Библия пэ влахицко романи шыб

© 2021 Bible Translators of Ukraine © 2021 Pioneer Bible Translators This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Тунчи Исусо зажыля андо форо Иерихоно и прожалас пар лэстэ. И акэ, екх мануш, савэс акхарэнас Закхеё, пхурэдэр стидэмарё налогонэндиро, барвало мануш, родэлас тэ дикхэл лэ Исусос, ко Вов кацаво, нэ на сас сар, колэстар со фартэ бут мануша сас пашав Исусо, ай Закхеё сас цэкно ростоса. Вов запрастая майанглэ, загульдя пэ тютина, сави барёлас пэ кодва тхан, кай прожалас Исусо. Кала Исусо поджыля кав кадва тхан, Вов подикхля упрэ и пхэндя лэсти:
— Закхеё! Згуль майсыго! Манди трэбуй адес тэ авав андо тиро чер.
Закхеё сыго згульдя и лошаса приля Лэс андо пэско чер. Всаворэ, ко дикхля када, холяйле и лине тэ дэн дума, со Вов зажыля кав бэзэхало мануш.
Закхеё вщиля и пхэндя Раести:
— Рай! Акэ, епаш всаворэстар, со мандэ исин, мэ роздава чёрорэнди, и кастар лем хохавимаса, отдава андэ штарвар майбут!
Исусо пхэндя лэсти:
— Адес авиля фэрисаримос андэ кадва чер, колэсти со и вов исин шаво лэ Авраамоско. Шаво Манушыкано авиля тэ аракхэл и тэ фэрисарэл колэн, ко хасавэл.

Колэнди, ко ашунэлас Исусос, Вов пхэндя екх дума. Колэстар со онэ сас пашав Иерусалимо, и онэ гындонас, со сыго отпхэрнавэлапэ Тхагаримос Дэвлэско.
Иисусо пхэндя кадя:
— Екх барвало мануш ладэлас андэ дурутни пхув, кай тэ лэл пэсти тхагаримос и тунчи тэ рисавэл. Вов акхардя дэшэн пэстирэн слугонэн, дя лэнди по шэл драхморя тай пхэндя: «Терэн арли, жы кала мэ рисавава». Нэ мануша кола пхувьятар на камэнас лэс и бишалдэ пала лэстэ пхурэдэрэн манушэн, кай онэ тэ пхэнэн: «На камас, соб вов тэ авэл амарэ тхагараса».
Нэ вов тэрдиля тхагараса тай рисайля черэ. Вов припхэндя тэ акхарэл лэ слугонэн, касти вов дя руп, кай тэ ужанэл, ко скачи затердя. Авиля англуно и пхэндя: «Хулай! Тирэ шэл драхморя андэ манди дэш шэла». Хулай пхэндя лэсти: «Мишто, лашо бутярно! Пала кода, со ту патимаско андэ кадва цэкно рындо, тути авэла баримос пэ дэш фороря». Авиля авэр и пхэндя: «Хулай! Тирэ шэл драхморя андэ панчшэл». Хулай пхэндя лэсти: «И ту ав пхурэдэр андэ панч фороря». Авиля трито и пхэндя: «Хулай! Акэ тути тирэ шэл драхморя. Мэ ритяравас лэн андо кхосноро. Мэ даравас тутар, ту мануш, саво бут мангэл: лэс кода, со на тховэсас, и стидэс кода, со ту на шосас андэ пхув». Хулай пхэндя лэсти: «Тирэ лавэнца авава тэ сындосарав тут, хохавно бутярно! Ту жанэсас, кай мэ бут мангав, лав кода, со мэ на тховавас, и стидав кода, со на шавас андэ пхув. Состар ту на дян руп мэрно андэ арли, сар мэ рисавава, тэ авэл руп будэр?» И вов пхэндя колэнди, ко котэ ашэлас: «Залэнтэ лэстар шэл драхморя и отдэн колэсти, кастэ дэш шэла». Онэ пхэндэ лэсти: «Хулай! Лэстэ ж исин дэш шэла драхморя». Хулай дя дума: «Пхэнав тумэнди, со всаворэнди колэнди, кастэ исин, дэлапэ инке, а кастэ нинай, залэлапэ и кода, со лэстэ исин. А мэрнэн вражымарен, ко на камэлас, кай мэ тэ авав лэндирэ тхагараса, анэн и умарэнтэ англав мандэ».

Исусо пхэндя када тай жыля майдур кав Иерусалимо. И сар поджыля кай и гава, савэ акхарэнпэ Вифагия и Вифания, пашав плай, саво акхарэлпэ Оливково, бишалдя дуен сытярнэн Пэстирэн и пхэндя лэнди:
— Жан андо гав, саво англай тумэндэ, ай сар зажана андэ лэстэ, аракхэна припхангле осликос, пэ саво нико никала на бэшэлас. Отпхандэн лэс и анэн Мандэ. Сар ко пушэла тумэндар: «Пэр со отпхандэн лэс?» — пхэнэн лэсти кадя: «Вов трэбуй Раести».
Сытярнэ, савэн Вов бишалдя, жыле и аракхле, сар Вов пхэндя лэнди. Кала онэ отпхандэнас осликос, хулая пушле лэн:
— Пэр со тумэ отпхандэн лэс?
Онэ пхэндэ:
— Вов трэбуй Раести.
Онэ андэ лэс кав Исусо, шутэ йида пэ ослико и тховдэ пэр лэстэ лэ Исусос. Кала Вов ладэлас, онэ шонас йида пэстири пав дром. А кала Вов подлагля кав тхан, кай о дром змукэлпэ пав плай Оливково, фартэ бут сытярнэ радосавэнас и зоралэ гласоса лашарэнас лэ Дэвлэс пала диворя, савэ онэ дикхле. Онэ пхэнэнас:
— Лашардо Тхагар, саво жал важ алав Рае Дэвлэско! Миро по болыбэн, слава упрэ по болыбэн!
Коисавэ фарисеёря, савэ сас машкар мануша, пхэндэ Лэсти:
— Сытяримари, припхэн Пэстирэ сытярнэнди тэ ашэн мулком!
Нэ Вов пхэндя:
— Пхэнав тумэнди, сар онэ ашэна мулком, и бара лэна тэ цыписавэн.

Кала Исусо поджалас кав Иерусалимо, Вов удикхля о форо и заровдя. Тунчи пхэнэлас:
— О, сар ту адес тэ ужанэс, со анэлас бы тути миро! Нэ икхатар када сгарадо тирэ якхэндар. Авэна кацавэ деса, кала вражымаря тирэ жана пэр тутэ маримаса, тэрдёна тай стасавэна тут всаворэ ригэндар. Онэ розмарэна тут, умарэна тирэ бэяцэн и на ашавэна бар по бар, пала кода со ту на ужанглян вряма, кала о Дэл авиля тутэ.

Тунчи Исусо зажыля андо храмо и ля тэ вытрадэл битимарен.
— Пистросардо, — пхэндя Вов лэнди, — со Мэрно чер авэла черэса, кай мангэнпэ Дэвлэс. А тумэ тердэ андар лэстэ прахарицко тхан.
Кажно дес Исусо сытярэлас андо храмо. Барэ рашая, сытяримаря Законостирэ и майбарэдэр машкар и мануша родэнас тэ умарэн Лэс. Нэ на аракхэнас, сар када тэ терэн, колэстар со всаворэ мануша на камэнас тэ промукэн ни екх лав Лэско.

Слушайте Лукастар 19