Triqui, San Martín Itunyoso - 2009 Edition (Non-Drama - NT)

Triqui, San Martín Itunyoso - 2009 Edition (Drama - NT)

Hué dan ni̱ ni tsínj fariseo nga̱ ni tsínj digyán ley nne xumanꞌ Jerusalén, ni̱ gaꞌna̱ꞌ ni sij rian Jesús. Ni̱ nachínj snanꞌanj ni sij Jesús. Ni̱ gataj ni sij:
―Ni̱ u̱n sin huin ni̱ naꞌue da̱gahuin ni tsínj nicoꞌ ru̱cu re̱ꞌ si-du̱cuanj ni xi únj únj. Daj si nun na̱niaꞌ ni sij ngaa xa ni sij chra. ―Daj gataj ni síꞌ.
Ngaa ni̱ gataj Jesús:
―Ni̱ u̱n sin ni̱ nun da̱gahuin ni é re̱ꞌ nuguanꞌ gaꞌninꞌ Yanꞌanj sun rian néꞌ únj. Ni̱ daꞌngaꞌ daj ꞌyaj ni é re̱ꞌ xiꞌí si dagahuin ni é re̱ꞌ nga̱ si-du̱cuanj manꞌan ni é re̱ꞌ. Daj si gataj Yanꞌanj: “Gui̱nun yanꞌánj re̱ꞌ chré re̱ꞌ nga̱ nní re̱ꞌ. Ni̱ u̱n tsínj aꞌmi quij rian chrej sij nga̱ nni sij, ni̱ ga̱huiꞌ sij nánj.” Daꞌngaꞌ daj gaꞌninꞌ Yanꞌanj sun rian néꞌ. Sani̱ ataj ni é re̱ꞌ sisi̱ ga̱ꞌue ga̱taj ꞌngo̱ tsínj daj gunun chrej sij nga̱ nni sij: “Huin ruhuāj ri̱quīj sanꞌanj nan rian nu̱ngüej é re̱ꞌ, sani̱ sanꞌanj nicā nan huin ofrenda güenda Yanꞌanj anj.” Hué daj ataj ni é re̱ꞌ. Hué dan ni̱ u̱n tsínj ga̱taj nuguanꞌ nan, ni̱ naꞌuej ruhua sij chra̱cuij sij chrej sij nga̱ nni sij. Ni̱ xiꞌí si-du̱cuanj ni é re̱ꞌ, ni̱ ꞌyaj yu̱n ni é re̱ꞌ si-nu̱guanꞌ Yanꞌanj anj.
’Tsínj digyaꞌ yunꞌunj huin ni é re̱ꞌ. Hua yya xa̱ngaꞌ si-nu̱guanꞌ xi néꞌ Isaías ngaa gaꞌmi sij si-nu̱guanꞌ Yanꞌanj xiꞌí ni é re̱ꞌ. Daj si gataj sij:
Nu̱n yanꞌanj ni ngüi̱ nan nga̱ duꞌua ni sij yūnj anj.
Sani̱ ni̱ni huin niman ni sij nánj.
Nitaj si níꞌyanj si nicoꞌ ni sij yūnj mánj.
Daj si nuguanꞌ digyán ni sij huin nuguanꞌ aꞌninꞌ ni tsínj sun anj.
Ni̱ sé si digyán ni sij si-nu̱guanꞌānj mánj.
Hué daj gataj Yanꞌanj garun Isaías asi̱j ná. ―Daj gataj Jesús gunun ni tsínj fariseo nga̱ ni tsínj digyán ley.
Hué dan ni̱ gaquínj Jesús ga̱ꞌnaꞌ ni ngüi̱ rian sij. Ni̱ gataj sij:
―Gu̱nun ni é re̱ꞌ. Ni̱ ga̱ra daꞌngaꞌ ruhua ni é re̱ꞌ nej aj. Nitaj si ga̱huin quij chruhua niman ꞌngo̱ tsínj daj, ꞌyaj rasu̱n atuj duꞌua sij mánj. Sani̱ ga̱huin quij chruhua niman sij, ꞌyaj nuguanꞌ ahui duꞌua sij. ―Daj gataj Jesús.
Ngaa ni̱ gahuin ni̱chrunꞌ ni tsínj nicoꞌ Jesús rian sij. Ni̱ ganachínj snanꞌanj ni síꞌ manꞌan Jesús. Ni̱ gataj ni síꞌ:
―Niꞌí re̱ꞌ sisi̱ nun ga̱ranꞌ ruhua ni tsínj fariseo nuguanꞌ gaꞌmí re̱ꞌ daj níꞌ. ―Daj gataj ni síꞌ gachínj snanꞌanj ni síꞌ Jesús.
Ngaa ni̱ gataj Jesús:
―Go̱rocoj chrē daranꞌ coj nun gu̱nun chrē nne xataꞌ. Ni̱ da̱j rúnꞌ hua ni coj nitaj si níꞌyanj daj daꞌngaꞌ daj hua ni tsínj daj. Ga̱ꞌninꞌ ruhua á re̱ꞌ nga̱ ni sij. Daj si tsínj duri huin ni sij. Ni̱ huin ni sij ni tsínj daꞌa raꞌa ango ni tsínj duri. Ni̱ sisi̱ daꞌa ꞌngo̱ tsínj duri raꞌa tsínj duri nga̱ sij huaj nu̱ngüej sij, ni̱ gui̱nij nu̱ngüej sij chruhua yuꞌuj. ―Daj gataj Jesús.
Ngaa ni̱ gataj Pedro gunun Jesús:
―Ga̱taj re̱ꞌ u̱n sin huin ruhua nuguanꞌ daj gata, ni̱ gu̱nun únj. ―Daj gataj Pedro.
Ngaa ni̱ gataj Jesús:
―Hua gue̱ naꞌue ga̱ra daꞌngaꞌ ruhua á re̱ꞌ níꞌ. Niꞌi sa̱ꞌ ni é re̱ꞌ sisi̱ daranꞌ rasu̱n atuj chruhua duꞌua ꞌngo̱ tsínj daj, ni̱ achin-ínꞌ riqui sij. Hué dan ni̱ ahui-íꞌ riꞌi sij. Sani̱ ni nuguanꞌ ahui duꞌua ꞌngo̱ tsínj daj, ni̱ ꞌna̱ꞌ ni nuguanꞌ daj niman sij. Ngaa ni̱ ga̱huin quij chruhua niman tsínj daj, ꞌyaj nuguanꞌ quij ahui chruhua niman sij. Daj si nan huin nuguanꞌ quij ahui chruhua niman ni ngüi̱: Ani quij ruhua ni sij. Ni̱ dagahuiꞌ ni sij níman nej. Ni̱ aꞌmi ni sij nga̱ nica̱ ango ni ngüi̱ nej. Ni̱ ꞌyaj squi̱raꞌ ni sij nga̱ ango ngüi̱ nej. Ni̱ ꞌyaj tu̱ ni sij nej. Ni̱ utaꞌ chre ni sij gaquinꞌ ni dugüiꞌ ni sij. Ni̱ aꞌmi quij ni sij xiꞌí ni dugüiꞌ ni sij. Ni̱ hué ni nuguanꞌ quij nan ꞌyaj sisi̱ ga̱huin quij niman ꞌngo̱ tsínj daj. Sani̱ sé si xa̱ngaꞌ sisi̱ ga̱huin quij niman sij ꞌyaj si nitaj si nania̱ꞌ sij ngaa xa sij chra. ―Daj gataj Jesús gunun ni tsínj nicoꞌ sij.

Hué dan ni̱ gahui Jesús yuꞌuj daj ganꞌanj sij rian ngaj xumanꞌ Tiro nga̱ xumanꞌ Sidón. Ngaa ni̱ gaꞌna̱ꞌ ꞌngo̱ yunꞌunj xa̱na nne estado Cananea. Ni̱ gaguáj únꞌ. Ni̱ gataj únꞌ gunun Jesús:
―Señor, na̱ni yaco ruhuá re̱ꞌ ni̱ꞌyaj re̱ꞌ manꞌānj huín re̱ꞌ daꞌníj David. Daj si ranꞌ daꞌni̱ xa̱nāj sayun, ꞌyaj nane̱ xi̱ꞌi nu̱n niman únꞌ. ―Daj gataj únꞌ.
Sani̱ ni̱ a̱ ꞌngo̱ nuguanꞌ nun ga̱taj Jesús gunun yunꞌunj xa̱na da̱ mánj. Ngaa ni̱ gahuin ni̱chrunꞌ ni tsínj nicoꞌ Jesús. Ni̱ gachínj jniꞌyaj ni sij rian síꞌ. Ni̱ gataj ni sij:
―Ga̱taj re̱ꞌ gu̱nun yunꞌunj xa̱na daj sisi̱ ga̱nꞌanj únꞌ. Daj si aguáj únꞌ nicoꞌ únꞌ ru̱cu únj anj. ―Daj gataj ni sij.
Ngaa ni̱ gataj Jesús:
―Maan si gaꞌníj Yanꞌanj gaꞌnāj rian ni tsínj israelita sisi̱ huin ni sij da̱j rúnꞌ huin ni xachij ga niꞌya. ―Daj gataj Jesús.
Sani̱ gaꞌna̱ꞌ yunꞌunj xa̱na daj ganiqui̱nꞌ ráj da̱coj únꞌ rian Jesús. Ni̱ gataj únꞌ:
―Señor, chra̱cuij re̱ꞌ manꞌānj. ―Daj gataj únꞌ.
Ngaa ni̱ gataj Jesús:
―Nitaj si hua sa̱ꞌ si ga̱ꞌneꞌ si-chra̱chrunj ni tsinꞌ ga̱ꞌuiꞌ duꞌua ni xuhue mánj. ―Daj gataj Jesús.
Ngaa ni̱ gataj únꞌ:
―Xa̱ngaꞌ Señor. Sani̱ daꞌ ni xuhue xa xúꞌ ni daru̱ chrachrúnj guinij duꞌua mesa nne tsínj huin dánj xúꞌ. ―Daj gataj únꞌ gunun Jesús.
Ni̱ gataj Jesús:
―Xuman nico ruhuá re̱ꞌ niꞌyáj re̱ꞌ manꞌānj. Xiꞌí daj ni̱ da̱j rúnꞌ achínj re̱ꞌ riānj, ni̱ hué daj ga̱huin. ―Daj gataj Jesús.
Ni̱ hué hora daj ni ganahuin daꞌníj únꞌ.

Ngaa ni̱ gahui Jesús yuꞌuj daj ganꞌanj sij. Ni̱ guisíj sij ni̱chrunꞌ duꞌua laguna xa̱chij gu̱ꞌnaj Galilea. Ni̱ gahui sij chra̱ ꞌngo̱ quij ganꞌanj sij. Ni̱ ganꞌanj ga̱ne sij. Ngaa ni̱ gahuin ni̱chrunꞌ nico ni ngüi̱ rian Jesús. Ni̱ nicaj ni sij ni ngüi̱ nareꞌ dacój nga̱ ni ngüi̱ duri nej, ni ngüi̱ ráꞌyanꞌ nej nga̱ ango ni ngüi̱ aꞌnanꞌ nicaj ni sij gaꞌna̱ꞌ ni sij rian nne Jesús. Ni̱ ganahuin ni sij, guiꞌyaj Jesús. Xiꞌí daj ni̱ ganꞌanj ruhua ni ngüi̱ gaꞌna̱ꞌ daj guiniꞌi ni sij sisi̱ gaꞌue gaꞌmi ni ngüi̱ ráꞌyanꞌ. Ni̱ ganahuin ni ngüi̱ yacuan nej. Ni̱ gaꞌue gache sa̱ꞌ ni ngüi̱ nareꞌ dacój nej. Ni̱ gaꞌue naxigui̱n rian ni ngüi̱ duri guiniꞌyaj ni sij nej. Ni̱ gaꞌmi sa̱ꞌ ni sij rian Yanꞌanj nicoꞌ ni tsínj israelita.

Ngaa ni̱ gaquínj Jesús gaꞌna̱ꞌ ni tsínj nicoꞌ sij. Ni̱ gataj sij:
―Nahuin ꞌi̱ ruhuāj niꞌyā daranꞌ ni ngüi̱ ma̱n nan. Daj si síj hua̱ꞌnij güi mán ni sij ngāj aj. Ni̱ nitaj si nicaj ni sij si xa̱ ni sij mánj. Ni̱ nitaj si huin ruhuāj na̱ꞌnī ni sij na̱nꞌ ni sij ngaa nitaj si nicaj ni sij si xa̱ ni sij si gui̱nichre ni sij huaj ni sij chruhua chrej si ruhuaj aj. ―Daj gataj Jesús.
Ngaa ni̱ gataj ni tsínj nicoꞌ Jesús:
―Ni̱ a̱ gui̱ran únj chrachrúnj gu̱numan riqui daranꞌ ni ngüi̱ nan ꞌngo̱ yuꞌuj quij quiꞌyanj na̱co únj. ―Daj gataj ni tsínj nicoꞌ Jesús.
Ngaa ni̱ gataj Jesús:
―Ni̱ u̱ndaj chrachrúnj nicaj ni é re̱ꞌ únj. ―Daj gataj Jesús.
―Ichij chrachrúnj nicaj únj. ―Gataj ni sij.
Ngaa ni̱ gaꞌninꞌ Jesús sun sisi̱ ga̱nꞌanj ga̱ne ni ngüi̱ rian yoꞌój. Ni̱ guidaꞌa sij ichij chrachrúnj nga̱ do̱j xucuaj daj raꞌa sij. Ni̱ nagoꞌ sij si guruhua Yanꞌanj. Ngaa ni̱ guraꞌ daꞌaj sij chrachrúnj daj nga̱ xucuaj gaꞌuiꞌ sij raꞌa ni tsínj nicoꞌ sij. Ni̱ daꞌngaꞌ ni síꞌ raꞌa ni ngüi̱ ma̱n anj. Ni̱ xa daranꞌ ni sij. Ni̱ gara ran riqui ni sij. Ni̱ gara ichij xuguti, guiꞌyaj si xitinꞌ gunáj aj. Ni̱ guisíj ga̱nꞌanj mí ni tsínj xa daj. Ni̱ nini huin ni yunꞌunj xa̱na nga̱ ni tsinꞌ. Ngaa ni̱ naꞌníj Jesús na̱nꞌ ni ngüi̱. Ni̱ gahui sij chruhua ꞌngo̱ rio̱ chéj rian nnee. Ni̱ guisíj sij ꞌngo̱ yuꞌuj gu̱ꞌnaj Magdala.

Слушайте San Mateo 15