Ticuna - 1986 WBT (NT) Drama

Rü marü ningaica ga Yudíugüarü peta ga Üpetüchiga ga nagu nangõ̱xgüãxü̃ ga paũ ga ngearü pu̱xẽẽruü̃ã́xü̃.
Rü ga chacherdótegüarü ãẽ̱xgacügü rü ngúexẽẽruü̃gü ga Moichéarü mugüwa ngu̱xẽẽtaegüxü̃ rü naxca̱x nadaugü nax ñuxãcü duü̃xü̃güechita Ngechuchuxü̃ yama̱xgüxü̃, yerü duü̃xü̃güxü̃ namuü̃e.
Rü yexguma ga Chataná rü Yúda ga Ichariótegu nangaxi. Rü nüma ga Yúda rü yema 12 ga Ngechuchuarü ngúexü̃tanüxü̃chire̱x nixĩ.
Rü nüma ga Yúda rü naxü̃tawa naxũ ga chacherdótegüarü ãẽ̱xgacügü rü Tupanapata ga taxü̃nearü purichíagüarü ãẽ̱xgacügü. Rü namaxã nüxü̃ nixu nax ñuxãcü tá Ngechuchuxü̃ inamuxü̃.
Rü nümagü ga yema ãẽ̱xgacügü rü nataãẽgü. Rü diẽru Yúdana ngĩxü̃ naxuaxü̃gü.
Rü nüma ga Yúda rü ngĩxü̃ nayaxu ga yema diẽru. Rü inanaxügü nax naxca̱x nadauxü̃ ga yema ora ga duü̃xü̃gü nagu taxuxü̃gu Ngechuchuxü̃ inamuxü̃ nüxna ga ãẽ̱xgacügü.


Rü nawa nangu ga yema petaarü ngunexü̃ ga nagu nangõ̱xgüãxü̃ ga paũ ga ngearü pu̱xẽẽruü̃ã́xü̃. Rü yema nixĩ ga ngunexü̃ ga nagu carnéruxacü yama̱xgüxü̃ naxca̱x ga Üpetüchigaarü peta.
Rü Ngechuchu nanamu ga Pedru rü Cuáü̃, rü ñanagürü nüxü̃: —¡Peyamexẽẽ̱x i tórü õna i Üpetüchigaca̱x! —﻿ñanagürü.
Rü nümagü rü Ngechuchuna nacagüe rü ñanagürügü: —¿Ngextá i cunaxwa̱xexü̃ nax tanamexẽẽxü̃? —﻿ñanagürügü.
Rü Ngechuchu nanangãxü̃, rü ñanagürü: —Ngẽxguma Yerucharéü̃wa pengugügu rü ngẽxma tá nüxü̃ peyangau i wüxi ya yatü i wüxi i tü̃xü̃ i dexámaxã ããcucü ngĩxü̃ ingexü̃. ¡Rü nawe perüxĩ ñu̱xmata yimá ĩpata ga nagu naxücunewa pengugü!
¡Rü yimá ĩpata ya nagu yaxücune ya yimá yatü, rü yimá ĩarü yoramaxã nüxü̃ pixu rü ñapegügü nüxü̃: “Torü ngúexẽẽruxü̃ rü nüxü̃ nacuáxchaü̃ nax ngexü̃rüüxü̃ yixĩxü̃ i ngẽma ucapu i norü ngúexü̃gümaxã tá nawa nachibüxü̃ i Üpetüchigaarü õnaca̱x”, ñapegügü nüxü̃!
Rü tá pexü̃ nüxü̃ nadauxẽxẽ i wüxi i ucapu i taxü̃ i marü mexẽẽxü̃ i norü daxũchiü̃wa ngẽxmaxü̃. ¡Rü ngẽmawa tá penamexẽxẽ i ngẽma õna i Üpetüchigaca̱x ixĩxü̃! —﻿ñanagürü nüxü̃.
Rü yéma naxĩ ga nümagü rü nüxü̃ inayangaugü ga guxü̃ma yema Ngechuchu namaxã nüxü̃ ixuxü̃rüxü̃. Rü yéma nanamexẽẽgü ga õna ga Üpetüchigaca̱x ixĩxü̃.
Rü yexguma nawa nanguxgu ga ora nax nachibüexü̃, rü mechawa narüto ga Ngechuchu namaxã ga norü ngúexü̃gü.
Rü yexguma ga Ngechuchu rü ñanagürü: —Ñuxãcü poraãcü choxü̃́ nangúchaü̃ nax pemaxã chachibüxü̃ i ñaa Üpetüchigaarü õnawa naxü̃pa nax chayuxü̃.
Natürü pemaxã nüxü̃ chixu rü taxũtáma wenaxarü Üpetüchigaarü õnawa chachibü, ñu̱xmatáta chowa yangu i Tupana ãẽ̱xgacü ixĩxü̃wa —﻿ñanagürü.
Rü yexguma nanayaxu ga wüxi ga copu ga bínumaxã ããcuxü̃. Rü Tupanana moxẽ naxã, rü ñu̱xũchi ñanagürü nüxü̃ ga norü ngúexü̃gü: —¡Peyaxaxü ya daa bínu, rü pegümaxã pengau!
Erü pemaxã nüxü̃ chixu rü tagutáma wena chayaxaxü ya bínu ñu̱xmatáta nua naxũ ya Tupana nax ñoma i naanemaxã inacuáxü̃ca̱x —﻿ñanagürü.
Rü nanayaxu ta ga paũ, rü Tupanana moxẽ naxca̱x naxã. Rü ñu̱xũchi inanabücu, rü norü ngúexü̃güna nanaxã. Rü ñanagürü nüxü̃: —Ñaa paũ rü chaxune i pexca̱x yuxü̃chiga nixĩ. ¡Rü ñaawena rü ñaãcü tá penaxü nax choxna pecua̱xãchiexü̃ca̱x! —﻿ñanagürü.
Rü marü chibüwena rü nanayaxu ga copu ga bínumaxã ããcuxü̃, rü ñanagürü: —Daa bínu rü Tupanaarü uneta i ngexwacaxü̃xü̃arü cua̱xruxü̃ nixĩ. Rü chaugü ya pexca̱x ibacüwa Tupana pexü̃ nüxü̃ nadauxẽxẽ nax aixcüma yixĩxü̃ i ngẽma norü uneta.
Natürü ngẽma yatü i chauechita ãẽ̱xgacügüna choxü̃ muxchaü̃xü̃, rü nua mechawa tamaxã narüto i ñu̱xmax.
Rü Tupana Nane ya duü̃xü̃xü̃ ixĩcü, rü Tupana ixunetaxü̃rüxü̃ tá nayu. Natürü wüxi i ngechaü̃xü̃chi tá nixĩ naxca̱x i ngẽma yatü i ãẽ̱xgacügüna namuxü̃ —﻿ñanagürü.
Rü yexguma ga norü ngúexü̃gü rü inanaxügüe ga nügüna nax nacagüexü̃, rü ñanagürügü: —¿Texé tá tixĩ ya yíxema naechita ãẽ̱xgacügüna namuxe? —﻿ñanagürügü.

Rü yexguma ga yema ngúexü̃gü rü nügümaxã niporagatanücüü nachiga nax texé tá tixĩxü̃ ya natanüwa guxãarü yexera ixĩxẽ.
Natürü ga Ngechuchu rü ñanagürü nüxü̃: —Ñoma i naanewa rü ngẽma nachixü̃anegüarü ãẽ̱xgacügü rü poragaãcü norü duü̃xü̃güxü̃ namu. Rü ngẽma ãẽ̱xgacügü ga duü̃xü̃gümaxã inacua̱xgüxü̃ rü nügü yaxugügu rü duü̃xü̃güarü ngü̃xẽẽruxü̃ nixĩgü.
¡Natürü pemax rü taxũtáma ngẽxgumarüxü̃ pixĩgü! Rü ngẽxguma texé naxwa̱xegu nax guxãarü yexera tixĩxü̃ i petanüwa, rü name nixĩ nax guxü̃ma i tümamücügüga taxĩnü. Rü texé naxwa̱xegu nax tümamücügüeru tixĩxü̃, rü name i guxãarü ngü̃xẽẽruxü̃ tixĩ.
¿Rü ñoma i naanewa rü texé tixĩ ya yexera ixĩxẽ? ¿Rü ngẽma mechawa rütoxü̃ nax nachibüxü̃ca̱x rüe̱xna ngẽma ixüwemüxü̃? ¿Rü tama ẽ̱xna ngẽma mechawa rütoxü̃ nixĩ? Natürü tatanüwa rü tama ngẽmaãcü nixĩ, erü choma i perü cori nax chixĩxü̃ rü perü ngü̃xẽẽruxü̃ chixĩ.
Rü pema nixĩ ga guxü̃guma pechauxü̃tagugüxü̃ ga yexguma guxchaxü̃wa chayexmagu rü ngúxü̃ chingexgu.
Rü ngẽmaca̱x i choma rü ãẽ̱xgacügüxü̃ pexü̃ chixĩgüxẽxẽ yema Chaunatü ãẽ̱xgacüxü̃ choxü̃ ingucuchixẽẽxü̃rüxü̃.
Rü ngẽmaãcü ãẽ̱xgacü íchixĩxü̃wa rü chomaxã tá pechibüe rü tá pexaxegü. Rü ãẽ̱xgacügüca̱x ixĩxü̃ i toruü̃wa tá perütogü nax nüxna pecagüxü̃ca̱x i ngẽma 12 i Iraétücumügü —﻿ñanagürü.


Rü Pedruxü̃ ñanagürü ta ga Cori ga Ngechuchu: —Pa Chimóü̃x, Pa Chimóü̃x, Chataná rü Tupanana naca nax ñoma triguxü̃ idüagüxü̃rüxü̃ pemaxã yixĩxü̃ca̱x.
Natürü choma rü Chaunatüxü̃ cuxca̱x chaca̱a̱xü̃ nax tama nüxü̃ curüxoxü̃ca̱x nax cuyaxõxü̃. Rü ngẽmaca̱x i cumax, Pa Pedru, rü ngẽxguma cha̱u̱xca̱x cutaegu̱xgu, rü chanaxwa̱xe i nüxü̃ curüngü̃xẽxẽ i cumücügü nax tama nüxü̃ naxoexü̃ca̱x nax yaxõgüãxü̃ —﻿ñanagürü.
Rü ñanagürü ga Pedru: —Pa Corix, choma rü marü íchamemare nax wüxigu cumaxã nax chapoxcuxü̃ rü ẽ̱xna wüxigu cumaxã nax chayuxü̃ —﻿ñanagürü.
Natürü Ngechuchu rü ñanagürü nüxü̃: —Pa Pedrux, cumaxã nüxü̃ chixu rü ñomatama i chütaxü̃gu naxü̃pa nax ota ica̱xaxü̃, rü cuma rü tomaepü̱xcüna tá nüxü̃ quixu nax tama choxü̃ cucuáxü̃ —﻿ñanagürü.

Rü yexguma ga Ngechuchu rü norü ngúexü̃güna naca, rü ñanagürü: —Yexguma pexü̃ chimugügu ngearü chocaã̱xgüxemaxã rü ngearü diẽruã̱xgüxemaxã rü ngearü chapatuã̱xgüxemaxã, ¿rü ta̱xacü pexü̃́ taxuxü̃ ga yexguma? —﻿ñanagürü. Rü nümagü nanangãxü̃gü rü ñanagürügü: —Taxuxü̃ma —﻿ñanagürügü.
Rü yexguma ga Ngechuchu rü ñanagürü nüxü̃: —Natürü ñu̱xma rü texé ya petanüwa ya chocaã́xẽ rü tanaxwa̱xe nax ítayangexü̃, rü tümaarü diẽruchixü̃ rü ta. Rü ngẽxguma texé ngearü taraã̱xgu rü tanaxwa̱xe i namaxã tataxe i tümaarü gáuxü̃chiru nax tümaarü taraca̱x tataxexü̃ca̱x.
Erü pemaxã nüxü̃ chixu rü chowa tá ningu i ngẽma Tupanaarü ore i ümatüxü̃ i ñaxü̃:
“Wüxi i máetaxü̃rüxü̃ tá namaxã inacua̱xgü”,
ñaxü̃. Erü guxü̃ma i ngẽma chauchiga ümatüxü̃ i Tupanaarü ore i ümatüxü̃wa rü aixcüma tá ningu —﻿ñanagürü.
Rü yexguma ga norü ngúexü̃gü rü ñanagürügü: —Pa Corix, nua nangẽxma i taxre i tara —﻿ñanagürügü. Rü nüma ga Ngechuchu rü nanangãxü̃ rü ñanagürü: —Marü ningu i ngẽma —﻿ñanagürü.


Rü yexguma ga Ngechuchu rü ínaxũxũ ga guma ĩanewa. Rü Oribunecüarü Ma̱xpǘnewa naxũ, yerü woetama nacüma nixĩ ga yéma nax naxũũxü̃. Rü norü ngúexü̃gü rü nawe narüxĩ.
Rü yexguma yema nachicawa nanguxgu, rü norü ngúexü̃güxü̃ ñanagürü: —¡Tupanana naxca̱x peca nax pexü̃ nangü̃xẽxẽxü̃ca̱x nax tama chixexü̃gu peyi̱xixü̃ca̱x i ngẽxguma Chataná pexü̃ üxgu! —﻿ñanagürü.
Rü yexguma ga Ngechuchu rü yéamaxü̃ra norü ngúexü̃güna naxũ. Rü yexma nacaxã́pü̱xü rü nayumüxẽ.
Rü ñanagürü: —Pa Chaunatüx, ngẽxguma cuma cunaxwa̱xegu, ¡rü nawa choxü̃ ínanguxuchixẽxẽ i ñaa ngúxü̃ i tá chingexü̃! Natürü chanaxwa̱xe i curü ngúchaü̃ cuxü rü tama i choxrü —﻿ñanagürü.
Rü yexguma nayumüxẽgu rü wüxi ga daxũcüã̱x ga Tupanaarü orearü ngeruxü̃ rü naxca̱x nango̱x, rü nanaporaxẽxẽ.
Rü yema nax poraãcü nanaxĩ̱xãchiãẽxü̃ ga Ngechuchu, rü yemaca̱x yexeraãcü nayumüxẽ, rü nanaxaiyaãchi. Rü ñoma nagü waixü̃müanewa ichuruxü̃rüxü̃ nixĩ ga norü aiyacü.
Rü yema ínayumüxẽxü̃wa rü inachi, rü norü ngúexü̃gütanüwa naxũ. Rü nüxü̃ inayangau nax ínapeexü̃ yerü norü ngechaü̃maxã düxwa nayaxtae.
Rü yexguma ga Ngechuchu rü ñanagürü nüxü̃: —¿Tü̱xcüü̃ ípepee? ¡Íperüdagü rü Tupanana naxca̱x peca nax pexü̃ nangü̃xẽẽxü̃ca̱x nax tama chixexü̃gu peyi̱xü̃ca̱x! —﻿ñanagürü.


Rü yexguma íyadexayane ga Ngechuchu, rü yéma nangugü ga muxü̃ma ga duü̃xü̃gü. Rü Yúda ga Ngechuchuarü ngúexü̃chire̱x ixĩxü̃ nixĩ ga naxũpe̱xexü̃. Rü Ngechuchuca̱x nixũ nax nüxü̃ nachúxãcüma nüxü̃ namoxẽxü̃ca̱x.
Rü Ngechuchu rü ñanagürü: —Pa Yúdax, ¿tü̱xcüü̃ wüxi i chúxumaxã cunaechitae ya Tupana nane ya duü̃xü̃xü̃ ixĩcü? —﻿ñanagürü.
Rü yema togü ga Ngechuchuarü ngúexü̃gü ga naxü̃tawa yexmagüxü̃, rü yexguma nüxü̃ nadaugügu ga yema ngupetüxü̃ rü ñanagürügü nüxü̃: —Pa Corix, ¿cunaxwa̱xexü̃ nax taramaxã tanada̱i̱xü̃? —﻿ñanagürügü.
Rü wüxi ga Ngechuchuarü ngúexü̃ rü chacherdótegüarü ãẽ̱xgacüarü duü̃xü̃xü̃ nanapi̱xẽxẽ, rü ínanadae ga norü tügünepachinü.
Natürü Ngechuchu rü ñanagürü: —¡Ngexrüma nax pegü namaxã peda̱i̱xü̃! —﻿ñanagürü. Rü yexguma ga Ngechuchu rü yema yatü ga ídaepachinüxü̃xü̃ ningõgü, rü nanamexẽxẽ.
Rü Ngechuchu rü ñanagürü nüxü̃ ga yema chacherdótegüarü ãẽ̱xgacügü, rü Tupanapata ga taxü̃nearü purichíagüarü ãẽ̱xgacügü, rü Yudíugüarü ãẽ̱xgacügü ga norü yauxwa yéma ĩxü̃: —¿Tü̱xcüü̃ taragümaxã rü naixmena̱xãgümaxã cha̱u̱xca̱x nua pexĩ ñoma wüxi i ngĩ́ta̱xaxü̃ chixĩxü̃rüxü̃?
Rü guxü̃ ga ngunexü̃gu ga yexguma petanüwa chayexmagu ga Tupanapata ga taxü̃newa, rü tama choxü̃ piyauxgü. Natürü marü nawa nangu nax pexü̃́ natauxchaxü̃ nax choxü̃ piyauxgüxü̃, erü ñoma nixĩ i perü ora i nagu pemaxã naporaxü̃ i Chataná —﻿ñanagürü.


Rü Ngechuchuxü̃ niyauxgü, rü chacherdótegüarü ãẽ̱xgacüpatawa nanagagü. Rü Pedru rü nawe narüxũ, natürü yáxü̃guma nüxü̃́ nixũchigü.
Rü yéma chacherdótegüarü ãẽ̱xgacüpataa̱xtüarü ngãxü̃wa, rü purichíagü nanaxügü ga wüxi ga üxü. Rü nüxü̃ ínachomaeguãchi. Rü Pedru rü ta yéma natanüwa narüto.
Rü yexguma yéma üxücutüwa nato̱xgu ga Pedru, rü wüxi ga ngecü ga ãẽ̱xgacüarü duü̃xü̃ nüxü̃ idau. Rü meama nüxü̃ idawenü, rü ngĩgürügü: —Ñaa yatü rü Ngechuchutanüxü̃ nixĩ —﻿ngĩgürügü.
Natürü ga Pedru rü nügü nixã, rü ñanagürü: —Pa Ngecüx, choma rü tama nüxü̃ chacua̱x ya yimá Ngechuchu —﻿ñanagürü.
Natürü yixcamaxü̃ra rü to ga duü̃xü̃ Pedruxü̃ nadau, rü ñanagürü nüxü̃: —Cuma rü ta Ngechuchutanüxü̃ quixĩ —﻿ñanagürü. Natürü ga Pedru rü ñanagürü: —Tama nixĩ, Pa Yatüx. Tama nixĩ i natanüxü̃ chixĩxü̃ —﻿ñanagürü.
Rü wüxi ga ora ngupetüguwena rü to ga duü̃xü̃ rü nüxĩ́ ñanagürüama: —Aixcümaxü̃chi ñaa yatü rü Ngechuchutanüxü̃ nixĩ, erü wüxi i Gariréaanecüã̱xrüxü̃ nidexa —﻿ñanagürü.
Rü yexguma ga Pedru rü ñanagürü: —Pa Yatüx, tama nüxü̃ chacua̱x nax ta̱xacüchigaxü̃ quixuxü̃ —﻿ñanagürü. Rü yexgumatama Pedru idexayane rü nica ga ota.
Rü yexguma ga Cori ga Ngechuchu rü Pedruca̱x nügü ínidau. Rü nüma ga Pedru rü nüxna nacua̱xãchi ga yema ore ga Cori ga Ngechuchu namaxã nüxü̃ ixuxü̃ ga ñaxü̃: “Ñomatama i chütaxü̃gu naxü̃pa nax ota icaxaxü̃, rü tomaepü̱xcüna tá cugü quixã nax chorü duü̃xü̃ quixĩxü̃”, ñaxü̃.
Rü yexguma ga Pedru rü ínaxũxũ ga yéma. Rü poraãcüxüchi naxaxu.


Rü yema yatügü ga Ngechuchuna daugüxü̃, rü nagu nidauxcüraxü̃gü, rü nüxna nanacua̱i̱xcagüxü̃.
Rü nayadüxetügü, rü nachiwegu nidagügü, rü ñanagürügü: —¡Nüxü̃ nacua̱x nax texé cuxü̃ nax idagüxü̃! —﻿ñanagürügü.
Rü muxü̃ma ga to ga ore ga chixexü̃ namaxã nixugüe.


Rü yexguma yangunegu rü nangutaque̱xegü ga yema Yudíugüarü ãẽ̱xgacügü, rü chacherdótegüarü ãẽ̱xgacügü, rü ngúexẽẽruü̃gü ga Moichéarü mugüwa ngu̱xẽẽtaegüxü̃. Rü ñu̱xũchi yema ãẽ̱xgacütücumüpe̱xewa Ngechuchuxü̃ nagagü. Rü yéma Ngechuchuna nacagü, rü ñanagürügü:
—Toma rü nüxü̃ tacuáxchaü̃ ¿rü cuma quixĩxü̃ i Cristu rü ẽ̱xna tama? —﻿ñanagürügü. Rü Ngechuchu nanangãxü̃ rü ñanagürü: —Ngẽxguma chi pemaxã nüxü̃ chixuxgu nax choma chixĩxü̃ i Cristu, rü taxũchima choxü̃́ peyaxõgü.
Rü ngẽxguma chi pexna chacaxgu nax ta̱xacüca̱x choxna pecaxü̃, rü taxũchima choxü̃ pengãxü̃ga, rü taxũchima choxü̃ pinge̱xgü.
Natürü ñu̱xmawena rü Tupana Nane ya duü̃xü̃xü̃ ixĩcü rü Nanatü ya Tupana ya Guxãétüwa Ngẽxmacüarü tügünecüwawa tá narüto —﻿ñanagürü.
Rü yexguma guxü̃ma ga yema ãẽ̱xgacügü rü nüxna nacagü, rü ñanagürügü: —¿Ẽ̱xna cuma quixĩxü̃ ya Tupana Nane? —﻿ñanagürügü. Rü Ngechuchu nanangãxü̃, rü ñanagürü: —Pematama marü nüxü̃ pixu nax Tupana nane chixĩxü̃ —﻿ñanagürü.
Rü yexguma ga yema ãẽ̱xgacügü rü nügümaxã ñanagürügü: —Ñu̱xma rü marü taxuca̱xma naxca̱x tadau i to i duü̃xü̃gü i nüxü̃ ixuxü̃ i ñaa yatüchiga. Erü yíxematama marü naã̱xwatama nüxü̃ taxĩnüe i norü ore nax ñuxũ ñaxü̃ —﻿ñanagürügü.

Слушайте Ore i mexü̃ ga Luca ümatüxü̃ 22