Известные библейские стихи из Matej 6

Поделиться

Nego, najangle roden o carstvo e Devlesoro hem lesiri pravednost, a sa adava so valjani tumenđe, ov ka del tumen!

Adalese, ma brininen tumen zako tejsato dive; nek o tejsato dive brinini pe pese. Đijekh dive isi le dovoljno ple bišukaripa.”

“Adalese vaćerava tumenđe: Ma oven zabrinuta zako tumaro dživdipe: ka ovel tumen li so te han ili so te pijen, ni zako tumaro telo: ka ovel tumen li so te urjaven. Nane li o dživdipe po bitno e hajbnastar, a o telo e šejendar?

Nego, kad molineja tut, đerdin korkoro tuće ki soba, phand o udar hem molin tut te Dadese e Devlese kovai ano garavdipe, a to Dad, kova dikhela soi ćerdo ano garavdipe, ka nagradini tut.

Adalese ađahar molinen: ‘Dade amareja, kova injan ano nebo, to sveto anav barjardo te ovel. To carstvo te avel. Ti volja te ovel, sar soi ano nebo, ađahar te ovel hem ki phuv.

De amen avdive o maro savo valjani amenđe đijekh dive

hem oprostin amenđe amare grehija sar so hem amen oprostinaja okolenđe kola grešinde premala amende.

Hem cide amen taro iskušenje, hem oslobodin amen e Bišukarestar. [Adalese soi to carstvo, to zoralipe hem ti slava zauvek.]’

Adalese so, te oprostinđen avere manušenđe kad grešinena premala tumende, hem tumaro Dad, kovai ano nebo, ka oprostini tumenđe.

Dikhen šukar e čirikljen! Ni sejinena ni čedena te čhiven ano šupe, a palem parvari len tumaro Dad kovai ano nebo. A na li tumen više vredinena e čirikljendar?

“Ma čeden tumenđe barvalipe ki phuv, kote o moljci hem i rđa ka uništinen le, a o čora šaj te aven te čoren le. Nego, čeden tumenđe barvalipe ko nebo, kote ni o moljci ni i rđa naka šaj uništinen le, a ni o čora našti te aven te čoren le. Adalese so to vilo ka ovel adari kaj to barvalipe.

“Nijekh robo našti kandel duje gospodaren. Ili ka mrzini jekhe, a ka volini e dujtone, ili jekhese ka ovel poslušno, a e dujtone naka podnosini. Našti kanden hem e Devle hem o barvalipe.”

Te o Devel ađahar šukar urjavela o biljke ko polje savei avdive adathe, a već tejsa frdena pe ani jag, kobor li više tumenđe ka del šeja, tikora verakere manušalen!

Nego, kad deja e čororenđe, te na džanel to levo vas so ćerela to desno. De e čororenđe garavindoj, a to Dad, kova dikhela soi ćerdo ano garavdipe, ka nagradini tut.”

O Isus phenđa: “Pazinen! Ma ćeren šukaripe anglo manuša, sar te dikhen tumen aver džene, adalese so, te ćerđen ađahar, tumaro Dad kovai ano nebo naka del tumen nagrada.

“Kad postinena, ma čeden tumare phova sar e dujemujengere, adalese so on ćerena muja sar te oven dikhle averendar da postinena. Čače vaćerava tumenđe, aver nagrada sem adaja naka dobinen. Nego, kad postineja, harov te bala hem thov to muj, te na dikhen o manuša so postineja, nego samo to Dad kovai ano garavdipe. Tegani to Dad, kova dikhela soi ćerdo ano garavdipe, ka nagradini tut.”