Mat. 10
10
Jesu Unodaidza Vadzidzi vake Gumi naVairi
(Mk. 3:13-19; Ruka 6:12-16)
1Naapo adaidza kwaari vadzidzi vake gumi navairi, wakavapa simba padera pemweya ine tsvina kuti vaidzinge nokurapa nhenda dzeshe nokurwara kweshe.
2Aya ndiwo mazina evapostori gumi navairi: uwo wokutanga ndiSimoni waizwi Petro, naAndreu munun'una wake; naJakobe mukororo waZebhedhi, naJohani munun'una wake, 3Firipi, Bhathoromeu; Thomasi naMateu mubharisi; Jakobe mukororo waArifeusi, naThadheusi; 4Simoni muKhenani naJudhasi Isikarioti uwo wakamupira.
Jesu Unotuma Vadzidzi Gumi naVairi
(Mk. 6:7-13; Ruka 9:1-6)
5Ava gumi navairi Jesu wakavatuma, akavapanga echiti, “Musaenda munjira yevemadzinza, musapotera muguta kunyazwi ngeriri revaSamaria. 6Asi endai kumakwai akarashika emhatso yaIsuraeri. 7Muchaenda mwechichumaira, mwechiti, ‘Umambo hwomudenga hwakwedzera.’ 8Mwechirapa vanorwara, mwechimusa vakafa, mwechimhodyosa vanemapere, mwechidzinga madhimoni; mwakaashira ngenyasha, mwechipawo ngenyasha. 9Musatora mukore nokuti sirivha nokuti thusi muzvikwama zvenyu; 10zve, nokuti munzaa werwendo rwenyu, musina mabhachi mairi nokuti magwada nokuti ndonga; ngokuti mushandi unosisira kupuwa kudya kwake. 11Kunyazwi ngomuri mudhorobha nokuti muguta mwemunozopinda, bvunzai kuti ndiani uri mukati mwaro unosisira; apo ndipo pomunozogara metsa mubvemwo. 12Mwoopotera mumhatso muichingamidze. 13Nokudai mhatso iyo yechisisira, kunyarara kwenyu ngakuuye padera payo; asi kuti isikasisiri ngakuhwirire kwomuri. 14Kunyazwi ndiani usikazomuashiri nokuti kupurutana mazwi enyu, mwechibudamwo mumhatso iyo nokuti dhorobha iro, guwai bukuta kubva patsoka dzenyu. 15Ngegwinyiso ndinoti kwomuri, kunozopinda kureruka kunenyika yeSodhoma neyeGomora ngezuva rokutongwa kuneiro dhorobha.
Madambudziko Achazouya
(Mk. 13:9-13; Ruka 21:12-17)
16“Ringirai, ndinomutuma kudai ngemakwai mukati mwemathika. Ndizvo mwechingwara kudai ngenyoka, mwakapfaa kudai ngenjia. 17Asi ngwarai vanhu, ngokuti vanozomuhina kubangano revatongi, navo vanozomurova mumhatso dzavo dzokudira. 18Nemwi munozounzwa pamberi pemakota nepemadzimambo ngepamusoro pangu, kuita chapupu kwavari nokumadzinza. 19Asi apo voomuhina, musazodembatemba kuti munozoereketenyi nokuti munozoronza chiinyi; ngokuti kunozohinwa kwomuri ngeawaro chomunozoereketa. 20Ngokuti andimwipi munoereketa, asi Mweya waBaba enyu unoereketa uri mukati mwenyu. 21Nomukoma unozohina munun'una kuti afe, ngokudaro baba mwana wavo, nevana vanozomukira vabari nokuvauraya. 22Nemwi munozonyenywa ndivo veshe ngendaa yezina rangu. Asi uwo unoshingirira metsa kumagumo, ndiye unozoponeswa. 23Naapo vanozomutambudza muguta rimwe, mwechitizira kune rimweni; ngokuti ngegwinyiso ndinoti kwomuri, amuzopedzi kuhamba madhorobha eshe aIsuraeri, asati auya Mukororo woMunhu.
24“Mudzidzi aari padera pomudzidzisi wake akadi, nomuranda aari padera pamambo wake. 25Kwakanaka kuti mudzidzi adai ngomudzidzisi wake, nomuranda kuti adai ndimambo wake. Kudai vakadudza munewemhatso kuti Bheerizebhuri,#10:25 Bheerizebhuri:Muzvare womweya yakashakata, mambo wenhunzi. vanozopinda kwakaitawani kuvadudza kudaro avo vari vemhatso yake!
Ziai woKutya
(Ruka 12:2-7)
26“Ndizvo musavatya; ngokuti apana chiro chakafishika chisikazooneki; nokuti chakafishiridzwa chisikazoziikanwi. 27Icho chendinomuronzera muchidima, mwechichiteketesa mukujeka, neicho chomunozwa ngevherevhere, mwechichichumaira muri padera pechachungu chemhatso. 28Musatya avo vanouraya muiri, asi vasina simba rokuuraya mweya. Asi mutye uwo unesimba rokuparadza zveshe mweya nomuiri muGehena. 29Zviwanzaburi zviiri azvitengiswi ngesendi here? Nechimwe chazvo achizowi pashi pamavhu kusatenderwa ndiBaba enyu. 30Asi nebvudzi resoro renyu rakaerengwa reshe. 31Ndizvo musatya, muri vanopinda kudikanwa kunezviwanzaburi zvakawanda.
Kutenda noKuramba Jesu
(Ruka 12:8-9)
32“Ndizvo weshe uwo unozonditenda pamberi pevanhu, neniwo ndinozomutenda pamberi paBaba angu vari mudenga. 33Kunyazwi ndiani unozondiramba pamberi pevanhu, neniwo ndinozomuramba pamberi paBaba angu vari mudenga.
Andizi Kuunza Kunyarara asi Shoti
(Ruka 12:51-53; 14:26-27)
34“Musapinimidza kuti ndakauya kuunza kunyarara padera penyika. Andizi kuuya kuunza kunyarara, asi shoti. 35Ngokuti ndakauya kuparadzanisa munhu nababa ake, nemwanasikana namai ake, nomunyamwana namazvarira ake. 36Nemagaa omunhu anozoita avo vari vemhatso yake. 37Iye unopinda kuda baba kunyazwi mai kuneinini, aazi kundisisira. Naye unopinda kuda mukororo kunyazwi mwanasikana kuneinini, aazi kundisisira. 38Neuwo usikatori muchinjiko wake, ateere sure kwangu, aazi kundisisira. 39Iye unoona kurarama kwake unozokurasha, nouwo unozorasha kurarama kwake ngepamusoro pangu unozokuona.
Misharo
(Mk. 9:41)
40“Iye unomuashira imwimwi unondiashira inini, nouwo unondiashira, unoashirawo uwo wakandituma. 41Iye unoashira muprofeti ngezina romuprofeti, unozoashira musharo womuprofeti; nouwo unoashira munhu wakarurama ngezina romunhu wakarurama, unozoashira musharo womunhu wakarurama. 42Nouwo unozopa umwe wevadoko ava tsani yemvura inotonhora yega ngezina romudzidzi, ngegwinyiso ndinoti kwomuri, aatongozorashikirwi ngomusharo wake.”
Выбрано:
Mat. 10: Ndau
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь