If you would like a copy of this version please contact info@davaraudiobibles.org

Ladakhi New Testament, CC-BY-SA-4.0, The Love Fellowship. Ladakhi New Testament Audio Bible, CC-BY-SA-4.0, Davar Partners International, The Love Fellowship, 2022.

Ladakhi New Testament

Ladakhi Bible by The Love Fellowship is licensed under Creative Commons Attribution-ShareAlike 4.0 License.

حضرت عیسیٰ مسیح بیت المقدِس نے بینگتے سکیودین یود زانے کھونگ یودسا لوبٹوگسگون یونگستے بیت المقدِس ہالاسشیس سیگستے یودکھانبو حضرت عیسیٰ سی ستانّا زادس۔ حضرت عیسیٰ سی کھونگونلا مولس، ”ای تشانگما کھیوجا تھونگدوگّا؟ نگے کھیوجا لدینبا زیرّاد، ای ردوا چیگّانگ چیگیکا ساگستے میلوس، تشانگما شیگین۔“
ذیتونی ریکا حضرت عیسیٰ سی جُوگستے یود زانے، لوبٹوگسگون کھونگ چیگپو یودسا یونگستے ٹیس، ”نگاجا شادّا زادّانگ تیبو نام جونگین۔ نیرانگ دُنیائیکا لوگستے سکیودچیس یانگ توسّی تھامے ستاگس پو کازوگ ریگ یونگین۔“
حضرت عیسیٰ سی لانسالس، ”سوجیکّیانگ کھیوجا گوبسکور تانگمیچوگچیسلا شانگ چوس، چیازیرنا نگے مینگ کھورتے نگا لدامّا زادکھانّی مسیحا این زیرکھان مانگپوجیک یونگستے می مانگپوا گوبسکور تانگین۔ یانگ کھیوجاگونّی ماگ تانگ ماگی سکورلا اُویاگون تشورّاچیگ، جیگس ماجیگشیگ؛ تیگون چونگّوس، اِین نانگ تھامے توس تارُونگ مِیلیب۔ گیالکھاگ چیگ تانگ چیگی یانگ گیالثید چیگ تانگ چیگی گیابگالّا ماگ تانگین۔ ناسّا مانگپوے نانّگا موگے تانگ رسانگّول یونگین۔ اِین نانگ تے تشانگما نی ٹھوگو سکیچیسّی گوزُوگی زوگزیربو ژوگس این۔“
”تینے کھیوجا ردوگنگال ستانچیسلا ستادتے ساداین۔ کھیوجے نگیکا ایمان چوچیسپوے گیالکھاگ تشانگمے میگونّی کھیوجاگونلا ناپھراد چوین۔ تیتوسلا می مانگپوے نگیکا ایمان چوکھانبو پھانگین یانگ کھورانگ چیگ تانگ چیگّا ناپھراد چوستے ڈاو لاگا ستاداین۔ زوسمے پیغمبر مانگپو یونگستے می مانگپوا گوبسکور تانگین۔ یانگ نگانسیمس رگیاشیسپوے مانگپوجیکّی خُدا تانگ میگونّی پھیا یاشابو نیامسین۔ اِین نانگ تھاما تشوگپا نگیکا ایمان ستانپو بورکھانگون تھارین۔ گیالکھاگ تشانگمے میگونّی تشورچیسّی پھیا دُنیا گانگپوے نانّگا نامکھے گیالثیدّی گاموےناتسُولبو شادین، تینے توسّی تھاما لیباین۔“
”کھیوجے، پیغمبر دانیایلّی ہلژخمہ شوقبُو بوے نانّگا ڈِیا زادکھان ’تشیتو چوکھانّی کھاملوگچیسپو‘ ہلژخمہ بیت المقدِس سی نانّگا تھونّگاچیگ، (سیلکھانگونّی نگے زیرچیسچانگونّیکا سنانّگا تونگ) یہُودیہ یولجونگسّی نانّگا دُوگکھان گُون ریگونلا شورگوس۔ کھانگپے کھاتھوگّا یودکھانگون یوگا بابستے کھانگپے نانّگا نورگون لینّالا ماچھا۔ ژینگیکا لاس چوین یودکھانگون لوگستے کھانگپا کوس کھیونّگالا ماچھا۔ تیتوسلا سکییچیسما تانگ ٹھوگوا آوما تانگکھانّی اماگُونلا تسامشیگی جیگسنانگ مانوگ۔ کھیوجا شورچیسّی توسپو گونتوس یا شابّادّی آرام چوچیسی جاگّا میچونگچیسلا دُعا چوس۔ تیتوسلا ایزام ردوگنگال ٹاگپو جونگین، کا بو دُنیا زادپانے پھارلا داگسا تشوگپا ماچونّگا اینوگ یانگ ستینگژینّانگ میچونگ۔ کالتیس تیتوسپو نیونگون مازادپینّا سوجیگی سروک لوستے میدڈو، اِین نانگ لدامّا زادکھانگونّی تونلا تیتوسپو نیونگون چوا زادس۔“
”تیتوسلا کالتیس سوجیکّی کھیوجا، ’ستوسشیگ مسیحا یکانے یا اکانے جُوگستے دوگ‘ زیرنا ایمان ماچو۔ چیازیرنا مسیحا زُوسما تانگ پیغمبر زُوسما گُون یونگستے ہالاسّی زادپا تانگ ستاگس گُون ستانتے خُدے لدامّا زادکھانگونلانگ گوبسکور تانگچیسّی سونڈوس چوین اِین نانگ تانگ مینیان۔ شانگ چوس، توسپو لیبّی سانگ سنگونلا نگے کھیوجا شادتے این۔“
”کالتیس سوجیکّی ’مسیحا ریستونگی نانّگا دوگ‘ زیرنا ماچھا، یا ’کھو نگا نانگنے دوگ‘ زیرنا ایمان ماچو۔ سکاملاگی اوت نامکھے نانّگا شارنے نوب تشوگپا کھییبسّا ژوگس، اِبنِ آدم لوگستے یونگ زان یانگ چھین۔ سپھور یودسا شا زاکھانّی چاگون کھورّانوگ۔ (کھیوجے تے ستاگس گُون چونّگا تھونّگاچیگ تھامے توس لیبچیسپو کھیوجا ہاگوگوس)۔“
”تیتوسّی ردوگنگالّی چاب ستینگنے،
’نییما مونڈیگ گیورین،
لزاوے اوت می تانگ
نامنے سکارماگون بودین
یانگ نامکھے وانگون سکولا زادِین۔‘
تینے اِبنِ آدم یونگچیسّی ستاگس نامی نانّگا چونگسپا دُنیائی گیالکھاگ تشانگمے میگونّی نیانگان چوین۔ تینے کھونگونی اِبنِ آدم وانگ تانگ شان ٹاگپو نیامپو ثینّیکا دُوگستے یونّگا تھونگین ۔ تونگسکاد چھینمو پھواچیگ کھوے، فرشتاگون دُنیا گانگپوے نانگنے کھورانگی لدامکھانگون لدوچیسلا کالین ۔“
”پھیگ کھازاسّی لچانگمے کانے لابجا لینّانگ؛ تیبوے یالگا سنگونپو سونگتے لوما سوما بینّگاچیگ، یار نیمو لیبکھانبو شیسّانوگ۔ تینّا تسوگسلا کھیوجاگونّی تے ستاگس تشانگما تھونّگاچیگ، نگا لوگستے یونگچیسّی توس نیمو، گھوے لدُونلا لیبستے یودکھانبو کھیوجاگونّی شیساین۔ نگے کھیوجا لدینبا زیرّاد، ای میرابسپو میدکھان چھے سانگ سنگونلا تے تشانگما جونگین۔ نامکھا تانگ دُنیا نیسکو میدکھان چھین، اِین نانگ نگے زیرکھانگون میدکھان مانے میچھا۔“
”تے تشانگما جونگچیسّی جاگ یا توستش اوت پو خُدے یاب چیگپوا مانے یانگ سوانگ گیوسمید، نامکھے فرشتا یا بُوژانگ۔ می ٹانگپو حضرت نُوح توسلا جونگکھان ژوگس اِبنِ آدم یونگی توسلانگ جونگین۔ دُنیائیکا چھولوگ یونگی سانگ سنگونلا، حضرت نُوح ٹُھوزینگی نانّگا چھاچھا تشوگپا میگون زین تانگ تھونگین ، ناما چوین تانگ باگما تانگین دُوگس۔ چھولوگ یونگستے کھونگ تشانگما کھیرتے شیشی تشوگپا کھونگونلا تے چونگچیسپو گیُوس چانگ میدپین، تینّا ژوگس اِبنِ آدم یونگ زان یانگ جونگین۔“
”ژینگیکا یودکھان می نییسّی نانگنے چیگپو نامکھا کھیرّا زادِین یانگ چیگپو بورین۔ رانگتھاگیکا ٹو سکوراین یودکھان بومو نییسّی نانگنے چیگپو نامکھا کھیرّا زادِین یانگ چیگپو بورین۔“
”تیبویپھیا شانگ چوس، چیازیرنا کھیوجاگونلا کھیوجے مسیح یونگچیسّی جاگپو گیوسمیدتے اینوگ۔ اِین نانگ ایبو ہاگوشیگ، کالتیس ژانلا کونما یونگچیسّی توستش اوت پو کھانگداگّا گیوسیودپینّا، کھو ثونگستے دُوگستے کھوے کھورانگی کھانگپے نانّگا کونما ژوگس میچوگ۔ تینّابویپھیا کھیوجا توسگیون ڈالڈیگ دُوگوس چیازیرنا کھیوجاگونّی ریوا میدّی توسلا اِبنِ آدم یونگثیدچیس اینوگ۔“
”سپونبوے کھورانگی کھانگپے ستاستوگ تانگ جان یوگپوگونلا توسّیکا جاگدانگی کھارجی تانگچیسّی پھیا سکوسکھان ایمان چان تانگ شیسرابسچانّی یوگپو سو اینوگ؟ مالِک لوگستے یونّگاچیگ یوگپوبوے کھوے سکوسکھانّی لاسپو چوین تھونگنا کھوا شزدے تانگین۔ نگے کھیوجا لدینبا زیرّاد، سپونبوے، کھورانگی نور تشانگما ستاستوگ چوچیسّی کھاگپو کھوا تانگین۔ اِین نانگ یوگپوبو نگانپا اینّا کھوے، ’نگے مالِک توسیونرینگ لوگستے مییونگ‘ سامستے کھورانگی ٹوپا یوگپوگونلا ردونگچیس گوزوگ چوستے، راروسکھانگون نیامپو زین چھانگ تھونگین دوگین۔ کھوے ریوا میچوے جاگّا یانگ کھوا گیوسمیدّی توستش اوت پویکا مالِک یونگستے کھو تومپاتومپے نانّگا چادتے ریاکاری گُون نیامپو بورین، تیرو ناگس ثانٹے جاستے نگوچیس تانگ سو ثیگچیس یونگین “

Слушайте مادتھا 24