PIANCILNA 27
27
Jakob in Isaacʼ Thupha Ngah
1Isaac teekin a mitte maangin khua a muh theih nawn loh ciangin a ta upa zaw Esau samin ama kiangah, “Ka tapa aw,” a ci hi. Amah in dawngin, “Hiah om ing,” a ci hi.
2Amah in, “En in, kei ka teek hi. Ka sih ding hun ka thei kei hi. 3Tua ahih ciangin tu-in, na hiamte ahi na thallawng le na thal la inla, gamlak ah pai-in kei adingin sa va beng in. 4Ka sih ma-in nang thupha kong piak theih nadingin keiʼ duh bangin an lim hong bawl inla, ka nek dingin hong paipih in,” a ci hi.
5Isaac in a tapa Esau a hopih laitakin Rebekah in na ngai sim hi. Sa bengin a ciahpih dingin Esau gamlak ah a kuan ciangin, 6Rebekah in a tapa Jakob kiangah, “Na sanggampa Esauʼ tungah na paʼ thugen ka za a, 7‘Ka sih ma-in Topaʼ mai ah nang thupha kong piak theih nadingin ka nek dingin na sa mat sa hong paipih inla, kei adingin an lim hong bawl in,’ ci hi. 8Tua ahih ciangin tu-in ka ta aw, kong thupiak bangin gamta in. 9Ama duh bangin na pa adingin an lim ka bawl theih nadingin keel hon lakah va pai inla keel no a hoih nih hong paipih in. 10Na pa in a sih ma-in nang thupha hong piak theih nadingin a nek dingin na pa kiangah na va paipih ding hi,” a ci hi.
11Ahih hangin Jakob in a nu Rebekah kiangah, “En in, ka sanggampa Esau pen mul nei mi hi a, kei pen cineel mi ka hi hi. 12Ka pa in kei hong lawng kha leh, amah in ka khemna hong thei dinga, keiʼ tungah thupha hi loin samsiatna hong tung zawsop ding hi,” a ci hi.
13A nu in ama kiangah, “Nangma thuak ding samsiatna kei tungah hong tung tahen, ka ta aw; ka thu hong mang peuh inla, pai-in keelnote keiʼ kiangah hong puak in,” a ci hi. 14Tua ahih ciangin amah pai-in keelnote va la-in a nu kiangah paipih a, a paʼ duh bangin a nu in an lim a bawl hi. 15Tua ciangin Rebekah in inn-a a kep, ama ta upa zaw Esauʼ puan hoih pente la-in a ta nau zaw Jakob a silhsak hi. 16Amah in keelnoteʼ vun ama khut tung le a neelna mun a ngawng sanah silhsak a, 17a bawl sa meh lim le an a tapa Jakob a pia hi.
18Tua ahih ciangin a paʼ kiangah amah pai a, “Ka pa aw,” a ci hi. Amah in, “Hiah om ing, ka ta aw; kua na hi hiam?” a ci hi.
19Jakob in a pa kiangah, “Na ta upa zaw Esau ka hi hi. Nong gen bangin ka hih khin hi. Kei thupha nong piak theih nadingin tu-in tu to inla, ka sa mat sa ne in,” a ci hi.
20Ahih hangin Isaac in a tapaʼ kiangah, “Ka ta aw, bangci-a hong hici manlan pak na hi hiam?” a ci hi. Amah in dawngin, “Topa nangma Pasian in kei hong tuahphasak hi,” a ci hi. Tua ciangin Isaac in Jakob kiangah,
21“Ka ta aw, ka ta Esau taktak na hi hiam, na hi kei hiam kong lawn theih nadingin ka nai ah hong pai in,” a ci hi. 22Tua ciangin a pa Isaacʼ kiangah Jakob pai a, amah lawngin, “A aw, Jakobʼ aw hi, ahih hangin a khutte, Esauʼ khut hi,” a ci hi. 23A khutte in a sanggampa Esauʼ khut bangin mul nei ahih manin amah in thei lo hi. Tua ahih ciangin amah in thupha pia dingin kithawi a, 24“Ka ta Esau taktak na hi hiam?” ci-in dongkik hi. Amah in dawngin, “Ka hi hi,” a ci hi.
25Tua ciangin amah in, “Ka tapa nangma sa mat sa ne-in thupha kong piak theih nadingin ka kiangah hong paipih in,” a ci hi. Tua ahih ciangin amah in a kiangah paipih a, amah in a ne hi. Amah in leenggahzu paipihin, amah in a dawn hi. 26Tua ciangin a pa Isaac in ama kiangah, “Ka kiangah hong pai inla hong nam in, ka ta aw,” a ci hi. 27Tua ahih ciangin amah a nai ah hong pai-in a pa a nam hi. Amah in a puan gimnamte nam a, amah thupha pia-in,
“En in, ka tapaʼ gimnam pen
Topa in thupha a piak
gamlak gimnam tawh kibang!
28Pasian in na tungah
vantung daitui hong pia henla,
na lote hoihsak tahen.
An le leenggahzu
tampi hong pia tahen.
29Mite in nangma na hong sem henla,
minamte na mai ah hong kun ta uh hen.
Na sanggamteʼ tungah topa hi inla,
na sanggamteʼ suanlekhakte,
na mai ah hong kun uh hen.
Nang hong samsia peuhmah in
samsiatna ngah henla,
thupha hong pia peuhmah in
thupha ngah tahen,”
a ci hi.#Heb 11:20 #Pian 12:3
Esau in Isaacʼ Thupha Ngen
30Isaac in Jakob thupha a piak a man khit, a pa Isaacʼ omna panin Jakob a paikhiat khit phetin, a sa betna panin a sanggampa Esau hong tung hi. 31Amah in zong an lim bawlin a paʼ kiangah hong paipih hi. Amah in a paʼ kiangah, “Thupha nong piak theih nadingin na tapaʼ sa mat sa a ne dingin ka pa hong tho in,” a ci hi.
32A pa Isaac in ama kiangah, “Kua na hi hiam?” a ci hi. Amah in dawngin, “Kei pen na tapa, a suak masa Esau ka hi hi,” a ci hi.
33Tua ciangin Isaac nakpi takin liingin, “Tua ahihleh, nangʼ hong pai ma-in sa mat sa hong paipihin, a vekin ka nek khit, amah thupha ka piak pa kua ahi hiam? Thupha pia khin ka hih manin amah in thupha ngah ding hi” a ci hi.
34Esau in a paʼ kammalte a zak ciangin nakpi tak le nasia takin kiko khia-in a paʼ kiangah, “Kei thupha hong pia in, kei zong, aw ka pa!” a ci hi.
35Ahih hangin amah in, “Khemna tawh na sanggampa hong pai-in amah in na thupha la khia khinta hi,” a ci hi.
36Esau in, “Amah Jakob kici mah hi lo ahi hiam? Amah in kei nih vei hong suan khia khin hi. Amah in ka innluah za hong sut hi. En in, tu-in amah in ka thupha hong sut leuleu hi,” a ci hi. Tua ciangin amah in, “Kei adingin thupha siit lo na hi hiam?” a ci hi.#Pian 25:29-34
37Isaac in Esau dawngin, “En in, amah nangmaʼ topa-in ka bawl khin a, a sanggamte khempeuh ama tungah nasemin ka pia khin a, an le leenggahzu tawh amah ka hingsak hi. Tua ahih ciangin ka ta aw, nang adingin bang hih thei nawn ding ka hi hiam?” a ci hi.
38Esau in a paʼ kiangah, “Pa aw, thupha khat beek nei nawn lo na hi hiam? Kei thupha hong pia in, kei zong, ka pa aw,” a ci hi. Tua ciangin Esau a kap hi.#Heb 12:17
39Tua ciangin a pa Isaac in,
“En in, leitung pan a piang
an le leenggahzu na nei kei dinga,
na lo adingin vantung daituite
na ngah kei ding hi. #Heb 11:20
40Na namsau tawh na nungta dinga,
na sanggampaʼ na na sem ding hi.
Ahih hangin amah na langpan ciangin
ama khutnuai panin
na leeng khia ding hi,”
a ci hi. #Pian 36:8; 2Kum 8:20
Isaac in Haran ah Jakob Sawl khia
41A pa in amah thupha pia khin ahih manin tua thupha hangin tu-in Esau in Jakob mudah a, Esau in, “Ka paʼ sihna hangin dah nading hun hong nai ta hi. Tua khit ciangin ka sanggampa Jakob ka that ding hi,” ci-in ngaihsun hi.
42Ahih hangin a tapa upa zaw Esauʼ ngimna, Rebekahʼ tungah kigen hi. Tua ahih ciangin amah in a ta nau zaw Jakob samin ama kiangah, “En in, na sanggampa Esau in nangmah thah ding vaihawmna tawh amah kihehnem hi. 43Tua ahih ciangin tu-in ka ta aw, ka thu hong mang in. Haran a ka sanggampa Labanʼ kiangah va tai inla, 44na sanggampaʼ hehna a dam mateng tua lai ama kiangah tawl khat sung va om in. 45Na sanggampaʼ sinsona a daih mateng, ama tunga na gamtatna a mangngilh mateng va om in. Tua ciangin mi hong sawlin hih lai munah nang kong lasak ding hi. Bang hangin no tegel tawh ni khat thu-in kei kikhen ding ka hi hiam?” a ci hi.
46Tua ciangin Rebekah in Isaac kiangah, “Esauʼ zi Hit numeiteʼ hangin ka lung gimin ka cimtak hi. Jakob in hih gam numeite khat ahi Hit numeite khat teenpih leh kei adingin bang nuntak tham nawn ding ahi hiam?” a ci hi.
Selectat acum:
PIANCILNA 27: TBR17
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Tedim Bible © Bible Society of Myanmar, 2017.