Athpariya 2023 WBT (NT) Non-Dramatized

Athpariya 2023 WBT (NT) Dramatized

हिट्‌नि निकोदेमास उनिङ् लिसाना ठिबाङ् फारिसि याप्‌मि डाना॥ हिट्‌ना याहुदि काचाहारि-कुन्‍डालङिना सादास्‍से डाना॥ ठिक् युसाना पाका उन् येसु सोरि आबाउङ् लोडुए, “काहिसिक्‍बा, खान् माङ्‌हाङ्‌लाम्‍मा आटायाना काहिसिक्‍बा नुङ् आन्‍याँ ठाहा टोगुएसुम्‍मे, पोङ्‌भोने माङ्‌हाङ् खान्‌लोक् युङ्‌नेएट्‌नि भोने खान्‍ङा आचोगुगा नागा चिन्‍नाचि साङा चा चोक्‍मा उहिडुन्‍गा॥”
येसुङा हिट्‌ना लोडुए, “छेम्‍बा डोक्, आङा खान् लोनाँ, कोइ याप्‌मि फेरि पोङ्‌नेएट्‌नि भोने, उन्‍ङा माङ्‌हाङ् उमुलुक् निमा टोगुन्‍ना॥”
निकोदेमासङा लोडुए, “याप्‌मि पासिङ् लियुङ् फेरि खोड्‌डेउङ् पोङ्‌मा हियुक्‍ना टे? पाक् हिट्‌ना उमाङाना ओफोक्‌ङि लिक्‌युङ् फेरि पोङ्‌मा हियुक्‌नि टे?”
येसुङा लोडुए, “छेम्‍बा डोक्, आङा खान् लोनाँ, खोना याप्‌मि चा चुवा लोक् हाङ्‌सालाम्‍मा पोङ्‌नेएट्‌नि भोने, हिट्‌ना माङ्‌हाङ् उमुलुक्‌ङि लिग्‍मा हिनिना॥ येम्‌लाम्‍मा पोङ्‌साना येम् डोक्, हिट्‌नुङ् हाङ्‌सालाम्‍मा पोङ्‌साना हाङ्‌सा डोक्॥ आङा खान् फेरि पोङ्‌मा कोन्‌युक् नुङ् लोनानाँ डोङ् ठोङ्‌नेन्॥ हिॽवा खोनालेङ् फेन्‍मा कोन्‌युक्‍ना हिट्‌नालेङ् डोक् फेन्‌युक्॥ खान्‍ङा हिॽवा फेन्‍डानाउम् ठाहा आटोगुटु, टरो हिट्‌ना हिॽवा खोनिलाम्‍मा फेन्‌युक्‍ना हिट्‌नुङ् खोनालेङ् खाट्‌युक्‍ना, हिट्‌नाम्‍बाक् ठाहा टोक्‌निम्‍ना॥ हिट्‌डेउङ् हाङ्‌सालाम्‍मा पोङ्‌साना याप्‌मि चा हिड्‌डेना डोक् लियुक्॥”
निकोदेमासङा सिलाप्‍टुए, “ना रिङ् खोड्‌डेउङ् लिमा हियुक्‍ना टे?”
हिट्‌नुङ् येसुङा हिट्‌ना लोडुए, “पाक् खान् इस्‍राएलि याप्‌मिचिगा काहिसिक्‍बा आलि चा नागा रिङ् बुजा आचोगुन्‍नै? छेम्‍बा डोक्, आङा खान् लोनाँ, आन्‍याँ जे निसुम्‍मागा हिट्‌ना रिङ् डोक् चेक्‌टिटिङा, हिट्‌नुङ् आन्‍याँ जे निसुएसुम्‍मे हिट्‌ना रिङ् डोक् माट्‌टुम्‍टुम्‍मा, टरो खानिङाम्‍बाक् आन्‍याँ माट्‌टुम्‍माना रिङ् बिस्‍वास आचोक्‌निम्‍ना॥ आङा नाहि नाराङिना रिङ् खानि लोनानि चा खानिङा बिस्‍वास आचोक्‌निम्‍ना भोने, टोनालोग्‌ङिना रिङ् लोनाने भोनेउम्‍टे खोड्‌डेउङ् बिस्‍वास चोक्‍मा आहिडुम्‍टुम्‍ना टे? हिट्‌नुङ् टोनालोग्‌लाम्‍मा उङ्‌साना याप्‌मि छा माले आरु खोना चा टोनालोग्‌ङि ओखाट्‌निगेट्‌निगा॥ साक्‍चा उयुङ्‌निना डेन्‌ङि मोसाङा काँसाङाना ओप्‍पु फोगु गाड्‌डे डोक् याप्‌मि छा चा याप्‌मिचिङा खाप्‍चेङि ओफोगुटु॥ हिट्‌नुङ् जुन्‍ङा उन्‌ङि बिस्‍वास चोगुटु, हिट्‌नाङा खोना बेला चा लाट्‌निना चोला टुबुटु॥ पोङ्‌भोने माङ्‌हाङ्‌ङा ना नाराङिगा याप्‌मिचि आम्‍टेप्‍मा जोम् माया चोगुचे, उन्‍ङा उन्‍ङाना ठिबाङ् एना छा चा आपिडे, हिड्‌डेउङ् उन्‌ङि बिस्‍वास काचोक् खोना चा जाखाम् उलिन्‍याक्, टरो हिट्‌नाँ खोना बेला चा लाट्‌निना चोला ओटोगुवाक्॥ माङ्‌हाङ्‌ङा नाराङिगा याप्‌मिचि फाट्‌टुर लाप्‍मा लोङ्‌सा उइछा पाङ्‌सुना माखाक्, टरो उन्‌लाम्‍मा हिट्‌नागा उहिङ्‌याक् नुङ् पाङ्‌सुए॥ जुन्‍ङा उन्‌ङि बिस्‍वास चोगुटु हिट्‌ना न्‍याएङि ठानिना, टरो उन्‌ङि बिस्‍वास ओचोगुन्‍गाम्‍बाक् पाइले डोक् न्‍याए लिमा हिडे, पोङ्‌भोने हिट्‌नाँ माङ्‌हाङ्‌ङाना ठिबाङ् एना छा उनिङ्‌ङि बिस्‍वास चोगुन्‍गेट्‌टुन्‍ना॥ न्‍याएम्‍बाक् ना रिङ्‌ङि लियुक्, व्‍हाङ्‌म्‍बाक् नाराङि टाइसे, हिट्‌नुङ् याप्‌मिचिङा व्‍हाङ् नुङ्‌ना चा डुम्‍बारिक् डुम् डोक् निङ्‌ग्‍वा ओटासुए, पोङ्‌भोने हिट्‌नागाँगा टोॽवा डोक् ओचाफेन्‍ना डाना॥ ओचाफेन्‍ना टोॽवा काचोक्‍बा सोब्‍बेङा व्‍हाङ् चिम्‍मा उफुट्‌टुना, हिट्‌नुङ् हिट्‌नागाँ ओचोगुना टोॽवा व्‍हाङ्‌ङि ओठेट्‌युक् नुङ् उन्‌चि किप्‍माङा हिट्‌नागा व्‍हाङ्‌ङि ओटानिगा॥ टरो छेम्‍बाना रिङ्‌ङि वाना याप्‌मिम्‍बाक् व्‍हाङ्‌ङि टायुक्, हिड्‌डेउङ् माङ्‌हाङ्‌ङा निङ्‌ग्‍वा चोगुना गाड्‌डे हिट्‌नागाँ ओचोगुएट्‌टु नुङ् आरुङा निमा उहिडुटु॥”

हिट्‌नुङ्‌ना येसु ओचेलाचिलोक् याहुदिया छेट्‌राङि खाडे, हिट्‌नुङ् आम्‍टेप्‍मा लेम्‍बा सोम्‍मा हिट्‌नागालोक् हिट्‌नि डोक् युङे हिट्‌नुङ् बाप्‌टिस्‍मा पिडुचे॥ युहान्‍नाङा चा सालिमङाना छेउ एनोन ओलोडुना डेन्‌ङि बाप्‌टिस्‍मा पिडुचिगा डागा, पोङ्‌भोने हिट्‌नि जोम् चुवा डाना॥ हिट्‌नि याप्‌मिचि बाप्‌टिस्‍मा लाड्‌मा ओटायागा डागा॥ (हिट्‌ना बेला सोम्‍मा युहान्‍ना खाम्‍बाङ्‌ङि ठानिगेएट्‌निना डाना॥)
ठिक् लेम्‍बा युहान्‍ना ओचेलाचिङि ठिबाङ् याहुदिलोक् चोख्‍याँ लिमाना बारेङि खेमाबुङ्‌मा ओचोगे॥ हिट्‌नागा युहान्‍ना सोरि ओखाडाउङ् उन् ओलोडुए, “काहिसिक्‍बा, यारदान याहाँपारा वासिनाँ खान्‌लोक् ठिबाङ् याप्‌मि वासेट्‌टाना॥ खान्‍ङा हिट्‌ना याप्‌मिङाना बारेङि आन्‍याँ याप्‌मिलोडाना डाना॥ हाट्‌ले उन्‍ङा डोक् बाप्‌टिस्‍मा पिडुएट्‌टुचि, हिट्‌नुङ् सोब्‍बे याप्‌मिचि उन् सोरि गोलो ओखाट्एट्॥”
हिट्‌नुङ् युहान्‍नाङा हिट्‌नागा लोडुचे, “याप्‌मिलाउङ्‌सा टोनालोग्‌ङिना माङ्‌हाङ्‌ङा पिडुन्‌चिलोक् सोम्‍मा हिट्‌नाङा पाक्‍चा टोग्‍मा हिडुन्‍ना॥ ‘आङा खिरिस्‍ट माखाक्, टरो आङाम्‍टे उन् नुङ्‌ना पाइले माङ्‌हाङ्‌ङा याङ्‌पाङ्‌साना याप्‌मि एरोक्’ नुङ् आङा लोनानिगा रिङ् खानि आप्‍पेलाउङ्‌स ठाहा युङ्‌ग्‍वा॥ बेहुलि बेहुलाङाना ए॥ बेहुला सोरि येब्‍ना ओसाइबाम्‍बाक् बेहुलाङाना ओसोरा खेम्‍सुङ् आड्‌डिक् हारका लियुक्॥ हिट्‌डेउङ् आङाना ना हारका हाट्‌ले युडाइसे॥ उन्‌बाक् पोसा खाप्‍मा कोन्‌युक्, टरो आङाम्‍बाक् योम्‍सा खाट्‌टिउना लिमा कोन्‌युक्॥”

टोनालाम्‍मा उङ्‌नाम्‍बाक् सोब्‍बे नुङ्‌ना माङ्‌ठेना ए॥ नाराङि ओपोङ्‌सागा याप्‌मिचिम्‍बाक् ना नाराङिगा याप्‌मिचि डोक् उलियुक्, हिट्‌नुङ् नाराङिगा रिङ् ओचेक्‌युक्॥ टरो टोनालोग्‌लाम्‍मा उङ्‌नाम्‍बाक् सोब्‍बे नुङ्‌ना माङ्‌ठेना ए॥ उन्‍ङा आप्‍पे निसुगा हिट्‌नुङ् खेम्‍सुगा रिङ् डोक् माट्‌टुटु, टरो उन्‍ङा माट्‌टुगा रिङ् साङा चा बिस्‍वास ओचोगुन्‍गा॥ टरो जुन्‍ङा उन्‍ङा माट्‌टुगा रिङ् बिस्‍वास चोगुटु, हिट्‌नाङा माङ्‌हाङ् छेम्‍बाना ए नुङ् पारमान् पिडुटु॥ पोङ्‌भोने उन् माङ्‌हाङ्‌ङा पाङ्‌सुना॥ उन्‍ङा माङ्‌हाङ्‌ङाना डोक् रिङ् माट्‌टुटु, पोङ्‌भोने माङ्‌हाङ्‌ङा सेङ्‌सेङ्‌ना हाङ्‌सा उन्‌लाउङ्‌सा आड्‌डिक् जोम् पिडुटु॥ माङ्‌हाङ् पाबाङा उइछा माया चोगुटु हिट्‌नुङ् ख्‍वाप्‍पा थोक् उमुक्‌ङि डोक् पिडुएसुए॥ जुन्‍ङा छाङि बिस्‍वास चोगुटु, हिट्‌नालोक् खोना बेला चा लाट्‌निना चोला लियुक्॥ जुन्‍ङा छाङि बिस्‍वास चोगुन्‍ना, हिट्‌नाङा खोना बेला चा लाट्‌निना चोला टोगुन्‍ना, टरो माङ्‌हाङ्‌ङाना साजाए हिट्‌ना उठुङ्‌ङि लियुयाक्‌युक्॥

Слушайте युहान्‍ना 3