मत्ती 10
10
येसुए उसिसरालाई ओरापरींव
(मर्कूस ३:१३-१९; ६:७-१३; लूका ६:१२-१६; ९:१-६)
1येसुए बाह्र जना उसिसरालाई खुल्द माचाव पुरूसर पले·न्या स़ोनो भाँती भाँतिलाव रोगनी सगराँन्या सक्तीर ब याएक्यो।
2नो बाह्र जना ओसाचीराए यामिनर आवर ज़ — प़ाइँरानी ङ़ाताव उसिस पत्रुस यादोज़्याव सिमोन, नकिन नोए ओभाइ अन्द्रियास, जब्दियाए ओज़ानी याकूब स़ोनो यूहन्नानी। 3नकिन फिलिप, बारथोलोमाइ, थोमा, सिर्मा स्यो·ज़्याव मत्ती, अल्फयसए ओज़ा याकूब, थेदियस, 4देसभक्ता सिमोन स़ोनो छींनी येसुलाई धोका याज़्याव यहूदा इस्करियोत।
5नो बाह्र जनारालाई येसुए अइ लिद यापरींक्यो, “जे जेबाक यहूदीराकिन छुत जातलावराए ल्योदा ताबाच्यो, स़ोनो सामरीराए यासहरल ब तापसिच्यो। 6बुरू एकसब्द्या ज़ इस्राएली जातलाव ङोइव बेधा स्यासोराए ल्योङ ज़ बाच्यो। 7नङ बाद पो पोङ, ‘स्वर्गताव राज्या सो हुरिके’ है लिद यारासथैच्यो। 8याजोरो हुवरालाई ब यारासगराँच्यो, सिउरालाई याराजागैच्यो, कुऱीरालाई सोजोकाव ज़ याराजैच्यो, माचाव पुरूसर यारापले·च्यो। आव सक्ती भरी अइज़ जेदैके, अइज़ याराएच्यो। 9जेवाँःफोत सुन चाँदीर पैसार तालाँच्यो। 10येमत जेबाक झ़ैं ब तालाँच्यो, फेरैसिन्या क्वा ब तालाँच्यो, छुत पोला ब तालाँच्यो, झुइ ब तालाँच्यो। जो य़ेनत तादी ब य़ेन दाज़्यावए ज़्याव दैव ज़।
11“फरी जो नाखारल जो सहरल तादी ब जेबाक जे लिन्या स्यासो सोजो मिँए उझ़िमक लिच्यो। ननी जेमापुलुसा पै नक ज़ लिच्यो। 12नो झ़िमल जेपसिक, ‘आव झ़िमलाई असिक ओताक,’ है लिच्यो। 13है जैद नो झ़िमलावराए जेलाई नैन्या स्यासोर यालिकिन नो जेदोव असिक नोरास ज़ ओताक। फरी नोर जेलाई नैन्या स्यासोर यामालिकिन नो जेदोव असिक नोरास ताताक। 14जोराए जेलाई ल्यो मायाद जेपाँ ब थैव यामाभैंःकिन नो झ़िमनी तादी ब सहरनी तादी ब जेपुलुस्क नो पोलाव जेखँताव गालो धुइरो नल ज़ थरैद ख्यानैद याराएच्यो।#10:14 मर्क ६:११ चिऊन्या। 15ङा जेलाई साचो है ङादाचिज़्या, परमेस्वरए फाल्न्या छ्याम नो सहरलाव मिँराकिन बुरू सदोम स़ोनो गमोरालावरालाई सहिधुन्या तारिज़्या।”#उत १९:२४-२८
सम्जैन्या पाँर
(मर्कूस १३:९-१३; लूका २१:१२-१७)
16“जे फरी जोगोइसिद बाच्यो। जेलाई प़र मितावराए खार्ल बेधा पाथा मितावर जैद ङापरींचिज़्या। है जैद जे सैंन्यात घुल मिताव बाथो, दान्यात कुइतम मिताव लातो ताच्यो। 17है जैद माचाव मिँराए ल्योनी जोगोइसिच्यो। नोराए जेलाई अदालतदा लाँद सूँपिचिरिज़्यार, धर्मसास्त्र झ़िम झ़िमल रीःचिरिज़्यार। 18स़ोनो ङा ङाजूँनी हाकिमर राजाराए ङ़ाक सच्याँद खोले·चिरिज़्यार। ननी ज़ जे नोरालाई स़ोनो छुत जातलावरालाई ङासाची यान्या जेले। 19है जैद नोराए जेलाई यासूँपिचिक, ‘ङा कै लिन्या, काता पाँन्या ओताव’ लिद जेयुँ आँचा पाँचा ताजैच्यो। नो बेलाक जे पाँव परिन्या भरी परमेस्वरए ल्योनी ज़ दैन्या जेले। 20नो बेलाक पाँन्यार जे माःक, परमेस्वर जेबाबुए छैंव उपुरूस जेयाःत च़ुसिद पाँन्या ले।
21“हो बेलाक ओभाइए ओदाज्युलाई, ओबाबुए ओज़ालाई सैःन्या सजाल यारापारैरिज़्यार। याबाबु याआमाकिन तँदा जैसिद याज़ाराए सैःन्या सजाल यारापारैरिज़्यार। 22जे ङामिनतावर जेतावए जेलाई प़ाइँए सोन्या लेर। खाली जो आव भरी ओमाखेमा पै थ॰रिज़्या, होए अजम्बरी जुनी दैन्या ले। 23जो नाखारल जेबाज़्या होल जेखिरी यापसिकिन ननी हाइसिद छुत नाखारल धोंःच्यो। साचो है ङादाचिज़्या, जे इस्राएलीराए यासहर भरिल आव य़ेन जेमातुपैद ज़ ङा मिँ मिन्सिउ हुन्या ङाले।”
24फरी, “उगुर्बाकिन उसिस घेप्पा माताए, ओय़ेन दाज़्याव ब ओघरपतीकिन घेप्पा माताए। 25उसिस उगुर्बा ओतावक पै वाज़ ताज़्या, ओनोकोर मनी ओघरपतीए ओहक भरी ओदैदी ब ओघरपती ओतावक पै वाज़ ताज़्या। है जैद ङा झ़िमए ओर्गेलाई ज़ माचाव पुरूसराए याघेप्पा ‘बालजिबुल’ है यादाँकिन झन जे ङाझ़िमलावरालाई कै जैद है मादाचिरके?”
सु रँःद छे·न्या
(लूका १२:२-९)
26“है जैद जे नोरालाई रँःद ताछे·च्यो। नो बेलाक कप्सिउल लिज़्याव भरी प़ाइँए सैंन्या लेर, म़ोंसिउल लिज़्याव भरी ब छर्लङ्ग ज़ रैंःरिज़्यार। 27है जैद जेलाई म़ोंसिउलाव है ङादाचिउ भरी जे पाखाङ ज़ यारासथैनाच्यो। ङाल्योनी जेर्नाल खुस खुसनी जेथैव भरी ब थालातिन यारासथैच्यो। 28जेक्याँलाई वाज़ सैःद्याज़्यावर जेपुरूसलाई कैज़ माजैधुज़्याव मिँर रँःद ताछे·च्यो। बुरू जेपुरूस जेक्याँलाई नर्गल ख्याद चुयाप जैधुज़्याव परमेस्वरलाई रँःद वाज़ छे·च्यो।
29“ऩेब्लो बिङर्या तपैसाल ओमाबिकैज़्याव रो? बिङर्या नाः सोङ्गो ओतादी ब स्वर्गताव जेबाबुए ओमासैंद तोबो ब नामल तेन्या माले। 30होए जेङ़ैताव जेचेम आः लिज़्या लिन्या ब सैंज़्याव। 31है जैद काताल ज़ ताछे·च्यो। कुधु बिङर्याराकिन होए जेलाई घेप्पा रँःचिज़्याव।
32“है जैद जोए मिँराए ङ़ाक ओलाज माहुद ‘ङा येसुसकाव ज़’ है लिज़्या, ङा ब नोलाई स्वर्गताव ङाबाबुए ओङ़ाक ‘ङासकाव ज़’ है दान्या ङाले। 33हो मिताव ज़ फरी जोए मिँराए ङ़ाक ‘ङा येसुसकाव माःक’ है लिज़्या, ङा मनी स्वर्गताव ङाबाबुए ओङ़ाक ‘आव ङासकाव माःक’ है दान्या ङाले।”
सिसए फो·व परिन्या एः
(लूका १२:५१-५३; १४:२६-२७)
34“जे ङालाई ‘आव मानुवाताव मिँरालाई सखैना हुव लिज़्या’ है तालिच्यो। ङा ते झन जेखार्ल तरवाली रैद ङाहुव मिताव लिज़्या। 35आव ङापाँए ज़ा बाबुनिलाई माखैव निजैरिज़्याव। हिताव ज़ ज़ा-मा तादी ब, फुबु भदै तादी ब माखैव याजैरिज़्याव, 36स़ोनो यासुतुर याझ़िमल ज़ तान्या ले।#मीका ७:६ 37जोए ङाकिन ओबाबु ओआमानी निल्योदा उयुँ थू ओजैकिन नो ङासकाव तान्या स्यासो माले। स़ोनो ङाकिन ओज़ाराए ल्योदा उयुँ थू ओजैकिन हो ब हिताव ज़ ताज़्या। 38है जैद जोए क्रुसत सिन्या मिताव दुखर सहिउ माभैंःद ङाछींत ओमाहुकिन नो ङासकाव तान्या स्यासो माले। 39जोए आव उजिउत ओललाई तान्या वाज़ खिम्ज़्याव, होए उजुनीलाई सम़ैज़्याव। फरी जोए आव उजिउत उजिउए मया मादाद ङा ङाजूँनी दोज़्याव, होए जुनी दैरिज़्याव।”
सिसए दैन्या इनाम
(मर्कूस ९:४१)
40“जे परमेस्वरए ओपाँ जेरासथैनाक जोए जेलाई ल्यो याचिज़्याव, होए ङालाई ब ल्यो ओयाँव मिताव ज़ लिज़्या। नो ङालाई वाज़ माःक, ङालाई परींज़्यावलाई मनी ल्यो ओयो मिताव ज़ ताज़्या। 41जोए अगमबक्तालाई ओय़ेन सरेस्द उझ़िमक ल्यो एज़्याव, नोए मनी नो अगमबक्ताए ओदैरिज़्याव मिताव ओल ब दैन्या ले। हो मिताव ज़ जोए धर्मी मिँलाई ओय़ेन सरेस्द उझ़िमक हुव एज़्याव, होए मनी नो धर्मीए ओदैरिज़्याव मिताव ओल ब दैन्या ले। 42ङा जेलाई साचो है ङादाचिज़्या, जोए ज़िम्ज़ारालाई तादी ब ङासकावर याल्यो लिद सरेस्द तुखुरी स़ोमो ऱी वाज़ ओराएदी ब नोए उइनाम जुनी ब दैन्या ज़ ले।”
Выбрано:
मत्ती 10: NKham
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015, Wycliffe Bible Translators, Inc. All rights reserved.
