Yoane 11

Imfwa yakwe Lazalo

1Muntu umwi izina lyakwe a Lazalo, walwile. Wene wikalanga ku Betaniya, umuzi uno yakaci yakwe oili Maliya na Mata ikalanga. (2#Yoa 12:3 Maliya wii ali wiyo uwapongolwile amafuta acinunu cisuma pa ngazo zyakwe Yesu nu kuzikumbula ni nyele zyakwe. Lazalo uwalwile wali a kalume wakwe.) 3Alino yakaci yakwe yatuma kuli Yesu yati, “Mwene, mukundwe wako watalwala.”

4Lelo lino Yesu wacuvwa ati, “Ndwala ii italapelela sile ku mfwa. Lelo ku kuletela Leza lulumbi, kuti Mwana wakwe Leza alumbanyiwe paliyo.”

5Yesu watemilwe Mata na kaci muze Maliya na ndume yao Lazalo. 6Caleka lino uvwa vino Lazalo umulwale, aikala kuno wali manda nayauze yaili. 7Lyene anena alondezi ati, “Tuini tuswilile ku Yudeya.”

8Alondezi yamunena yati, “Kasambilizya, patali papite nsita lino Ayuda yalondanga kukutama na mawe, nga nupya ukulonda kuyako?”

9Yesu avwanga ati, “Uzye musanya utaya na ya aawa ikumi na yaili? Caleka umuntu ndi akupita musanya wene atangapumika, pano akulola luswepo lwa nsi ii. 10Lelo umuntu ndi akupita usiku wene angapumika, pano asi mu luswepo.” 11Lino Yesu wavwanga vii, atwalilila kuyanena ati, “Cuza witu Lazalo watakasula, lelo napita kuti nkamuzyule.”

12Alondezi yati, “Mwene, ndi watakasula amapola.”

13Yesu wasenulanga ukuti Lazalo umufwe, lelo yene yelenganya vino akulanda kukasula kwa tulo. 14Caleka Yesu ayanena paswe ati, “Lazalo watafwa. 15Lelo nkuzanga pamulandu winu vino ntaliko pakuti lyene mutaile. Caleka tuini kunoli.”

16Tomasi (wino akaamwa ukuti Didimo) anena alondezi yauze ati, “Naswe kwene katupite pamwi na kasambilizya kuti tukafwe nawe.”

Yesu ali kuzyukuka nu umi

17Lino Yesu wafisile ku Betaniya, azana Lazalo yamuzika, ala papita na manda yani. 18Muzi wa Betaniya wali pipi na Yelusalemu, pali manye makilomita yaili. 19Na antu aingi amu Yudeya izile kuli Mata na Maliya kukuyatekezya pamulandu wa mfwa yakwe kalume wao.

20Lino Mata uvwa vino Yesu akwiza, aya kukumukomanya, lelo Maliya wene asyala atenzi mu ng'anda. 21Mata anena Yesu ati, “Mwene ndu yapo, kalume wane nga atafwile. 22Lelo na ndakai kwene manyile vino consi cino umalenga kuli Leza wene amakupeela.”

23Yesu amunena ati, “Kalume wako amazyukuka nupya.”

24Mata amunena ati, “Nati manya vino alazyukuka nupya mu kuzyukuka kwa pa wanda wampelelekezyo.”

25Yesu ati, “Nene kuzyukuka nu umi. Wino wensi wantaila nanti angafwa alaya nu umi nupya. 26Na wino wensi ali nu umi, ndi wantaila, wene atalafwa. Uzye wataila cii?”

27Mata aasuka ati, “Endi Mwene! Nataila vino wewe uli Katuula uwalavilwe, Mwana wakwe Leza, wino malembelo yakati ali nu kwiza.”

Yesu walila

28Pacisila lino Mata wavwanga vii, apita aya aama kaci muze Maliya mu nkama amutotoza ati, “Mwene wataiza akukwama.” 29Lino Maliya uvwa cii, akatuka acincila aya kukumukomanya. (30Yesu walanga atali aingile mu muzi, ala acili pa ncende ino Mata wamusilepo lino wamukomanyizye.) 31Lyene Ayuda yano ali mu ng'anda pamwi na Maliya, ala yakumutekezya, lino yalola vino Maliya wakatuka wacincila nu kufuma, yamulondela. Yene yelenganya vino waya kwi lindi kukulosya.

32Maliya aiiza kuno Yesu wali. Lyene lino wamulola, amufukamila, amunena ati, “Mwene ndu yapo, kalume wane nga atafwile.”

33Lino Yesu walola ukuti Maliya akulila pamwi na Ayuda kwene amusukilile ala yakulila, auvwa ulanda cuze mu mwenzo. 34Alino ayauzya ati, “Uzye mwamwika kwi?”

Nao yaasuka yati, “Mwene ndu kalole.”

35Yesu alila. 36Ayuda yavwanga yati, “Silolini vino wamutemwa!”

37Lelo yamwi munoyali yati, “Uzye wino uwalenzile kuti impafu zyalola angaposiwa kulesya imfwa pa muntu wii?”

Lazalo waya nu umi nupya

38Nupya Yesu auvwa ulanda cuze, nga akatuka aya kwi lindi, lino ilyali ni iwe pa mulyango. 39Yesu anena antu ali penepo ati, “Sisyinipo iwe.”

Mata kaci wa mufwe amunena ati, “Mwene, ndakai tumanunkilwa pano pati papita manda yani kufuma lino yamuzisile.”

40Yesu amuuzya ati, “Uzye ntakunenyile vino ndi wataila umalola lulumbi lwakwe Leza?” 41Alino yasisya iwe. Lyene Yesu alingamila kwiyulu avwanga ati, “Tata, nakutaizya pano wanguvwa. 42Nani manyile vino ukanguvwa pe. Lelo pamulandu wi umba lii lino liimi pano navwanga cii kuti yataile vino wewe wantuma.” 43Pacisila lino wavwanga vii, alaizya ni zwi likulu ati, “Lazalo, fuma.” 44Alino Lazalo afuma, ala makasa na maulu yakwe yafufilwe mu nsalu ya mufwe, nga nu ku manso yakwe kwafufilwe ni citambala. Yesu ayanena ati, “Mufupululini nsalu, lekini apite.”

Yapangana kukoma Yesu

(Mat 26:1-5; Mk 14:1-2; Luk 22:1-2)

45Ayuda aingi yano aizile ku kutandalila Maliya lino yalola cino Yesu wacita yamutaila. 46Lelo yamwi munoyali yaswilila ku Afaliseo, yalanda vino Yesu wali wacita. 47Caleka yasimapepo akalamba na Afaliseo yakongana na amwi tengo yati, “Uzye tumacita uli? Lolini vilangililo vyonsi vino umuntu wii akucita! 48Ndi twamusila umweko, antu yonsi yamamutaila. Ni ntunguluzi zya Ciloma ziliza nu konona Ng'anda ikulu yakwe Leza nga na antu amu luko lwitu.”

49Lelo wenga uwa munoyali akaamwa ukuti Kayafa, wino wali a Simapepo Mukulu mu mwaka ulya, ayanena ati, “Mwemo mutamanyile nanti cimwi! 50Uzye mutange mwelenganye vino cingazipa kuti umuntu wenga afwile antu, kuluta kuti antu yonsi amu luko lonsi yalowe?” 51Ataivwangilanga cii kukulonda kwakwe. Lelo pano wali a Simapepo Mukulu mu mwaka ulya, wasemanga vino Yesu ali nu kufwila Ayuda. 52Asi pamulandu wakufwila sile Ayuda, lelo kuti akonganike na antu yakwe Leza yonsi yano asalangana konsi.

53Kufuma pa wanda ulya, intunguluzi zya Ciyuda zipangana kukoma Yesu. 54Caleka Yesu atapitananga mu Yudeya paswe. Lelo wafumileko aya ku ncende imwi pipi nu lwanga, ku muzi wa Efulemu akuno aikala na alondezi yakwe.

55Lyene insita yakuzevya Cimulo ca Ucilo ipalama, nga antu aingi yafuma mu mizi yaya ku Yelusalemu ku kuisangulula kulingana nu lutambi lino kuzevya kwa Cimulo ca Ucilo kutali kufike. 56Yalonda Yesu, nga lino yakongana mu Ng'anda ikulu yakwe Leza, yauzyanya yati, “Uzye mukwelenganya uli? Uzye asyakwiza ku Cimulo?” 57Lelo yasimapepo akalamba na Afaliseo yapile ilamulo kuti umuntu umwi ndi angamanya ukuli Yesu, wene alinzile ayanene kuti yakamuleme.

Выбрано:

Yoane 11: MamL13

Выделить

Копировать