Mat. 14
14
Kuuraiwa kwaJohani Mubhabhatidzi
(Mk. 6:14-29; Ruka 9:7-9)
1Ngouwo mukuwo Herodhi mutongi wematunhu marongomuna wakazwa mbiri yaJesu. 2Naye wakati kuvaranda vake, “Uyu ndiJohani Mubhabhatidzi; wamuka kwevakafa. Ndizvo mishando iyi ine simba inoitwa ndiye.” 3Ngokuti Herodhi waiya akamubata Johani, akamusunga, akamuisa mutirongo ngendaa yaHerodhiasi mukadzi womunun'una wake Firipi. 4Ngokuti Johani waiya akati kwaari, “Autenderwi ngezvironzo kuti umuroore.” 5Naapo aida kumuuraya, wakatya mbungano ngokuti vaiti muprofeti. 6Asi apo zuva rokuberekwa kwaHerodhi raguma, mwanasikana waHerodhiasi wakazvina pakati pavo, naye wakadakadza Herodhi. 7Ndizvo iye wakagondisa ngokupika mhiko kuti unozomupa kunyazwi chiinyi chaaizokumbira. 8Naye echiangiridzwa ndimai ake, wakati, “Ndipe panapa muchidziyo soro raJohani Mubhabhatidzi.” 9Namambo wakakurudzwa; asi ngendaa yokupika kwake, nendaa yaavo vaigara naye panokudya, wakapanga kuti rihinwe kwaari. 10Naye wakatuma kuti Johani agurwe soro mutirongo. 11Nesoro rakaunzwa riri muchidziyo rikapuwa kumusikana, naye wakariunza kunamai ake. 12Nevadzidzi vake vakauya vakatora muiri wake, vakauika, navo vakaenda vakaronzera Jesu.
Jesu Unopa Kudya Mazana Makumi Mashanu
(Mk. 6:30-44; Ruka 9:10-17; Joh. 6:1-14)
13Zvinopano Jesu azwa izwi wakabvapo ngengarava kuenda kundau iri yega ari ega. Naapo mbungano yazwa ndizvo, yakamuteera ngetsoka, yechibva kumadhorobha. 14Naye wakabuda akaona mbungano huru, wakavazwira urombo naye wakaponesa vairwara vavo. 15Kwakati aamadeekoni vadzidzi vake vakauya kwaari vechiti, “Panapa muri pandau iri yega nomukuwo watopera zvinopano. Ndizvo chiparadza mbungano kuti vaende mumaguta vadzitengere zvokudya.” 16Asi Jesu wakati kwavari, “Avasisiri kuenda; vapei imwimwi zvokudya.” 17Navo vakati kwaari, “Panapa tine zvingwa zvishanu zvega nehove mbiri.” 18Naye wakati, “Zviunzenyi panapa pendiri.” 19Naye wakapanga mbungano kuti igare pashi pamwenje, atora zvingwa zvishanu nehove mbiri, wakaringira mudenga, akazvibonga, akazvigura, akazvihina kunevadzidzi, nevadzidzi vakahina kune mbungano. 20Navo veshe vakadya, vakaguta, navo vakatonhera matsekeneswa ezvaiwarakatika vakazadza zvitundu gumi nazviiri. 21Naavo vakadya vaiya vanoda kuita mazana makumi mashanu evamuna, ngepabanze pevakadzi nevana.
Jesu Unohamba padera peMvura
(Mk. 6:45-52; Joh. 6:15-21)
22Paripo iye wakaronzera vadzidzi vake kuti vapotere mungarava, vatungamire kuambuka ruseri, achiendesa mbungano. 23Naapo aendesa mbungano, wakakwira pamutunhu ari ega kookumbira. Kwoita madeekoni waiya aripo ega. 24Asi zvinopano ngarava yaiya yaane mastadhia akawanda kubva kuhumbikumbi, yechikandirwa apo naapo ngemafungu, ngokuti dutu raipesana navo. 25Panguva yokurinda yechirongomuna yousiku#14:25 Panguva yokurinda yechirongomuna yousiku:Pakati peawa rechitatu nerechitanhatu. iye wakauya kwavari, echihamba padera peruandhle. 26Asi vadzidzi vechimuona echihamba padera poruandhle vakatyiswa vechiti, “Idzimudzangara.” Navo vakadaidzira ngokutya. 27Asi paripo Jesu wakaereketa kwavari echiti, “Shingai, ndini hangu, musatya.” 28NaPetro wakamupingura echiti, “Mambo, kuti uriwe, ronza kuti ndiuye kwouri padera pemvura.” 29Naye wakati, “Uya.” Naapo Petro adzaka kubva mungarava, wakahamba padera pemvura kuuya kunaJesu. 30Asi echiona dutu rine simba rechipesana naye, wakatya; naye echitanga kudzemera, wakadaidzira echiti, “Mambo, ndiponese.” 31Asi paripo Jesu wakatambanudza nyara yake, akamubata, akati kwaari, “Iwewe unokutenda kudoodoko, wagononda ngenyi?” 32Kwakati apo vakwira mungarava, dutu rakaterama. 33Naavo vaiya mungarava vakamudira, vakati, “Ngegwinyiso iwewe uri Mukororo waMwari.”
Jesu Unoponesa Vanorwara muGenesareta
(Mk. 6:53-56)
34Naapo vakaambuka ruseri vakaguma munyika yeGenesareta. 35Naapo vanhu vomunyikamwo vamuzia, vakaziisa munyika mweshe, vakaunza kwaari veshe avo vaiya nenhenda. 36Navo vakamupota kuti ava vatenderwe kwega kubata mupendero wegauni rake. Naavo veshe vakaubata vakaponeswa yaamho.
Выбрано:
Mat. 14: Ndau
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
