Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so á mak á leshūŋ menu muɔ mɛ́t, á mbū meziŋ‑ntō pí ntsɔp pīa mé legēm, éfhó á ajʉʼ mɛ́t ŋgʉ̄ɔ. Ńziŋɛ nzíʼnɛ epuɔ, ńtswīi ŋke mbɔŋ á ntē metésɔŋ apak alāʼ mɛ́t.
Á ge egɔ́, mbɔ Jáaŋ a ke tshí á ŋgyā atʉɛ́, ńjúʼ mɛ́ nɔŋ ŋghítɛ menu mīi, Yɛɛ́so Nzaʼ‑Ŋkhʉ, a á si ŋghʉ̄ɛ. Ńtó nnɔ yí ŋ́gɛ, pɔ́ egʉɔ nzɛ́tte á Yɛɛ́so ŋ́gɛ, yí mé Nzaʼ‑Ŋkhʉ yīi, a á si eshʉ̄ʼɛ lā, kɛɛ mɛ́ zɛɛ́t nzwíʼtɛ eyi ndɛʼɛ lɛ́? Yɛɛ́so á kó mbwɛ̄t á mbū pɔ́p ŋ́gɛ: «Pɛ epīŋ nzem, ḿbɛ́te eshúŋ á Jáaŋ, á ajū mīi, pɛ é si ndɔ̄kɔ metuúŋ mɛ́ njúʼɔ, mbɔɔ azi, pɛ é si ndɔ̄kɔ menēk mɛ́ njʉ́ɔɔ: Wɔ efʉʉ́‑menēk é si njʉ́ɔ ejʉʼ. Meŋkeluʼ é nɔŋ ndūu á esī nzīŋɛ. Megaŋ kaʼpáp é nɔŋ ntʉ̄ɛ̄, ḿbīŋɛ á nnɔ. Wɔ etsɛɛ́t‑metuúŋ é nɔŋ njúʼɔ ejʉʼ. Mepfhō epuɔ é nɔŋ nzímɛ. Mɛ́ nɔŋ ntswīi ŋke mbɔŋ, á mbū wɔ te kuʼ ánɛ azō. Eshhʉ̄ mbɔŋ a á si ŋgɔ́ á ŋiŋ yīi, a á véŋ á gá té miʼte. »
Epuɔ pīi, Jáaŋ a á ntó á wɔ́p, é gʉɔ. Yɛɛ́so á zi á leshūŋ menu ánɛ Jáaŋ á mbū alāʼ, ndé ŋ́gɛ: «Pɛ ekímte páʼ pɛ lɛɛ́ te ŋgʉ̄ɔ á késáatswɛt, á njʉ́ɔ ŋiŋ yīi, a á páʼ taʼ akekaʼa yīi, fefwɛt a á si ncʉ̄ʼnɛ ɛ́. Ŋgáŋ, pɛ lɛɛ́ ŋgʉɔ á njʉ́ɔ á kwaʼ Jáaŋ yí méŋwɛ̄t. Pɛ le jʉ́ɔ á gɔ́ páʼ lā? Pɛ le jʉ́ɔ á maʼ menzhó ŋkāp lɛ́? Epuɔ pīi, é maāʼ menzhó ŋkāp, é naŋteé áa ánɛ meŋgyā mefɔ. Pɛ lɛɛ́ ŋgʉɔ éwú, á njʉ́ɔ Jáaŋ, á taʼ ntswi‑ŋke Ndém. Á épúp, meŋ chʉ́ɛ nnɛ̄t eshúŋɔ á wɛ́, a zeéŋ efáŋ ntɔ́k mbɔɔ ntswi‑ŋke Ndém mɛ́t. Yí mé ŋiŋ yīi, Ndém a le lé ánɛ lezēŋ tsí, á ntē aŋwaʼne yí ŋ́gɛ: “Meŋ a shʉʼ etó á ntswi‑ŋke ga, a epīk á mvhɔ wu, ńcūŋte á mɛnzhɛ, tɛ́ o ezīŋ éwú eshʉ̄ʼ.” Meŋ chʉ́ɛ nnɛ̄t eshúŋɔ á wɛ́ á kwaʼ anuúnē ŋ́gɛ, á shʉʉ̄ʼ ánɛ epuɔ metsem, á ndo esī atsetsáʼ, tɛ ntshí á ayáʼa, mmɔʼ ŋiŋ yīi, anu zí á faáŋ ntɔ́k azi Jáaŋ, a te éwú ú. Táʼ, méŋ agáʼ ŋiŋ yīi, a á ndáʼ nzī á lejūʼ á mbɔŋɔ́ ánɛ Lefɔ Ndém tsīi, é zii tsetsɔŋɔ lā, a tɔɔ́k á Jáaŋ. Tɛ efhó ánɛ afʉʼ Jáaŋ nnoʼ‑epuɔ á ntshi, ŋ́gʉɔ ntshí ánɛ ayáʼa, megaŋ mbo é nɔŋ ndʉɔ́ʼɔ Lefɔ Ndém lʉɔ́ʼe. Epuɔ pīi é fók mbʉʼ mé piŋ ŋkó éwú. Á épúp tɛ́, Mɔɔ́sɛ mbɔɔ metswi‑ŋke Ndém metsem, é le shúŋ anu ánɛ Lefɔ Ndém, tɛ ŋkó ánɛ afʉʼ Jáaŋ. Pɛ nɔŋɔ ŋkɔ̄ŋɔ á lezhɛ̄ á mbɔŋɔ́, á ŋiŋ yīi Jáaŋ a á ewiɛ́, mbɔ meŋ shúŋɔ á wɛ́ ŋ́gɛ, yí mé Eli yīi, a le nɔ̄ŋ ŋgɔ̄ ezéŋ eshʉʼe. Ŋiŋ a wiɛ metuúŋ á lelɔk njúʼ ejʉʼ, á júʼ. »
Yɛɛ́so á zéŋ ndé ŋ́gɛ: «Meŋ gɔ elɔ̄ɔk akɔ̄, ḿbɛ́ efʉʼ ánɛ epuɔ ŋguʼ puɔ ɔ̄? Pɔ́ swhií ewɔŋkhʉ̄ pīi, pɔ́ naŋteé á azá, emɔ̄ʼ é nɔŋ ntɔ́ŋɔ emɔ̄ʼ mé ŋghi teté, ńdʉ́ɛ́ ŋ́gɛ:
“Pek é tɔ́ŋ ndendɔ̄ŋ, ŋ́gɛ pɛ ezéŋ, pɛ te zéŋ.
Ḿbwɛ̄t lewhʉ̄, pɛ te lāa.”
Á zéŋ ŋgɔ́ páʼ, pɛ le ghʉ̄ épúp ánɛ Jáaŋ. A le shʉ̄ʼē, ńnɔŋ te mpfɛ́tɛ azō ɔ́, a te nnúu meluʼ ɔ́, mɛ́ zɔte á yí ŋ́gɛ: “Esī e lē ŋgɔ á yí.” Méŋ‑Ŋiŋnɔŋ wuɔ, a á piŋ eshʉ̄ʼ azí, ńnɔŋ mpfɛ́tɛ azō, ńnɔŋ nnúu meluʼ, mɛ́ zɔte á yí ŋ́gɛ: “Jʉ́ɔ á ŋiŋ wɔ̄, a á si ŋkʉ́ʼnɛ nzáa apʉp, ńzéŋɛ mbía meluʼ. Ŋ́gɔ́ á esoó wɔ tswí‑ncup, mbɔɔ eyi emɔ̄ʼ epuɔ tepɔŋ.” Táʼ, mɛ́ jʉɔ́ epuɔ pīi, é lɔɔ̄k azhɛ̄‑anu nnáŋ, ńzhɛ́ á légɛ Ndém a á ŋgaŋ anuúnē. »


Yɛɛ́so á fhó éwú, ńzī á lethū epuɔ tésɔŋ pīi, a le ghʉ̄ á lelʉɛ meŋkʉʼne anu éwú. Ńthúɔ á wɔ́p melaʼ mīi, a le ghʉ̄ meŋkʉʼne anu mɛ́t, pɔ́ piŋ te gɔ̄ nnɛ̄t zɔp, ḿbīŋ nzem á mbū Ndém ɛ́. Ńthú á wɔ́p ndé ŋ́gɛ: «Wóó epuɔ Kolazin lōo, wóó epuɔ Betsayída lōo, pɛ é wɔ eshhʉ̄ tepɔŋ. Meŋkʉʼne anu mīi, meŋ gɛ nzóko ŋghʉ̄ɛ á alāʼ pɛ, meŋ nde wíʼe, ńdɔkɔ ŋghʉ̄ɛ á ntē tésɔŋ Tíi pɔ́ Sidɔŋ, mbɔ ŋgia é éwú yīi, pɔ́ lē ndáʼ ŋgɔ̄ nnɛ̄t zɔp, ńzwík mezwiŋ epa, ḿbōk á avhō, ńdɔk ntswī á légɛ, pɔ́ é wáʼ atswhī tepɔŋ zɔ́p, ḿbīŋ nzem á mbū Ndém. Kwaʼ anuúnē, meŋ shúŋɔ á wɛ́ ŋ́gɛ, a láʼ aleʼé zīi, Ndém a záʼa ntsaŋ epuɔ menɔŋ, anu zɛ́ a epék ntɔ́k azi epuɔ Tíi pɔ́ Sidɔŋ.
Ḿbiŋ ŋgɔ́ mé pɛ epuɔ Kafaanawum,
pɛ é kwaŋ ŋ́gɛ, Ndém a a shʉʼ ekɔ́ʼne á wɛ́,
tɛ pɛ epfēŋ lephū lɛ́?
Ŋgáŋ, a a shʉʼ esóʼne á wɛ́ sóʼne, tɛ pɛ ekó á apwɛt.
Éghʉɛ épúp melaʼ mīi, meŋkʉʼne anu mīi, mɛ́ le ghʉ̄ á alāʼ pɛ, mɛ́ le wíʼe ndɔ̄kɔ ŋghʉ̄ɛ á tésɔŋ Sodɔm, mbɔ tésɔŋ mɛ́t, a zɛɛ́t tɛ ntshí á ayáʼa. Meŋ ndɔkɔ eshúŋɔ á wɛ́ ŋ́gɛ, a láʼ aleʼé zīi, Ndém a záʼa ntsaŋ epuɔ menɔŋ, anu zɛ́ a epék ntɔ́k azi epuɔ tésɔŋ Sodɔm. »


Yɛɛ́so á ghʉ ndé ŋ́gɛ: «Mɔʼɔ́ ga, Atsyapuɔ, wu yīi, o pɔɔ́ŋ lephū pɔ́ esī atsetsáʼ, meŋ á syákne á wú, páʼ o ke lʉ̄ɔ menu mú, á mbū megaŋ azhɛ̄‑anu mbɔɔ á mbū meghi, ḿbiŋ ntswī á mbū epuɔ pīi, é páʼ ewɔŋkhʉ̄ lā, éwɔ te zhɛ́‑anu. Ŋŋ me Mɔ́ʼɔ, á gɔ́ épúp páʼā, ŋ́gɔ́ áa páʼ wu mé kɔŋ.
«Mɔʼɔ́ ga a lē mbú ŋgyá mete ntsem á mbū meŋ. Ŋiŋ a gɔ le zhɛ́ páʼ meŋ Méŋ yi, meŋ á épúp ɔ́, ńdaʼ yí. Ŋiŋ á pīŋ le zhɛ́ páʼ, Mɔʼɔ́ ga a á épúp ɔ́, ńdaʼ gá Méŋ yi, mbɔɔ epuɔ pīi, Mɔ́ a á tswi á wɔ́p á ŋiŋ yīi, Mɔʼɔ́ yi a á ewiɛ́.
«Ŋiŋ ntsem yīi, a á kʉɛ apiʼ, tɛ á nɔŋ nzɛ́tɛ á yí, á nɔŋ ŋkáa, a eshʉʼ njʉ́ɔ á gá, meŋ eghʉ̄ a ezwīte. Pɛ epɛ́ akʉɔʼté zá, ńzwík á ntɔ̄ŋ pɛ, ńcʉ́ʼ meŋ ezíʼne á wɛ́ menu Lefɔ Ndém, melaʼ mīi, meŋ á ŋiŋ, ńdáŋte, ntē gá é pwɛ́ne. Pɛ eghʉ̄ épúp, ńnáŋa ŋgwīɛ̄ apwɛne á ntē pɛ. Á épúp, akʉɔʼté zá á zaŋneē á lepiʼ, apiʼ zá á piŋ mbú te zɛ̄ɛt. »

Слушайте Matío 11