Panagna'an 9
9
Paljanji'an Tuhan maka si Nū
1Manjari si Nū maka saga anakna l'lla binarakatan na e' Tuhan. Magkallam iya ma sigām, yukna, “Anganak kam paheka supaya ap'nno' e'bi kaluha'an dunya ilu. 2Ka'am ilu kinatāwan du e' kamemon sattuwa maka hayop, manuk-manuk maka ai-ai maglelehan ma tana', sampay saga daing. Buwananta kam kapatut magdūl-baya' ma sigām. 3Manjari takakanbi na ai-ai taga-napas ilu. Ma waktu dahū inān, tinanom ya bay pamuwanku ma ka'am, sagō' buwattitu pamuwanku na kamemon.
4“Saguwā' aniya' pangalānganku ma ka'am subay mbal kakanbi, ya na sumbali'an halam tapaluwas laha'na, sabab laha' ya pameya'an nyawa. 5Damikiyanna laha'bi manusiya', pameya'an nyawa isab angkan subay tinungbasan to'ongan. Sai-sai a'a amahuddud laha' pagkahina manusiya' sampay amatay, tungbasanku du. Minsan sattuwa, bang aniya' amapatay ma manusiya', subay du papatayku.
6Sabab aku ya bay amapanjari manusiya' pina'anggil ni aku,
angkan na bang aniya' a'a amahuddud laha' pagkahina,
binalosan du a'a inān, pinahuddud isab laha'na e' pagkahina manusiya'.
7Na, ka'am ilu subay anganak paheka supaya asaplag kaluha'an dunya e' saga panubu'bi magsuring-magsaingsing.”
8Manjari itu magkallam isab Tuhan ma si Nū maka saga anakna l'lla, yukna, 9“Itiya' aku amat'nna' paljanji'anku ma ka'am sampay ma saga panubu'bi magpangkat-mamangkat. 10Ya du ai-ai taga-napas kamemon ya bay tabeya' ma ka'am ma adjung e', talapay du isab pinat'nna'an paljanji'an, ai-na ka manuk-manuk, ai-na ka hayop, ai-na ka sattuwa. 11Ya na itu pagkallamku pasal paljanji'anku ma ka'am: tinagna'an minnitu in dunya itu mbal na taluwa' latap pabalik, maka ai-ai taga-napas kamemon mbal du alaglag e' latap. 12Aniya' isab tanda' palsaksi'an pat'nna'ku ma ka'am magtubu'-manubu' sampay ma sasuku taga-napas kamemon. 13Pat'nna'ku biradaliku#9:13 Biradali: ‘salindugu'’ atawa ‘bāngaw’ bang ma kasehe'an. ma kagabunan, bo' aniya' paltanda'an pamaentom saga manusiya' ma pasal paljanji'anku ma kamemon ya ma dunya. 14Bang pa'andomku lahat bo' aniya' biradali patuwa' min deyom andom, 15entomku du paljanji'anku ma ka'am saga manusiya' sampay ma kamemon taga-napas mailu ma dunya. Janji'anta kam, halam na aniya' latap makalaglag pabīng.” 16Yuk Tuhan isab, “Bang patuwa' biradali ma kagabunan sumiyan-sumiyan, nda'ku maka entomku paljanji'anku ma ai-ai taga-napas ma babaw dunya, paljanji'an anatas ni kasaumulan.”
17Buwattē' pagkallam Tuhan ma si Nū, yukna, “Ya na ina'an tanda' sin paljanji'an ya tahinangku ma sasuku taga-napas mailu ma dunya.”
Si Nabi Nū maka saga Anakna
18Na, saga anak si Nū ya bay sehe'na ma adjung e', ya na disi Sēm, si Hām maka si Japet. (Si Hām ya mma' si Kana'an.) 19In anak si Nū kat'llungan itu, ya na pang'mbo'an ma kamemon manusiya' ya pasaplag ma kaluha'an dunya. 20Na si Nū itu a'a maghuhuma asal, jari anagna' iya magtanom anggul.#9:20 Anggul: ‘grape’ bang ma bahasa Ingglis. Buwa'na ahāp kinakan, bohe'na ahāp ni'inum. Nihinang binu-anggul isab. 21Manjari itu, aniya' inuman makalango nihinang e' si Nū min bohe' anggul e'. Paginumna, nilango iya ati ahurusan di-na saga s'mmekna. Ati pabahak iya anantang ma deyom tolda ya pagluma'anna. 22Mahē' pa'in iya pabahak, makasōd pehē' anakna si Hām, ya mma' si Kana'an. Manjari tapandang e'na harapan mma'na. Pagpandangna itu, magtūy iya paluwas anuli-nulihan saga danakanna 23si Sēm maka si Japet. Sigā duwangan itu bay angā' s'mmek magtūy. Pinasablay ma baha sigā bo' yampa pasōd dahū bukut anambunan mma' sigā. Halam sigā palingi' bo' mbal ta'nda' kaiya'anna. 24Na, pagsayu si Nū min bay kalangona, bo' kata'uwanna bay hinang anakna kasiyalihan ma iya, 25magtūy pabukaganna. Yukna,
“Si Kana'an itu t'kkahan sukna'.
Tahinang iya ata ma deyo'an saga danakanna.”
26Ah'lling isab si Nū,
“Pudjiku PANGHŪꞋ ya pagtuhanan si Sēm!
Bang pa'in pa'ata ni iya si Kana'an sampay panubu'na.
27Si Japet isab, bang pa'in angaluha paglahatan saga panubu'na.
Bang pa'in sigām palamud sangkahāpan ma saga panubu' si Sēm.
Bang pa'in isab pa'ata ni sigām si Kana'an maka panubu'na.”
28Na, damuli pa'in min latap e' aniya' gi' t'llu hatus maka limampū' tahun kallum si Nū. 29Ta'abut pa'in siyam hatus maka limampū' tahun umulna, awapat na iya.
Выбрано:
Panagna'an 9: sml
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2008, Wycliffe Bible Translators, Inc. All rights reserved.
