Basketo - 2014 BSE (NT) Drama

Basketo - 2014 BSE (NT) Non Drama

“ኣሲ ታ̈ና ቤቆ̇ ጋ̈ሪ ዪንታ̇ ኮሻ ኦ̈ሲን ኣሳ ቲ̈ን ኦ̈ዚን ጋልዳፖ̇ ና̈ጊንቲ̇ብቴ̇፤ ዪ̈ፌን ዪንቲ̇ ኦ̈ጌንዶ ዪንታ̇ ባ̈ባ ቲ̈ናፖ̇ ኣባካር ዋ̈ጋ ዪንቲ̇ ዲጚባ̈ሴ።
“ዪ̈ኮታ̇ቦ ኣሲ ፌ̈ና ቦንቾ̇ ጋ̈ሪ፥ ኣይሁድ ዎ̈ሳ ኬ̈ን ጋርታ̇ኬ ጎይምጋልዳ̇ ፌ̈ና ቤይሳንዳ̇ብ ኮዪዝ ኣሳንፌ̈ኒ፥ ኔ̈ናር ዎርባያንቦ ኣባክ ኢማ̇ርዶራ፥ ኣሲ ታ̈ና ቤቆ̇ ጋ̈ራ ኦ̈ፔ̇፤ ቴ ዪንታ̇ክ ኪን ጋ̈ሬ ኢንቲ̇ ፌ ጋቲን ኤኪ̇ኔ። ኔ̈ኒ ዎርባያንቦ ኢማ̇̈ርዶራ፥ ኔ ኦ̈ሲንዳ̇ ጌ̈ማ ማ̈ቃ̇ምፔ̈ኒ፥ ኔ ኡሻች ኩሺንባር ኢማ̇ዚንዶ̇ ኔ ዓዲርስ ኩሺን ኤራፖ̇። ዪዚ ጌ̈ማ ጋርታ̇ ኦ̈ንቲ̇ኖ ኦ̈ሲን ቤቂ̇ዝ ጾ̈ሳ̇̇̈ዲ ኔ ዋ̈ጊን ኔ̈ብ ጪጊ̇̈ሬ።


“ዪንቲ̇ ዎ̈ስ ዎ̈ሲ̇̈ርዶሪ ኣሳ ቲ̈ን ጺላ̇ ማይጺ ቤንታ̇ንዳብ ኮዪዝ ኣሳንፌ̈ን ማ̈ቃፒ̇ቴ። ኢንቲ̇ ኣሲ ፌ̈ና ቤቆ̇ ጋ̈ሪ ዎ̈ሳ ኬ̈ ጋርታ̇ኬ ጎይ ቡጊድ ጋል ዎይ ኤቃ̇ሪ ዎ̈ሲ̇ዛ ዶሲ̈ሬ። ቴ ዪንታ̇ክ ኪን ጋ̈ሬ ኢንቲ̇ ፌ ኦ̈ሲን ዋ̈ጊን ኩም ኤኪ̇ኔ። ኔ̈ኒ ዎ̈ሳ̈ርዶራ፥ ኬ̈ ጌላቤ፥ ካሪን ኔ ጋል ዪብጻ̇ራ ጌ̈ማ ቤስ̇ ዎ ኔ ባ̈ባ̈ክ ዎ̈ሳ̇ቤ፥ ጌ̈ማ ቤስ̇ ጋርታ̇ ኦ̈ሲንቲ̇ኖ ኦ̈ሲን ቤቂ̇ዝ ኔ ባ̈ባ̈ዲ ኔ ዋ̈ጊን ኔ̈ብ ጪጊ̇̈ሬ።
“ዪንቲ̇ ጾ̈ሳ̇̇ ዎ̈ሳ̇ምባራ፥ ጾ̈ሳ̇̇ ኤሪባ̈ሶ ኣሳን ዎታዚንዲፌ̈ኒ ፔታ̇ን ጌይኖ ቃ̈ሊን ሜላ̇ ማሂ ማሂ ኢዞ ጋ̈ፒ̇ቴ። ኢንቲ̇ ማሂ ማሂ ጌይኖምቦ̇ ጾ̈ሲ̇ ኢንታ̇ኮን ሲስኪ̇ዛ ኢንታ̇ብ ማይጺ̈ሬ። ዪንቲ̇ ኢንታ̇ፌ̈ን ማ̈ቃፒ̇ቴ̇። ዪንታ̇ ባ̈ባ̈ዲ ዪንታ̇ብ ኮሻ̇ዚንዶ ዪንቲ̇ ዎ̈ሳ̇ናፖ̇ ቲ̈ኒታር ኤሪ̈ሬ።
“ዪዚ ዪንቲ̇ ዪዝ ጋ̈ር ዎ̈ሲ̇ብቴ̇፦
‘ኣፋ ዎ ኑ ባ̈ባ̈ዶ፥
ኔ ሱምን ቦንቺ̇ንቶ̇፥ ኔ ሳ̈ዝ ጋልዳ̇ ካ̈ቲ ማ̈ቃ̇ር ኣስ ኣቂሲዝ ላይን ዬዮ፥
ኣፋ ዎን ኔ ጌይኖን ኦ̈ዚንዲፌ̈ኒ፥ ሳ̈ዝ ጋልዳ ዎ ኣሳንሬ ኔ ጋ̈ዚን ኦ̈። ኑ̈ብ ኮሻ̇ዝ ፊ̈ሺን ዓታ̇̈ብ ኑ̈ብ ኢማ̇ቤ።
ኑ̈ኒ ኑ̈ብ ኢ̈ት ኦ̈ኖ ኣሳንቦ ኣቶ̇ ጋ̈ዚንዲፌ̈ኒ፥
ኑ ናጋሪን ኑ̈ብ ኣቶ̇ ጋ̈ቤ።
ኢ̈ት ባዝ ጋልዳፖ̇ ኑ̈ና ና̈ጋብዶኬ፥
ፋታና ጋርታ̇ ኑ̈ና ጌልሳ̇ፔ̇።
[ካ̈ቲቲ፥ ዎልቃኬ ቦንችኬ ሜናብ ኔዬ̇፤
ኣሚንኤ።’] “ዪንቲ̇ ዪንታ̇ብ ኢ̈ት ኦ̈ኖ ኣሳንቦ ኣቶ̇ ጌዬጌይን ኣፋ ዎ ዪንታ̇ ባ̈ባ̈ዳር ዪንታ̇ ናጋሪን ዪንታ̇ብ ኣቶ̇ ጌይሬ። ዪንቲ̇ ኢንታ̇ብ ኣቶ̇ ጋ̈ካ̇ይ ኣቴ̇ጌይንዶ̇ ዪንታ̇ ባ̈ባ̈ዳር ዪንታ̇ ናጋሪን ዪንታ̇ብ ኣቶ̇ ጋ̈ባሴ።

“ዪንቲ̇ ጾ̈ማ ጾ̈ሚ̈ርዶሪ፥ ኣሳ ቲ̈ን ጺላ̇ ማይጻንዳብ ኮዪዝ ኣሳን ኢንቲ̇ ጾ̈ማ ጾ̈ማዚን ኣሲ ኢንታኮን ኤራምፔ̈ን ጋ̈ሪ ፌ̈ና ሹሊ̇ቻ̇ዚንዲፌ̈ኒ፥ ዪንቲ̇ ዪና̇ ኢዝፌ̈ኒ ዎታፒ̇ቴ። ቴ ዪንታ̇ክ ኪን ጋ̈ሬ ኢንቲ̇ ፌ ዋ̈ጊን ኩም ኤኪ̇ኔ።
ኔ ጾ̈ማ ጾ̈ማ̈ርዶራ፥ ኔ ኣ̈ፊን ሜ̈ጫ̇ቤ፥ ኔ ቆሚ̇ንዳ̇ር ቆታ̇ቤ። ዪኒ̇ባር ኔ ጾ̈ማዚንዶ̇ ጌ̈ማ ዎ ኔ ባ̈ባ̈ፖ̇ ኣቲ̇ን ሜላ ኣሲ ኦ̈ናካር ኤሪባ̈ሴ። ጌ̈ማ ኦ̈ንቲ̇ኖ ኦ̈ሲን ቤቂ̇ዝ ኔ ባ̈ባ̈ዲ ኔ ዋ̈ጊን ኔ̈ብ ጪጊ̇̈ሬ።
“ቢላ ሙዪ፥ ባልታ̇ራር ኢ̈ቲ፥ ማ ሶላር ቦ̈ኪ̇ ኤካ̇ንዳብ ዳንዳኣዝ ዓና̇ ሳ̈ዚን ጋልዳ̇ ዪንታ̇ብ ቆሊን ሺ̈ሻ̇ፒ̇ቴ። ቢላ ሞ̈ባሶ፥ ባልታ̇ራር ኢ̈ቲባ̈ሶ፥ ማ ሶላር ቦ̈ኪ̇ ኤካ̇ንዳብ ዳንዳኢባ̈ሶ ቤሲ̇ ኣፋ ዪንታ̇ብ ቆሊን ሺ̈ሺ̇ብቴ̇። ኔ ቆሊንን ዎ ቤሲ̇ን ኔ ቡ̈ዲንዳ̇ር ኢና ዶኣ̈ሬ።
“ኣ̈ፊ ኑ ጋሊ̇ን ዎይምቦ̇ ፎኢን። ኔ ኣ̈ፊን ማባስኮ፥ ኔ ጋሊ̇ን ዎይ ፎኢን ማ̈ቃ̇̈ሬ። ኔ ኣ̈ፊን ማ̈ርኮ ኔ ጋሊ̇ን ዎይ ም ማ̈ቃ̇̈ሬ። ዪዚ ኔ ጋርታ̇ ዎ ፎኢንን ̈ም ማ̈ቄ̇ጌይንዶ̇፥ ሚ̇ንዳ ዎዛርፌ̈ን ማ̇ና! “ፔቲ̇ ኣሲ ናምኢ ላ̈ብ ኣይላ ማ̈ቃ̇ንዳብ ዳንዳኢባ̈ሴ፥ ፔታ̇ና ኢጻ̇ሪ ሜላ ዶሲ̈ሬ፤ ዎይ ፔታ̇ና ቦንቻ̇ሪ ሜላ ሌቂ̇̈ሬ። ዪንቲ̇ ሚ̈ሻ̇ብኬ ጾ̈ሳ̇̇̈ብኬ ዎልኣ ኣይላ ማ̈ቃ̇ንዳብ ዳንዳኢባ̈ሴ።

“ዪ̈ኮታ̇ቦ ቴ ዪንታ̇ክ ጋ̈ዚንዳ ‘ኑ ኣብዝ ሙይራ? ኣብዝ ኡሽኪ̈ራ? ኣብዝ ማኢ̈ራ?’ ጋ̈ሪ ዪንታ̇ ዶኢን ኮታ̇ ቲ̈ራፒ̇ቴ። ዪንታ̇ ሼምፒ̇ንዳ ፊ̈ሻፖ̇፥ ዪንታ̇ ጋሊ̇ንዳ̇ ኣፊላፖ̇ ሺባሳ? ዪንቲ̇ ካፋን ቤቂ̇ብቴ፤ ኢንቲ̇ ዜር ዜርቂባ̈ሲ፥ ቴይሲ̇ባ̈ሲ፥ ዲእ ጋርታ̇ ሚሺባ̈ሲ፥ ማ̈ቂ̇ናካር ዪንታ̇ ባ̈ባ̈ ኣፎ ኢንታ̇ ሙሲ̈ሬ። ዓት ዪ̈ዲኮ ካፋንፖ̇ ዪንቲ̇ ሺባ̈ሳ? ዪንታ̇ ጋርታ̇ፖ̇ ቲ̈ሪስባራ ፌ ላይን ጋል̇ዳ ፔቲ̇ ቃማ̇ ጉጃ̇ንዳብ ዳንዳኢዝ ኣሲ ዎ?
“ማ ኣፊላባር ማ̈ቂ̇ን ዪንቲ̇ ኣባብ ቲ̈ሪ̈ራ? ቡጫ ጋልዶ ቡናን ቤቂ̇ብቴ̇፥ ኢንቲ̇ ኦ̈ ዋ̈ዪባ̈ሴ ፉ̈ታ̇ር ሱኪ̇ባ̈ሴ። ማ̈ቂ̇ናካሬ ሜላ ኣቲ̇ን ጴች ቦንቺ̇ንቲኖ ሶሎሞ̈ኒ ዪን ቡናን ጋርታ̇ፖ̇ ፔታ̇ኒንዲፌ̈ን ኣፊላ ማኣካ̇ዬ። ጾ̈ሳ̇̇̈ባር ኣማኒንቲባሶ ኣሳን! ጾ̈ሲ̇ ዓታ̇ብ ቤንታ̇ር ጊያብ ታማባራ ሚጪ̇ ዪዝ ማ̈ታ ዪዲፌ̈ን ማኢሲ̈ርዶሪ፥ ዪንታ̇ ዎዛርፌ̈ን ኢንታ̇ፖ̇ ሺ ማኢሲባ̈ሳ? ዪ̈ኮታ̇ቦ ‘ኑ ኣብዝ ሙይራ?’ ‘ኣብዝ ኡሽኪ̈ራ?’ ማ ‘ኣብዝ ማኢ̈ራ?’ ጋ̈ሪ ቲ̈ራፒ̇ቴ። ዪን ባዛን ዲጛንዳ̇ቦ ጾ̈ሳ̇̇ ኤሪባ̈ሶ ኣሳንር ዎይ ዎጺቲሬ̈፤ ዪን ዎይ ዪንታ̇ብ ኮሻ̇ዚን ኣፋ ዎ ዪንታ̇ ባ̈ባ ኤሪ̈ሬ። ዪንቲ̇ ቲ̈ኒታሪ ጾ̈ሳ̇̇ ካ̈ቲቲንዲኬ ኢ ጺሊቲ ጎይን ኮዪብቴ̇፥ ኢ ዪን ባዛን ዎይ ዪንታ̇ብ ጉጂ̇ሬ። ዪ̈ኮታ̇ቦ ዪንቲ̇ ጊያ̈ባብ ቲ̈ራፒ̇ቴ፤ ጊያባቦ ማቃ̈ዝ ባዚምቦ ጊያብ ቲሪብቴ፥ ዎይ ቃ̈ማንቦ ኢንታ̇ብ ጊዲዝ ሜቲ ዎ።

Слушайте ማ̈ቶ̈ሳ 6