MARCOS 6

Nu Jesúz guiedzy-Nasaret

(Mt. 13:53-58; Lc. 4:16-30)

1Byruu Jesúz uga no za me ru nac xguiedzy me, no ziyno me xmeññ me. 2No dze-risladzy meññ guzlo galuu me meññ leññ idoo. Nu xtahl meññ uga, no ru bieññ yâme ni ganii Jesúz, rtzunadz yâme, no ra yâme:

―¿Báhx‑e byzeedy me gyre nirieꞌ yahc? ¿Biahx guîlnann‑e nirieꞌ ni rahp me, no milagür-rieꞌ yahc ni rtzoo me? 3¿Dâs‑e leeme carpinter, xiiñ Maríe no behtzy Jacob, no José, no Jud, no Simóṉ la? ¿Dâs‑e neꞌ zegahc nu meññ-byzan me no nó la?

No nehx bylaby yâme ni rnii Jesúz lé bydziadzyno yâme leeme. 4Per Jesúz naꞌ, ra leeyâme:

―To profet rzacbeeiy meññ lee gyre ru ria, per leññ gahc xguiedzy me ba yac, ni lahd xfamily me, per ni leññ xiryuꞌ me.

5No di raḻ ntzoo me mbehty milagür uga, nunzy doozy meññ-gayac-ure psiaḻ me lee ru pshob ña me chehsh. 6No rtzunadz Jesúz nehx bylíladzy yâme leeme. Luxu za me zrieñ guiedzy yahc ni nu gahsh de uga zigluu me meññ.

Pshahl Jesúz gydiby tzipychop xmeññ me

(Mt. 10:5-15; Lc. 9:1-6)

7No pquee Jesúz riedz gydiby tzipychop xmeññ me no guzlo gashahl me chohp gá yâme, no ptzoo me leeyâme meññ ni beeiy ctzoo mdad gyruu mbenahcsy meññ. 8No ra me leeyâme di tziyno yâme mbehty par lo ñahz, nunzy yagca; no di tziyno yâme bush, ni paṉ, ni medy. 9Beeiy yquee yâme xguidguial yâme nieꞌ yâme, per di tziyno yâme chohp shab yâme, nunzy ni nutz yâme. 10No ra me leeyâme:

―Rutisy gydzihñ laꞌd to yuꞌ, uga lâ tzu xtâ glo gyruu laꞌd leññ guiedzy-caḻ. 11No bâḻ to guiedzy di gdee ñahz gydzihñ laꞌd no di ne yâme guieññ ni ru laꞌd la, lâ gyruu de uga no lâ cuihby yudé ni queꞌ nieꞌ laꞌd, lehdy gann yâme ni nahcsy‑e ptzoo yâme porni di ntzucas yâme laꞌd. Gapyaꞌ laꞌd ni uli, dze-gac xguîlnadz Dioz, ma xchoꞌ guîlné ni gabiahz meññ-guiedzy-wé que meññ-Sodom no meññ-Gomorr.

12Luxu byruu yâme zigyuno yâme meññ diidz lehdy csaan ni nahcsy ni nac. 13No gaboo yâme xtahl mbenahcsy ni nu meññ, no güluꞌ yâme ceihd xtahl meññ-gayac-ure no psiaḻ yâme lee.

Ni guhty Juaṉ ni rchôbnihs

(Mt. 14:1-12; Lc. 9:7-9)

14Bieññ ṟeiy-Herody ni gatzoo Jesúz, porni byzaꞌzy gayu meññ diidz gyre ni gatzoo Jesúz. No ne Herody:

―Juaṉ ni rchôbnihs‑e gübahñ de lahd mînguty gyzac, no leewe beeiyu leeme rtzoo me nirieꞌ yahc ni rtzunadz meññ lee.

15Zrieñ meññ ne:

―Profet-Elíaz‑e leeme ni güyuꞌ ba xtze.

No zrieñ yâme ne:

―Profet‑e leeme, beeiy gahc profet yahc ni güyuꞌ ba xtze.

16Per Herody naꞌ, hor-bieññ me nirieꞌ, ne me:

―Leeme we Juaṉ, ni ptzon mdad byruꞌ ihqy, naꞌ ba gübahñ me.

17Günii me ze porni ptzoo me mdad bygaꞌ Juaṉ, blihby yâme lee caden leññ lidzyguiib por xtoḻ Herodíaz ni nac tziahl behtzy gahcme Felipy. Ptzoo Herody ze, porni rahp me tziahl Felipy, beeiy tziahl gahcme. 18Porni gu Juaṉ Herody:

―Nehx xñahzu rahpiꞌ tziahl behtzy gahquiꞌ.

19No por leeu bydziadzyno Herodíaz Juaṉ, no racladzy me igaꞌdy me Juaṉ; per di raḻ ctzoo meu, 20porni rdzie Herody Juaṉ, porni nann me nehx rtzoo Juaṉ cuentz nac no meññ-tziaawy Juaṉ, no leewe rla Herody leeme. No hor-rieññ Herody ru Juaṉ diidz, ba racngannu par Herody, per riuꞌladzy me guieññ me ni ru Juaṉ. 21Per bydzihñ to dzé we naꞌ, güdahpu to mód, ptzoo Herodíaz ni gucladzy me; dze-byzaꞌ Herody ihz, guhc xilni me, no bzaa yâme xtahl guîlrahgü ni güdahgü xmeññ me ni rsahc, no zrieñ xcomandant xsoldad me, no zrieñ meññ-rahc ni rnii yahc lahd meññ ni nu lo ṟegioṉ-Galilea. 22Güyuꞌ xindzabdxuur Herodíaz glaꞌy ru dxie yâme gayahgü yâme, no byeꞌ me, no byxilyno ṟeiy-Herody mod-ptzoo me, no zrieñ meññ-dxieno me lee. Were ra ṟeiy-Herody ndzabdxuur:

―Günab naa nitisy neꞌy, no naa gdedyaꞌu lii.

23No bdee xtiidz me, ra me nzabdxur-rieꞌ:

―Nitisy gnabiꞌ naa, zdedyaꞌu lii nîcze ñahcu glaꞌy ru rtzon mdad.

24Luxu za ndzabdxuur, no ra me xmam me:

―¿Bia gnabaꞌ?

Ra xmam me leeme:

―Günab leeme ihqy Juaṉ ni rchôbnihs.

25Gubyguiat gahc ndzabdxuur, za me ru dxie ṟeiy, no ra me lee:

―Racdadzyaꞌ ba gahc ndeedyiꞌ naa leññ to blad ihqy Juaṉ ni rchôbnihs.

26Modni bioobu ṟeiy; per gumm ba pcahbyladzy me ñaz-lo meññ-dxieno me lee ruꞌ miax la, ba nehx biuꞌladzy me ndedyu zehzy no ni günab ndzabdxuur. 27Luegü gahc pshahl ṟeiy to soldad biycaꞌ ihqy Juaṉ. 28No güya gahc soldad leññ lidzyguiib, bicchuꞌ ihqy Juaṉ, no güiyno meu leññ to blad no bdee meu ndzabdxuur; no wé ba bdeedyu cuaꞌ xmam.

29Hor-gunn xmeññ Juaṉ nirieꞌ we naꞌ, güya yâme biycaꞌ yâme xcuerp Juaṉ no güiyno yâmeu biycaꞌdzy yâmeu leññ to baa.

Dze-ptzuxtahl Jesúz paṉ no mbaḻ

(Mt. 14:13-21; Lc. 9:10-17; Jn. 6:1-14)

30Byluxu bydohp xmeññ Jesúz ni güya ru pshahl Jesúz lee, no bie yâme diidz lo me gyre ni ptzoo yâme no gyre ni bluu yâme meññ. 31Ra Jesúz leeyâme:

―Lâ te, tzo nó diby lad to ru ndruhty nehx nu, lehdy guisladzy laꞌd doozy.

Porni za ziaad xtahl meññ, ba ni di riob gahgü yâme. 32Were za yâme nunzy leeyâme to leññ barcü ru ndruhty nehx nu. 33Per xtahl meññ bwieꞌ za yâme no bzaclo leeyâme. No gyre guiedzy byruu meññ, za ngueeḻy gahc, no nier lee bydzihñ que leeyâme. 34Ru byruu Jesúz leññ barcü, bwieꞌ me xtahl meññ no bioob me leeyâme, porni zidguiahc yâme beeiy xiily ni nehx rahp dxu güieꞌ lee; no guzlo galuu me meññ-rieꞌ yahc xtahl cos. 35Hor-ba ma udzie we naꞌ, gübigy xmeññ me, ra yâme leeme:

―Neꞌ ba diby lad‑e leeu, no ba udzie. 36Gu meññ-rieꞌ yahc tza yâme bahch ru gahsh o zrieñ guiedzy-yaañ ni nu gahsh de neꞌ lehdy ssii yâme paṉ, porni nehx rahp yâme ni gahgü yâme.

37Were ra Jesúz leeyâme:

―Lâ gdee ni gahgü yâme.

Ra yâme leeme:

―¿Per xnahcs ntzoo noꞌ? Rquihñu sahc xchieñ chohp gayuu xdzé dziiñ, lehdy nicshii noꞌ paṉ ni gahgü gyre yâme.

38Ra Jesúz leeyâme:

―¿Blac paṉ rahp laꞌd? Lâ dzigüieꞌ.

Bylux bigüieꞌ yâme, ra yâme Jesúz:

―Rahp noꞌ gaay paṉ no chohp mbaḻ.

39Luxu ra Jesúz xmeññ me, ga yâme gyre meññ-caḻ yahc cuia yâme por cuib lo guix-ngay. 40Were gürie yâme por cuib, diby gayuu gá no cincuent gá guhc to cuib. 41Byluxu cuaꞌ Jesúz gydiby gaay paṉ-caḻ lo ña me no gyrop mbaḻ, no gülesy lo me gybaa, bdee me xquix Dioz, no ptzulaꞌy me paṉ, bdee meu xmeññ me lehdy quiiz yâmeu ycaꞌ meññ-caḻ yahc. No güdiiz me gyrop mbaḻ zegahc, cuaꞌ gyre meññ-dxie yahc uga. 42No gyre yâme güdahgü glo bydzeꞌ yâme. 43No luxu ptohp yâme tzipychop dzomby paṉ no mbaḻ ni biaꞌn. 44Meññ-mpyquie ni güdahgü, gaay mily yâme.

Gazeꞌ Jesúz xtziguia nzeꞌ

(Mt. 14:22-27; Jn. 6:16-21)

45Luegü gahc ra Jesúz xmeññ me tzu yâme leññ barcü no tedy yâme stiby chehsh nisdoo sunier ga yâme, no gydzihñ yâme to guiedzy ni le Betsaida, eguiid Jesúz gashahl me meññ-bidyo leeme gybiꞌ yâme. 46No bylux pshahl me meññ-caḻ yahc zia, güyehpy me chehsh to dahñ, zignab me lo Dioz. 47Hor-ba güyuꞌ guiaal‑e naꞌ, ba za barcü beeiy glaꞌy nisdoo, no Jesúz biaꞌn me lehzyme lo yudahñ coo nisdoo. 48No bwieꞌ me xroꞌ dziiñ par gayisshuunn xmeññ me barcü, porni rxan gaxuu mbedun. Ba nchuulr‑e naꞌ, bydziñgahsh Jesúz ru za xmeññ me, gazeꞌ me xtziguia nzeꞌ lo nisdoo, no gucladzy me tedy gahcme lo yâme. 49Ru bwieꞌ yâme ziaad me gazeꞌ me xtziguia nzeꞌ, nlâdzyx yâme xguiaḻ meññ‑e no pquee yâme riedz; 50porni gyre yâme bwieꞌ no gadzie yâme. Per ra me leeyâme:

―¡Di yqueꞌladzy laꞌd mbehty; naa we, di gydzie laꞌd!

51No güyuꞌ me leññ barcü tohzy no leeyâme, no biandzie gahc mbedun. No modni rtzunadz yâme, 52porni nehx gunn yâme xnahc ptzuxtahl me paṉ, no porni ndaagü xguîlriehñ yâme.

Psiaḻ Jesúz meññ-gayac-ure ni nu ṟegioṉ-Genesaret

(Mt. 14:34-36)

53Ru ba güdedy yâme stiby chehsh nisdoo, bydzihñ yâme to lo ṟegióṉ ni le Genesaret, no uga blihby yâme barcü ni ziyno yâme. 54Ru byruu yâme leññ barcü, bzaclo gahc meññ-caḻ Jesúz, 55no ngueeḻy gahc güya yâme byzaꞌzy, no guzlo gahc ziyno yâme meññ-gayac-ure lo camill, bydzihñ yâme gyzasy ru rieññ yâme nu Jesúz. 56No rutisy za me, leññ guiedzy-yaañ yahc, o guiedzy-ro yahc, o leññ ru nu meññ dahñ la, rguihsh yâme meññ-gayac-ure coo ñahz, no rnab yâme leeme gdee me ñahz can yâme nîcze nieꞌ shab me; no gyre meññ-güdanu, biaḻ gahc yâme de xguîlguihdz yâme.

Выбрано:

MARCOS 6: zpg

Выделить

Копировать