If you have would like a copy of this version please contact info@davaraudiobibles.org

Odki New Testament © The Pakistan Bible Society (Text), Odki New Testament Audio Bible ℗ 2024, Davar Partners International (Audio)

Odki New Testament

पर ईशु जैतून चे पहाड़ा उपर गेला। ते ईशु सवेले सवेले बल्ति मन्दरा चे बेहड़े मां आला, ते सारी बन्दी ओचे गोढु आली, ते ओ ब़ेसती कर वानु उपदेश ङिऊं लाग़ला। तब शास्त्री ते फरीसी हेक असतरी नु गेहती आले जको व्यभिचार मां पकड़ीली गेली हुती। ते विनु लौका चे आधे मां खड़े करती कर, ईशु कनु पूछले, “हे गुरु, हा असतरी व्यभिचार करते रंगे हाथे पकड़ीली गेली। मूसा ची व्यवस्था तां हा किहे कि इसड़ी असतरी नु तां पत्थरा लारे मारणे चाही छै। हमा तु बावड़ ये असतरी चे बारे मां तु का किही?” ईशु नु परखणे चे वास्ते वाणे हा बात ओकनु पूछली, कि ऐचे उपर दोष लावणे वास्ते कुई बात मिलती जाओ। ते ईशु पग़्ग़ा चे भराणे हुला ते भोंये उपर आंगली लारे लिखु लाग़ला। कांकि वे ईशु कनु पूछते ही जई पलते, बल्ति ओ सिधा भिला रेहती कर वानु केहले, “कि तम्चे महु जको पापी ना हो ऊंही सारा महु पेहला पत्थर यिनु मारो।” ते बल्ति ओ पग़्ग़ा चे भराणे हुती कर भोंये उपर आंगली लारे लिखु लाग़ला।
जिसे बेले लौका ने ईं सुणले ते सारा महु पेहले बङा कनु लाती कर छोटा तक, वांचे महु हेक-हेक करती कर उठु खिसकु लाग़ली, ते ईशु ओठे हेकला रेहती गेला, ते वा असतरी वी उठी भिली रेहली। ईशु खड़ा हुला ते वे असतरी नु केहले, “हे असतरी, वे सारी बन्दी किठे गेली? ते किह्णी वी तनु ङण्ड ची आज्ञा कोनी ङिली?”
वा असतरी ब़ोली, “हे गुरु जी, किह्णी वी कोनी।”
ईशु ने केहले, “मैं वी दुधे उपर ङण्ड ची आज्ञा ना ङी, जा ते बल्ति पाप ना करियो।”

ईशु ने बल्ति लौका नु केहले, “मैं संसारा चे सोज़ले छै। जको माये भांसु टुरी ऊं अन्धारे मां नी टुरी, पर जीवन चे सोज़ले मां टुरी।”
फरीसिया ने ओनु केहले, “तु आपणी ग़वाही खौद्द ङी पला, ऐवास्ते दुधी ग़वाही सच्‍ची कोनी।”
ईशु ने वानु उत्तर ङिला, “कि अगर मैं आपणी ग़वाही आप ङिये, तां वी माई ग़वाही सच्‍ची छै, कांकि मैं जाणे कि मैं किठु आला ते किठे जाये पला। पर तम्ही ना जाणा कि मैं किठु आला ते किठे जाणे। तम्ही तां दुनिया ची रीति चे अनुसार न्यां करा, पर मैं काया न्यां ना करी। ते अगर मैं न्यां करे वी तां माया न्यां सच्‍चा छै, कांकि मैं हेकला कोनी। पर मैं ते माया ब़ा नरीकार जेह्णे मनु भेज़ले अम्ही ङोनी जणे न्यां करु। ते तम्ची व्यवस्था मां वी लिखले पले कि ङुंहु जणा ची ग़वाही मिलती कर ठीक हुवे। हेक तां मैं आपणी ग़वाही ङिये, ते ङुजा माया ब़ा नरीकार माई ग़वाही ङिये, जेह्णे मनु भेज़ले।”
वाणे ईशु नु केहले कि, “दुधा ब़ा किठे छै?”
ईशु ने उत्तर ङिला, “ना तम्ही मनु जाणा ते ना ही माया ब़ा नु। अगर तम्ही मनु जाणा हां तां माये ब़ा नु वी जाणा हा।”
ये बाता ओणे मन्दरा ची दान पेटी चे गोढु भिले रेहती कर उपदेश ङिते हुले केहलीया। ते किह्णी वी ओनु कोनी पकड़ले, कांकि ओचा समय हालि तक कोनी आला हुता।

ईशु ने बल्ति वानु केहले, “मैं जाये पला, ते तम्ही मनु सोधा, ते आपणे पापा मां मरती जावा। जिठे मैं जाये पला, ओठे तम्ही ना आ सग़ा।”
बल्ति यहूदी नेता किहुं लाग़ले, “का ओ आपणे आप नु मारती नाखी, जको किहे पला कि ‘जिठे मैं जाये पला, तम्ही ओठे ना आ सग़ा?’ ”
ईशु ने वानु केहले, “तम्ही ये धरती चे छिवा, पर मैं तां स्वर्ग़ा चा छै। तम्ही संसारा चे छिवा, मैं संसारा चा कोनी। ऐवास्ते मैं तम्हानु केहले कि तम्ही आपणे पापा मां मरा, कांकि अगर तम्ही विश्‍वास ना करा कि मैं ओही छै, तां तम्ही आपणे पापा मां मरा।”
बल्ति वाणे ईशु कनु पूछले, “तु कूण छी?”
ईशु ने वानु केहले, “मैं ओही छै जको शुरु कनु तम्हानु केहता आवे पला। तम्चे बारे मां मनु ब़ोहत कोच्छ केहणे ते फैंसला करना छै। पर माया भेज़णे आला सच्‍चा छै, ते मैं जको ओकनु सुणले ऊंही संसारा नु किहे पला।”
वे ईं ना समझो कि अम्हानु ब़ा नरीकारा चे बारे मां किहे पला। बल्ति ईशु ने केहले, “जिसे बेले तम्ही मैं इन्साना चे पूता नु ऊंचे पर चढ़ावा, तां तम्ही जाणा कि मैं ओही छै, मैं आपणे तरफु कहीं ना करी पर जिंवे माये ब़ा ने मनु सिखाले यूंही ये बाता किहे पला। ते माया भेज़णे आला माये लारे छै, ओणे मनु हेकले कोनी छोड़ले, कांकि मैं सदा ऊंही काम करे जाये कनु ओ खौश हुवे।”
ईशु जिसे बेले ये बाता किहे ही पलता, कि ब़ोहत सारा ने ओचे उपर विश्‍वास करला।

बल्ति ईशु ने वा यहूदिया नु जेह्णे ओचे उपर विश्‍वास करला हुता केहले, “अगर तम्ही माये वचना मां बणले रिहा, तां सच्‍चमां माये चैले बणा। तम्ही सच्‍च नु जाणा, ते सच्‍च तम्हानु आजाद करी।”
वाणे ईशु नु उत्तर ङिला, “अम्ही तां अब्राहम चे वंशा महु छिऊं ते कङी काये गुलाम कोनी हुले। बल्ति तु किवें किही कि, ‘तम्ही आजाद हुती जावा?’ ” ईशु ने वानु उत्तर ङिला, “मैं तम्हानु सच्‍च-सच्‍च किहे पला, हर बन्दे जको पाप करे ऊं पाप चे गुलाम छै। ते गुलाम मालिक चे कुणम्बे उपर अधिकार ना जमा सग़ी, पर मालिक चा पूत सदा चा अधिकारी रिहे। ऐवास्ते अगर पूत तम्हानु आजाद करी, तां सच्‍चमां ही तम्ही आजाद हुती जावा। मैं जाणे कि तम्ही अब्राहम चे वंशा चे छिवा। तां वी माया वचन तम्चे दिला मां जग़हा ना गे सग़ी, ऐवास्ते तम्ही मनु मारती नाखणे चाहवा। मैं तम्हानु ऊंही किहे पला जको मैं आपणे ब़ा नरीकारा कनु ङेखले, ते तम्ही ऊंही करा जको तम्ही आपणे ब़ा कनु सुणले।”
वाणे ईशु नु उत्तर ङिला, “अम्चा ब़ा तां अब्राहम छै।”
ईशु ने वानु केहले, “अगर तम्ही अब्राहम ची ऊलाद्ध हुवा हा तां, तम्ही ऊंही काम करा हा जको अब्राहम ने करले हुते। पर हमा तम्ही मनु मारणे चाहवा कांकि मैं तम्हानु सच्‍च वचन सुणाला जको आपणे ब़ा नरीकारा कनु सुणला हुता। पर अब्राहम ने तां तम्चे जिसड़े कोनी करले हुते। तम्ही आपणे ब़ा आलीकर काम करा।”
बल्ति वाणे ईशु नु केहले, “अम्ही व्यभिचार लारे कोनी जमले। अम्चा हेको ब़ा छै, यानि नरीकार।”
ईशु ने वानु केहले, “अगर नरीकार तम्चा ब़ा हुवीया तां, तम्ही माये लारे प्रेम राखा हा, कांकि मैं नरीकारा ची तरफु आला। मैं आपणे आप कोनी आला, पर ओणे मनु भेज़ले। तम्ही माया बाता कां ना समझा? कांकि तम्ही माये वचन सुणना ना चाहवा। तम्ही आपणे ब़ा शैताना ची ऊलाद्ध छिवा, ते आपणे ब़ा ची इच्छा नु पुरी करने चाहवा। ओ तां शुरु कनु हत्यारा छै, ते सच्‍च उपर कोनी रुकला, कांकि सच्‍च ओचे मां छै ही कोनी। जिसे बेले ओ कूड़ मारे, तां आपणे सुभाव लारे ही कूड़ मारे, कांकि ओ कूड़ा छै, बल्कि कूड़ा चा ब़ा छै। पर मैं सच्‍च ब़ोले, ऐवास्ते तम्ही माया विश्‍वास ना करा। तम्चे महु कूण मनु पापी ठहरावे? अगर मैं सच्‍च ब़ोले, तां तम्ही माया विश्‍वास कां ना करा? जको नरीकारा चे तरफु छै, ऊं नरीकारा चा ही बाता सुणे। तम्ही ऐवास्ते ना सुणा कि नरीकारा चे तरफु कोनी।”

ईं सुणती यहूदिया ने ईशु नु केहले, “का अम्ही ठीक कोनी किहुं पले कि तु सामरी छी ते दुधे मां दुष्टात्मा छै?”
ईशु ने केहले, “माये मां दुष्टात्मा कोनी, पर मैं आपणे ब़ा चा कद्दर करे ते तम्ही माई बेकदरी करा पले। पर मैं आपणी महिमा ना चाहवी, पर हेक तां छै जको माई महिमा करवाणा चाहवे, ते ओ सही न्यां करे। मैं तम्हानु सच्‍च किहे कि, अगर कुई बन्दे माये वचना उपर चले तां ओ कङी वी मौत नी ङेखी।”
यहूदी बन्दा ने ओनु केहले, “हमा अम्ही जाणती गेले कि दुधे मां कुई दुष्टात्मा छै। अब्राहम वी मरती गेला ते भविष्यवक्‍ता वी मरती गेले, ते तु किही कि ‘अगर कुई माये वचना उपर चले तां ऊं कङी वी मौत नु नी ङेखी।’ पक्‍का ही तु अम्चे ब़ा अब्राहम कनु बङा कोनी जको मरती गेला ते भविष्यवक्‍ता वी मरती गेले। बल्ति तु का सोची कि तु का छी?”
ईशु ने उत्तर ङिला, “अगर मैं आप आपणी महिमा करे, तां माई महिमा कोच्छ कोनी। पर माई महिमा करने आला माया ब़ा नरीकार छै, जानु तम्ही किहा कि ‘ओ अम्चा नरीकार छै।’ तां वी तम्ही तां ओनु कोनी जाणले, पर मैं ओनु जाणे। अगर मैं किहे कि मैं ओनु ना जाणी, तां मैं वी तम्चे आलीकर कूड़ा ठहरी, पर मैं ओनु जाणे ते ओचे वचना उपर चले। तम्चा ब़ा अब्राहम माया ङिओ ङेखणे ची आस लारे मगन हुता, ते ओणे ङेखला ते खौश हुला।”
यहूदी बन्दा ने ओनु केहले, “तु हालि तक पंजहा साला चा कोनी, तु अब्राहम नु किवें ङेखती गेले?”
ईशु ने वानु केहले, “तम्हानु सच्‍च-सच्‍च किहे पला अब्राहम चे पैदा हुले कनु पेहले, मैं छै।”
तब वाणे ईशु नु मारणे वास्ते पत्थर चले, पर ईशु लुकती कर मन्दरा महु निकलती गेला।

Слушайте यूहन्‍ना 8