मत्ती 8
8
येसुए कुऱीलाई ओसगराँव
(मर्कूस १:४०-४५; लूका ५:१२-१६)
1नाःत ज़ येसु नो दाँदातिन झरिके। उछींत बाज़्याव मिँर बनै माहोल्या यालिज़्याव। 2नो बेलाक ज़ तोबो कुऱी ओल्योक हुद उखँत फुलुप्सिद, “अ प्रभु, ङाल्योदा नयुँ ओताकिन ङालाई सगराँन्या नले,” है ओदोक ते, 3येसुए नोलाई उकुइए छाप्द, “नल्योदा ङायुँ लिज़्या ज़, गराँनिके,” है ओदोव प़ाइँना ज़ नो ओक्याँताव कुऱीए ऱास्द सोजोकाव ज़ ताके। 4येसुए नो गराँवलाई, “आव नक्याँताव ङादोव य़ेन सुलाई ज़ है तारादोयो। बुरू नगराँव साचो ज़ ओल्यो लिन्या थ·रैव परींन्याए जूँनी पुजारीए ल्योक सतैंसिनाद मोसाए ओकानुनलाव मिताव चरैःन्यार चरैःनाके,” है दोक्यो।#लेबी १४:१-३२
येसुलाई उयुँ हुबो कप्तान
(लूका ७:१-१०; यूहन्ना ४:४३-५४)
5फरी येसु कफर्नहुमल ओकेस्नावत तोबो रोमी कप्तान ओल्योक हुद, 6“अ प्रभु, तोबो ङानोकोर ओजोरो हुद उखँ उकुइ माचलिद झ़िमक ज़ घ्याँसिद ले,” है ओदोक ते, 7येसुए, “ताए, ङा हुद सगराँन्या ङाले,” है दोक्यो। 8नो कप्तानए फरी, “अ प्रभु, ङा इतावए ङाझ़िमक नँलाई लाँन्या स्यासो ङामाले। बुरू आकिन ज़ ‘गराँनिके’ है नलिकिन ङानोकोर गराँन्या ले। 9ङा ब छुतए ओहक धूँलाव मिँ ज़, ङा ङाधूँल मनी कुधु सिपाईंर लिज़्यार। नोरालाई ‘बाचिके’ है ङारादोक बाज़्यार, ‘हुचिके’ है ङारादोक हुज़्यार। ङाबाँदालाई ब ‘इताव दोके’ है ङादोक दोज़्याव,” है दोक्यो।
10येसुए नो कप्तानए ओपाँ थैद अचम्ब ताद ओलस बाऱिज़्यावरालाई, “ङा जेलाई साचो है ङादाचिज़्या, इस्राएलीराए खार्ल मनी आव मिताव ङाल्योदा उयुँ हुबो सु ज़ ङामादैताए। 11आदा थैचिके, स्वर्गताव राज्यालाव भत्यारल पुर्ब-पछ्युँनी छुत जातलाव मिँर ब बनै कुधु ज़ हुद अब्राहाम, इसहाक, याकूबरास सिप ज़ च़ुसिन्या लेर। 12इस्राएली राज्यालाव ताव परिन्याकावर ते नल मापसिद चुम चुमोल परिरिज़्यार। नल याहार ङर ङर कैद चिर्लनी बिर्ल घर्न्या लेर,” है दाद, 13फरी नो कप्तानलाई, “बानिके, ङालाई किताव नयुँ उहुबो हिताव ज़ तान्या ले,” है दोक्यो। नो कप्तानए ओनोकोर येसुए है ओदोव बेलाक ज़ होङ ओगराँधुव ओल्यो।
येसुए पत्रुसए उमुइँज्युलाई ओसगराँव
(मर्कूस १:२९-३१; लूका ४:३८-३९)
14नकिन येसु पत्रुसए उझ़िमक ओबाक पत्रुसए उमुइँज्यु ओजोरो हुद घ्याँसिद उलिज़्याव रँःक्यो। 15येसुए नोलाई उकुइ छाप्द ओयो प़ाइँना ज़ ओजोरोए ऱास्क्यो। नो सोद बेहार ज़ येसुलाई ज़्यावर ब जैदिक्यो।
येसुए याजोरो हुवरालाई ओरासगराँव
(मर्कूस १:३२-३४; लूका ४:४०-४१)
16ऱिमदा ऱिमदा मिँराए याजोरो हुवर, माचाव पुरूसराए क्योःद यारानैज़्यावरालाई येसुए ओल्योक यारारैकेर। येसुए ओपाँए ज़ नो माचाव पुरूसर पुलुस्द धोंःकेर, याजोरो हुवर ब गराँकेर। 17नो ओदोव य़ेन यसैया अगमबक्ताए सर्द ओनैज़्याव मितावनी ज़ ताके। नोए ओसरो आव ज़,
“गेदुखर ब पले·द्यासिक्यो,
गेजोरोर ब सगराँद्यासिक्यो।”#यसै ५३:४
येसुस बाव पैंज़्यावर
(लूका ९:५७-६२)
18येसुए ल्योक तछा मिँर ल्यो माल्यो याछुइसिहुवए दोङ्गाल पसिद उसिसरालाई, “दह होफत गेबाया,” है यादोक्यो। 19हाःत ज़ तोबो सास्त्री येसुए ल्योक हुद, “गुर्बा, नँ जोदा नबाज़्या, ङा ब नँस ज़ ङाबाया,” है ओदोक ते, 20येसुए, “स्यालर लिन्या कुँ ब लिज़्या, बाज़ार लिन्या सिप ब लिज़्या। ङा मिँ मिन्सिद हुवलाई ते ङ़ै कप्न्या पो ब माले,” है दोक्यो।
21फरी तोबो ओलस बाज़्यावए, “अ प्रभु, ङ़ादा ङाबाबुलाई ङागादैदा, नँस ङाबाया,” है ओदोक ते, 22येसुए, “सिउरालाई सिउ स्यासोराए घरागादैज़्यारक, नँ ते ङास घुहुनी,” है दोक्यो।
येसुए बतासलाई ओथकनैव
(मर्कूस ४:३५-४१; लूका ८:२२-२५)
23नकिन येसु दोङ्गाल उपसिउत उसिसर ब ओलस ज़ बाकेर। 24दह माँजल याबाज़्याक उमँःजानी ल्यो माल्यो बतास हुद ऱीए ओछल्कार दोङ्गाल पसिद दोङ्गालाई गदैवा गदैवा जैक्यो। हो बेलाक येसु ङ़ल्द उलिज़्याव। 25उसिसराए येसुलाई सोचोइद, “प्रभु, गेलाई बाँचैसिके, खदम ज़ गेतारिके,” है यादोक ते, 26येसु सोद, “जे काराव जेछे·ज़्याव? जेयुँ नाः माहुबोर,” है दाद बतास स़ोनो ऱीनिलाई उनिसिङारो प़ाइँना थपक ज़ अदिके। 27निताव रँःद उसिसर अचम्ब ताद, “आव किताव मिँ ओताव? बतासर ऱीराए ब ओपाँ यादोज़्याव,” है लिकेर।
खादर पोल लिज़्याव बूलिउनी
(मर्कूस ५:१-२०; लूका ८:२६-३९)
28येसु उसिसरास दह होफताव गदरिनीराए यापोङ याकेसो प़ाइँना ज़ माचाव पुरूसराए क्योःद यारानैज़्यावनी ऩेब्लो खादर पोनी पुलुस्द नोस दैसिहुकिनी। नोनी बनै निछ्यास ल्योनी निल्यो, नलाव घ्याँ सु ज़ आदा होदा यामालिधुज़्याव। 29नोनी बनै चोइस अइ लिद क़िकिनी, “अ परमेस्वरए ओज़ा, गिनस नखै काता उलिज़्याव? परमेस्वरए गोइँद ओनैज़्याव बेला ओमाहुद ज़ गिनलाई दुख याना नहुव रो?” है दोकिनी।
30नो बेलाक जाँ होकसैक ऊर तबगाल यालाज़्याव। 31नो माचाव पुरूसराए, “गेलाई पले·न्या ताकिन नो ऊराए क्याँत बाव यासिके,” है यादोक ते, 32“ताए, नोनी निक्याँनी पुलुस्द बाचिके,” है ओरादोक ते, नोर पुलुस्द ऊराए याक्याँत यापसिउ प़ाइँना ज़ ऊर ओपो·स ज़ बूलिद दाँदातिन सुइँःकिनाद दहल ज़ो·द प़ाइँ ज़ स़ुद सिकेर।
33निताव रँःद नो ऊ गावलार ननी धोंःनाद सहर जीदा बाद प़ाइँलाई ज़ ‘माचाव पुरूसराए क्योःद यारानैज़्याव मिँनिलाई इताव इताव ताके’ है यारादोकेर। 34नो याथैव प़ाइँना ज़ सहरलावर ओपो·स ज़ येसुए ल्योक बाद, “आनी पुलुस्द बान्के,” है दोकेर।
Выбрано:
मत्ती 8: NKham
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015, Wycliffe Bible Translators, Inc. All rights reserved.
