मत्ती 12
12
येसु ऩासिन्या छ्यामकिन घेप्पा ज़
(मर्कूस २:२३-२८; लूका ६:१-५)
1हो बेलाक तछा ऩासिन्या छ्याम येसु उसिसरास एँः खार्लाव घ्याँ याबाज़्याक उसिसर याकरेए बाला फ्या·द याकैज़्याव।#ब्य २३:२५ 2फरिसीराए निताव रँःद येसुलाई, “चिऊके, नसिसराए ऩासिन्या छ्याम मादान्या य़ेन ज़ दोज़्यार,” है यादोक ते, 3येसुए, “धर्मसास्त्रलाव सर्सिउ दाऊद राजा ओनैंरास याकरेकाव यादोव य़ेन जेमाप़रिए रो? 4दाऊद ध्यान झ़िमल पसिद परमेस्वरलाई चरैःसिउ भरेस हाइद ओनैंरास भाःद ज़्युकेर। नो भरेस पुजारीराए वाज़ ज़्यान्या ओताज़्याव, दाऊद ओनैंरास ज़्यान्या ओमाताज़्याव।#१ समू २१:१-६#लेबी २४:९ 5काता मोसाए ओकानुन जेमाप़रिए रो? ऩासिन्या छ्याम ध्यान झ़िमल पुजारीराए य़ेन दाद कानुनलाई बले·ज़्यार। कानुननी फरी नोराए याखत ते माले।#गन्ती २८:९-१० 6ङा फरी जेलाई साचो है ङादाचिज़्या, ध्यान झ़िमकिन घेप्पा तोबो आक लिज़्या। 7जे धर्मसास्त्रलाव सर्सिउ ‘पाथा पल्द चरैःज़्यावरास माःक, यादया ल्योरास ङायुँ होलाँ ताज़्या’ परमेस्वरए है ओल्यो पाँर जेथ·रैधुव ताकिन जे ब जेदया ल्योर तान्या जेल्यो।#होसे ६:६ 8ङा मिँ मिन्सिद हुव ऩासिन्या छ्यामकिन ब घेप्पा ज़ ङालिज़्या,” है यादोक्यो।
येसुए उकुइ थँवलाई ओसगराँव
(मर्कूस ३:१-६; लूका ६:६-११)
9येसु ननी पुलुस्द नोराए याधर्मसास्त्र झ़िमल बाके। 10नल उकुइ थँव मिँ तोबो उलिज़्याव। नल लिज़्यावराए येसुए ओपाहा झाःद्यान्याए जूँनी येसुलाई, “ऩासिन्या छ्याम ओजोरो हुवलाई सगराँन्या ओताज़्याव सैं ओमाताज़्याव?” है यादोक ते, 11येसुए, “जे सुवाराए तोबो जेबेधा ऩासिन्या छ्याम भल्खादाल ओतेकिन होल ज़ जेमानैज़्याखेहो, जेहाइज़्याखेहो सानी। 12बेधाराकिन मिँर घेप्पाल गनिसिउर लिज़्यार। है जैद ऩासिन्या छ्याम कानुनलाव सर्सिउ मिताव मिँए जूँनी चाव दाव परिके,” है दाद, 13नो उकुइ थँवलाई, “नकुइ तङ्गैके,” है दोक्यो। नोए उकुइ ओतङ्गैव प़ाइँना तँनिकाव उकुइ स्यासो सोजोकाव ज़ ताके। 14नो फरिसीराए निताव रँःद लाँःदा पुलुस्द, ‘आवलाई कै जैद सैःन्या ओताव?’ लिद गुमुस्ता दोनाकेर।
येसु परमेस्वरनी छाँतिसिउ ज़
15येसुए नो सैःव यापैंज़्याव सैंद ननी हाइसिद छुतङ बाके। ओलस बावर ब बनै माहोल्या ज़ यालिज़्याव। नलाव याजोरो हुव भरिलाई ब यासगराँक्यो। 16फरी नोरालाई, “आव जेक्याँताव ङादोव य़ेन सुलाई ज़ है तारादोच्यो,” है यादोक्यो। 17ननी ज़ यसैया अगमबक्ताए ओसरो ब यो·के। नोए ओसरो आव ज़,
18“आव छाँतिद ङानैज़्याव ङायुँलाव ङानोकोरलाई चिऊचिके।
नोलाई रँःद ङायुँ होलाँ ताज़्या।
नोए ओक्याँत ज़ ङापुरूस ङानैरिज़्या,
नोए प़ाइँ जातलाव मिँरालाई सतलाव पाँ सथैन्या ले।
19नो सुस ज़ इ़सिन्या माले,
बजार जीदा ब स्याप स्याप ख्यान्या माले।
20बुरू कान्ल ज़ मागनिसिउरालाई यायुँ केःद्यान्या माले,
यायुँ स्यासे तेवरालाई ब यायुँ होलाँ जैद्यान्या ले।
सतलाव ओय़ेन ओमासझेंःवा पै नो य़ेन दाव ज़ नैन्या ले।
21है जैद प़ाइँ जातलाव मिँराए होए ओक्याँत ज़ आस दान्या लेर।”#यसै ४२:१-४
येसुलाई सैताननिकाव याजैव
(मर्कूस ३:२०-३०; लूका ११:१४-२३; १२:१०)
22हाः बेलाक ज़ माचाव पुरूसए क्योःद ओनैज़्याव तोबो मिँलाई येसुए ल्योक रैकेर। नो मिँ उमी मारैंःव लाता उलिज़्याव। येसुए नोलाई ओसगराँवत उमी ब रैंःके, पाँधुन्या ब ताके। 23नो य़ेन रँःद माहोल्यार अचम्ब ताद, “आव ज़ सा, दाऊदए ओथोलाव ‘हुरिज़्या’ है यालिज़्याव ख्रीस?” है यालिज़्याव। 24फरिसीराए थैद, “आव ते झन माचाव पुरूसराए याघेप्पा बालजिबुलए उमिननी माचाव पुरूसर पले·ज़्याव ची,” है यारादोकेर।
25येसुए नोराए यायुँलाव पाँ सैंद, “तोबो राज्यालाव मिँर या या यामाखैकिन राज्याए उमिन ज़ म़ाज़्या। हो मिताव ज़ तोबो सहरलावर तादी ब तोबो झ़िमलावर तादी ब या या यामाखैकिन चितराँ पुतराँ तान्या लेर। 26है जैद सैतानए ओराज्यालावर ब या या माखैद तोबोए तोबोलाई ओपले·किन होए ओराज्या कातानी उरहिरिज़्याव? 27ङा बालजिबुलए उमिननी माचाव पुरूसर ङारापले·ज़्याव ताकिन जेसकावराए कातानी यारापले·ज़्याव? है जैद नो जेपाँ जेसकावराए ज़ जेङ़ैत फुलुप्द्यान्या लेर। 28खाली ङा परमेस्वरए उपुरूसनी ङारापले·ज़्याव ताकिन परमेस्वरए ओराज्या जेखार्ल ज़ हुद ले। 29फरी तोबो ओर्सा ल्यो मिँलाई ङ़ादा यामाकिवा पै उझ़िम पा·द ओजा-यार हाइद मालाँधुर।
30“जो ङास माखैए नो ङाकिन तँदाङाव ज़ लिज़्या। हिताव ज़ फरी जोए ङाल्योदा मारारैव, होए ङाकिन तँदा ज़ याख्यानाज़्याव। 31है जैद ङा जेलाई साचो है ङादाचिज़्या, मिँराए जो पाप यादोदी ब, परमेस्वरए उमिन याबले·दी ब नोराए यापाप क्यालो दैसिए। खाली जोए परमेस्वरए छैंव उपुरूसए उमिन बले·दिज़्याव, होए ओपाप क्यालो मादैसिए। 32हो मिताव ज़ जोए ङा मिँ मिन्सिद हुवए ङाङ़ैत माचाहिउ पाँर झाःद ङामिन बले·ज़्याव, होए ओपाप क्यालो दैसिए। खाली जोए परमेस्वरए छैंव उपुरूसए उमिन बले·द ओएकिन, नो पाप आव जुनील तादी ब अजम्बरी जुनील तादी ब क्यालो मादैसिए।”
गराँव सीं स़ोनो काना सींनी
(लूका ६:४३-४५)
33“गराँव सीं ताकिन ओसै ब गराँव ज़ ताज़्या। काना सीं ताकिन ओसै ब काना ज़ ताज़्या। है जैद सींलाई ओसैनी ज़ सरेस्सिए। 34हिताव ज़ जे घुलए ओथोर, माचाव जेयुँनी कातानी ची चाव जेपले·धुरिज़्याव? युँल किताव लिज़्या याःनी ब हिताव ज़ हुज़्या। 35चाव मिँए उयुँनी चाव वाज़ हुज़्या, माचाव मिँए उयुँनी माचाव वाज़ हुज़्या। 36ङा साचो है ङादाचिज़्या, मिँराए यापाँव माचाहिउ पाँ भरी तछा परमेस्वरए ओङ़ाक फाल्सिन्या छ्याम नो भरी थ·रैव परिरिज़्या। 37है जैद हो छ्याम धर्मी थ॰रिन्या सैं पापी थ॰रिन्या जेसाची जेपाँ ज़ तारिज़्या।”
सरेस खिम्ज़्यावर
(मर्कूस ८:११-१२; लूका ११:२९-३२)
38हाःत ज़ नक लिज़्याव सास्त्रीर स़ोनो फरिसीराए, “अ गुर्बा, गेलाई नसरेस तोबो सतैंद्यासिके,” है यादोक ते, 39येसुए, “जे आव जुकलाव जेयुँ माहुबो पापीराए सरेस वाज़ जेखिम्ज़्या। खाली जेदैरिज़्याव सरेस ते योना अगमबक्ताए ओक्याँत ताव सरेस वाज़ जेदैरिज़्या। 40किताव योना नो घेप्पा ङाँःए उफूल स़ोंला स़ोंरी ओल्यो, हिताव ज़ ङा मिँ मिन्सिउ मनी नाम जींल स़ोंला स़ोंरी ङालिरिज़्या।#योना १:१७ 41निनवे सहरलाव मिँराए योनाए ओरासथैव पाँर थैद परमेस्वरए ल्योदा यायुँ फर्कैकेर। खाली जे ते झन जेखार्ल हुद लिज़्याव योनाकिन घेप्पाए ओसथैचिक ब परमेस्वरए ल्योदा जेयुँ जेमाफर्कैके। है जैद परमेस्वरए मिँरालाई ओराफाल्रिज़्याव छ्याम नो ङ़ादाङाव मिँराए यायुँ याफर्कैवनी ज़ जेगल्ती थ॰रिरिज़्या।#योना ३:५ 42हिताव ज़ नो दखिन देसलाव रानीए परमेस्वरए ओपाँ सोलोमनए ओयाःनी थैना बनै तादानी हुके। जे जेखार्ल हुद लिज़्याव ते सोलोमनकिन झन घेप्पा लिज़्या। है जैद परमेस्वरए ओराफाल्रिज़्याव छ्याम आव बेलाकाव मिँराए यागल्ती नो रानीए ओक्याँनी ज़ थ॰रिरिज़्या।”#१ राज १०:१-१०; २ इति ९:१-१२
ओल्द हुज़्याव माचाव पुरूस
(लूका ११:२४-२६)
43“मिँनी पले·सिउ माचाव पुरूस नो मिँए ओक्याँनी उपुलुसोत ऱी माल्यो साइँसुइँवक ऩासिन्या पो खिम्नाज़्याव। लिन्या पो ओमादैकिन, 44फरी ओल्द ङ़ादाङाव उपुलुसोए ओक्याँत ज़ पसिउ पैंज़्याव। नल ओबाक स्यासी जैद थिक थाक जैसिउ खाली पो रँःद, 45ओलकिन माचाव पुरूसर सात गोता ओलस रैद नल पसिद नो मिँलाई ङ़ादाङावकिन झन ज़ माचावए क्योःज़्याव। आज्यालकाव पापी मिँर ब हिताव ज़ जेतारिज़्या।”
येसुए ओआमार ओभाइर
(मर्कूस ३:३१-३५; लूका ८:१९-२१)
46येसु नो माहोल्यारास ओपाँज़्याक ज़ ओआमा स़ोनो ओभाइर हुद लाँःक च्याँःसिद येसुलाई क़िउ यारापरींकेर। 47ननी येसुए ल्योक तोबो बाद, “लाँःक नआमा स़ोनो नभाइर नँस दैसिना हुद लेर,” है ओदोक ते, 48येसुए नो है दाना हुवलाई, “ङाआमार ङाभाइर कितावर?” है लिद, 49उकुइ उसिसराए ल्योदा छों जैद, “चिऊके, ङाआमार ङाभाइर आवर ज़। 50जोराए स्वर्गताव ङाबाबुए ओपाँ थैद दोज़्यार, होर ज़ ङाआमार ङाभाइ बैंनीर ताज़्यार,” है लिके।
Выбрано:
मत्ती 12: NKham
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015, Wycliffe Bible Translators, Inc. All rights reserved.
