मत्ती 15
15
यहूदीराए यापुर्खारानी हुव चलन
(मर्कूस ७:१-१३)
1तछा यरूसलेम सहरनी फरिसीर स़ोनो सास्त्रीर येसुए ल्योक हुद, 2“नसिसराए काराव गेसाखा पुर्खारानी हुव चलन यामादोज़्याव? आवराए याकुइ माचोखोइद ज़ ज़्युज़्यार,” है यादोक ते, 3येसुए नोरालाई, “जे ते झन जेसाखा पुर्खाराए याचलननी परमेस्वरए ओकानुनलाई जेबले·ज़्या। 4परमेस्वरए, ‘बाबु आमाए ओमान नैद्याव ज़ परिए,’ स़ोनो, ‘जोए ओबाबु ओआमाए उमिन बले·दिज़्याव, होलाई सैःव ज़ परिए’ है लिज़्या।#प्रस २०:१२; २१:१७; ब्य ५:१६; लेबी २०:९ 5जे ते झन, ‘जोए ओबाबु ओआमानिलाई, ‘जिन ङानिकाव दैव परिन्या भरी परमेस्वरए उमिनत ची नैद ङानै,’ है उलिकिन, 6नो मिँलाई ओबाबु ओआमानी निभार मालागिए,’ है जेलिज़्या। है जैद जे निताव जेय़ेननी ज़ जेचलनलाई सघ्योःद परमेस्वरए ओपाँलाई अऩाकलाव जेजैज़्या। 7जे मिताव कैफतीराए जूँनी यसैयाए ङ़ादा ज़ थिक सर्द नैद्याचिउ। नोए ओसरो आव ज़,
8‘आवराए यायाःए वाज़ ङामान नैद्याँज़्यार।
यायुँ ते ङाकिन तादाङ लिज़्या।
9मिँराए याससैव चलनलाई सघ्योःद,
अऩाकल ज़ ङासेवा दोज़्यार,’ ”#यसै २९:१३
है यादोक्यो।
मिँलाई बले·न्या पाँर
(मर्कूस ७:१४-२३)
10नकिन येसुए नक लिज़्याव माहोल्यारालाई ओल्योदा खुल्द, “आव ङापाँ चावस थ·रैच्यो, 11पाखानी याःल पसिज़्यावए मिँलाई माछैंव माजैव। मिँलाई माछैंव जैज़्याव ते याःनी पुलुस्ज़्यावए ची,” है लिद यासथैक्यो। 12उसिसराए नो ओपाँ थैद येसुलाई, “प्रभु, आव नपाँए फरिसीराए यायुँ कोला कोला जैद नरायो नमासैंए रो?” है यादोक ते, 13येसुए, “स्वर्गताव ङाबाबुए ओमारारूपिउ भरी तछा भोस्रिज़्यार। 14हैज़ घताज़्यारक, नोर तोबो उमी मारैंःवए उमी मारैंःवलाई दोरैद ओलाँज़्याव मितावर लिज़्यार। नितावनी दोरैसिद निबाक ऩेब्लो ज़ भल्खादाल तेन्या लिनी,” है यादोक्यो।
15हाःत ज़ पत्रुसए फरी, “ङ़ादाङाव नपाँए ओअर्थ गेलाई पलास्द्याव ताके,” है ओदोक ते, 16येसुए, “जे किताव मिँर जेल्यो, आःपै ङापाँ जेमातीधुज़्याव। 17जो ज़्याव ज़्युदी ब नो ज़्याव अइज़ फूल पसिद छींनी पुलुस्द बाज़्या लिन्या जेमासैंए रो? 18मिँलाई बले·ज़्याव ते युँल सिर्जैद याःनी पुलुस्ज़्याव पाँए ची। 19युँलाव माचाहिउ पाँर आवर ज़ — माचाव चेतैन्या, मिँ सैःन्या, अर्काए ओज्याए ल्योदा बान्या, पातर्या पातर्नी जैसिन्या, कुन्या, धुत गोहाई यान्या, अर्काए उमिन बले·द्यान्या, 20आवर ज़ मिँलाई बले·न्या पाँर। निताव कुइ माचोखोइद ज़्यान्याए काता ज़ माबले·व।”
छुत जातलाव कनानी मेंमा
(मर्कूस ७:२४-३०)
21येसु ननी पुलुस्द तुरोस सीदोन जीदा बाके। 22नलाव तोबो कनानी मेंमा येसुए ल्योक हुद, “अ प्रभु, दाऊदए ओथोलाव येसु, ङाल्योदा नयुँ ओनाक। मेंमा ङाज़ालाई माचाव पुरूसए क्योःद बनै हत्या याद नैव,” है लिद उक़िक, 23येसुए घाइ ज़ मादोक्यो। उसिसराए फरी, “आव मेंमा बनै झ्याउँ झ्याउँ लिज़्या, हतप्त ज़ पले·के,” है यादोक ते, 24येसुए नो मेंमालाई, “ङा इस्राएली जातलाव म़ाव ङोइव बेधा स्यासोराए जूँनी वाज़ ङाहुव ची,” है ओदोक ते, 25नो मेंमाए येसुए उखँत फुलुप्सिद, “जेरो ङाप्रभु, ङाल्योदा नयुँ ओनाक,” है दोक्यो। 26येसुए फरी, “ल़ुज़ाराए याज़्युज़्याव ज़्याव नैंद काःरालाई#15:26 मर्क ७:२७ चिऊन्या। यान्या माताए,” है ओदोक ते, 27नो मेंमाए, “हैज़ प्रभु, हैदी ब यार्गेराए तेबलतिन यासतेव ज़्याव काःराए मनी ज़्याव दैर सानी,” है ओदोक ते, 28येसुए, “अ माँ, नँ बनै नयुँ हुबो मेंमा नल्यो। है नल्यो भरी यो·न्या ले,” है ओदोव प़ाइँना होङ ओज़ा ओगराँधुव ओल्यो।
येसुए कुधुलाई ओरासगराँव
29येसु ननी पुलुस्द गालील दहलाव घ्याँ बाद तोबो दाँदात पुलुस्द च़ुसिके। 30नत च़ुसिद उलिज़्याक नजीलाव माहोल्याराए काना दूँदार, लुला लङरार, लाता भैरार, याजोरो हुवरालाई ब येसुए ल्योक रैद ओङ़ाक यारानैकेर। येसुए नो भरिलाई ओपो·स ज़ यासगराँक्यो। 31नो माहोल्याराए निताव मापाँधुन्यार पाँधुन्या याताव, यामी मारैंःवर रँःधुन्या याताव, माबाधुन्यार बाधुन्या याताव रँःद नोर बनै अचम्ब ताद इस्राएलीराए यापरमेस्वरलाई बनै घ्योःव ज़ थ·रैद उमिन ब सघ्योःदिकेर।
येसुए चार हजारलाई भरेस ओरायो
(मर्कूस ८:१-१०)
32नकिन येसुए उसिसरालाई ओल्योदा खुल्द, “आव माहोल्यार रँःद ङायुँ नाज़्या। आवर ङास याल्यो आछिम स़ोंला ताकेर। याज़्याव भरी ब खेम्के। आवरालाई करे ज़ परींन्या ङायुँए माभैंःए, अइज़ परींकिन येमत याकरेए माधुन्या लेर,” है ओरादोक ते, 33उसिसराए, “इताव साइँसुइँवक आःकाव माहोल्यारालाई गे कातानी ज़्यावर रैद सव़ाँन्या की?” है यादोक ते, 34येसुए, “जेस भरेस खागोता उलिज़्याव?” है ओरादोक ते, “भरेस सात गोता, ङाँःजुँर ऩेबरेंवा लिज़्यार,” है दोकेर। 35नकिन येसुए नो माहोल्यारालाई नामक च़ुसिउ परींद, 36नो सात गोता भरेस स़ोनो ङाँःजुँर उकुइत रैद धन्याबाद चरैःद नो भरेसलाई केःद उसिसरालाई नो माहोल्यारालाई भाःद्याव ओरापरींक ते, भाःद याराएकेर। 37नोर प़ाइँए याफू तसी ज़्याद यासय़ेलो यादुप्क सात झुर्नु ताके। 38नो ज़्युज़्यावर, मेंमार स़ोनो ल़ुज़ार माझाःद, खेपा भरी वाज़ चार हजारा याल्यो। 39नकिन नो माहोल्यारालाई याझ़िमदा याझ़िमदा परींद येसु दोङ्गाल पसिद मगादान खन्द जीदा बाके।
Выбрано:
मत्ती 15: NKham
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015, Wycliffe Bible Translators, Inc. All rights reserved.
