Mat. 7

Chumairo Inoendemberi.

Dzitonge Usati Watonga Vamweni

(Ruka 6:37-38,41,42)

1“Musatonga, kuti musazotongwawo. 2Ngokuti ngokutonga kwomunotonga ndikwo, munozotongwawo; neicho chipimo chomunopima ndicho, ndicho chomunozopimirwawo ndicho. 3Unopenyerenyi chitsepedzo chiri mudziso romukoma wako, asi auoni danda riri mudziso mwako? 4Nokuti ungaita maereketerenyi kunemukoma wako kuti, ‘Rekera, ndiduse chitsepedzo chiri mudziso rako,’ naapo ringira, danda riri mudziso rako. 5Iwewe mudziitisi, tanga kudusa danda riri mudziso rako, naapo unozonasa kukona kudusa chitsepedzo chiri mudziso romukoma wako.

6“Musapa izvo zvakachena kunembwa, zve, musakandira mapherere#7:6 Mapherere:Mapuwe anemutengo mukuru. enyu pamberi penguruve, kuti dzisazoatsika-tsika pashi petsoka dzadzo, dzikunukuke dzimurume.

Kumbirai, Tsvakai, Kuhudzai

(Ruka 11:9-13)

7“Kumbirai, munozopuwa; tsvakai, munozoona; kuhudzai, munozobeurirwa. 8Ngokuti weshe unokumbira, unoashira; naye unotsvaka, unoona; nokwaari unokuhudza, unozobeurirwa. 9Ngokuti ndiani munhu kwomuri, unoti mukororo wake echimukumbira chingwa, amupe buwe? 10Nokuti echikumbira hove, amupe nyoka? 11Ndizvo kudai imwimwi mutori vakashata mwechizia kupa zvipo zvakanaka kuvana venyu, kunozopinda kwakaitawani Baba enyu vari mudenga kuvapa zvakanaka avo vanokumbira kwaari?

Mutemo Mukuru

12“Ndizvo izvo zveshe zvomunoda kuti vanhu vaite kwomuri, itaiwo kudaro kwavari, ngokuti ichi chiri kuzadzisika kweMipango nezvidzidziso zvevaprofeti.

Pindai ngepaMusiwo Wakamanikana

(Ruka 13:24)

13“Pindai ngepamusiwo wakamanikana; ngokuti musiwo wakapamhama nenjira yakapamhama inoenda mukuparadzwa, navo vanopinda ndiyo vazhinji. 14Ngokuti musiwo wakamanikana nenjira yakatsonga, iyo inoenda mukurarama, navo vanoiona vashomani.

Vadzidzisi voKunyepa neveGwinyiso

(Ruka 6:43-44)

15“Ngwarirai vaprofeti vokunyepa, avo vanouya kwomuri vakapfeka makushe emakwai, asi ngomukati vari mathika anokara. 16Muchavazia ngemichero yavo. Vanhu vangakaya here michero yomuvhini paminzwa nokuti maonde parukato? 17Ngokudaro miti yeshe yakanaka inobereka michero yakanaka; asi muti wakashata unobereka michero yakashata. 18Muti wakanaka aungakoni kubereka michero yakashata, nomuti wakashata aungakoni kubereka michero yakanaka. 19Muti weshe usikabereki michero yakanaka unotemerwa pashi ukandirwe mumwoto. 20Ndizvo munozovazia ngemichero yavo.

Ndiani Unozopinda muUmambo hwomuDenga?

(Ruka 13:25-27)

21“Andivopi veshe vanoti kwendiri, ‘Mambo, Mambo’, vanozopinda muumambo hwomudenga, asi iye unoita kuda kwaBaba angu vari mudenga. 22Vazhinji vanozoti kwendiri ngeiro zuva, ‘Mambo, Mambo, atizi kuprofeta here ngezina rako, ngezina rako atizi kurasha madhimoni here, ngezina rako atizi kuita mishando yakawanda ine simba here?’ 23Naapo ndinozovaronzera kuti, ‘Andizi kumuzia akadi. Ibvai kwendiri, imwimwi munoshanda zvakashata.’

Vaaki Vairi, Wakangwara neBenzi

(Ruka 6:47-49)

24“Ndizvo kunyazwi ndiani unozwa mazwi angu aya nokuaita, unoedzaniswa nomunhu wakangwara, uwo wakaaka mhatso yake padera poruware. 25Nemvura yakanaya nendambi yakauya nomubvumo wakavhuvhuta, wakarova padera peiyo mhatso, nayo aizi kuwa, ngokuti yaiya yakaakwa paruware. 26Kunyazwi ndiani uwo unozwa mazwi angu aya, asikaaiti, unoedzaniswa nomunhu uri benzi, wakaaka mhatso yake pajecha. 27Nemvura yakanaya nendambi yakauya nomubvumo wakavhuvhuta, wakarova padera peiyo mhatso, nayo yakawa, nokuwa kwayo kwayia kukurutu.”

Kudzidzisa kwaJesu kuneSimba

28Kwakaitika apo Jesu apedza mazwi aya, mbungano yakashamiswa ngokudzidzisa kwake. 29Ngokuti wakavadzidzisa kudai ngounesimba, asikaiti kudai ngevanyori vavo.

Выбрано:

Mat. 7: Ndau

Выделить

Копировать