Yoane 1

Izwi lino likapela umi

1Ku utandiko wa uumbo, kwali wino akaamwa Izwi. Izwi wali na Leza. Wene wali a Leza. 2Kufuma ku utandiko kwene wene wali na Leza. 3Kupitila munoli Leza waumvile vintu vyonsi, kusi nanti cimwi mu uumbo onsi cino citaumvilwe na aliwe. 4Wene wali intulo ya umi, nupya umi wakwe wapile luswepo ku antu onsi. 5Luswepo lukawala mu mfinzi, ni mfinzi itangaluzimya.

6 # Mat 3:1; Mk 1:4; Luk 3:1 Leza watumile umuntu umwi, izina lyakwe a Yoane. 7Yoane wizile nga kambone kukupeela umboni pamulandu wa luswepo, kuti yonsi auvwa umboni wakwe yataile mwi landwe lyakwe lya luswepo kwene luu. 8Wene atali luswepo, lelo wizile sile kukupeela umboni pamulandu wa luswepo luu, 9luswepo lwa cumi lukakozya muno nsi pa antu onsi.

10Izwi wali mu nsi, lelo nanti Leza waumvile insi kupitila muli aliwe, amu nsi yene yaposiwa kumumanya. 11Wizile ku mpanga yakumwao, lelo antu akumwao yatamuzengile. 12Lelo yamwi, yano amuzengile nu kutaila munoli, yene wayapile nsambu yakuti yaye ana yakwe Leza. 13Yene yatali ana yakwe Leza kupitila ku kuvyalwa ku akwasi. Lelo Leza umwisikulu uwayalenzile kuya ana yakwe.

14Izwi wiya wizile aya umuntu, wino uwa zuziwemo cikuku nga ni cumi, nupya wizile aikala pamwi naswe. Twaweni lulumbi lwakwe lwakuya Mwana wenga sile kufuma kuli Leza Tata.

15Yoane wapile umboni pamulandu na aliwe. Wene walaizye ati, “Wii, awino nalandanga inti, ‘Wino akwiza pacisila cane wene umukulu kunduta, pano wene waliko lino nemo ntali mvyalwe.’”

16Pamulandu wakuvula kwa cikuku cakwe twapelwa upolelelo kulunda pa upolelelo uze. 17Pano Leza wapile Masunde ku antu kupitila muli Mose, lelo Yesu Klistu watuletela uwila, cikuku nga ni cumi. 18Pasi umuntu watala alola Leza. Suka Mwana wenga sile wino wikala pamwi ni Isi. Mwana kwene uwiza wamusokolola.

Umboni wakwe Yoane Kawatizya

(Mat 3:1-12; Mk 1:1-8; Luk 3:1-18)

19Intunguluzi zya Ciyuda zyamu Yelusalemu zyatumile yasimapepo yamwi na ina Levi kuli Yoane kuti yakamuzye, yati, “Wewe weni?”

20Yoane nawe atakanyile kwasuka, lelo avwanga paswe ati, “Nemo nsi Katuula uwalavilwe.”

21 # Malg 18:15, 18; Mal 4:5 Nao yamuzya yati, “Uzye lyene wewe weni? Uzye wewe Eliya?” Nawe aasuka ati, “Asi nene Eliya.” Nao yamuzya yati, “Uzye ale wewe kasema wino tukalolela?” Nawe aasuka ati, “Awe.”

22Lyene yamunena yati, “Lyene tunene cipuma, kuti tukanene yano atutumile; uzye wemwisikulu ukayaama uti uli?”

23 # Eza 40:3 Yoane aasuka ndi vino kasema Ezaya wavwanzile ati,

“Nene izwi lyakwe umwi akulaizya mu lwanga ati,

‘Olololini inzila mwakupita Mwene!’”

24Lyene yamwi atumilwe, ali Afaliseo 25yuzya Yoane yati, “Uzye wemo ndi usi Katuula uwalavilwe, nanti Eliya, nanti kasema wino tukalolela, pacani ukawatizya?”

26Yoane nawe ayaasuka ati, “Nemo nkuwatizya na manzi, lelo pali wenga akwimilila munomuli wino mutalooka. 27Wene akwiza pacisila cane, lelo ntaine kusapula mikonda ya ndyatu zyakwe.”

28Kulanzyanya kuu kwacitike ku Betaniya, ku ufumondaka wa mbalama ya luzi lwa Yodani, kuno Yoane wawatizyanga.

Yesu Mwana wa Mfwele wakwe Leza

29Uwanda walondelela Yoane alola Yesu akwiza kunoli, ati, “Lolini, Mwana wa Mfwele wakwe Leza wino akafumya maifyo ya antu. 30Wii awino nalandanga, inti, ‘Umwi ali nu kwiza. Wene umukulu kunduta, pano wene waliko lino nemo ntali mvyalwe.’ 31Nani ntamumanyile. Uli mulandu uno niza nkuwatizya na manzi kuti aina Izlaeli yangamumanya.”

32Lyene Yoane apeela umboni ati, “Naweni Mupasi Wamuzilo akwika kufuma kwiyulu mu musango wa nkunda nga aikala panoli. 33Nemo ntamanyile ukuti ali wikwene. Lelo Leza wino wantumile kuti nawatizya antu na manzi, wanenyile ati, ‘Ulalola Mupasi Wamuzilo akwika nu kwikala panoli. Yesu kwene wii ali wino alawatizya na Mupasi Wamuzilo.’ 34Nemo nati ndola cicitike, acino nkupeela umboni ndi vino wii ali Mwana wakwe Leza.”

Alondezi ankolelo yakwe Yesu

35Uwanda walondelela Yoane waimi na alondezi yakwe yaili papa kwene. 36Lyene lino walola Yesu akupita pipi, avwanga ati, “Lolini Mwana wa Mfwele wakwe Leza!” 37Lyene lino alondezi oili yuvwa Yoane wavwanga cii, yalondela Yesu. 38Yesu aseleuka, alola vino yakumulondela, nga ayauzya ati, “Mukulonda cani?” Nao yamunena yati, “Labi (kuli kuti Kasambilizya), uzye ukaikala kwi?” 39Yesu nawe aasuka ati, “Tuini mukalole.” Lyene yaya yalola kuno akaikala. (Cali namanye 4 koloko amanguzi.) Lyene mu wanda uwa onsi iikala nawe.

40Wenga pali yao yaili auvwile kuli Yoane, nu kulondela Yesu, wali a Andeleya, mwina wakwe Simoni Petulo. 41Lilyo kwene, alonda Simoni mwina wakwe, amuzana amunena ati, “Twati tuzana Mesiya.” (Kuli kuti “Klistu.”) 42Alino aleta Simoni kuli Yesu.

Yesu amulolekesya, nga avwanga ati, “Wewe Simoni mwana wakwe Yoane, lelo umatemelwa izina Kefa.” (Kuli kuti Petulo nupya cikusenula “Iciliwe.”)

Yesu waama Filipo na Natanaeli

43Uwanda walondelela Yesu apanga kuya ku Galile. Lino wazana Filipo, amunena ati, “Ndondela.” 44Filipo wali uwaku Betisaida, kuno Andeleya na Petulo ikalanga. 45Filipo azana Natanaeli, amunena ati, “Twati tuzana wino Mose walemvile pamulandu na aliwe mu lupapulo lwa Masunde, wino na yakasema nao kwene yalemvile pamulandu na aliwe mu mpapulo zyao. Wene a Yesu mwana Yosefu uwaku Nazaleti.”

46Natanaeli amuuzya ati, “Uzye mu Nazaleti mungafuma cimwi campomvu?” Filipo amunena ati, “Ndukailolele.”

47Lino Yesu walola Natanaeli akwiza kunoli, avwanga pamulandu wakwe ati, “Lolini wii ali mwina Izlaeli wa cumi, nupya munoli musi usomvi.”

48Natanaeli amuuzya ati, “Uzye nemo wamanya uli?”

Yesu nawe amwaasuka ati, “Nali nkuweni lino walutenzi mwisika lya musamvu ala Filipo atali akwame.”

49Natanaeli avwanga ati, “Kasambilizya wewe Mwana wakwe Leza! Wewe Mwene wa Izlaeli!”

50Yesu amuuzya ati, “Uzye, wataila pano nakunena vino nali nkuweni mwisika lya musamvu? Ulalola vicitwa vilusile cii.” 51#Uta 28:12 Nupya ayanena ati, “Cumi, namunena vino mulalola iyulu lyalekuka na angeli yakwe Leza yakukwela nu kwika pa Mwana wa Muntu.”

Uwinga ku Kana

Выбрано:

Yoane 1: MamL13

Выделить

Копировать