Nyina kụ kẹgba ni rạraar phọ ịphen emitiom ẹḅeni we. 49#Iiḍ 1.4Kụ mị rꞌaloor ạmi kaḍighi ni dị ịyaar phọ Ọde phọ ạmi miguanaan bọ inyina ketu ịteeny inyina. Kụ ọlo nyina kẹtol li sịphe ẹmha phọ kụ ekori ghan tụtu ịikpo ẹḍua kꞌạke eru isoorom inyina.”
Ọsighe Jịzos okeelom kꞌạke
(Mạk 16.19-20; Iiḍighi 1.9-11)
50 #
Iiḍ 1.9-11
Kụ ọdi arorori bịdi ạḍuanam sịphe ẹmha phọ asiemi kꞌẹpe Betani. Pọ kụ esi dị ọdi ạrol kụ aphoophe rạghaagh ọdi, kụ ạngo bịdi ooḅi ọghor. 51Ịdipho ọdi rạngo bọ bịdi ọghor phọ, bịn ạgbatanaan bịdi, bịn ọsighe nyọdi osiemi kꞌạke. 52Bịdi uuseeny ni nyọdi kụ ọḅile oḅula ẹpe Jeruselem rꞌiboom iboh, 53kụ oomo phọ amem mọ ạmuphe phọ bịdi ụrol ghan ni sịphe Otu Ịiḅereghi phọ oboom ghan Ẹnaan.
Выбрано:
Luk 24: ẠḌI
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
