Luka 4

Yesu watunkwa na Ciwa

(Mat 4:1-11; Mk 1:12-13)

1Yesu awela kufuma ku luzi lwa Yodani, ala azuziwemo na Mupasi Wamuzilo. Lyene Mupasi Wamuzilo amutungulula ku lwanga, 2kuko kuno watenzi manda makumi yani. Mu manda yalya onsi, ala akutunkwa na Ciwa. Wene atalyanga nanti cimwi. Caleka auvwa inzala.

3Lyene Ciwa amunena ati, “Ndi wewe Mwana wakwe Leza, nena iwe lii liye mukate.”

4 # Malg 8:3 Yesu aasuka ati, “Calembwa mu malembelo cati, ‘Muntu atangaya nu umi pa cakulya citupu.’”

5Lyene Ciwa amukwezya pa mwamba papela, alino amulanga mawene yonsi amu nsi mu kasita kanono, nga amunena ati, 6“Namakupeela maka yonsi akuteeka mawene nu lulumbi lwakweyo. Insi yonsi yapeelwa kunondi, nani ningapela kuli wensi wino nkasi! 7Caleka ndi wampepa, insi yonsi imaya iyakwako.”

8 # Malg 6:13 Yesu aasuka ati, “Calembwa mu malembelo cati, ‘Wapepa Mwene Leza wako, wene wenga sile awino watumikila.’”

9Lyene Ciwa amusenda ku Yelusalemu nga amwika pa kansonsi ka Ng'anda ikulu yakwe Leza. Alino amunena ati, “Ndi wewe Mwana wakwe Leza, uiponye pansi kufuma pano. 10#Mas 91:11 Pano calembwa mu malembelo cati, ‘Leza alapeela ilamulo ku angeli yakwe kuti yakucingilile ningo.’ 11#Mas 91:12 Nupya kwene calembwa mu malembelo cati, ‘Yalakwanka mu makasa yao, kuti utacinta lwazo lwako pi we.’”

12 # Malg 6:16 Lelo Yesu aasuka ati, “Calembwa mu malembelo cati, ‘Utaezya kutunka Mwene Leza wako!’”

13Lino Ciwa wamala kwezya kumutunka muli vii vyonsi, lyene pa nsita ilya atala amusya.

Yesu watandika imilimo yakwe mu Galile

(Mat 4:12-17; Mk 1:14-15)

14Lyene Yesu aswilila ku Galile, na maka yakwe Mupasi Wamuzilo yali nawe. Ilandwe lya pali aliwe lisalangana mu mpanga yonsi yapalime kuku. 15Wene wasambilizyanga mu mang'anda ya mapepo, na antu yonsi yamulumbanya.

Yesu yamukana ku Nazaleti

(Mat 13:53-58; Mk 6:1-6)

16Lyene Yesu waile ku Nazaleti kuno wakulile. Pa Sabata, aingila mu ng'anda ya mapepo, umwaelile mwata wakwe, nga aimilila kuti awelenge. 17Alino yamupeela malembelo yakwe kasema Ezaya, nawe apombolola nga azana pano calembwa cati,

18 # Eza 61:1 “Mupasi wa Mwene uli panondi, pano watampela maka kuti

nkosole Ilandwe Lisuma ku apina.

Wantuma ku kusapula anyepwe nu kuleka

impafu kuti zyalola, nga nu kwiza kulula yano atitikiziwa,

19nu kumanyisya antu nsita lino Mwene alatuula antu yakwe.”

20Yesu apomba ulupapulo, alupeela kuli kasunga alino aikala pansi. Antu yonsi ali mwenemo yamulolekesya. 21Alino atandika kuvwanga kunoyali ati, “Vino mwali muvwa nkuwelenga vyati vifikiliziwa ilelo.”

22Antu yonsi yavwanga visuma vya pali aliwe, nga yazunguka pa mazwi asuma yano wavwanzile. Yavwanga yati, “Uzye wii asi mwana wakwe Yosefu?”

23Yesu ayanena ati, “Cumi, mumangumila ipinda lii, likati, ‘Sing'anga, ipozye wemwisikulu. Ucite na kuno mwinu vino tuvwa wacita ku Kapenaumu.’” 24#Yoa 4:44 Yesu atwalilila kulanda ati, “Kasema asyazengelwa ku mpanga ya kumwao.

25 # 1Yam 17:1 “Kutikini kunondi, icacumi nkumunena ukuti kwali yamukamfwilwa aingi mu Izlaeli pa nsita yakwe Eliya, lino kwali cilala pa myaka itatu na citika. Lyene cipowe cikulu cuze caponyile mu mpanga yonsi. 26#1Yam 17:8 Lelo Eliya atatumilwe kuli umwi mu Izlaeli, suka sile kuli mukamfwilwa uwatenzi mu Zalefati mu mpanga ya Sidoni. 27#2Yam 5:1 Pa nsita yakwe kasema Elisya, kwali antu aingi mu Izlaeli alwile tembwe. Lelo kutali nanti wenga munoyali uwapoziwe, suka sile Naamani umwina Silya.”

28Lino antu ali mu ng'anda ya mapepo yuvwa cii, yasoka cuze. 29Yakatuka, yamukunkizya kunzi ya muzi, yamutwala pa mwamba papela pano pakuzilwe umuzi wao kuti yamusumbile mu lwema. 30Lelo wene ayafyumbutuka, apita pakasi ki umba, aongoloka.

Yesu Wapozya Muntu Uwali nu Mupasi Wankota

(Mk 1:21-28)

31Yesu waile ku Kapenaumu, ku muzi uwaku Galile, nga pa Sabata asambilizya antu. 32#Mat 7:28 Onsi yazunguka pa misambilizizye yakwe, pano mazwi yakwe yali na maka. 33Mu ng'anda ya mapepo mwali umuntu uwali nu mupasi wankota uwa ukowezi, alaizya ni izwi likulu ati, 34“Uzye ukulonda cani kunotuli we Yesu uwaku Nazaleti? Uzye wiza kuno kuti utonone? Nati nkumanya, wewe Wamuzilo nupya wafuma kuli Leza.”

35Yesu akalipila mupasi wankota ati, “Myalala, fuma mu muntu wi!” Mupasi wankota umuponya pansi ala yakulola, alino ufuma kwaula kumucisa.

36Antu yonsi yazunguka cuze yuzyanya yati, “Uzye icani cii? Uzye uu umusango uze upya uwakusambilizizyamo na maka? Muntu wii ali na maka akupeela ilamulo ku mipasi yankota nga nayo ifuma!” 37Impwelo ya pali Yesu isalangana mu mpanga yonsi yapalime kuku.

Yesu Wapozya Antu Aingi

(Mat 8:14-17; Mk 1:29-34)

38Lyene Yesu afuma mu ng'anda ya mapepo aya aingila mu ng'anda yakwe Simoni. Nyinavyala Simoni walwile impepo ya nzakaza. Alino yanena Yesu pamulandu wa kulwala kwakwe. 39Nawe aya aimilila pa mbali ya musanzi wakwe alesya impepo, nayo isila. Lyene lilyo kwene umulwale akatuka, atandika nu kuyapela ivyakulya.

40Lyene lino ilanzi lyati lyawa, antu yonsi akweti alwale alwile indwala zipusanepusane yayaleta kuli Yesu; alino nawe aikapo makasa yakwe pali cila wenga ayapozya onsi. 41Mipasi yankota ifuma mu antu aingi, ala ikulaizya ikuti, “Wewe Mwana wakwe Leza!”

Yesu akalipila mipasi yankota nupya ataizumilizye kuti ivwange, pano yamanyile vino wali Katuula uwalavilwe.

Yesu wakosola mu mang'anda ya mapepo

(Mk 1:35-39)

42Lino kwaca Yesu afuma mu musumba aya ku cifulo ukwali cele. Antu yatandika kumulonda nga lino yamuzana yezya kumulesya kuti atayasya. 43Lelo wene ayanena ati, “Ndinzile nkosole Ilandwe Lisuma lya Wene wakwe Leza nu ku misumba yuze kwene, pano acino Leza wantumile.”

44Lyene atwalilila kukosola mu mang'anda ya mapepo amu Yudeya.

Выбрано:

Luka 4: MamL13

Выделить

Копировать