Utandiko 7
7
Mulamba watandika
1Lyene Yawe anena Nowa ati, “Pita ingila mu cange pamwi na amu ng'anda yako. Ninzana vino wewe wenga mpo mu antu yonsi ukacita ivyaololoke. 2Toola inyama cinimbali zyakalume na cinimbali zyakaci, muli cila musango onga uwa nyama zyasangululwa. Lelo cila musango uwa nyama zitasangululwa utoole sile ziili, yakalume ni yakaci. 3Toola na cinimbali muli cila musango uwa vyunyi vikapapuka, cakalume ni cakaci. Vivyo vyonsi uvisunge vipuma kuti vikavyalane nupya mu nsi. 4Ndi papita sile amanda cinimbali indi nu kutuma imvula pansi, ilatonya mu nsi yonsi amanda makulu amakumi yani, nu konona consi ca umi cino naumvile.”
5Nowa wacisile vyonsi ndi vino Yawe wamupeezile ilamulo.
6Nowa wali ni myaka imyanda mutanda, lino mulamba wizile pano nsi. 7#Mat 24:38, 39; Luk 17:27 Pa nsita ilya alanga Nowa nu muci wakwe, ana yakwe aonsi na aci yao yatiingila mu cange kuti yapusuke ku manzi yakwe mulamba. 8Cakalume ni cakaci ca nyama zyonsi zisangululwe ni zisi zisangululwe, ivyunyi ivikapapuka, ni vikasela vyonsi vyakalume ni vyakaci, 9vyonsi ivingila na Nowa mu cange ndi vino Leza wamupeezile ilamulo. 10Pacisila ca manda cinimbali mulamba aiza pano nsi.
11 #
2Pet 3:6
Lino Nowa wafika imyaka imyanda mutanda pa wanda uwalenga ikumi na cinimbali uwa mwezi uwalenga iili, maziya ya muli yayemba yafukoka amanzi, ni vipongo vya mwiyulu navyo viyulika, na manzi yaafuma. 12Ni mvula itonya amanda makulu amakumi yani, usiku nu musanya. 13Pa wanda kwene ulya Nowa nu muci, ana yakwe aonsi yatatu Syemu, Hamu na Yafeti pamwi na aci yao ingile mu cange. 14Yene ingile pamwi ni misango yonsi ya nyama zya mpanga ni viteekwa, zinono ni zikulu, ni misango yonsi ya vyunyi. 15Ca kalume ni cakaci ca musango wa cintu consi ca umi cingile pamwi na Nowa mu cange, 16ndi vino Leza wamupeezile ilamulo. Lyene Yawe ayala cisasa lino Nowa wingila.
17Imvula itwalilila ukutonya pa manda makulu yani, nga manzi yavula ni cange citandika ukutumpuka. 18Amanzi yavulisya nga icange caelela pa manzi. 19Amanzi yavula yavimba ni myamba italimpe cuze. 20Amanzi yatwalilila kuvula yavimba myamba itali kulingana manye amamita cinimbali ukuya papela. 21Consi ica umi cifwa, ivyunyi ivikapapuka, inyama na antu yonsi. 22Consi ca umi, icikafuta icali mu nsi cafwile. 23Yawe ononyile ca umi consi ca muno nsi, antu, inyama, vikasela ni vyunyi ivikapapuka vyonsi vyafwa. Nowa sile na yano wali nayo, pamwi na vino wali navyo mu cange ivyapuswike.
24Amanzi yamala amanda umwanda onga na makumi yasano kwaula kupwa.
Выбрано:
Utandiko 7: MamL13
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Mambwe-Lungu Bible © The Bible Society of Zambia, 2013
