Yoane 8
8
Umwanaci wino yalemwile akulongozya
1Lelo Yesu wene aya ku Mwamba wa Olivi. 2Katondo tondo pa wanda uwalondelile aya aingila mu Ng'anda ikulu yakwe Leza. Antu yonsi yamuunganila, nga aikala pansi atandika kusambilizya. 3Yakasambilizya ya Masunde na Afaliseo yaleta umwanaci wino walemilwe ala akulongozya. Alino yamwimika inkolelo yakwe onsi. 4Yanena Yesu yati, “Kasambilizya, umwanaci wii yali yamulema ala akulongozya. 5#Levi 20:10; Malg 22:22 Mu Masunde itu Mose wapile ilamulo ilyakuti umwanaci ali ndi wii alinzile atamwe na mawe suka afwe. Uzye lyene wemo ukuti uli?” 6Yavwanzile cii kuti yateye Yesu mu mazwi, pakuti yangamupeela umulandu. Lelo Yesu ainama alemba pansi nu munwe.
7Lino yaimi ala yakumuzya mauzyo, Yesu ainuka ayanena ati, “Ali wensi pano muli wino atatala wifya atandike amutame ni iwe.” 8Nupya ainama alemba pansi nu munwe. 9Nao lino yuvwa cii, yonsi kwene yafuma wenga wenga, kutandika ku mukalamba kufika nu ku munono. Yesu asyala wenga nu mwanaci ala aimi papa kwene. 10Lino Yesu winuka, auzya mwanaci ati, “Uzye yonsi yali kwi? Uzye pasi umwi watasyala kuti akupeele mulandu?”
11Nawe aasuka ati, “Mwene, pasi nanti umwi.” Yesu nawe amunena ati, “Nani kwene nsyakukupeela mulandu. Pitanga, lelo utakiifye nupya.”
Yesu ali luswepo lwa antu amu nsi
12 #
Mat 5:14; Yoa 9:5 Nupya Yesu anena Afaliseo ati, “Nemo nene luswepo lwa antu amu nsi. Wino wensi wandondela, wene atalapita mu mfinzi lelo alaya nu luswepo lukatungulula ku umi.”
13 #
Yoa 5:31
Afaliseo yamunena yati, “Ukuicitila umboni caleka umboni wako usi wa mpomvu.”
14Yesu ayanena ati, “Nanti ningaicitila umboni, lelo cino nkulanda ca cumi, pano namanya kuno nafuma na kuno nkuya. Mwemo mutamanya kuno nafuma na kuno nkuya. 15Mwemo mukapingula mu mwata wa untunze, nemo nsyapingula umuntu nanti umwi. 16Lelo nanti nali nu kupingula, upinguzi wane ungaya uwa cumi, pano nsyacita cii nenga. Tata wino uwantuma ali nani. 17Calembwa mu Masunde inu kwene ukuti lino umboni wa antu yaili wazumilizyanya, umboni wao ala uwa cumi. 18Nemo nkuicitila umboni, na Tata uwantuma nawe kwene akancitila umboni.”
19Nao yamuzya yati, “So alikwi?” Yesu aasuka ati, “Mutamanyile nene nanti a Tata. Ndi mumanya nene nga mwamanya na Tata kwene.”
20Mazwi yaa wayavwangile mu Ng'anda ikulu yakwe Leza, ala akusambilizya mu muputule umwali cipao ca mawila. Patali umuntu wakumulema, pano kasita kakwe ala katali kafike.
Mutangaya kuno ndaya
21Yesu ayanena nupya ati, “Nemo ndapita, namwe mulandonda. Lelo mulafwila mu maifyo inu. Kuno ndaya mwemo mutangayako.”
22Caleka intunguluzi zya Ciyuda zivwanga ziti, “Wene wavwanga vino swemo tutangaya kuno alaya, uzye kuli kuti amaikoma?”
23Alino Yesu ayanena ati, “Mwemo mwafuma muno nsi, lelo nemo nafuma kwiyulu kupela. Mwemo mwemwe antu amuno nsi, nemo nsi wamuno nsi. 24Acino nali namunena vino mulafwila mu maifyo inu. Pano ndi mutataile vino nene ali nene kwene, mulafwila mu maifyo inu.”
25Nao yamuzya yati, “Uzye wewe weni?” Yesu aasuka ati, “Wakwe vino munenyile kufuma ku utandiko. 26Nkweti vintu vingi vyakumunena makamaka pa viipe vino mwacita. Lelo wino uwantuma wene uwa cumi, nga nani nkanena amu nsi vino nuvwa sile kunoli.”
27Yene yatilwike vino akuyalandila vya pali Isi. 28Caleka Yesu ayanena ati, “Alala mwatumpula Mwana wa Muntu, lyene mulamanya vino ‘Nene ali nene kwene.’ Alino mulamanya vino nsyaicitila cimwi nenga, lelo nkavwanga sile vino Tata wanena kuti mvwange. 29Wino uwantuma ali nani. Wene asinsya nenga pano lyonsi nkacita vintu vikamuzanzya.”
30Aingi yano auvwile Yesu akuvwanga vii, yamutaile.
Icumi cilamukulula
31Caleka Yesu anena yao amutaile ati, “Ndi mukuyela mazwi yane, mu cumi ale mwemwe alondezi yane. 32Mulamanya cumi ca pali Leza, nga ni cumi cilamukulula.”
33 #
Mat 3:9; Luk 3:8 Nao yamunena yati, “Sweswe amu mupanda wakwe Abulaamu, tutatala tuya azya ya muntu umwi. Uzye wemo walozya mwi lino wavwanga wati, ‘Mulakululwa?’”
34Yesu ayanena ati, “Cumi, namunena vino wensi akaifya wene umuzya wa maifyo. 35Nu muzya asyaikala mu alupwa manda pe, lelo mwana akaikalamo manda pe. 36Caleka Mwana ndi wamukulula, mu cumi mulaya antungwa. 37Nemo manyile vino mwemwe amu mupanda wakwe Abulaamu. Lelo mukulonda kunkoma, pano mutangazumila mazwi yane. 38Nkavwanga vintu vino Tata wandanga, lelo mwemo mukacita vino so wamunena.”
39Nao yamunena yati, “Tata a Abulaamu.” Yesu ayanena ati, “Ndi mwemwe ana yakwe Abulaamu, nga mukacita vintu vili vimwi na vino Abulaamu wacitanga. 40Lelo ndakai mukulonda kunkoma pamulandu wakuti nkumunena mazwi ya cumi, yano nuvwile kuli Leza. Abulaamu atacisile vii! 41Lelo mwemo mukacita vino so akacita.”
Nao yamunena yati, “Swemo twakwata Tata wenga sile, nawi a Leza.” 42Yesu ayanena ati, “Leza ndi a So mu cumi, nga mwantemwa, pano nemo nafuma kuli Leza. Nupya ndakai ndi pano. Ntaizile nenga, lelo aliwe uwantuma. 43Uzye pacani musyakutezya vino nkuvwanga? Apamulandu wakuti mwaposiwa ukuvwa mazwi yane. 44Mwemo mwemwe ana ya Musomvi, wii ali so, nupya mwatemwa kulondela kucita kulonda kwakwe. Kufuma nu ku utandiko kwene wali inkomi. Atatala aya mwa cumi pano wene cumi citaya munoli. Lino akuvwanga ntumpu, ala wene kunoli uli mwata, pano uwa ntumpu nupya aliwe uwazitandike. 45Lelo nemo nkavwanga cumi, nga uli mulandu uno mutantaila. 46Aweni uwa munomuli angansinila pi ifyo limwi? Ndi nkavwanga cumi, uzye lyene pacani musyantaila? 47Muntu wakwe Leza akauvwa mazwi yakwe Leza. Mwemo musi yakwe Leza, na pamulandu kwene uu acino musyakuvwila.”
Yesu na Abulaamu
48Ayuda yuzya Yesu yati, “Uzye tutavwanzile ningo lino twati wewe Musamaliya, nupya uli nu mupasi wankota munuli?”
49Yesu aasuka ati, “Nemo nsi nu mupasi wankota.” “Nkacindika Tata, lelo mwemo musyancindika. 50Nemo nsikuilondela mucinzi. Lelo akunoli akalonda kuti ncindikwe, nupya aliwe akapingula. 51Cumi namunena nati, wino wensi akayela mazwi yane wene atalafwa.” 52Ayuda yati, “Ndakai twamanya nu kusininkizya vino uli nu mupasi wankota! Abulaamu wafwa, na yakasema nao yafwa nga nawe wavwanga wati, wino wensi, akayela mazwi yako wene atalafwa. 53Tata Abulaamu wafwa. Uzye wemo ulusile Abulaamu? Yakasema nayo kwene yafwa. Uzye wemo wailola vino wewe weni?”
54Yesu aasuka ati, “Ndi nkuikuzya nenga ale ukulu wane usi cimwi. Tata aliwe akankuzya. Mwemo mukalanda vino wene a Leza. 55Nanti angala mutamumanya mu cumi. Lelo nemo namumanya. Ndi nati ntamumanyile, ale nakolana namwe mwe antumpu. Lelo nemo namumanya nupya nkayela mazwi yakwe. 56So Abulaamu wali nu luzango pa kulola kwiza kwa wanda wane. Wauweni nga azanga.”
57Ayuda yamunena yati, “Myaka yako itali ifike makumi yasano. Uzye wemo ungavwanga uli ukuti waweni Abulaamu?”
58Yesu aasuka ati, “Cumi namunena vino Abulaamu lino atali ayeko ala nemo akunondi.”
59Lyene yasola mawe kuti yamutame, lelo Yesu afisama. Alino afuma mu Ng'anda ikulu yakwe Leza.
Выбрано:
Yoane 8: MamL13
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Mambwe-Lungu Bible © The Bible Society of Zambia, 2013
