मत्ती 5
5
परमेस्वरनी धन्याकावर
(लूका ६:२०-२३)
1येसुए नो माहोल्यारालाई रँःद तोबो दाँदात बाद उच़ुसिक उछींत हुज़्याव भरी ब ओल्योक ज़ हुकेर। 2हाःत ज़ येसुए अइ लिद यासथैक्यो,
3“धन्या, यायुँल मासघ्योःसिज़्यावर,
स्वर्गताव राज्या नितावराए जूँनी ज़ लिज़्या।
4धन्या, आज्याल सोगोल लिज़्यावर,
यायुँ होलाँ तान्या ले।#यसै ६१:२
5धन्या, परमेस्वरए ओक्याँत ख्यासिद यातहस लिज़्यावर,
आव मानुवाताव हक दैन्या लेर।#भज ३७:११
6धन्या, परमेस्वरए ओपैंज़्याव मिताव सयो·न्याए जूँनी यास॰ तरा चींज़्यावर,
यापैंज़्याव भरी यो·न्या ले।#यसै ५५:१-२
7धन्या, छुतए ल्योदा यायुँ नाज़्यावर,
याल्योदा मनी परमेस्वरए उयुँ नान्या ले।
8धन्या, आज्याल यायुँ छैंवर,
परमेस्वरलाई रँःन्या लेर।#भज २४:३-४
9धन्या, माखैज़्यावरालाई सखैज़्यावर,
यामिन परमेस्वरए ओज़ाल गनिसिन्या ले।
10धन्या, परमेस्वरए उयुँलाव मिताव य़ेनत याखिरी पसिद दुखर दैज़्यावर,
स्वर्गताव राज्या नोराए जूँनी ज़ लिज़्या।
11“ङा ङामिनत जेलाई अऩाकलाव पाँर ससैद, जेखिरी पसिद, उल्ली गिल्ली दाद जेमिन बले·द यायाचिक धन्याकावर ज़ जेताज़्या। 12जेयुँर मासतेद रेंच्यो, काराव ल्यो ताकिन स्वर्गताव घ्योःव इनाम दैन्या जेले। अगमबक्ता भरिरालाई मनी जेकिन ङ़ादा निताव दुखर याव ज़ यारानैज़्याव।”#२ इति ३६:१६
सापी स़ोनो ज़गै
(मर्कूस ९:५०; लूका १४:३४-३५)
13“जे आव मानुवात सापी मितावर जेलिज़्या। सापीए ओदार ओमालिकिन नोलाई कै जैद ची ओदार ल्यो जैन्या? है जैद नो काम मालागिउ ओतावए नोलाई ख्याद मिँराए छिल्सी ऩिन्या वाज़ ताज़्या।
14“जे आव मानुवाताव ज़गै स्यासो ब जेलिज़्या। झेंःवताव जैसिउ सहर ब माम़ोंसिए। 15स़ोनो मिँराए ल़ोसै तैंःद जाए माकपर, दिउ बाल्न्यात ची झाःर। हुनी वाज़ झ़िमल लिज़्यावरालाई पलाँ ताज़्या। 16हिताव ज़ जे मनी मिँराए याङ़ाक जेज़गै ओरैंःक। हो ताकिन ची चाव जेय़ेन रँःद स्वर्गताव जेबाबुए उमिन ब सघ्योःद्यान्या लेर।”
कानुनलाव य़ेन सयो·न्या
(लूका १६:१७)
17“जे ङालाई ‘मोसाए ओकानुन स़ोनो अगमबक्ताराए याय़ेन सम़ैना उहुव’ है तालिच्यो। सम़ैना माःक, सयो·ना ङाहुव ची। 18ङा साचो है ङादाचिज़्या, आव नाम नम ओमाखेमा पै, धर्मसास्त्रलाव सर्सिउ पाँ ओमायो·वा पै, तोबो ब खेर बान्या माले। 19है जैद जोए धर्मसास्त्रलाव पाँ तकेज़ा तादी ब ओबले·किन स़ोनो छुतलाई तँनी ओपैकिन नोए उमिन स्वर्गताव राज्याल प़ाइँरानी ज़िम्ज़ा तान्या ले। फरी नो भरी ओल माबिरैद ओदोकिन छुतलाई ब दान्या ओपैकिन नोए उमिन स्वर्गताव राज्याल घ्योःव ज़ तान्या ले। 20है जैद ज़ ङा साचो है ङादाचिज़्या, सास्त्रीर स़ोनो फरिसीराए यादोज़्याव धर्मकिन जे कोसै जेमादोकिन, स्वर्गताव राज्याल पसिउ दैन्या जेमाले।”
रिस स़ोनो मिँ सैःन्या
21“जे ब थैद जेनैज़्याखेहो, भाःकाव जेसाखा पुर्खारालाई ‘मिँ मासैःन्या,’ स़ोनो, ‘जोए मिँ सैःज़्याव, होए सजा ब दैव ज़ परिके’ है लिद सथैव ज़ यारानैज़्याव।#प्रस २०:१३; ब्य ५:१७ 22ङा ते झन जेलाई इतावनी है ङादाचिज़्या, जोए ओभाइलाई रसिद वाज़ ओएकिन नोलाई ब सजा दैन्या ओछ्यास लिज़्या, स़ोनो जोए छुतलाई, ‘नँ कान्ल ज़ काम मालागिउ भोकोता,’ है दोज़्याव, नोलाई झन घ्योःव कचरील लाँन्या ओछ्यास लिज़्या। फरी जोए छुतलाई, ‘मुर्ख नफ्या·हुव,’ है दोज़्याव, नोलाई नर्गलाव मेंःए ओज़्यास तान्या ओछ्यास लिज़्या। 23है जैद नँ ध्यान झ़िमल परमेस्वरए उमिनत कातार चरैःना नबाक ननैंए उयुँल नउपर्त कातार उलिज़्याव नसैंकिन, 24नो चरैःना नरैवलाई होक ज़ ख्यानैद ङ़ादा नो ननैंस सखैसिद वाज़ चरैःयो।
25“नजगर्याए अदालतदा मुद्दा झाःनाद उईंकिन होङ ओमाकेस्द येमक ज़ खैनानी, म़ानी नोए न्याधिसए उकुइत सूँपिद, न्याधिसए फरी पुलिसए उकुइत सूँपिद झ्यालखानाल झाःनिरिज़्याव। 26साचो ज़, नल नपरिकिन तपैसा तादी ब ओपो·स ज़ नमाफो·वा पै पुलुसो दैन्या नमाले।”
जारी य़ेन
(मर्कूस १०:११-१२; लूका १६:१८)
27“जे आव ब थैद जेनैज़्याखेहो, ‘अर्काए ओज्याए ल्योदा माबान्या।’#प्रस २०:१४; ब्य ५:१८ 28ङा ते झन है ङादाचिज़्या, जोए तोबो मेंमालाई चाव रँःद उयुँल बले·व ओपैंकिन होए पाखात ब ओबले·धुव मिताव ज़ लिज़्या। 29है जैद तँनिकाव नमीए माचावल ओपारैनिकिन नोलाई कोला·द ख्याके। नक्याँ भरी नर्गल ओबाज़्याव देखा बुरू तोबो ओमाल्यो पाथ लिज़्या। 30हिताव ज़ तँनिकाव नकुइए माचावल ओपारैनिकिन नोलाई च़म्द ख्याके। नक्याँ भरी नर्गल ओबाज़्याव देखा बुरू तोबो च़म्द ख्यान्या पाथ लिज़्या।
31“फरी कानुनलाव आव मनी जेसैंज़्याखेहो, ‘जोए ओज्यालाई ऱासो ओपैंकिन होए ऱास्न्या कागत सर्द ओऱासोक।’#ब्य २४:१-४ 32ङा ते झन है ङादाचिज़्या, जोए ओज्या ओरेए ओसतत उलिज़्यावत ब ओरेए ओऱास्किन, फरी नो मेंमाए छुत रे ओदोकिन, नो ऱास्ज़्याव ओरेए नो मेंमालाई जारी य़ेन ज़ दाव परींक्यो। फरी जोए नो ऱास्सिउ मेंमालाई रैज़्याव, होए मनी जारी य़ेन ज़ दोक्यो।”
किर्या माझाःन्या
33“आव ब थैद जेनैज़्याखेहो, भाःकाव जेसाखा पुर्खारालाई, ‘धुत किर्या झाःन्या माताए,’ स़ोनो, ‘परमेस्वरए उमिनत काताराल किर्या जेझाःकिन नोलाई जुनी ब सयो·व ज़ परिए’ है लिद सथैव ज़ यारानैज़्याव।#लेबी १९:१२; गन्ती ३०:२; ब्य २३:२१ 34ङा ते झन है ङादाचिज़्या, किर्या झाः ज़ ताझाःच्यो। नम छुद तादी ब ताझाःच्यो, नत परमेस्वरए उसिंहासन लिज़्या।#यसै ६६:१ 35नाम छुद ब ताझाःच्यो, नाम परमेस्वरए उखँ नैन्या पो ची। यरूसलेमए उमिननी ब ताझाःच्यो, नो राजाराए याराजाए ओसहर ची।#यसै ६६:१; भज ४८:२ 36जेङ़ै छुद ब ताझाःच्यो, जेङ़ैताव चेमलाई पालो ब जेमाजैधुइ, मोलो ब जेमाजैधुइ। 37है जैद जे हैज़लाई हैज़, माःकलाई माःक ज़ है लिच्यो। नोकिन आगल्या भरी ओचाहित माल्यो ज़ लिज़्या।”
खिस माफेरैन्या
(लूका ६:२९-३०)
38“आव ब थैद जेनैज़्याखेहो, ‘छुतलाई ओहा केःद ओएकिन, उमी पा·द ओएकिन, हाए ओपोल हा, मीए ओपोल मी ताव ज़ उपरिज़्याव।’#प्रस २१:२४; लेबी २४:२०; ब्य १९:२१ 39ङा ते झन जेलाई है ङादाचिज़्या, माचाव य़ेनत खिस ताफेरैच्यो। काताकावए तँनिकाव नगालात लप्तैद उईंकिन, तँनिकाव नगाला ब थाँदियो। 40स़ोनो काताकावए नचूबन्दी नैंन्याए जूँनी मुद्दा झाःद उईंकिन नफुतु ब हाइद एयो। 41फरी काताकावए करस ज़ तकिलोमितर लाँव ओपैंकिन नोस अझ ऩेकिलोमितर पै बानी। 42नँस ऩिज़्यावलाई एयो, नँस कातार लोसो ओपैंकिन ‘माले’ है मादाद लोइयो।”
सुतुररालाई समारिन्या
(लूका ६:२७-२८,३२-३६)
43“आव ब थैद जेनैज़्याखेहो, ‘नैं मेंलाई समारिन्या, सुतुरलाई सोन्या।’ 44ङा ते झन जेलाई है ङादाचिज़्या, जेसुतुररालाई मनी यारासमारिच्यो, जेखिरी पसिज़्यावराए याजूँनी पोंखारिच्यो। 45हो ताकिन ची स्वर्गताव जेबाबुए ओज़ार तान्या जेले। होए चाव माचाव प़ाइँलाई निमी ब पले·द याएज़्याव, धर्मीर स़ोनो अधर्मीरालाई नम ब सवाद याएज़्याव। 46जेलाई समारिज़्यावरालाई वाज़ जेरासमारिकिन स्वर्गताव जेजुँ कातानी जेदैरिज़्याव? नाःवाकाव य़ेन ते पापी है यारादोज़्याव सिर्मा स्यो·ज़्यावराए मनी दोज़्यार। 47जेक्याँदाङावरालाई वाज़ मानस जेरासुम्किन नो काता ज़ माःक। नाःवाकाव ते परमेस्वरलाई मासरेस्ज़्यावराए ब दोज़्यार। 48है जैद स्वर्गताव जेबाबु किताव ओखत माल्यो छैंव लिज़्या, जे ब हिताव ज़ ताव परिके।”#लेबी १९:२; ब्य १८:१३
Выбрано:
मत्ती 5: NKham
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015, Wycliffe Bible Translators, Inc. All rights reserved.
