Wambeela 2
2
1Ndala dhahaakwanela osasanyiwa wa odhulu ni elabo ya vati ni dhaatedhene dha mwemo.
2Mulugu agamarihe mabasa aaye maatene, ahivumaga nlabo na neetanu nabiili.#2.2 Mulugu kaavumele mwaha wi eere ogoma, sowi kayahalile yego wi apadduse naari adhaalihe mwiilaboni. Mabasa aaye oopaddusa yahimala. 3Nuwindo Mulugu ahireeliha nlabo ndde, aheeliha wi nikale naaye-naaye, vowi thi nlabo navumiliiye mwa mabasa aaye oopaddusa.
Mulobwana ni mwihiyana mu Eddeni
4Mwaha wa oopaddusiwa wa odhulu ni elabo ya vati waali ndala. Nabwiya Mulugu vapaddusiliiye odhulu ni elabo ya vati 5kamwaali mithanko naari kamwamelile manasi naariwene.#2.5 Ndina <<Nabwiya>> mu ewogelo ya omapadduwelo wa Bibiliya, mu eHeberi, nneethaniwa YHWH, naari wi Zhova. Ndda thi ndina naaye-naaye na Mulugu. Mulugu mu eHeberi nneethaniwa Elohim. Mandina mameenddeene enolabihiwa mu Nipangano Nawale. Mandina mameenddeene enolabihiwa vamohive enooniha wi mandina mameenddeene enamuromola Mpaddusi mmohive. Sowi Nabwiya Mulugu kaarubwihedhemo muzongwe vano kaalimo muthu oolima. 6Mahinje yakuma vati va theya wi ekuwalihege vaatevene.
7 Nabwiya Mulugu ahimuuba muthu ni nthubi na theya,#2.7 Muthu ni theya Mu ewogelo ya eHeberi madhu owi muthu, ni theya wiiweyawiwa enoofwanafwana. Vano teto mu ewogelo ya eHeberi ndhu nimohive nnatapuleliwa muthu, vamohi ndina na Adamu. omukudheelela mwela mpunani, omvaha egumi. Ndala muthu ole ahikala ni egumi.
8 Nabwiya Mulugu ahisasanya teto mudda mu Eddeni,#2.8 Eddeni enatapulela mburo wowiithaala wafwanyeya dhaatedhene. epaddi ya wewo onakuma nduwa, ahimuhelamo muthu oyene ampaddusiliiye. 9Mudda ole Nabwiya Mulugu ahidhalamo mithanko dha misawo-misawo, dhaatedhene dhedho voosugwa dhahimudhivela ni dhoovaha dhiwa dhapama. Vaari va mudda ole vahikala muthanko wa egumi ni muthanko onanoniha yapama ni yootakala.
10Mu Eddeni mwahikala mwihinje, oyene wavaha mahinje mudda olene. Mwihinje ola otiwiwa wahigawanyeya mihinje minnayi. 11Mwihinje wowambeela oneethaniwa Pixoni, oyene waapeelele mwiilaboni ya oHavila mwemo muli oro mwijinji 12ni apama, wewo ohukalawo manddela muthanko oonukwela pama ni mabwe oofuneyesesa. 13Mwihinje wa nabiili oneethaniwa Giyoni, oyene waapeelele mwiilaboni yaatene ya Kuxi. 14Mwihinje wa neethaaru oneethaniwa Tigiri, oyene onavira epaddi ya wewo onakuma nduwa yo Axuuri. Mwihinje wa nennayi oneethaniwa Ewufarati.
15 Nabwiya Mulugu ahimwiithaaliha muthu mmuddani mule wi alabege mwemule ni okameelamo. 16Nabwiya Mulugu ahimulamulelaga, wiira: <<Ojege dhoovaha dha mithanko dhimohi dhaatedhene, 17mbwenye muthanko onanoniha yapama ni yootakala. Kuje. Waja onookwa ebaribareene>>.#2.17 Yoovaha ya muthanko ola enawogiwa eli yoovaha ya ebaribari. Kahuwo nifwanafwaniho na oraruwa wona amohi munatapuleliiwa. Muthu ogonana mwihiyanaaye naari mamune kahuwo yoothega vowi Mulugu ahilamulela vamurumiliiye Adamu ni Eva wi murelane, mudhaale mwiilaboni (moone Wambeela 1.27-28); vowi ahimuruma Adamu ni Eva otaganyihedhana. Moone Wambeela 2.22-25.
18Vano Nabwiya Mulugu ahiiraga: <<Kadhili pama wi mulobwana akale yeeka. Gimusasanyedhele oomukamihedha aaye omfwaneelela>>. 19Nabwiya Mulugu ahawuuba ni theya aneenyama ni balame misawo dhaatedhene, ahimwinka muthu wi aatwe mandina eewa. Mandina athwiliiye dhoopaddusiwa dhaatedhene baayene. 20Ndala muthu ahithwa mandina aneenyama aatene oofuwiwa ni amukokolani ni balame dhene. Ndala, kaafwanyeyile oomukamihedha aaye Adamu omfwaneelela.
21Veva Nabwiya Mulugu ahimvaha kove dhuulubale muthu, ogonelavo. Agonagave ndale, ahimvenyihavo bararu, ofugavo ni munoku vano mwiili wahiwelela wona mwakaleliiwa. 22Mwa bararu elene, Nabwiya Mulugu ahimusasanyana mwihiyana, omvaha mulobwana.
23Veva mulobwana ahiiraga:
<<Mbwenye vano gihimfwanya! Ola muthu
okumile mwa makuva aaga ni mwiili waaga.
Ola, ndina naaye di mwihiyana,
vowi okumile mwa mulobwana>>.#2.23 Mu ewogelo ya eHeberi ndhu nowi mwihiyana ni ndhu nowi mulobwana wiiweyawiwa enofwanafwana.
24Mwahaya buuyene mulobwana enamwihiyeliiye babe ni amaaye, otaganyihedhana ni mwihiyanaaye, abiili ala enakala mwiili mmohive.#2.24 Okalana mwiili mmohive oli ohaandeya omwalana. Oxixa omwalaniha mwiili, onoonga. Eli emodha-modhave mulobwana ni mwihiyanaaye kinafwaneelela omwalana enonoongeya aabiileene. Omwalana kuli mmoobuweleloni a Mulugu. Moone Matewuzhi 19.6.
25Mulobwana ni mwihiyanaaye#2.25 Mulobwana ni mwihiyanaaye enaagiwana di Adamu ni Eva. yeedda ehiwarile yego, kayawuliwa muru mwaha wa ela.#2.23-25 Maverisikulu ala enanisuuziha yoohadhihela ya Mulugu odheela matelo. Oliye wiirile wi wiiwanana odheela wa anamatelana okalege wooliba ohiyana ni wiiwanana odheela wa aliwa ni ababiwa naari addibiliwa, naari aniiwa. Wiiwanana odheela mulobwana ni mwihiyanaaye vikalege nthithimiho mmohi ni mukwaaye vadhulu vowiiwanana ni ohiyaniha odheela wa emudhi yeewa. Aliwa enofuneya esasanye emudhi exa ni mukalelo woolapelana odheela aliwa ni ababiwa. Oohiddeelana odheela mulobwana ni mwihiyana mootelana Mulugu olamuleliiye vihikalege weenjedhedhavo mwihiyana mmohi naari mulobwana mmohi. Moobuwelelo ala kili mwa Mulugu. Moone Wambeela 2.24; Timoteyo Owambeela 3.2.
Выбрано:
Wambeela 2: tke
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015, Wycliffe Bible Translators, Inc. All rights reserved.
