John 8

1ꞋEt Jesus shusyaz Olive huyulhni, kꞌuz whinya.

Tsꞌeke dune bulh lubeshi ꞌuleh whe nahuyúlhtus. Jesus highu hinílhti ꞌinkꞌez tse be hituzilhghelh hutni

2ꞋEt ꞌom bun dzin soo ꞌudaꞌ ꞌet Jesus lugliz whucho tsꞌe oozya. Tsꞌiyanne dunene highu nindil. ꞋEt nátlꞌa didaꞌ ꞌinkꞌez whewhubuhóndunilhꞌeꞌ. 3ꞋEt whubodulhꞌeh whe Moses be ꞌudustlꞌus ꞌukꞌu nunáguzne ꞌinkꞌez Phariseene te, tsꞌeke dune bulh lubeshi ꞌuleh whe nahuyulhtus, ꞌen soo buniz ꞌet néhinilhti. 4ꞋEt Jesus ꞌuhuyúlhni, “Neoodulhꞌéh-un ndun tsꞌeke ꞌen dune bulh lubeshi ꞌuleh whe soo ꞌet natsꞌulhtus. 5Moses khuni ootulhúhisdeꞌ-i netlꞌa íditꞌai, ꞌi kꞌut ꞌutni, ‘Mbene la ndi lubeshi ꞌulhꞌenne, ꞌenne tse be ubutsꞌuzoolhghelh,’ ni. Nyun doꞌ ꞌet huwun daja dini?” 6ꞋEt ꞌonilha huyóolhzih hoonli hukwaꞌ hikꞌeóotaꞌalh ꞌinka ꞌuhutni, ꞋEt Jesus nyo duja ꞌinkꞌez dulasga be yun kꞌut ꞌukꞌeneꞌ ꞌúsguz, lhubudutso léꞌuntꞌoh.

7ꞋAwhuz huyoodulhkut whe ndo dunaja ꞌinkꞌez ꞌubulhni, “Nohni nohtoh mbe la lubeshi lhitꞌih-un, ꞌen ꞌudechoo tse be yutsꞌe oolhꞌis,” ubúlhni. 8Doo cha nyo dunaja ꞌinkꞌez yun kꞌut hukwꞌu neꞌúzguz.

9ꞋEt mbene la whudántsꞌo whe neyo tsꞌe oogha tꞌetsꞌoninzun-i#8:9 Ndi khuni, “Neyo tsꞌe oogha tꞌetsꞌoninzun-i,” ꞌi hoonli tsꞌihꞌun unꞌa kꞌus tankꞌus ꞌúhoontꞌoh-un, ꞌi gha tꞌetsꞌoninzun tsꞌutni wheꞌ tsꞌutni. whúbunilhtan didut cha lubeshi ꞌulhꞌenne hinli, ꞌinkꞌez ꞌilhoghun hinli whe hoonyanne ꞌudetso hidulh whe tsꞌiyawh highu whenádil ꞌinkꞌez nyoon tsꞌeke didutchꞌoh za Jesus yubut usyin. 10ꞋEt Jesus donáꞌuja whe nyoon tsꞌeke whusaílhtine huhooloh whunilhꞌen whe ndun tsꞌeke ꞌuyulhni, “Tsꞌeke ndunne nkꞌéhoonꞌaine ntsꞌe whe nahidil? ꞋAw ꞌilhoghun hoontsꞌi eh mba nahooyeh ꞌaítꞌoh?”

11ꞋEt tsꞌeke ꞌuyulhni, “ꞋAwundooh, ꞌaw ꞌilhoghun hoontsꞌi hooloh.” ꞋEt Jesus ꞌuyulhni, “ꞋAw si cha mba nahoosyeh ꞌaítꞌoh. ꞋEt huwa naindalh ꞌinkꞌez ꞌon ꞌat cha lubeshi ꞌolhꞌen junih!” yúlhni.

Yinka whutꞌenne didut ꞌuntꞌoh buba be hóotꞌen-i unli ubúlhni Jesus

12ꞋEt Jesus doo cha za bubulh yálhduk whe ndutni, “Si ꞌustꞌoh yinka whuduneꞌne buba be hóotꞌen-i usdli. Mbe la suniyalh-un, ꞌaw tsálhgus yo hutooyaꞌ ꞌaítꞌoh, kꞌus ndi be hóotꞌen-i higha ꞌilhiz wheni hutinalh-i, ꞌi la huyótꞌeꞌ,” ubúlhni.

13ꞋEt Phariseene ꞌuhuyúlhni, “Nyunchꞌoh khuyanailduk wheꞌ dini, nghuni ꞌaw tsꞌihꞌun lheꞌítꞌoh.”

14ꞋEt Jesus ꞌubulhni, “Ntsꞌez de hásya la tꞌéwhunúszun ꞌinkꞌez ntsꞌe tisyalh-un cha tꞌéwhunúszun, ꞌet huwa daja dusni la, si sghun ꞌalha ꞌuhoontꞌoh, ꞌet ntsꞌez de hásya-un ꞌinkꞌez ntsꞌe tisyalh-un nohni ꞌaw tꞌéoonuzúhzun. 15Nohni dune ba nahihyilh, si ꞌaw ꞌuyoonne ba nahusyéhne hooloh. 16ꞋEt si cha dune ba nahusyeh de, ndi be náhusyeh-i, ꞌi tsꞌihꞌun unꞌa ꞌuntꞌoh. ꞋAw sichꞌoh iloh ꞌustꞌoh, sBá, mbe la whuz de sútilhꞌaꞌ-un, ꞌen sulh ꞌúntꞌoh, ꞌet huwa ndi be dune ba náhisyilh-i de, ꞌi tsꞌihꞌun unꞌa za ꞌuntꞌoh. 17ꞋEt whuz unꞌa za ꞌukꞌu nusguz ndi khuni nohba ootulhúhisdeꞌ-i kꞌut whe ndutni, ‘Nane dune ndet la huhonꞌén-un lhgha ꞌúhudija whe howu yahulhduk de, ꞌet tsꞌihꞌun unꞌa ꞌuhoontꞌoh,’ ni whe ꞌutni. 18Sichꞌoh duba yanazduk ꞌinkꞌez sBá mbe la whuz de sútilhꞌaꞌ-un, ꞌen cha sba yalhduk,” ꞌubulhni.

19ꞋEt huyoodulhkut, “MBá ꞌen ntsꞌe usda?” ꞋEt Jesus ꞌubulhni, “ꞋAw si ꞌinkꞌez sBá bulh ꞌaw tꞌenenuzúhzun. Si tꞌesunáhzun de, sBá cha daꞌ tꞌenóhzin ooleꞌ.”

20Jesus ndi khuni ꞌi be yailhduk lugliz whucho ꞌet dune hodulꞌeh daꞌ. Ntsꞌe la sooniya nahulhdzóoh-un, ꞌet dune hodulꞌeh. ꞋEt ꞌawhuz ooba whudizulh-un whutsꞌun hoozulh ꞌet huwa ꞌaw lhuhuyílhchulh.

21ꞋEt Jesus doo cha ubúlhni, “Nohghu tisyalh. Ska itóhꞌen la ꞌet hoontsꞌi nohlubeshi bulh la yaóohdlah, ꞌet huwa ntsꞌe la tisyalh tsꞌe nohni cha ꞌaw whuz toohdilh ꞌaítꞌoh.”

22ꞋEt doo cha nyoonne Lizwifne ꞌulhodutni, “Nyoon dichꞌoh toleh naꞌdutuzilghelh? ꞋEt huwa toleh ꞌutni, ‘Ntsꞌe la tisyalh tsꞌe nohni cha ꞌaw whuz toohdilh ꞌaítꞌoh,’ neúlhni?”

23ꞋEt ubúlhni, “Nohni ndi yun kꞌut tsꞌe hahdil, ꞌet si ndus de hásya whe ꞌustꞌoh. Nohni ndi yun kꞌut tsꞌe hahdil, ꞌet si ꞌaw ndi yun kꞌut tsꞌe haszut iloh whe ꞌustꞌoh. 24ꞋEt huwa ꞌunohdusni nohlubeshi bulh yatáhdlah. ꞋAw nohba ꞌalhaꞌ lheꞌútꞌoh si mbe ꞌustꞌoh ꞌet huwun, ꞌet huwa la nohlubeshi bulh la yatáhdlah,” ubúlhni.

25ꞋEt “Mbe inli whe ꞌintꞌoh?” huyúlhni. ꞋEt Jesus ꞌubulhni, “Nohdusni soo ꞌudechoo whutsꞌun, ꞌen za ꞌustꞌoh.

26ꞋAwhuz tube lhat-un nohni nohghun howu yatisduk, ꞌinkꞌez tube lhat-un nohni nohghun nahutisyeh-un whuzꞌai, ꞌet hoontsꞌi mbe la ndun whuz de sútilhꞌaꞌ-un, ꞌen tsꞌihꞌun unꞌa ꞌuntꞌoh. Ndai la ootsꞌun whudástsꞌo-un, ꞌet whuz unꞌa za yinka whuduneꞌne bubulh yásduk,” bubúlhni.

27ꞋEt hoontsꞌi ꞌaw dudeni be tꞌehonúszun duBá, ꞌen ghun bubulh yálhduk whe ꞌutni. 28ꞋEt Jesus ubúlhni, “Yinka Dune Yeꞌ ndo dubeꞌ dunahtan de, ꞌet de la soo tsꞌihꞌun mbe usdli-un, ꞌen ꞌustꞌoh tꞌéoonóhzin. ꞋInkꞌez ꞌaw sichꞌoh duba moodih nasdliꞌ íloh, sBá ntsꞌenꞌa la whusodalhꞌeꞌ, ꞌi khuni za be yásduk, 29ꞌinkꞌez mbe la whuz de sútilhꞌaꞌ-un, ꞌen sulh ꞌúntꞌoh. ꞋAhoolhyiz wheni sBá hóontꞌiꞌ te za neꞌústꞌen, ꞌet huwa ꞌaw schꞌa nalhusdai,” ubúlhni. 30ꞋEt ndi khuni ye yaílhduk whe tube lhane ꞌen buba ꞌalhaꞌ yintꞌoh suliꞌ.

31ꞋEt ndunne Lizwifne, mbene la Jesus yuba ꞌalha ꞌuntꞌohne, ꞌenne ubúlhni, “Sghuni oohtun ꞌinkꞌez ookꞌúneꞌ ꞌuhtꞌen de, ꞌalha ꞌuhoontꞌoh whe sgha hodulꞌehne ꞌahli. 32ꞋInkꞌez ꞌet huwa ndi khuni ꞌalhaꞌ ꞌuntꞌoh-i tꞌenóhzin, ꞌinkꞌez ꞌi gha la ꞌaw ꞌon ꞌun ꞌulhnáne oolhleꞌ ꞌaítꞌoh.”

33ꞋEt ꞌuhuyúlhni, “Wheni Abraham ootsꞌu haíndene ꞌutsꞌintꞌoh. ꞋAw whutsodaꞌ ꞌuyoonne ba ꞌulhna lhtsꞌíloh, ꞌinkꞌez di haꞌ nedíni, nohla nahudutitnih nedíni?”

34ꞋEt Jesus ꞌubulhni, “Soo tsꞌihꞌun unꞌa nohdúsni, mbene la lubeshi ꞌulhꞌenne, ꞌenne lubeshi ba ꞌulhnáne hinli. 35Ndet la yoh ꞌilhoghun ꞌulhna unlí-un, ꞌaw ꞌahoolhyiz ꞌet lhídoh, ꞌet ndun yoh whuduneꞌ-un ooyeꞌ, ꞌen ꞌahoolhyiz wheni, ꞌet usda. 36ꞋEt huwa ooYeꞌ lubeshi chꞌa nohlanaditni de, ꞌet de tsꞌihꞌun unꞌa ꞌaw ꞌon ꞌun ꞌulhna oohleꞌ ꞌaítꞌoh. 37Tꞌewhunúszun Abraham ootsꞌu haíndene ꞌahli, ꞌet hoontsꞌi sghuni ꞌaw ookalheꞌnáhzun, ꞌet huwa sutuzilhghelh hukwaꞌ nahzun. 38Ndet la sBá whusunilhtan-un, ꞌet nohdúsni. ꞋEt hoontsꞌi nohni nohbá ꞌunohulhni, ꞌoh te néꞌahtꞌen.”

39ꞋEt ꞌuhuyúlhni, “Abraham ꞌen ootsꞌu haindene tsinli.” ꞋEt Jesus ꞌubulhni, “Abraham ꞌen tsꞌu hahde de, ꞌen be ꞌutꞌen kꞌoh za daꞌ neꞌóohtꞌen.

40ꞋEt hoontsꞌi ꞌandit si ntsꞌoh te la ꞌunohdúsni-un tsꞌihꞌun unꞌa ꞌuhoontꞌoh whe Yakꞌusda tsꞌun whudástsꞌo. ꞋEt hoontsꞌi nohni sutuzilhghelh hukwaꞌ nahzun. Njan ꞌet ꞌaw Abraham be ꞌutꞌen kꞌoh iloh ꞌuhoontꞌoh. 41Nohbá be ꞌutꞌen kꞌoh ꞌuwhulhꞌen.” ꞋEt doo cha ꞌuhuyúlhni, “ꞋAw wheni soh ulhtsíne iloh ꞌutsꞌintꞌoh! ꞋIlhoghun nebá ꞌen Yakꞌusda unli!”

42ꞋEt Jesus ꞌubulhni, “Yakꞌusda ꞌen nohbá unli de, si skꞌeoohsiꞌ ooleꞌ daꞌ, Yakꞌusda ootsꞌun hasya ꞌet huwa. ꞋAw sichꞌoh sghá iloh whusásya, Yakꞌusda whusasálhꞌaꞌ. 43Di ha nohbulh yasduk-un, ꞌaw tꞌewhunuzáhzun. Daja nohdusni-un ꞌaw sudóhtsꞌo hukwa lheꞌnáhzun ꞌet huwa. 44Netsudule ꞌen nohbá ꞌuntꞌoh. Ndet la ꞌen hukwaꞌ ninzun, ꞌoh te za neꞌóohtꞌen hukwaꞌ nahzun. Soo ꞌudechoo daꞌ whutsꞌun dune ughan-un unli. ꞋAw tsꞌihꞌun ꞌuhoontꞌoh-un hukwa lheꞌnizun, ꞌet huwa ꞌaw ndi khuni ꞌalhaꞌ ꞌuntꞌoh-i ooghu whéyooloh. Ntsꞌoh tula neꞌduniꞌ-un tankꞌus unꞌa za yalhduk, dichꞌoh dukꞌunꞌa ꞌutni ꞌet huwa. Whutsꞌit-un unli, ꞌinkꞌez whutsꞌit-i, ꞌen za ootsꞌu haídukat. 45ꞋEt si khuni ꞌalhaꞌ ꞌuntꞌoh-i be yasduk, ꞌet ꞌaw nohba ꞌalhaꞌ lheꞌduzusni. 46ꞋAw nohtoh ꞌilhoghun hoontsꞌi si lubeshi ꞌulhꞌen-un usdli doohniꞌ ꞌaítꞌoh. ꞋEt huwa khuni ꞌalhaꞌ ꞌuntꞌoh-i be ꞌunohdúsni te, di ha ꞌet nohba ꞌalhaꞌ lheꞌduzusni? 47Mbene la Yakꞌusda oochꞌeꞌ unline, ꞌenne za Yakꞌusda ooghuni hiditsꞌo. Nohni ꞌaw Yakꞌusda oochꞌeꞌ lháhloh ꞌet huwa ooghuni ꞌaw dóhtsꞌo ꞌaitꞌoh,” ubúlhni.

48ꞋEt Lizwifne ꞌuhuyúlhni, “Ꞌalha ꞌi be ntsꞌuyútni nyun Samaria whutꞌen-un ꞌintꞌoh ꞌinkꞌez ntsiꞌ-i nudúdeh-i nyudínda!”

49ꞋEt Jesus ꞌubulhni, “ꞋAw ntsiꞌ-i nudúdeh-i sghu hooloh, sBá ꞌen dústiꞌ, ꞌet nohni ꞌaw sulh dúlhtiꞌ. 50Ntsꞌoh dádiztiꞌ ꞌet hoontsꞌi sba ꞌantsꞌi ꞌuhoontꞌoh. ꞋAw ꞌuyoonne sudólhtiꞌ hukwa lheꞌnúszun, ꞌet ꞌilhoghun sba whudutálhtiꞌ-un hoonli, ꞌen nahiyilh-un cha ꞌuntꞌoh. 51Soo tsꞌihꞌun unꞌa nohdúsni, mbene la sghuni yoontúnne, ꞌaw dahóotsah ꞌaítꞌoh.”

52ꞋEt Lizwifne ꞌuhuyúlhni, “ꞋAndit ꞌawet tꞌétsꞌonínzun ntsiꞌ-i nudúdeh-i nyudínda! Abraham ꞌinkꞌez nus hóoꞌenne yahadla, ꞌet hoontsꞌi ꞌunedíni, mbene la nghuni yoontúnne, ꞌaw dahóotsah ꞌaítꞌoh díni. 53Nebá Abraham dazsai inleꞌ. ꞋEn ba nus ꞌilcho whe eh ꞌudini? ꞋEt nus hóoꞌenne, ꞌenne cha yahadla. ꞋEnne cha buba nus ꞌilcho eh? Soo mbe inli dini wheꞌ dini?”

54ꞋEt Jesus ꞌubulhni, “Sichꞌoh duba naoodúztiꞌ de, sichꞌoh be úscha-i ꞌantsꞌi ꞌuntꞌoh, ꞌen nohYakꞌusda dáhni-un, ꞌen si sBá ꞌuntꞌoh, ꞌinkꞌez ꞌen sudílhtiꞌ. 55ꞋEt nohni ꞌaw tꞌelhnáhzil, ꞌet si tꞌenuszun. ꞋAw si tꞌenuzuszun dusni de, ꞌet de nohni nohkꞌunꞌa whutsꞌit-un usdli wheꞌ dutisnelh. ꞋEt soo tꞌenuszun ꞌinkꞌez ooghuni ꞌahoolhyiz wheni ookꞌúneꞌ ꞌustꞌen. 56Nohbá Abraham tube hóontꞌiꞌ whe sdzin honꞌen. ꞋAwet whunalhꞌen ꞌinkꞌez tube whunálhni.”

57ꞋEt Lizwifne ꞌuhuyulhni, “Nilhꞌen lheꞌhoontꞌoh te neꞌdiniꞌ! ꞋAwhuz kwulat whunizyai nye yus kꞌut iloh, ꞌinkꞌez ꞌudini Abraham ꞌudaꞌ inꞌen dini!”

58ꞋEt Jesus ꞌubulhni, “Soo tsꞌihꞌun unꞌa nohdúsni, Abraham whutileh whutsodaꞌ, ꞌet ꞌudaꞌ si usdli whe ꞌustꞌoh.” 59ꞋEt ndúbulhni whe, tsꞌiyawh tse huyeni dízgooh, ꞌi be nahúyuntilhꞌuz ꞌinkꞌez hituzilhghelh ꞌinka. ꞋEt Jesus buchꞌa úntilhꞌi ꞌinkꞌez soo butoh ꞌet lhunásja whe lugliz whucho ꞌet tenánja.

Selectat acum:

John 8: crx

Evidențiere

Partajează

Copiază