John 9

Dune whuzdli daꞌ whutsꞌun hoos̱ꞌén-un, Jesus soo naꞌyuleh

1ꞋEt Jesus ꞌoh whuya uyalh whe, dune whuzdli daꞌ whutsꞌun hoos̱ꞌén-un yutilhꞌen. 2ꞋEt yugha hodulꞌehne huyoodulhkut, “Whunehodulhꞌéh-un ndun dune mbe oolubeshi gha ꞌúja hoos̱ꞌen whe whuzdli? Didutchꞌoh kꞌus oodusneke bulubeshi?”

3ꞋEt Jesus ꞌubulhni, “ꞋAw didutchꞌoh oolubeshi gha, kꞌus oodusne bulubeshi gha iloh hoos̱ꞌen suliꞌ. Yakꞌusda be ꞌutꞌen kꞌoh ooghá tꞌewhunoodzeh ꞌinka ꞌuja hoos̱ꞌen whe whuzdli. 4ꞋAwhuz dzenis hootꞌen whe, mbe la whuz de sútilhꞌaꞌ-un, ꞌen be ꞌutꞌen oosꞌen huba ꞌuhoontꞌoh. ꞋUlhdzis whusahóoltsꞌut ꞌinkꞌez tsalhgus yo suliꞌ de, ꞌaw dune ootꞌen ꞌaítꞌoh. 5ꞋAwhuz ndi yun kꞌut susda whe, ndi yun kꞌut whuduneꞌne buba be hóotꞌen-i usdli.”

6ꞋEt ndúdija hukwꞌelhꞌaz yun ꞌúntizo, ꞌinkꞌez duzo ꞌi be whutlꞌus ꞌinla, ꞌinkꞌez nyoon dune hoos̱ꞌen-un yuna yé yulhlho, 7ꞌinkꞌez ꞌuyulhni, “Nghuz too dizꞌai Siloam tsꞌe inyalh ꞌinkꞌez néꞌnildeh.” ꞋEt ndi khuni Siloam ni, ꞌet whélꞌaꞌ, ni whe ꞌutni. ꞋInka whuz whinya, neꞌnilde, ꞌinkꞌez hooꞌen whe whusanája.

8ꞋEt ndun hinat whutꞌíne ꞌinkꞌez ꞌuyoonne cha, hoos̱ꞌen whe hinalhꞌen daꞌ, ꞌenne ꞌulhodútni, “Ndun ꞌen daꞌ ꞌoh úsda ꞌinkꞌez datsó-un, ꞌen eh ꞌuntꞌoh?” 9Whulohne ꞌuhutni, “A, ꞌen ꞌuntꞌoh.” ꞋEt whulohne cha ꞌuhutni, “ꞋAwúndooh, ꞌantsꞌi yundótꞌen-un ꞌuntꞌoh.” ꞋEt ndun hoos̱ꞌen inléꞌ-un ubúlhni, “A, si ꞌustꞌoh.”

10ꞋEt ꞌuhuyúlhni, “Daínja whe honꞌen suliꞌ?”

11ꞋEt ubúlhni, “ꞋIlhoghun dune, Jesus huyulhni, ꞌen whutlꞌus ꞌínla, sna kꞌut yé sulhlho, ꞌinkꞌez ꞌusulhni, ‘Tadizꞌai tsꞌe, Siloam huwhútni, whuz inyalh ꞌinkꞌez neꞌnildeh.’ Whuz oozusya ꞌinkꞌez neꞌnizde whe ꞌet hoosꞌen súliꞌ.”

12ꞋEt doo cha huyoodulhkut, “Ndun dune ntsꞌe ꞌutꞌen?” “ꞋAw tꞌéoonuzúszun,” ubúlhni.

13ꞋEt ndun hoos̱ꞌen inleꞌ-un, Phariseene bughu hinílhti. 14Njan dzin, ndun dune Jesus whutlꞌus ꞌínla ꞌinkꞌez hooꞌen nayulhtsí-un, ꞌet natsꞌulyis dzin ꞌuyínla, 15ꞌinka doo cha za Phariseene huyoodulhkút, “Dáhoontꞌoh-un huwa honꞌen suliꞌ?” ꞋEt ubúlhni, “Ndun dune whutlꞌus ꞌínla, sna kꞌut yé whulhlho, hukwꞌelhꞌaz neꞌnizde, ꞌinkꞌez hoosꞌen susdliꞌ.”

16ꞋEt ndunne Phariseene whulohne ꞌuhutni, “Ndun dune ooghu yailhdúk-un, ꞌen ꞌaw Yakꞌusda ootsꞌu haínya-un iloh ꞌuntꞌoh. ꞋAw natsꞌulyis dzin hukwꞌu nulheꞌustꞌen ꞌet huwa.” ꞋEt ꞌuyoonne cha ꞌuhutni, “Ntsꞌenꞌa ꞌuwhutátꞌelh, ꞌaw lubeshi ꞌulhꞌen-un, ꞌen huwa ꞌítꞌen túneꞌ óotꞌen ꞌaítꞌoh!” ꞋEt huwun lhchꞌa nehudindil.

17ꞋEt doo cha za ndun hoos̱ꞌen inleꞌ-un ꞌuhuyúlhni, “Hónꞌen nyulhtsi, ꞌet huwa ꞌen ooghun daja dini?” “ꞋAlhaꞌ nus hóoꞌen-un ꞌuntꞌoh,” ubúlhni.

18ꞋEt hoontsꞌi Lizwif moodihne ꞌaw buba ꞌalhaꞌ lheꞌhóotꞌoh, hoos̱ꞌen inleꞌ whe whuzdli ꞌinkꞌez ꞌandit ꞌet hooꞌen, ꞌinka oodusneke ꞌanih hubodániꞌ, 19ꞌinkꞌez buboohoodulhkut, “Ndun ꞌen nohyeꞌ ꞌuntꞌoh ꞌinkꞌez whuzdli whutsꞌun hoos̱ꞌen nedúhni, ꞌinkꞌez ntsꞌenꞌa ꞌandit hooꞌen?”

20ꞋEt oodusneke ꞌuhutni, “Tꞌetsꞌonínzun ndun ꞌen neyeꞌ ꞌuntꞌoh ꞌinkꞌez whuzdli whutsꞌun hoos̱ꞌen inleꞌ. 21ꞋInkꞌez ndet huwa ꞌandit hooꞌen, ꞌinkꞌez mbe hooꞌen yulhtsí-un, ꞌaw tꞌétsꞌonúszun. ꞋAw tsꞌoodun lhiloh whe ꞌuntꞌoh, oodulhkut da. Didutchꞌoh la nohdóniꞌ.” 22Oodusneke tꞌehonínzun Lizwif moodihne ꞌudaꞌ lhgha ꞌúhudija mbene la Jesus Christ ꞌuntꞌoh, ꞌuyoonne hudániꞌ de, lugliz ꞌet whuchꞌa huntájulh. ꞋEt huwa ndun dune oodusneke Lizwif moodihne bube hunuljut. 23Njan hunuljut-un, ꞌet huwa ꞌuhutni, “ꞋAw tsꞌoodun lhilhlhoh whe ꞌuntꞌoh, ꞌen oodulhkut dah,” hutni.

24ꞋEt doo cha za ndun dune hoos̱ꞌen inleꞌ-un, “ꞋAnih,” huyúlhni, ꞌinkꞌez ꞌuhutni, “Njan daínja-un la Yakꞌusda ꞌen ooba whudílhtiꞌ, ꞌaw ndun dune ꞌen íloh, tꞌetsꞌonínzun lubeshi ꞌulhꞌen-un ꞌuntꞌoh ꞌet huwa.”

25ꞋEt ꞌubulhni, “Lubeshi ꞌulhꞌen-un tilah ꞌuntꞌoh, ꞌaw tꞌéoonuzúszun. ꞋEt ꞌilhoghun tꞌéoonúszun, whuzisꞌen ínleꞌ ꞌet ꞌandit hoosꞌen.”

26ꞋEt doo cha za ꞌuhuyúlhni, “Dányin la ínleꞌ? Ntsꞌenꞌa honꞌen nyulhtsi?”

27ꞋEt ubúlhni, “ꞋUdaꞌ nohdasniꞌ, ꞌaw sulh oozúlhtsꞌai, di ha ꞌet doo cha nohdósniꞌ hukwaꞌ nahzun? Soo tuzálhtsꞌilh hukwaꞌ nahzun eh? Nohni cha eh oogha hodulꞌehne tihleh hukwaꞌ nahzun eh?” bubúlhni.

28ꞋEt highudloh, “Nyun ꞌen yugha hodulꞌeh-un inli! ꞋEt wheni Moses bulh ꞌútꞌenne tsinli! 29Tꞌétsꞌonínzun Yakꞌusda ꞌen Moses bulh yaílhduk ínleꞌ. ꞋEt ndun ꞌen, ꞌaw ntsꞌez de hainya-un tꞌétsꞌonuszun,” huyúlhni.

30ꞋEt ndun dune hoos̱ꞌen inleꞌ-un ubúlhni, “Ndun dune hoosꞌen nasulhtsi ꞌet hoontsꞌi nohni ꞌaw tꞌéoonuzúhzun ntsꞌez de haínya duhni! Tube sba hooncha! 31Tꞌetsꞌonínzun Yakꞌusda ꞌaw lubeshi ꞌulhꞌenne lhuboozílhtsꞌai. ꞋEt mbene la Yakꞌusda tsꞌu téniꞌ nilhdzunne, ꞌinkꞌez butsꞌu húkwaꞌ ninzun te neꞌútꞌenne, ꞌenne za uboozílhtsꞌai. 32Soo ꞌudechoo yinka ꞌuhóolya whutsꞌun ꞌaw dune hoos̱ꞌen whe whuzdli-un, ꞌen dune soo náꞌyinla-un whulheꞌuzdustsꞌo. 33Ndun dune mbe la hoosꞌen nasulhtsí-un, ꞌaw Yakꞌusda ootsꞌun iloh ꞌuntꞌoh de, ꞌaw ndóneh ꞌaítꞌoh,” ubúlhni.

34“Lubeshi toh whuzindli ꞌinkꞌez mbe naꞌdunínzun whe whuneoodolhꞌeh hukwaꞌ dini?” huyúlhni ꞌinkꞌez ꞌaz tenáhinino.

35ꞋEt Jesus whulh ꞌúdantsꞌo Lizwifne nyoon dune tenáhinino, hukwꞌelhꞌaz nayilhti ꞌet ꞌuyulhni, “Yakꞌusda ooYeꞌ ghun mba ꞌalha ꞌuhoontꞌoh eh?”

36ꞋEt dune ꞌutni, “Moodihti mbe whe ꞌuntꞌoh? Busúnilhtun ꞌet de la ooghun sba ꞌalhaꞌ hotꞌeꞌ.”

37ꞋEt Jesus ꞌuyulhni, “ꞋUdaꞌ inꞌen whe ꞌuntꞌoh, ꞌinkꞌez ꞌen ꞌutni nyulh yálhduk.”

38ꞋEt dune yubut nachániti ꞌinkꞌez, “SMoodihti, sba ꞌalhaꞌ ꞌintꞌoh!” yúlhni, ꞌinkꞌez yutsꞌun teniꞌ nalhdzin.

39ꞋEt Jesus ꞌutni, “Ndi yun kꞌut whusásya ꞌet huwa la yinka duneꞌne buba nahoodeh. Whusásya-un, ꞌet huwa hoos̱ꞌenne, ꞌenne huhooꞌen hutileh. ꞋEt mbene la hooꞌenne, ꞌenne cha huhoos̱ꞌen hutileh.”

40ꞋEt whulohne Phariseene yugha hodulꞌehne hodántsꞌo whe, ꞌet ꞌuhuyúlhni, “Wheni cha lhtsꞌuhoos̱ꞌen dini whe eh dini?”

41ꞋEt Jesus ꞌubulhni, “Whuzihꞌen de, nohni ꞌaw lubeshi nohba hooloh. ꞋEt ꞌuduhni, ‘Wheni tsꞌoohooꞌen,’ dahni, ꞌet huwa lubeshi nohba hoonli.”

Selectat acum:

John 9: crx

Evidențiere

Partajează

Copiază