Yõaannẽ 4
4
Yeesu hĩ ngaa ꞌcĩ ĩĩn Thamaritaanoc
1Baa athĩhĩ Variꞌtheei aĩ, mẽẽlĩg nuyyiooha cĩg Yeesu ꞌcĩg aggameek nẽẽ baattithimo hĩllõõanit cĩg Yõaannẽ. 2Nẽẽthĩ, baa hõllõngaa Yeesu ꞌcĩ aaꞌnyĩk eet baattithimo ho, baa nuyyiook cĩgĩnnĩg ꞌcĩg aggameek eet baattithimo ho. 3Ma baa athĩhĩ Makayyioohiti thõõth icci ho, ikia ũtũngeek nẽẽ looc cĩ ꞌJudeea nẽ õbõdõõthĩ ũũk ĩĩcĩ looc cĩ ꞌGalileea. 4Nẽẽthĩ ꞌyioko, ikia ẽꞌngẽrkẽẽthan nẽẽ ũũk ĩĩcĩ looc cĩ Thamaria.#4:4 Thamaria: Baa ĩĩn hĩbaangĩ cĩg eet cĩg Thamaria ũgẽẽgĩ ꞌJudeei, nẽ iita ũgẽẽgĩ eetinii cĩrrĩĩng. Baa gõõng ala eeta cĩg Thamaria Nyekuc muuraa ꞌcĩ haĩ ꞌGerithim, ꞌgõõlaa ꞌcĩ hõllõngaa aduhõõ hĩ ꞌgõõl ꞌcĩ alaĩ ꞌJudeei Nyekuc. Tigiil thõõth icci ꞌBuuhaa cĩ 2 Habuẽẽt 17:27-40; Yõaannẽ 4:1-42.
5Nĩngĩtĩ õdõlanĩ nẽẽ ꞌtaaũn umwa looccaa cĩ Thamaria ꞌcĩ haĩ Thikar, ngaatĩ baa õbõhõõ hĩ mana umwa, ꞌcĩ baa aaꞌnyĩk Yakobo#4:5 Yakobo: Baa ĩĩn Yakobo ngeertĩ loholeec cĩ Abũrahamĩ ꞌcĩ baa aꞌnyak lõhõlĩ ꞌcĩg maacĩg õmmõtõ hĩ ꞌramma. Baa ẽgẽẽran Nyekuci ꞌthaar cĩgĩnnĩg nẽ akateek ꞌthaar ꞌcĩg kaĩ Ĩꞌthĩraẽl. Haĩ lõhõlĩ cĩg lõhõlĩ cĩgĩnnĩg lõhõlĩ cĩg Ĩꞌthĩraẽlĩ nẽ korrioohĩĩ baag Yeesu, baa avvĩ eeta ĩhõõggõ anneek eet cĩg ꞌJudeei. Tigiil thõõth cĩnnĩ ꞌBuuhaa cĩ ꞌThianaattõ 25-50. ngeerĩnĩ Yothebo. 6Baa aaĩ wĩĩtanẽẽcĩ cĩ Yakobo nĩngaata, nĩngĩtĩ aku iyyiomanĩ Yeesu wĩĩtaneeca nĩĩca, hĩnĩngĩtĩ baa ĩppĩĩra nẽẽ weet ꞌcĩ õvvõõĩ, baa aau kõrra lokora.
7Ma baa aku adtĩĩla ngaa umwaa ꞌcĩ baa ĩĩn Thamaritaanoc maam wĩĩtaneeca ho, ikia othoothĩk Yeesu ĩnõõnnõ ĩĩnnĩk, “ꞌBaanaa baaĩ maam ũgĩ hũhũdĩ.” 8Baa nga õõ ũũta nuyyiooha cĩgĩnnĩg ꞌgẽẽn umwa ꞌtaaũnatõõ.
9Ẽdẽcĩ ngaa nicciee Yeesu anneek, “Alayyaa gõõng ẽẽtĩ ꞌcĩ ĩĩnĩ ꞌJudeeinit ngaa ꞌcĩ hĩĩnĩ Thamaritaanoc maam hutuno?” (Baa ĩĩgĩnnõõ eeta cĩg ꞌJudeei hĩ eet cĩg Thamaria mĩrõk.)
10Ẽdẽcĩ Yeesu ĩnõõnnõ anneek, “Má gaa nii ꞌbaaninit ꞌcĩ occa aaꞌnyi Nyekuci nẽ agau eet iina ꞌcĩ alayyi nganiit maam ko, occa ꞌyioko alau ĩnõõnnõ haaꞌnyi maam ꞌcĩg rũgẽtaak.”
11Ẽdẽcĩ ngaa nicciee Yeesu anneek, “Ẽẽtĩ cieeni, aitioonni nõõ uhucu ꞌcĩ adtĩĩlanĩ maam tõõ nẽ uuthik wĩĩtanẽẽcĩ thõng buúk, attiha occa hatĩ maam ꞌcĩg aaꞌnya rũgẽt ko ngaana? 12Ĩllõõani nii Yakobo baangeet cĩnaang baa aaꞌnyeet ngagĩĩt wĩĩtaneec icci nẽ uhuddiõõĩ nẽẽg hĩ lõhõlĩ cĩgĩnnĩg hĩ ẽẽtha hĩ aꞌtha cĩgĩnnĩg vẽlẽk ko?”
13Ẽdẽcĩ Yeesu anneek, “Má ahũd eeta maam cugguung ko, aalla nga aam ĩhõõggõ kõrra noho. 14Nẽ ẽẽtĩ ꞌcĩ haaꞌnyihi naa maam cĩgannĩg, aitiõõ hatĩ hõllõngaa aam ĩnõõnnõ kõrra tarĩ ũdũt. Aattĩg maama cĩgannĩg ko hĩ maama ꞌcĩg ariha ũꞌngeecaa cĩ hidiowwo nẽ aaꞌnyĩk eet rũgẽt ꞌcĩ aalla ooo.”
15Ẽdẽcĩ ngaa nicciee aĩ, “Makayyioohit ꞌbaanaa baaĩ nuun maam tĩko, hiittiõõ hõllõngaa aamma kõrra tarĩ nẽ hátĩ hiittiõõ hõllõngaa hakuu wĩĩtaneecaa ĩcĩ tarĩ.”
16Ẽdẽcĩ Yeesu ĩnõõnnõ anneek, “Bĩteek maac cunni.”
17Ẽdẽcĩ ngaa nicciee aĩ, “Aitioonna maac tõõ.”
Ẽdẽcĩ Yeesu ĩnõõnnõ anneek, “Aduha dĩdĩ ngaatĩ aĩnnĩ aitioonni maac tõõ. 18Ĩĩn thõõth dĩdĩ, baa aꞌnyahu nii maaccwa ꞌtur nẽ ẽẽtĩ ꞌcĩ arũmeennu ꞌyioko ho buúk, hõllõngaa ĩĩn maac cunni dẽẽdẽ.”
19Ẽdẽcĩ ngaa nicciee aĩ, “Ẽẽtĩ cieeni, ĩko iini nii põrõvẽtaac. 20Baa gõõng alayyi hĩbaangĩ cĩggaang muuraa cĩ,#4:20 Muuraa cĩ: Haĩ ꞌthaar cĩg muur icci ꞌGerithim. ainnu hinnia niig eeta cĩg ꞌJudeei, aaĩ nĩngĩtĩ occa halaĩ Nyekuc ꞌJeruꞌthalẽma dioo.”
21Ẽdẽcĩ Yeesu ĩnõõnnõ anneek, “Lẽẽm thõõth caannĩ ngaa cieeni, aaĩ hatĩ kõrra ꞌcĩ hõllõngaa alayyu niig Baaba ngaati, hode ꞌJeruꞌthalẽma. 22Erekuung ngagiit eet cĩg Thamaria Nyekuci ꞌcĩ alayyu ho, ngagĩĩt eet cĩg ꞌJudeei ꞌcĩg hagayyia ĩnõõnnõ jurrung, hĩnĩngĩtĩ aku eliiniti hĩ ngagĩĩta. 23Aaĩ hatĩ kõrra nẽ ikia ẽlẽk, ꞌcĩ hatĩ aaꞌnyĩkĩ Lorii ꞌcĩ Ẽllẽẽmĩth eet halaacõ Baaba ꞌgõõlaa ꞌcĩ ĩĩn dĩdĩ, hĩnĩngĩtĩ ĩĩn nẽẽg eet cĩg adiim Baaba halaacõ ĩnõõnnõ ꞌgõõla nĩĩca. 24Ĩĩn Nyekuci Lori nẽ eeta ꞌcĩg ala ĩnõõnnõ buúk, abũnnaa ala ĩnõõnnõ ꞌtirrianaa cĩ Lori cĩnnĩ ꞌgõõlaa ꞌcĩ ĩĩn dĩdĩ.”
25Ẽdẽcĩ ngaa nicciee aĩ, “Haga naa aku hatĩ habuui ꞌcĩ ẽbẽra Nyekuci#4:25 Habu ꞌcĩ ẽbẽra Nyekuci: Haĩ habu ꞌcĩ ẽbẽra Nyekuci ho Ebereeiyyi Meꞌthia nẽ hĩĩtõ ꞌGiriheeyyi Krĩstõ. ꞌcĩ haĩ Krĩstõ, hikia hẽẽla eet. Ma ikia nẽẽnĩ, aku hatĩ aduhaakeet ngagĩĩt thooꞌthiok vẽlẽk.”
26Nĩngĩtĩ aduhaakĩ Yeesu ngaa niccia annẽẽkĩ, “Nganĩĩt Krĩstõ ꞌcĩ hõthõõthõõ hĩ nganiit ꞌyioko ho.”
Ũrũmtĩ nuyyiooha hĩ Yeesu tarĩ
27Ma nĩngaata noho, oboddia nuyyiooha cĩg Yeesu nẽ ukullieek ꞌjieen ngaatĩ ammũdẽẽkĩ õthõõthõnĩ Yeesu hĩ ngaa nicci nẽ baa hiꞌthihi eet umwa hõrggẽẽnaa cĩnĩĩng ꞌcĩ ajin Yeesu thõõth ꞌcĩ õthõõthõnĩ hĩ ngaa nicci ho buúk.
28Ma tarĩ ho, ĩtĩnga ngaa nicciee, ũtũngeek deeri cĩ maamu wĩĩtaneeca nĩĩcĩ nẽ õbõdõõthĩ ĩĩcĩ olu, ũũk uduhaak eet vẽlẽk ĩĩnnĩk, 29“Iita ĩcĩnĩt eet umwa ꞌcĩ aduhaaka thõõth vẽlẽk ꞌcĩ baa hĩdĩmana naana! Krĩstõ occa nẽẽnĩ?” 30Nĩngĩtĩ allũnganiini eeta vẽlẽk ꞌtaaũnaa tĩho õõ acĩnĩ Yeesu.
31Ma baa nga ovvooyyia eeta ꞌgõõla, iita othooꞌthik nuyyiooha cĩgĩnnĩg ĩnõõnnõ ĩĩttĩk, “ꞌLimmannioohit, daak ꞌgẽẽn umwa ꞌcĩ abadtẽc.”
32Ẽdẽcĩ Yeesu ĩhõõggõ anneek, “Haꞌnyahi naa ꞌgẽẽn umwa ꞌcĩ hadahi ꞌcĩ erekuung ngagiita.”
33Ma nĩngaata, iꞌthiattaaĩ nuyyiooha ijitto ẽmmẽn ĩĩtõ, “Aꞌnyahaak occa hatĩ eet umwaa ĩnõõnnõ ꞌgẽẽn ꞌcĩ adahĩ?”
34Nĩngĩtĩ ẽdẽcĩ Yeesu ĩhõõggõ annẽẽkĩ, “ꞌGẽẽn caannĩ ꞌcĩ hadĩmanĩĩ thõõth ꞌcĩ adiim Nyekuci! Baa ĩnõõnnõ ꞌcĩ ĩꞌthõõannaa nganĩĩta nẽ occa hẽdẽcaahi dtiic baa aaꞌnya nẽẽ hidticanõ. 35Agayyu niig thõõth ꞌcĩ aĩ, ‘Nga aattiyyiaa nyĩlõhĩ ꞌwec ꞌcĩg janiittak.’ Haduhaakuung naa hanneekuung ĩcĩnĩt, ibbiir mana ẽlẽk, ĩĩ ꞌthaa cĩ janiitto. 36Tananga ꞌyioko, ummuddia janniooha ꞌbaaninit cĩnĩĩng ẽlẽk, ngaatĩ ajanaanĩ ꞌgẽẽn ꞌcĩ aꞌnyaha rũgẽt ꞌcĩ aalla ooo. Nẽẽthĩ, eeta vẽlẽk baag athacĩ hinyomo hĩ ꞌcĩg ajana ꞌgẽẽn, au hatĩ accamanoothĩk nẽẽg vẽlẽk hõdẽĩ. 37Ĩĩn thõõth dĩdĩ ꞌcĩ aĩ, ‘Akatĩ eet umwaa mana cĩnnĩ nẽ ikia ajan ẽẽtĩ ꞌcĩ ꞌrĩĩng.’ 38Hĩꞌthooyyuung naa ngagiit õõt ajattõ manẽẽnĩĩ baag hõllõngaa akannu niiga. Baa idticanit eeta ũgẽẽgĩ dtiic ꞌcĩ õkõmĩ nẽ iita ajattu niig haal ꞌcĩg mũlũk cĩggĩĩng.”
Elemit eeta cĩg Thamaria Yeesu
39Baa au ẽlẽmĩ eeta ꞌcĩg mẽẽlĩg cĩg Thamaria ꞌtaaũnaa tĩho Yeesu, hĩnĩngĩtĩ thõõth ꞌcĩ aduhaak ngaa ĩhõõggõ anneek, “Aduhaaka ẽẽtĩ ciee thõõth vẽlẽk ꞌcĩ gõõng hadĩmani naana.” 40Ma baa au acĩn eeta cĩg Thamaria Yeesu ho, iita uduktaak ĩnõõnnõ ĩĩttĩk, “Hũrũmtĩ nõõ hĩ ngagĩĩta.” Nĩngĩtĩ arũmẽẽnĩ Yeesu hĩ ĩhõõggõ waathinniook ꞌramma.
41Nẽ hĩnĩngĩtĩ thõõth cĩ Yeesu ho, iita elemit eeta ꞌcĩg mẽẽlĩg ĩnõõnnõ. 42Ma baa ho, iita uduktaak nẽẽg ngaa nicci ĩĩttĩk, “Hẽlẽmta naag Yeesu, hĩnĩngĩtĩ thõõth ꞌcĩ aduha nẽẽ dẽẽdẽ, hõllõngaa hẽlẽmma, hĩnĩngĩtĩ thõõth baa aduhaakeet nii diooni. Hẽlẽmta, hĩnĩngĩtĩ ĩko ĩĩn nẽẽ Ellioohit cĩ lootu dĩdĩ!”
Aaꞌnyĩk Yeesu ngeertĩ makayyiookto hũbũna
(Tigiil Maatteeo 8:5-13; ꞌLuuka 7:1-10)
43Ma urutaa cĩ waathinniook ꞌcĩg ĩĩn ꞌramma ho, ikia ĩtĩnga Yeesu ũũk ĩĩcĩ looc cĩ ꞌGalileea. 44Baa õthõõth Yeesu aĩ, “Hõllõngaa itieelli eeta põrõvẽtaac looccaa cĩnnĩ, iꞌngolli eeta ĩnõõnnõ loonyinii ꞌcĩg ꞌrĩĩng diooni.” 45Ma baa õdõlan Yeesu ꞌGalileea, õõt ĩꞌthaacõ eeta ĩnõõnnõ taliitta, hĩnĩngĩtĩ baa agaacõ nẽẽg Yeesu Kõrraa cĩ Haangittõõ ꞌJeruꞌthalẽma, hĩnĩngĩtĩ thooꞌthiok ꞌcĩg mẽẽlĩg ꞌcĩg ĩnaat eeta, ꞌcĩg baag adtican nẽẽnĩ.
46Ma ho, õbõdõõthĩ Yeesu ĩĩcĩ õlõ cĩ Kana, looccaa cĩ ꞌGalileea, õlõõ baa ũũhũĩ nẽẽ maam hĩĩ mẽrtĩ cĩ viinoo. Baa aaĩ ꞌgaalacĩ umwaa ꞌcĩ õmmõõrĩ ngeerĩnĩ gẽrrẽẽt ꞌtaaũnaa cĩ Kapernaumĩ. 47Ma baa athĩhĩ nẽẽ aĩ õbõda Yeesu looccaa cĩ ꞌGalileea aku ĩĩcĩ ꞌJudeea ho, ikia ala nẽẽ ĩnõõnnõ, hátĩ haaꞌnyĩk ngeerĩnĩ ꞌcĩ baa õbõhĩ adaak hũbũna.
48Ma nĩngaata, uduhaak Yeesu ꞌgaalac nicci ĩĩnnĩk, “Má hõllõngaa acinnu niig thooꞌthiok ꞌcĩg ĩnaat eeta, hõllõngaa hatĩ elemmu.”
49Ẽdẽcĩ ꞌgaalacĩ nicciee Yeesu anneek, “Makayyioohit, ijjia cĩneehaa loholeec nga hadaak!”
50Ẽdẽcĩ Yeesu ĩnõõnnõ anneek, “Bodooth ĩĩcĩ olu, ũrũg loholeec cunnẽẽnĩ!”
Nĩngĩtĩ ẽlẽmmĩ ꞌgaalacĩ nicciee thõõth cĩ Yeesu nẽ ĩtĩnga ũũk ĩĩcĩ olu. 51Ma baa nga hõdõlan ꞌgaalacĩ õlõ cĩnnĩ, iita ithirriamanit ĩnõõnnõ dticcianniooha cĩgĩnnĩg ꞌgõõla nẽ uduktaak ĩnõõnnõ nyeemuut ꞌcĩ aĩ, “Ũbũna loholeec aau lõꞌngõõc!” 52Ma nĩngaata, ijin ꞌgaalacĩ dticcianniook ꞌthaa ꞌcĩ baa abũnnayyĩ loholeec ko. Ẽdẽcĩ nẽẽg ĩnõõnnõ anneek, “Ammanyanni abuurꞌthet cĩ loholeeco baalõ baa ꞌthaa hõdẽĩ cĩ waathinu.”
53Ma nĩngaata, ikia agaõõthĩ baattĩ loholeeco ĩĩ, abũnnaa loholeec ꞌthaa baa aduhaakĩ Yeesu ĩnõõnnõ annẽẽkĩ, “Ũrũg loholeeca.” Nĩngĩtĩ aku ẽlẽmmĩ ꞌgaalacĩ hĩ eet cĩg halang cĩnnĩ vẽlẽk Yeesu.
54Baa thõõth ꞌcĩ adtican Yeesu ꞌcĩ ĩnaat eeta ꞌcĩ ĩĩn ꞌramma cieeni, baa õbõda nẽẽ ĩĩcĩ looc cĩ ꞌJudeea nẽ ikia ũũk ĩĩcĩ ꞌGalileea.
Выбрано:
Yõaannẽ 4: did
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Wycliffe Bible Translators, Inc., All rights reserved.