ꞌLuuka 16

ꞌLimman ꞌcĩ awantoothĩk dticciannioohit ꞌcĩ abathĩ

1Ma nĩngaata, uduhaak Yeesu nuyyiook cĩgĩnnĩg ĩĩnnĩk, “Baa aaĩ ballioohiti umwaa ꞌcĩ athĩhĩ aĩ, uranganĩ dticciannioohiti cĩnnĩ ijjio. 2Nĩngĩtĩ avvaanĩ dticciannioohit tĩho ꞌcieetõõ nẽ ĩĩnnĩk, ‘Ne ꞌcĩ hathihi naa aĩ eeta adĩmani nii ho? ꞌNyahaahaa da ꞌbuuk gõõng ẽhẽẽdĩkĩĩ ꞌrabbẽẽta, hĩnĩngĩtĩ iittiõõ nii hõllõngaa occa aggami dtiic icci.’

3“Ma nĩngaata, ummuk dticciannioohiti nicciee ĩĩ, ‘Lõggõõ cieeg, hogooni occa hutuno? Itiggiawaa bẽrẽ hatĩ baattĩ dtiico nẽ hĩĩnĩ ẽẽtĩ eet ꞌcĩ occa hõllõngaa hũũlũ ngaatĩ hakanniini nẽ tarĩ haꞌngaaõna ngaatĩ occa halaĩ eet buúk. 4Nẽẽthĩ nẽẽꞌthẽk, haga naa ꞌgii ꞌcĩ occa hadĩmani, hátĩ haccamattaawa eeta olooyyiohĩĩ cĩggĩĩng hatĩ hitiggiaĩ.’

5“Nĩngĩtĩ avvaanĩ dticciannioohiti nicciee eet ꞌcĩg baag acuhan ijjio cĩg makayyioohit cĩnnĩ ho hõdẽĩ hõdẽĩ nẽ ijin ꞌcĩ oou ĩĩnnĩk, ‘Ne baa ꞌcĩ acuhanaa nii makayyioohit caannĩ?’

6“Ẽdẽcĩ aĩ, ‘Baa hacuhani naa boromiilit ꞌmiia hõdẽĩ cĩg ngõõrrõ cĩ olivi.#16:6 Hẽẽt cĩ Olivi: Ĩĩn ciee hẽẽt ꞌcĩ abbiiri ꞌcĩ aduk eeta cĩg ꞌJudeei nẽ erehit bura cĩg olivi nẽ ammacũyyia ngõõrrõ cĩ duhẽẽttõ hode ngõõrrõ ꞌcĩ attũllẽẽnĩ ꞌloomo.’

“Nĩngĩtĩ annẽẽkĩ ĩnõõnnõ, ‘Waraga cieeni, au loota hataman nẽ eteheedĩhuu hẽẽn ꞌtur haaga.’

7“Ma tarĩ ho, ijin umwa ĩĩnnĩk ‘Ma nooyyia baa nii acuhani thõng?’

“Ẽdẽcĩ nicciee aĩ, ‘Baa hacuhani naa lohoddwa aalib hõdẽĩ cĩg ꞌgẽẽmẽ.’

“Nĩngĩtĩ annẽẽkĩ ĩnõõnnõ, ‘Eri waraga cunni cieeni, teheedĩk ꞌmiiaꞌnya turkiyyio haaga.’

8“Ma ho, ikia accamana ballioohiti dticciannioohit ꞌcĩ ĩĩn oloꞌngiaahit ko gẽrrẽẽt, ngaatĩ ẽggẽẽꞌnyĩ nẽ ĩdĩman eet ꞌcĩg acuhan ijjio jurrung. Nẽ dĩdĩ, ẽggẽẽnyĩth eeta cĩg looc nicci, ngaatĩ adĩmanĩ ꞌgõõnõgĩ jurrung hĩllõõanit eet cĩg lanyitaak. 9Haduhaakuunga, akattiaaĩ baliinit cĩ looc nicci ꞌgõnnaꞌthẽẽt hĩ eet cĩg looc nicci, hátĩ ma edeccia baliiniti cĩ looc nicci, ẽlẽmaakuung hatĩ Nyekuci uduhunit halang ꞌcĩ aalla ooo.

10“Ẽẽtĩ ꞌcĩ aꞌthũũnnĩ hẽlẽggĩ ꞌcĩg abadtẽc, aꞌthũũnnĩ hatĩ ꞌcĩg mẽẽlĩg buúk. Nẽ ẽẽtĩ ꞌcĩ hõllõngaa aꞌthũũnnĩ ꞌgii ꞌcĩ abadtẽc, hõllõngaa ꞌthẽk hatĩ aꞌthũũnnĩ ꞌcĩ maka buúk. 11Má hõllõngaa aꞌthuunnu niig baliinit cĩ looc nicci, nganĩ thĩ hatĩ ꞌcĩ aaꞌnyuung uꞌthuutti baliinit ꞌcĩ ĩĩn dĩdĩ ho? 12Má hõllõngaa aꞌthuunnu niig ijjio cĩg eetuk, nganĩ hatĩ ꞌcĩ aaꞌnyuung ijjio ũgĩ hĩĩ cugunnig ko?

13“Aitiõõ dticciannioohiti ꞌcĩ occa adticanoothĩk makayyiook ꞌramma tõõ. Occa hinnia hatĩ ammĩnan hõdẽẽthõng nẽ ahareek umwa hode occa adticanoothĩk hõdẽẽthõng jurrung nẽ appallaaran umwa. Occa hõllõngaa adticanoothiku niig Nyekuc hĩ ꞌrabbẽẽt hõdẽĩ.”

Thooꞌthiok ũgĩ cĩg Yeesu

(Tigiil Maatteeo 11:12-13; 5:31-32; Maarko 10:11-12)

14Ma baa athĩhĩ Variꞌtheei thõõth icci ho, iita atararri nẽẽg Yeesu ꞌbuth, hĩnĩngĩtĩ ĩĩn nẽẽg eet ꞌcĩg ammĩnan ꞌrabbẽẽta. 15Nĩngĩtĩ annẽẽkĩ Yeesu ĩhõõggõ, “Gõõng ꞌthẽk ngagiit ꞌcĩg athĩngõnyannu ainnu abũnnayyu hẽbẽrẽẽnnĩĩ cĩg eet vẽlẽk. Nẽẽthĩ, aga Nyekuci ꞌthinneeti cugguung. ꞌGii ꞌcĩ tiiri hĩ eeta, ĩĩn ꞌgii ꞌcĩ abathĩ hĩ Nyekuc.”

ꞌLimman umwa ꞌcĩ ĩttoorĩk Yeesu

(Tigiil Maatteeo 11:12-13; Maarko 10:11-12)

16Ma ho, irrioonĩk Yeesu nuyyiook ĩĩnnĩk “Baa udukiaak eet vẽlẽk nyattalĩ cĩ Mũũꞌtha hĩ thõõth cĩ põrõvẽtaaꞌnyanu, ĩꞌthõng hikia Yõaannẽ Batitta. Nganĩngĩtĩ irkiꞌnyia nicciag, nga ꞌthẽk allimanoothĩk eet nyeemuut ꞌcĩ abũnnaa cĩ habuccieet cĩ Nyekuci noho nẽ nga ꞌthẽk attĩman eeta vẽlẽk kõmĩĩtha ngaatĩ occa adukni. 17Ammũjĩ ngaatĩ aꞌnginõõꞌthĩ hẽẽtkujjieen hĩ looc hĩllõõan ngaatĩ occa aꞌnginõõꞌthĩ nyamacaar ꞌcĩ abadtẽc cĩ ꞌgaalam ꞌcĩ eheedini nyattalĩ.

18“Ẽẽtĩ ꞌcĩ õõg ngaa cĩnnĩ nẽ ũꞌthũwana ngaa umwa, adĩman ꞌthẽccan, nẽ ẽẽtĩ ꞌcĩ aꞌthũwan ngaa ꞌcĩ õõg ẽẽtĩ umwaanĩ, adĩman nẽẽ buúk ꞌthẽccan.”

Ballioohit hĩ Laaꞌtharõ

19Ma nĩngaata, uduhaak Yeesu eet ĩĩnnĩk, “Baa aaĩ ballioohiti umwaa ꞌcĩ ahimit ceremwa ꞌcĩg ꞌrẽggẽẽg ꞌcĩg õkõmĩ gẽrrẽẽt nẽ adak ꞌgẽẽn ꞌcĩ abũnnaa waathinniook vẽlẽk. 20Nẽ baa tarĩ, aaĩ hullahaacĩ umwaa ꞌcĩ haĩ Laaꞌtharõ, ꞌcĩ ara ala ꞌgẽẽn hattũũgaa cĩ araan cĩ eet ꞌcĩ ĩĩn ballioohit ko. Baa ĩĩn Laaꞌtharõ eet ꞌcĩ appiik carrahulit ẽlla vẽlẽk habath dtẽc. 21Nẽ baa nuun adiim nẽẽ aduk thuruthur ꞌcĩg adhukiaa tẽrẽmẽẽjawa ꞌcĩ aduhẽẽnĩ ẽẽtĩ ꞌcĩ ĩĩn ballioohit ko. Baa tarĩ au ẽdẽlan ũthũrẽẽta carrahulit cĩgĩnnĩg ko buúk nĩngaata.

22“Ma baa ho, ikia adaak Laaꞌtharõ nẽ iita ootti aajĩlẽẽta ĩnõõnnõ ngaatĩ aayyi Abũrahamĩ. Ma urutaa cĩnnĩ, ikia adaak ballioohiti tĩho buúk nĩngĩtĩ adaiini. 23Ma looccaa cĩ daakiahu, ũũk accananĩ nẽẽ gẽrrẽẽt. Ma baa acĩnoothi hẽẽtkujjieen ko, adtuuhothi hinnia Abũrahaamõ ꞌrẽẽna arũmĩ hĩ Laaꞌtharõ. 24Nĩngĩtĩ avvõõꞌthĩ nẽẽ Abũrahaamõ annẽẽkĩ, ‘Baaba Abũrahaamõ! Tamaatĩhaa baaĩ nuun! ꞌThõõahaa Laaꞌtharõ hikia hokoleek aꞌthiit maamĩtõõ nẽ ĩdtĩlaneeka ahaat maam halalĩĩthanĩ, hĩnĩngĩtĩ aaburii ꞌgwaa ngaati padtahac.’

25“Ẽdẽcĩ hinnia Abũrahamĩ ĩnõõnnõ anneek, ‘Ẽlẽ, muhunooth, baa ĩĩnĩ nii eet ꞌcĩ aanytĩhoothihii hẽlẽggĩ ꞌcĩg abũnnaa baa nga arugi nẽ baa accananni Laaꞌtharõ, nẽẽthĩ ꞌyioko, accamanoothĩk nẽẽ ngaati nẽ accananĩĩ niina. 26Nẽ nõõ ꞌthẽk dĩdĩ, aaĩ ꞌwoor ꞌcĩ uuthik gẽrrẽẽt hõrggẽẽnaa cĩnaac ꞌcĩ alaammeet, hiittiõõ ẽẽtĩ ꞌcĩ occa aku nĩĩca hode ĩĩcĩ tõõ.’

27“Ẽdẽcĩ hinnia ballioohiti aĩ, ‘Má aaĩ nohotaa baaba, hammaannikiina, ꞌthooĩhaa Laaꞌtharõ hũũk õlõõ cĩ baaba, 28hĩnĩngĩtĩ haꞌnyahi ꞌgotoonoga ꞌtur õlõ. Aꞌnyĩĩk nuun hũũk hirrioonik ĩhõõggõ, hátĩ hiittiõõ hõllõngaa au nẽẽg buúk ngaatĩ ꞌcannaanõ ho.’

29“Ẽdẽcĩ Abũrahamĩ anneek, ‘Aꞌnyĩĩk ꞌgotoonogu hitigiilito thooꞌthiok baag ẽhẽẽd Mũũꞌtha hĩ põrõvẽtaaꞌnya, aꞌnyĩĩk thooꞌthiok tĩko hirrioottĩk ĩhõõggõ.’

30“Nĩngĩtĩ annẽẽkĩ ballioohiti Abũrahaamõ, ‘Aitiõõ hõllõngaa occa aaĩ nohotaa nyakangaan, hĩĩ ꞌcĩ õkõ aduhaakĩ ẽẽtĩ umwaa ꞌcĩ adaak ẽlẽk ĩhõõggõ, occa ũũnnĩk nẽẽg ꞌgõõl cĩ ꞌthẽccanẽẽt cĩggĩĩng.’

31“Anneek hinnia Abũrahamĩ ĩnõõnnõ, ‘Má hõllõngaa athĩhĩ nẽẽg thõõth cĩ Mũũꞌtha hĩ cĩ põrõvẽtaaꞌnyanu, aalla ꞌthẽk hatĩ hõllõngaa athĩknĩ noho, tananga hĩꞌthõõĩ ẽẽtĩ ꞌcĩ adaak ẽlẽk.’ ”

Выбрано:

ꞌLuuka 16: did

Выделить

Копировать