Mat 2

Beboete ba bɛdɔ ní Kewetu ya ɛba

1Agi bɛpɔ Yesu ní Betlehem ní Yudea, ní Okusi ye Herodes lipoe le me e, beboete ba bɛdɔ ní kewetu ya ɛba Yerusalem, lɛ beʋi sì 2“Nifɔ kwiamɔ Yudanɛ ma Okusi ye gi bɛpɔ ɔ? Kwimɔ yɛ liŋui nɛ, lɛ kwiba si kwitrakpɛ litukpo kesea ɛki yɛ ɛ.”

3Agi Okusi ye Herodes enu liboe lɛ ya ɛ, yɛ ɔna nɔ ɛhwa. Lɛ Yerusalem banɛ ma pɔ́ fɛ ɛ, liboe le lihwa ni ba a. 4Lɛ axwa kusɔliɔ baka ba petee ni ɔsã nɔ badɔbasɛ ba pɔ́ akpɛ likpɔ, lɛ apamí liboe le me nì ba si, “Nifɔ biapɔ Kristo ye?”

5Lɛ bɛsi yɛ si, “Ní Betlehem, ní Yudea, lɛ ese linu si, Aya yɛ oboedoplɛɛ aŋwlimi a plɛ si:

6‘Lɛ wɔ Betlehem ní Yuda kesea aʋa ɛ,

wɔ wonu ɔma sisami nɔ ní Yuda ikusima nɛ kusi;

pɔ lɛ wɔ mɛ ɔnɔgbanɔɛ

gi yɛ atrá gbani mɛ Israel ɔma nɔ aadɔ.’ ”

7Lɛ Herodes axwa beboete ba tsinɔ ní kutsatsa mɛ ní kikpokpo me, lɛ apami lipoe lɛ klɔ gi liŋui nɛ lido e nì ba mɔmɔmɔ. 8Le kede e, akpɛ ba atsisi Betlehem, lɛ asi ba sì, “Mlazɛpɛ́ obi ye mɔmɔmɔ; tɔ xegi mlɛmɔ yɛ ɛ, mledzi ba atɔ mlagasi mɛ, tɔ mɛ fɛ maatrɛ tɔ miikpɛ litukpo kesea ɛki yɛ.”

9-10Agi benu Okusi ye eboe la pɔ́ ɛ, beku kudeo me. Gi bɛzɛtrɛ ɛ, bɛmɔ liŋui nɛ klɔ gi bɛmɔ ní kewetu ya ɛ, ní ba ɔtɔ nɔ. Isami nɛ iku ba nyani nyani lɛ liŋui nɛ lizeeli ní kepea lia klɔ mɛ gi obi ye eze e, ka ada la mɛ ɛ. 11Gi beti iku ní kepea mɛ pɔ́ ɛ, bɛmɔ obi ye nì yene Maria; lɛ bedu ba aklamasi na kesea lɛ bɛkpɛ etukpo kesea ɛki obi ye. Lɛ bebu ba bidɔkɔkɔɛ ʋɛ gi bize sika, kotoklobo ani lifi yɛ ní ba igudo le me ɛki obi ye e.

12Agi Aya ebu abasɛ ba ní kulila mɛ si bakídzi atrɛ ní Herodes klɔ tɔ ɛ, bɛga kude dzedze lɛ bɛtrɛ ní ba kepea ɛ.

Yosef ese ni Yesu ni Maria atsinɔ Egipte

13Agi bɛsɛ pɔ́ ɛ, Aya yɛ ɔxwɛdzɛɛ ebu isu ya abasi Yosef ní kulila mɛ si, “Herodes atrápɛ obi ye si yiye ye, lɛ loso e, yɔ tɔ gbani obi ye ni yene tɔ sé trɛ ní Egipte. Mleze niklɔ kɔzɛna nani lipoe lɛ klɔ gi maasi mlɔ si mlasɛ edzi i.”

14Niteme si Yosef ayɔ, lɛ agbani obi ye ni yene elesi la lɛ eseni ba atsinɔ ní Egipte e. 15Beze ní Egipte kɔzɛna nani Herodes litsepoe le. Lɛ loso e, liboe lɛ gi Aya yɛ oboedoplɛɛ apani si “Maxwa Mobi ye adɔ ní Egipte e,” liba lɛ mɛ.

Herodes aki si beye bebinyimenuvɔ ba petee ní Betlehem

16Agi Herodes amɔ si beboete ba gi bɛdɔ kewetu ya bekyi ye exla ɛ, amɔ kusuyeʋi nyani nyani. Lɛ loso e, akpɛ ɔsã si beye obinyime kakaa gi azɛ agɔ taʋa pleno ní Betlehem ani imaɛ nɛ klɔ gi iklani lɔ ɛ. Ebu ɔkliɔ lɔ klɔ kɔkpɛ liboe lɛ klɔ gi enu adɔ ní bababa ʋa onu ní ɔnuvɔɛ lipɔpoe le su i.

17Niteme liboe lɛ gi Aya yɛ oboedoplɛɛ Yeremya apani aplɛ ɛ,

18liba lɛ mɛ si, “Ole ɔtɔ eyi ní Rama,

gi onu kubemi gagla ole.

Raxel eebemi yɛ bebi ba;

ɔ́dimɛ si bayɔ yɛ ɔna a,

lɛ ese linu si yɛ bebi ba pɔ́ betse.”

Yosef, Maria ani Yesu bedzi dɔni Egipte

19Ní Herodes kutseo kede e, Aya yɛ ɔxwɛdzɛɛ ebu isu ya abasi Yosef ní kulila mɛ ní Egipte, 20lɛ apani si, “Yɔ, gbani obi ye ni yene, atɔ dzitrɛ ní Israel kesea aʋa, lɛ ese linu si banama gi bɛpɛ si beye obi ye e, betse.” 21Loso e Yosef ayɔ, lɛ agbani obi ye ni yene, atsinɔ ní Israel kesea ʋa ɛ.

22Pɔ̀ gi Yosef enu si Arxelao yɛ ɛɛŋa kukusi yo ní yɛka Herodes kutse o kede ní Yudea ɛ, ese lifu ne ki niklɔ kutrɛtrɛ. Agi bɛkpɛ yɛ ɔsã ní kulilaa mɛ loso e, ekyi atrɛ ní Galilea kesea mɛ. 23Lɛ atsa kepe ní ɔma ɔtɔ gi bizɛxwa si Nazaret mɛ ɛ. Nite si liboe lɛ gi bedo eplɛ gani beboedoplɛ ba ʋa si “Banima biaxwa Yɛ si Nazaret Ɔnɛ ɛ” liba lɛ mɛ.

Выбрано:

Mat 2: avn

Выделить

Копировать